ماشاء الله تبارك الله ماشاء الله لاقوة الا بالله اللهم انا نسالك الهدى والتقى والعفاف والغنى

روابط مهمة و مفيدة : لاستعادة الباسورد الرقم السري || كيف يتم تفعيل الاشتراك || أفضل طريقة لطلب كود تفعيل على البريد

مزاجيه كيفي · #1 03-28-2011

السلام عليكم ورحمة الله وبركاته ..

يوميـاتـ عاطله

هي مذكراتي التي كنت أخبئها بدفتري الصغير الذي كبر معي وأصبح صديقي الوحيد أحكي فيها بعض مواقف حصلت لي وبعض من ذكريات طفولتي ورأيت أنه قد آن الآوان لكي أخرج ماخطته يدي منذ سنين ..

قمت بإدراج بعض الصور وهي من تصميمي ..

ولن أحلل من ينقلها بدون ذكر إسمي ( مزاجيه كيفي ) .

منتديات مدرسة المشاغبين - مدونات تدوينات

مزاجيه كيفي · #2 03-28-2011

مراااااحب بداية راح أعرفكم بنفسي وأعطيكم نبذه مختصره عني

أنا أكبر أخواني عمري من ( 20 إلى 30 ) آخر شهادة أذكر إني استلمتها كانت شهادة ثالث متوسط

وجلست بالبيت ولا كملت دراستي لأني أصبت بعقده من شي اسمه مدرسه ..

حاليا ماعندي غير التسدح والتبطح قدام التلفزيون

بس بالفتره الأخيره قاطعت التلفزيون لأني مرضت مرض خلاني ألازم فراشي ..

أول شي أبي أعلمكم بالأسامي اللي أسمي فيها أخواني :

***

أختي أم أمان

سبب التسميه : لأنها تشبه برود أم أمان ونفس مشيتها .. عمرها 22 سنه تدرس بالكليه من دخلت هالكليه وهي

رافعه خشمها تحسب محد درس غيرها ودايم نتلاقط أنا وياها أي نتهاوش ..

***

أخوي جازورا

سبب التسميه : لأنه ياكل أي شي يشوفه حتى القراطيس إذا بغينا نرميهن نخليه ياكلهن .. عمره 18 سنه يدرس

بثالث ثانوي ..

***

وأخيرا أختي السوسه

آخر العنقود على قولتهم مع إني أظلم المسمى إذا أطلقته عليها .. سبب التسميه : لأنها فعلا سوسه ..

عمرها 14 سنه تدرس بثاني متوسط ..

مزاجيه كيفي · #3 03-28-2011

جالسه بغرفتي اللي يشاركني فيها خواتي الوديعات ..

كالعاده منثبره على سريري وأتسمع لأنشودة ينادي فؤادي .. عجزانه أقوم أجيب دفتر مذكراتي فلذلك أخربش على جهازي لأنه أقرب لي ..

اليوم صحيت الساعه وحده ونص الظهر وأفطرت ويوم خلصت رحت للمطبخ شربت ماء .. ورحت آخذ فره على القنوات طبعا حنا عندنا المجد وحطيته على ماسه وكان برنامج حياكم حلقة شباب زد رصيدك .. صراحه أنا ماأعرفهم بس يقولون انهم يطلعون على قناة بدايه .. بيني وبينكم انا مجداويه متعصبه وأي شي يطلع بغير قناة المجد يعتبر عندي شي مايصلح .. وأنا مندمجه مع البرنامج مع اني ماأدري وش يقولون فجأه سمعت صوت وراي يقول وخري ابي اشوف .. وخرت عشان أخوي الحبيب يشوف .. نسيت اقول لكم انه سيطر على غرفة التلفزيون وخلاها غرفته الخاصه بس ماعطيناه وجه ندخل متى مابغينا ونتابع التلفزيون .. ومرات اخلي الصوت عاااالي كذا نذاله بس مايحرك فيه شعره لأنه إذا نام مايدري باللي حوله تصدقون انه يذكرني بالكائنات اللي تدخل سبات شتوي .. المهم تابعت شوي وجيت بطلع قبل مايطلب مني شي بس سبقني وقال كالعاده أبي فطور وأنا رديت عليه كالعاده ماني خدامه عندك وطلعت وخليته .. توقعت الريموت يمر بجنبي بس اشوى طلعت من الغرفه سليمه .. ورجعت لغرفتي أكمل خربشه ..

