...:::][ الجزء الثالث ][:::...
__________
غرفة رهف .. الساعه 8:00 مساءً
__________
** رهف **
صحيت وجلست اناظر شوي .. عرفت اني في غرفتي .. شفت اخوي محمد .. جالس بجني .. كنت منسدحه .. قمت على طول ..
قال لي وهو يناظرني بنظرات ماعرفت تفسيرها : صحيتي
لا نمت مايشوفني صاحيه قدامه .. هزيت راسي .. بمعنى ايه
قال لي وهو رافع حاجب : زين ماقلتي لي .. من وين تعرفين مشعل
فتحت عيوني بقووه .. وش جالس يقول محمد .. لا هذي عائله مو صاحيه .. صدقوني مجانين
قلت له وانا احط يدي على راسي .. لان كان يعورني : ما اعرفه .. ولا عمري شفته .. اصلاً من هذا
سحب يدي بقووووه : العبي على غيري .. مستحيل واحد مثل مشعل .. يخطبك وهو لا يعرفنا ولا نعرفه
حاولت اسحب يدي منه بس ماقدرت .. قلت له وانا ابكي : والله العظيم ما اعرفه .. اصلاً ما ادري من وين طالع لي هالمشعل
قال لي : كذابه .. ايه كذابه .. سمعته وهو يقول لابوي .. لو تبي مهرها مليون بعطيها.. وبعيشها في احسن فله ..بعيشها ملكه في بيتي .. بس انت عطني اياها .. معقوله واحد مايعرفك ولا تعرفينه بيقول كذا .. العبي غيرها
ماقدرت ارد عليه وانا ابكي .. شد على يدي اكثر وهو يقولي .. تكلمي .. بس انا ماتكلمت .. مسك شعري بقوه وهو يصارخ : بتتكلمي ولا اذبحك .. موقلت لكم احسبوا كم مره بنطق اليوم .. عشان هالمشعل ..
مسكت يده وقلت له :محمد الله يخليك .. لا تعذبني اكثر .. قلت لك ما اعرفه .. ما اعرفه
توقعته يطقني اكثر .. بس لا .. تركني وطلع من الغرفه .. جلست ابكي على حظي .. وعلى حالي اللي انا فيه الحين
دخل علي اخوي سعد .. وجاني يسرع يقولي لي : رهوفه حبيبتي لا تصيحين .. قومي بجيب لك حلاوه
ضميته بقوووه وانا ابكي .. اكثر واحد يحس فيني اخوي سعد .. لو كان اخوي سعد كبير .. اكيد ما بيخليهم يطقوني
قال لي سعد : سمعت انك بتتزوجين.. وااو يعني بتجيبين لي عيال العب معاهم
من سمعت سيرة الزواج .. جلست ابكي اكثر ..وقلت له : سعد حبيبي اطلع الحين ابي انام ..
طلع سعد و دخلت علي امي .. وجلست على السرير مسكت يدي وقالت لي : رهووفه حبيبتي هذا نصيبك .. ولازم ترضين فيه .. وابوك اكثر واحد يحب مصلحتك .. وهذا مشعل رجال ولا كل الرجاجيل .. بيحافظ عليك
قلت لها :ايه هين ابوي يحب مصلحتي .. لو يحب مصلحتي مارماني على هالشايب
قالت لي وهي مبتسمه : من اللي ضحك عليك وقال لك شايب .. انا شفته بعيوني شباب .. كانه اخوك يوسف .. عاد الا عمره 30
جلست احللها بمخي .. 30 يا يمه حرام عليك ومعتبرته صغير .. خلونا نشوف الحين انا عمري 17 وهو عمره 30 .. اكبر منك يا رهوف بـ 13 سنه تقريباً وين اصرفها هذي .. الظاهر هو يبيني عشان يربيني .. مدري ليه جا على بالي .. ان يوسف قال لي انه متزوج وعنده بنت .. عشان يقهرني بس
سالت امي : زين هو متزوج .. وعنده بنت
سكتت امي شوي وبعدين ردت وهي مرتبكه : لا مو متزوج متزوج .. هو كان متزوج .. بس زوجته توفت قبل سنتين ..وماعنده الا بنت صغيره اصغر من اخوك سعد بسنه .. عمرها 6 سنوات
حطيت يدي على راسي .. والله ما اصدق .. وش رايكم انتو باللي يصير لي .. مو حرام .. والله حرااااااااااااام ..
