قصيده تحاكي الحظ العاثر / اتترككم معها
كم من جبيناً كـل وقتـه تباشيـر
حظه يغنّي له على طـرق وَرقـا
وكم من وجيهاًحظها قاعـة البيـر
لوهي وجيهاًفي المواقيـف عرقـا
ارقى دَرَج والحظّ ينزل اصنصير!!
ينزل وانا من عادتـي لازم ارقـا
حظاً يعاكس خَطوتي وين ما اسير
لامن بغيت الغرب ينحـاز شرقـا
حظي بوقتي صار مثل الأعاصيـر
بينه وبيـن الزيـن مليـون فرقـا
قصة عتيبيـاً جـرى لـه تعاسيـر
قلبه مـع الروقـه وعينـه لبرقـا
انا وحظي! سالفة راعـي الطيـر
ياطير إبـن برمـان فرقـا وفرقـا
طيراً من إكبار الطيور المشاهيـر
اللي لهـا بيـن المناعيـر طرقـا
غذاه إبـن برمـان وبكـل تبذيـر
طرحة يده ماجـاه نهبـاً وسرقـا
تعب عليـه ودبّـره خيـر تدبيـر
وسرح بطيره يدرق الصيـد درقـا
وهَدّه بغاه إيصيد ويجيب له خيـر
وعَوَّد عليـه بحيّـة الغـار زرقـا
حيه وصـار لنابهـا فيـه تغزيـر
تدفق بسم ازرق بلـغ كـل عرقـا
وداخل وريده صـار للسـمّ تأثيـر
سماً زرق في داخل القلـب زرقـا
طيراً ذبح راعيه قصـه وتصويـر
إعروق ابن برمـان بالسـم غرقـا
وده يصيـد وراح فيهـا مقـاديـر
مات وعليه إقلوب اهاليـه حرقـا
وياحظ ياللي نـازلاً بالأصنصيـر
متى ياحظي تلتفـت لـي وترقـا؟