[ثورة حتى النصر]

ونحن في الإعدادي، أصر ابن صفّي رائد البرجوازي إنه ياخذني معه على بيتهم اللي كان متشابك مع فلل المسؤولين الكبار، خيمتنا في المزارع علّمتني كيف أنظر لبيتهم وكأنه الجنّة، رحت مع رائد بعد انتهاء دوام المدرسة، وكانت من المرّات القليلة اللي أركب فيها "السيارة الخصوصي" لأني حينها كنتُ من ركّيبة (التراكتور والترولّة) ومن محترفي الشعبطة في (البِكَمات) وكنت أحسب ذلك المشوار غير محسوبٍ من عمري الأبجدي، فاستعراضيّة رائد كانت تتخزّن في داخلي قطعة قطعة ومشهدا مشهدا، ما كان في البيت إلاّ أنا ورائد فقط، كلّ عائلته في عمّان، وبعد قليل حضر الجميع، سلّموا علي، وغادر رائد غرفته وظليت لحالي، عاد بعد دقائق، كان يحمل خبز فوق صحن، حط الصحن وقال: كُلْ وأرجعلك بعدما تخلِّصْ أكِل، وغادر الغرفة. أمسكتُ رغيف الخبز، صُعِقْتُ لهول المُفاجأة، كان تحته جاجة مْحَمّرة، لأوّل مرّة أنفرد بجاجة محمّرة كاملة، ولأوّل مرّة أحتار من أين سأبدأ؟ من الفخذ،لا من السفينة، لا من الرقبة، الرّقاب كلهن زْهِقْتهن، خَلَص آكل وأنا مغمّض، ويا دوب مديت إيدي، حتى تذكرتُ أمراً عظيماً، رائد حط الجاجة وخرج.. يعني يستنّى فيّ لمّا أخلّص، يعني يمكن العيلة كلها بتستنّى فيّ. ما أكرمهم! أعطوني جاجتهم وما تْغدّوا لأنّ إللي يزيد من وراي كلّهم يوكلوا منه، فهيك كنّا نفعل في بيتنا لمّا ييجي عندنا ضيوف، كنّا ننتظر لمّا يخلصوا أكل ونحن نلهج بالدعاء: يا رب ما ياكلوا الأكل كلّه، إذاً عليّ أن أُراعي أن عائلة رائد بانتظار ما يفيض، أكلت قطعتين أذكرهما تماماً، الساق والجناح. وتركتُ البقيّة، جاء رائد، ورجاني أن أُكمل الأكل وأنا أدّعي بأني شبعت. بس عيني رَحْ تطلع على ما تبقّى، قال لي: إنتَ حُرّ. وحمل الجاجة وخرج.. ثمّ عاد وقال: تعال غسِّلْ. خرجتُ للغسيل وفي طريقي للمغسلة وجدتُ كلباً "حقيراً" وأمامه جاجة محمّرة تشبه جاجتي وصحن يشبه صحني. قلت لرائد: مِشْ هاي جاجتي؟ قال: آه جاجتك، بس إللي يزيد وين نروح فيه؟ قلتُ بحسرة: وأهلك ما بدهم يوكلوا؟ ضحك وقال: بابا اشترى عشر جاجات! وما زلتُ لغاية الآن كلّما رأيتُ كلباً أعتقد بأنّ هذا الكلب يعرف الكلب الذي أكل جاجتي المحمّرة.