باست راسي امي .. وطلعت .. حطيت راسي على المخده ونمت
شفت خالد جايني .. يقولي تعالي بيتنا نروح هناك .. اشر لي على بيت صغير .. وقال لي بنتنا تنتظرنا ..
تبينا نروح نلعب معاها .. مسكته ورحت معاه .. وانا لابسه فستان ابيض .. وهو لابس ملابس بيضا ..
وراكب فوق حصان ابيض .. ركبني معاه .. ركبت وانا مستانسه مع زوجي خالد .. فجأه جاني شايب يقول انا مشعل .. ضرب خالد
بالعصا وقتله .. واخذني عطاني فستان اسود .. وقال لي البسيه .. واخذني الى قصر كبير .. ورماني فيه .. وجاب بنت صغيره .. وقال لي يللا ربيها .. انا جايبك هنا مربيه لبنتي .. وجلس يضحك
صحيت من النوم .. وانا متخرعه .. اتعوذ من الشيطان .. وانا اتنفس بسرعه .. معقوله هذي حياتي مع مشعل .. ماااااا ابي .. ماااااااااابي .. مااااااااااااااابي
.
.
مرت ثلاث ايام وانا على هذا الحال .. لا اروح المدرسه .. ولا اكلم احد ..بالي منشغل .. ملكتي يوم الخميس .. واليوم الثلاثاء .. يعني ما باقي شي .. تذكرت جوالي .. وينه .. وين رميته انا .. شفته تحت سريري ..اخذته كان فيه 6 مسجات و 23 مكالمه لم يرد عليها
كان 4 مسجات من رفيقة دربي .. الريم ..و 2 من صديقاتي ديمه وعبير
^المسج الاول كان ^
^*^
/
\
/
\
/
\
/
\
/
^*^
هلا رهوف ردي على جوالك .. ابي اكلمك
^ثاني مسج^
^*^
/
\
/
\
/
\
/
\
/
^*^
سلامات رهوف وش فيك غايبه من المدرسه اليوم ماخبرتيني انك راح تغيبين يا الخاينه
لايكون مريضه او فيك شي طمنيني عليك اوكي
^المسج الثالث^
^*^
/
\
/
\
/
\
/
\
/
^*^
زودتيها انتي عاد يومين غايبه مو معقوله الله يخليك رهوفه
ردي علي لا تخليني في حيره كذا
^المسج الرابع^
^*^
/
\
/
\
/
\
/
\
/
^*^
مايصير 3 ايام غايبه بدون سبب ماتعودت عليك تغيبين كذا لا ومن بداية الدراسه
انتي ثالث يارهف لا تنسين وردي على اتصالاتي بموت من الخوف حرام عليك
والمسجين الثانيين ..كانوا يسالوني عبير وديمه ..ليه غايبه .. والله مالي نفس اروح المدرسه واشوف احد
.. الله يكون بعوني .. اقوم اصلي ..احسن لي
..........................
