السلام عليكم ورحمة الله وبركاته
متواضعه اتمنى لها القبول

كتبتها بضروفها كما اوردت فالقصيده وهي تعبر عن نفسها لم تكتب من خيال ..

البارحه قبل الفجر .. والهاجس ينقط نقيط=ولَّفت قيفان الشِّعر .. لو الشِّعر ماهو وَلُوف
صحيت من حماً لها .. في صُفَّة اضلاعي قطيط=جالس وكني بالحرم .. والارض من حولي تطوف
احيان اشوف اشياء اصدقها .. واثاريني ماحيط=واحيان اشوف اشياء اكذبها .. وهي ناسٍ وقوف
الاَّ بصوت اللي يقول .. انْبه ..!! ترى قُدْمَك مشيط=اثر مشيط اللي حضر .. شايب خذى شمسه كسوف
شايب من اللي ودَّعوا ... والحلم صاير له وسيط=جاني .. ولا سلَّم ..! وفي وجهَه تعابير .. الحروف
قلت السلام ..! وقال خل الهرج واسمع ياعبيط=عندي ثمان .. ابنشدك عنها ولا وحده تطوف
وقلت ياربي بلشت .. وروحتي روحة .. مقيط=وأخاف .. لو ما جبتها يلحق على خدي .. كفوف
قال الإِمام ..؟ (اللي بدين الخالق السانه صليط)=وقلت شوفه مَعْ بني .. نجوى كرم دق الدفوف
قال السلام ..؟ وقلت هذا صار من سَدَّ المحيط=امَّا هنا .. شفنا نعيش العمر في راعه وخوف
قال الحرام ..؟ وقلت وجبه تنقلي وَالْها شطيط=من حُبنا في طَعمها .. صارت تقَدَّم للضيوف
قال الكلام ..؟ وقلت حظره طلقةٍٍ والْهَا شويط=مقرها لو تنطلق .. وسط الظهر .. بين الكتوف
قال المنام ..؟ وقلت هذا اللي غمرنا في الغويط=( النوم راس اللوم ) .. قلتوها وحنا في اللحوف
قال الغرام ..؟ وقلت هذا الوقت تعريفه بسيط=ملابس ومكياج .. زائد .. بنت يعشقها خروف
قال الوئام ..؟ وقلت ذا روحين مربوطه بخيط=الخيط قُوَّتها .. ويربطها .. بقلبين الضعوف
قال الختام ..؟ وقلت ابا صوره على هذا الشريط=واقولها لا صحصحوا .. تعال ياصاحي وشوف
قال انت عارف عالمك .. ضاربَّها في عرض حيط=كرامته معْ عِزِّتَه .. راحت معَ شُطر السيوف
تلقى الرجل في عالمك .. ماهمته مثل .. اللقيط=ظاع الحسب حتى النسب .. رايح على دربه ذلوف
من الكلام اللي حصل .. واهل المهايط لا تهيط=فكرة لكم دونتها .. وانا عن آرآئي عزوف
هذي تروها قصتي .. وحكاية الشايب مشيط=جت تحت تأثير المرض .. (حمى) لها حكم وضروف