[بنت شمــــــــراحلى شمريــــه]

جاء في بالي انزل موضوع دايمن يدور بخاطري <<<ترى خاطري هذي متعوب عليها
انا من يوم وطئت كراعيني ارض النت وانا اقرأ شي اسمه الخقه

قلت يابنت وش الخقه قد تكون اسم ماركه شامبوات اوانه اسم راعي المنتدى وبيحتكون فيه <<<المديرشخبارك

وبعد تفكير دام قرابه ربع دقيقه وربط بين مواقفن حصلت قدام عيني <<<<ابوتس يالفصحى عرفت وش معناها

عاد قلت بعلمكم وش اللي يخققني انا ويخقق البنات اللي معي بالمدرسه او من قرايبي يالبى قلوبهم

فاهمين الخقه غلط بس ودهم يخقون

مرتن من المراريت كنت انا ووحده من صقيقاتي نناظر مسرحيه شوي الا اشوفها تنهد قلت وش فيتس؟ قالت شوفي ذا واقوم وابحلق فيه جيدا ماشفت شي ملفت للانتباه؟ قلت وش فيه؟ قالت يازين شنبه نعنبو بليتس خاقتن مع شنبه وتاركتن وجهه بكبره

وحده من صديقاتي ايام الثانويه كنا طالعين من المدرسه نمشي الا واشوفها وقفت فجئه قلت وراتس وقفتي قالت شوفي ذا الرجال اللي في الكابرس خقيت معه قلت ليش قالت علشانه رافع رجله جنب الدركسون ويقرأجريده <<<انا لولا الفشيله تسان اخذت زبيريته من رجله وكمخت فيها جبهتها علشان تعرف تخق مزبوط <<<<اجل احد يخق مع رجل مرفوعه


وحده من قرايبي تخق مع اللي يسوق وماد يده بشكل مستقيم

والثانيه مع اللي يحط يده على المرتبه اللي جنبه <<<اشك ان عقولهم طبيعيه ؟؟؟

وعاد اللي مقطع قلوب العذارى ومخققهم صح وانا معهم اذا طق اللثمه ياويلي ويلاااااه احس انه رجال >>>اجل وشو يامروووحه
وحده من صديقاتي مره جايه للكليه وطاقه الزين تقل داخلتن عرس قلت وش عندتس اليوم مخربتها قالت امس انا في السوق امشي وقال لي واحد ياحلوه وخقيت معه وطقيت الزين اتأكد انا حلوه والا لا قلت اوب منتس من هالصلصال اللي في وجهتس

ويوم كنت باول ثانوي كانت معنا بنيتن تسنها زبده بالعافيه بتنيعم الموهم غابت لها يومين وجت قلت سلامات وراتس غايبه قالت الحب ومايسوي قلت من هو قالت ولد خالتي قلت يحبتس قالت ماادري؟ قلت اجل وشو حبه قالت دق قبل امس يسأل عن اخوي وقلت ماهوب فيه قال تبون شي وخقيت معه >>>>اجل لو انه قايلن شين ثاني وش بتسوين

والحين جينا في المصيبه ايام وانا بالكليه اشوف ثنتين تسنهن عصافير سدره الا على طاري العصافير وش رايكم في رومنصيتهم لاقاموا يغردون وهم جنب بعض اوب يخققون <<<ماعليه نرجع لمحور حتسينا

قربت من عند البنتين ولقيتهم خاشات جو وكل وحدتن مسبلتن عيونها قلت هوووه وش فيكن انتن؟ جاياتن تدرسن والا تميلحن قدام عجوزن بتخطبكن لولدها قالوا الدكتور قلت وشو دكتوره قالو اسمعي صوته يخقق

بعدها تأكدت انهن جميعا وانا معهن بس اوب دايم نعاني من الفراغ العاطفي او بالاصح ماعندنا ماعند جدتي

وبالنسبه لي انا مانيب تساذبتن عليكم ان شفت منكم تفاعل كتبته والا لا والف لا

وبس هذي تقريبا اكثر خقااااااات البنات اللي اعرفهم لو عندكم اي اضافه يابنات اسدحوها هنا
وبالنسبه للشباب خلونا نشوف ردودكم على الشي اللي يخققكم في البنيات


ملاحظه,,ترى حتى ردود بعض الاعضاء ومواضيعهم تخقق
وبعضهم تواقيعهم واسمائهم خقااااااااق بالعربي الفصيح يازين الخقه اذا جت على سنع اوب خرابيط مثل خرابيطتس

انتظر اروع ردودكم وخقاتكم ,,,