________
بيت الريم .. الساعه 1:30مساءً
________
** الريم **
رجعت من المدرسه .. رميت شنطتي على الارض .. ورحت اركض لجوالي .. اكيد رهوفه .. ارسلت لي شي .. مسكته ادور مافيه شي .. لا دقت .. ولا ارسلت .. جلست في الصاله بيأس .. ابي اعرف بس وش فيه رهف ..بموت من الخوف .. قلبي يقول لي ان فيها شي كبير .. جلست على الارض و سندت راسي على الجدار .. بدون ما احس طاحت دمعه من عيوني .. وينك يا رهف .. ماتدرين ان الدنيا بلاك ماتسوي .. والمدرسه مالها طعم من دونك ..لا تخليني لحالي .. مسحت دمعتي .. ومسكت التلفون .. قلت بدق على بيتهم .. مع اني دقيت مليون مره وامها تقولي لي نايمه .. رهف اعرفها اكثر منهم ماتنام لا بالظهر .. ولا العصر .. ليه يكذبون علي ليه .. دقيت الرقم ******* وانا ادعي ربي انهم مايقولون لي نايمه .. رد علي صوت رجولي قال لي : الو
قلت له : الوو .. السلام عليكم
رد علي : وعليكم السلام يا هلا
عرفت صوته .. هذا محمد .. قلت له : كيف حالك محمد
قال لي بسرعه : بخير دام الغاليين بخيرر .. وانتي
استحيت شوي يوم قال .. الغاليين .. جد محمد يعتبرني من الغاليين .. مافكرت كثير بكالمه .. لان اللي شاغل بالي .. في الوقت الحال .. رهف وبس
قلت له : انا بخير الحمد الله
قال لي بحماس وبصوت عالي : عسى دووووووووم يارب مو يووووووووم
قلت له : رهف موجوده
قال لي : ايه .. ايه ... لحظه
كنت ادعي ربي يارب .. يارب .. يارب .. تكلمني وتكون بخير يارب
......................
_________
غرفه رهف .. الساعه 2:00 مساءً
_________
** محمد **
فتحت باب غرفة رهف .. وانا مستانس .. يااربي.. سمعت صوت غلاتي الريم .. فديتها .. الله يخليها لي يارب
شفت رهف منسدحه على السرير .. قلت لها رهف رهف .. قومي كنت بقول لها تلفون بس من قلت .. تعالي تلفـ....
قاطعتني وقالت : نايمه نايمه
طلعت من الغرفه .. قفلت الباب ..ونزلت طيران للريم .. مسكت سماعة التلفون .. وقلت لها :الريم ..
قالت لي بسرعه ونبرتها فيها الخوف : نعم .. وين رهف .. وينها
قلت لها : نايمه ..
بس اللي استغربت منه .. انها ساكته ماقالت لي شي .. قلت لها الوو اكثر من مره بس هي ساكته ..
فجأه سمعت صوت بكي .. قلت لها وانا خايف عليها : الريم .. يا الغاليه .. تبكين
قالت لي وصوتها كله بحه : محمد ..لو صدق انا غاليه على قلبك .. بتخليني اكلم رهف .. تكفى محمد .. الله يخليك ..( وزادت في البكي ) .. ابي اكلمها .. لو ماكلمتها اليوم .. بمووت .. وربي خايفه عليها .. تكفى ..
بصراحه كسرت خاطري .. بيني وبينكم .. اصير مجنون .. وغبي .. لو ماخليت رهف تكلمها الحين ... لو اجيبها من شعرها عشان تكلمها .. ما اتحمل اسمع الريم تبكي ..
قلت لها : والله الحين اجيبها لك يا الريم .. بس انتي لا تبكين عشان خاطري
وش عشان خاطرك انت .. يا الثور .. يا الدرج .. يا الحطبه .. مسوي تمون على البنت انت ووجهك
قالت لي بصوتها الناعم : تسلم محمد .. يللا انا انتظرك
قلت لها ولأول مره احس نفسي حنون : انتي الحين روحي غسلي وجهك .. وارتاحي .. وانا بخليها تكلمك .. بعد شوي
ردت علي بسرعه : لا انا ابي اكلمها الحين
قلت لها : يللا عاد ريوم بلا عناد وروحي غسلي وجهك وارتاحي
عضيت على شفايفي ..لا بالله هالثور صدق نفسه ..وش فيني انا ..زودتها ..وطيحت ابو الميانه ..قالت لي كلام ماسمعته .. لاني ما كنت معاها
قلت لها : هااه .. نعم وش قلتي ضحكت علي وقالت : ولا شي .. ,, وكانها قالت بهمس اللي ماخذ عقلك يتهنابه .. اذا ماكنت غلطان عاد ,,
قلت لها الله معاك وقفلت وهي ماتدري .. انها هي اللي ماخذه عقلي .. بس حسيت الريم مرتاحه لي وهي تكلمني .. ان شاء الله اللي احسه صح .. والحين .. انطــــــــــــــــــلاق الى غرفة رهف .. اللي لو ماطاعت تجي بجيبها بالقووه .. تفدا الريم مية رهف
.....................................