السلام عليكم ورحمة الله وبركاته ،،
جت الاجازه الصيفيه وكلن يطري المسفار .. وانا طريت ما في بالي في هذي القصيده .. وكانت محاكاه بيني وبين احد الاخوان .. على ماقيل سوالف شباب .. اتمنى ترتقي لذائقتكم..
وقصيدتي هذه تعتبر مصافحه اولى .. وان شاءلله فاتحة خير .. لتقديم المزيد وإثراء هذا القسم .. مع بقية الاخوان الشعراء . ؛ طبعا القصيده تميل الى الفكاهه وتحاكي الواقع ههههه .. ونسأل الله من فضله .. اليكم النص :
يامحمد جتنا مقبلـه عطلـة الصيـف
والبـوك فاضـي مامـعـي كــود فـكـه
والناس شدت عفشها والمصاريـف
تـبـغـى تـغـيـر جـوّهــا والـمـضـكـه
ناسٍ تبـي ماليزيا نـاسٍ تبـي جنيـف
والصنـف الاخـر جالـسٍ فـوق دكـه
وناسٍ نوت بالشرق سجه وتكييـف
عنـد البـراد ولاغشـى القلـب شكـه
ناسٍ تذوق البيف من طبخة الشيف
ونـاس يـدك تسبـودهـا الــرز دكــه
وانته وانا يامحمد من غيـر تكليـف
عفنـا مـن عنيزة حــاره وسـكـه
نبـغـى نـغـيـر جـوّنــا بالمصـايـيـف
ميـر الدراهـم صابـت القلـب وعكـه
الحظ الاقشر في حياتي كما الضيف
لاقـلــت روّح قـــال مـاعـنـك فـكــه
وادلّه النفس الحزينه علـى السيـف
والا علـى البيـلـوت تقـزيـر صـكـه
ماقول ليت ان الليالـي علـى الكيـف
يسـعـد بـهـا رجـــلٍ بخـافـيـه لـكــه
وان كان تبغى العلم ياخوك يامحمد
عمـره فـي بيـت الله فــي دار مـكـه
اخير من ماليزيا واطيب من جنيف
تبري عنا نفسٍ مـن الوقـت ضنكـه