يقول من عـدا علـى راس عالـي=رجم طويـل يدهلـه كـل قرنـاس
في راس مرجوم عسيـر المنالـي=تلعب به الارياح مع كـل نسنـاس
في مهمة قفر مـن النـاس خالـي=يشتاق له من حس بالقلب هوجاس
قعدت فـي راسـه وحيـد لحالـي=براس الطويل ملابقه تقـل حـراس
متذكـر فـي مرقبـي وش غدالـي=وصعقت بالكفين ياس علـى يـاس
اخـذت اعـد ايامهـا والليـالـي=دنيا تقلب ما عرفنـا لهـا قيـاس
كم فرقت ما بيـن غالـي وغالـي=لوشفت منها ربح ترجـع للافـلاس
يقطعك دنيـا مـا لهـا اول وتالـي=لو اضحكت للغبن تقرع بالاجـراس
المستريح اللي مـن العقـل خالـي=ما هو بلجات الهواجيـس عطـاس
ماهـوب مثلـي مشكلاتـه جلالـي=ازريت اسجلهـن بحبـر وقرطـاس
حملـي ثقيـل وشايلـة باحتمالـي=واصبر على مر الليالي والاتعـاس
وارسي كما ترسي رواس الجبالـي=ولا يشتكي ضلع عليه القـدم داس
يابجاد شـب النـار وادن الدلالـي=واحمس لنا يابجاد ما يقعد الـراس
ودقـه بنجـر ياظريـف العيـالـي=يجذب لنا ربع على اكـوار جـلاس
وزله الى منـه رقـد كـل سالـي=وخله يفوح وقنـن الهيـل بقيـاس
وصبـه ومـده ياكريـم السبالـي=يبعد همومي يوم اشمـه بالانفـاس
فنجال يغـدي مـا تصـور ببالـي=وروابع تضرب بها اخماس واسداس
لاخـاب ظنـي بالرفيـق الموالـي=مالي مشاريه علـى نايـد النـاس
لعـل قصـر مـا يجيلـه ظلالـي=ينهد مـن عـال مبانيـه للسـاس
لاصار مـا هـو مدهـل للرجالـي=وملجا لمن هو يشكي الضيم والباس
بحسناك يامنشي حقـوق الخيالـي=ياخالق اجناس ويامغنـي اجنـاس
تجعـل مقـره دارس العهـد بالـي=صحصاح دوِّ دارس مابـه اونـاس
البـوم فـي تالـي هدامـه يلالـي=جزاك ياقصر الخنا وكـر الادنـاس
متـى تربـع دارنــا والمغـالـي=وتخضر فياض عقب ما هيب يباس
نشـوف فيهـا الديدحـان متوالـي=مثل الرعاف بخصر مدقوق الالعاس
ونثير على البيدا سـوات الزوالـي=يشرق ****ه شرقة الصبغ بالكاس
وتكبر دفوف معبسـات الشمارلـي=ويبني عليهن الشحم مثل الاطعـاس

الله يعطيك العافيه مشكور على القصيده يا الغالي والبيت الاول يعجبني كثير مررررره عن القصيده كامل لانه مذكور به قرناس والمقصود به الصقر في مرحله من مراحل نتف االريش وتسمى القرنسه عند الصقارين

مشـ@ـور بدون جمـ@ـور على القصيد الروووووعه وصح لسان الشاعر وسلمت يديك والله حاولت اشوف البيت الافضل لكن الصراحه كل بيت افضل من الثاني مشكور أقين تقبل مروري المتواضع مشـ@ـور بدون جمـ@ـور