فلت شعرها وانتثـر كنـه الليـل =غطي عبايتهـا وغطـى نحرهـا
وغطى العيون اللي هدبها مظاليل =حتى سواد الرمش ضاع بشعرها
تلحفت به والعبت كنهـا الخيـل =ترقص تناظر للنجـوم وقمرهـا
لها عيون ناعسة ترسـل الويـل =وياويل من هو صوبتـه بنظرهـا
ولها نظرة منها تموت الرجاجيـل =ورمش العيون السود زود خطرها
فيها جمال وزادها الكحل تجميـل =فيها دلال يسحـر اللـي نظرهـا
بعيونها القمراء وبحجاجها الليـل =وجمال كل الخلق ضاع ابحرهـا
صعبه لغيري ودربها لي تساهيـل =ومافيه غيري با لخلايق سحرهـا
احبها بالحيـل بالحيـل بالحيـل =راضي انـا بغرامهـا وبكدرهـا
كلـي قصايـد وكلـي مراسيـل =لعيونهـا ولرموشهـا ولشعرهـا