*******

(((( 1 ))))

من عرفت نفسي وأنا عندي عقده من المدرسه حتى قبل ماأدخلها .. بالبدايه عارضت بشده أدخل للمدرسه بس بالأخير رضخت ودخلتها ورجلي فوق رقبتي .. صحتني أمي بالويل ومابقى أحد ماسمع صياحي ولبستني المريول غصب عني وكل ماعارضتها على شي رجفتني لحد ماحسيت إن قلبي بيطلع .. صراحه تعبت من الصياح ولا فيه أمل إن أمي تخليني بالبيت عشان كذا بلعت العافيه وانطميت .. المهم رحت للمدرسه وأمي معي ومن دخلت ويجيني مغص من الخوف .. الساحه مليانه بنات وقعدت أناظر ومايدور في بالي غير إني أرجع للبيت .. سحبتني أمي وخذتني لفصلي اللي حسيته سجن .. دخلت الفصل وكان فيه معلمه جالسه ترتب البنات كل وحده بمكانها .. المهم جلستني المعلمه بمكاني وطلعت أمي وسكرت الباب عاد أنا يوم شفيت أمي طلعت وأقعد أصيح وأصيييح وقطعت نفسي من كثر الصياح أبيها تاخذني .. الغريب إن المعلمه مطنشتني ولا كأنها تشوفني وتسولف مع بعض البنات اللي قدام .. كان بجنبي بنت ساكته مو هي بس اللي ساكته الفصل كله ساكت بس أنا اللي أصيح المهم شكلي غثيتها من كثر ماأصيح قامت وفتحت شنطتها وطلعت صامولي وعطتني ياه تبيني أنطم .. الظاهر إنه فسحتها عاد أنا أخذته وسكتت وقعدت آكل ونسيت أمي اللي كنت أصيح عليها

*******

(((( 2 ))))

يوم كنت بصف رابع كانت معلمة الدين حاقده علي حسبي الله عليها وللحين أدعي عليها كل ماأتذكر معاملتها .. كان مستواي نازل شوي ودايم تفشلني قدام البنات وتخليني واقفه طووووول الحصه مع إن فيه بنات نفس مستواي بس ماتعاملهن مثلي .. ومره كان الجو باااارد وأنا أتراجف لأن ملابسي مبلله من المطر ومن دخلت فتحت دفتر الدرجات ونادت إسمي كأن مافيه بالفصل غيري .. المهم سألتني عن الدرس اللي طاف وماعرفت الجواب .. وقفتني وهزأتني قدام البنات وأرسلت بنت من اللي قدام تجيب لها عصا .. أنا قلبي وصل حلقي من الرعب .. المهم جت البنت وعطتها العصا وجاك الموت ياتارك الصلاة .. قعدت أترجاها وأنا أصيح .. والله آخر مره .. والله بكرى أجي مذاكره .. بس ماشفعت لي دموعي اللي غرقت وجهي .. وجلدتني بكل قوتها قسم بالله حسيت روحي بتطلع من الألم .. انتفخت يديني وصارن زي النار .. وطلعتني برا الفصل وتخيلوا الموقف .. وكل يوم على هالحاله وصارت على أتفه شي تطردني برا الفصل لدرجة صرت مشهوره بالمدرسه من كثر ماتطردني .. الله لا يسامحها .. يمكن تقرأ كلامي الحين وتتذكر معاملتها فيني أحب أقول لها روحي الله ياخذ حقي منك بالدنيا قبل الآخره .. يمكن تحسبوني معطيه الموضوع أكبر من حجمه بس أقول مايحس بالنار غير رجل واطيها ..

*******

(((( 3 ))))

مره طلعت من المدرسه وكنت أغلب المرات أروح مشي .. المهم طلعت وطوالي لبيت خوالي طبعا بيتنا ماأعرفه إلا المغرب .. دخلت بيت خوالي وأرمي شنطتي بالصاله وأدرعم للمطبخ وأفتح الثلاجه على مصراعيها .. أدور شي آكله بس مالقيت غير طماط وخيار وأنا مو من عشاق الطماط ولا من عشاق الخيار أنا من عشاق الهلال .. المهم شربت ماء ورحت أتفرج عالتلفزيون .. أنتظر متى يحطون الغداء وتأخروا وأنا طقني الجوع .. زوجة خالي مسويه فيها ذكيه بس على مين .. كانت تتعمد تأخر الغداء عشان أروح لبيتنا .. يئست إنهم يحطون الأكل ولبست شنطتي وطلعت وبعد خمس دقايق رجعت لهم ولقيت زوجة خالي توها حاطه الغداء على السفره .. جلست معهم وتغديت وأشوف الشرر يتطاير من عيون زوجة خالي بس ولا عبرتها .. المهم بعد ماخلصنا جلست أنا وبنت خالي اللي معي بنفس الصف نحل الواجب .. أنا قعدت ساعه أتمطط ولا خلصت واجبي وهي بسرعه خلصت وجت بتروح تنام لأنهم متعودين ينامون الظهر ورفضت أخليها تروح تنام وتتركني لحالي لأني ماأحب أنام الظهر حتى في بيتنا أهلي كلهم ينامون إلا أنا مستقعده تقول قطعة جن .. المهم ماأذكر وش صار بالضبط بس اللي أذكره إني مسكتها بالغصب ولصقت علك على شعرها مدري من وين جبته .. عاد هي مايحتاج علمت أمها علي وجت زوجة خالي وهاوشتني وطردتني بالظهررررر لبيتنا .. ومن بكرى جيتهم ولا كأني سويت شي وجلست وتغديت عندهم بعد

*******

(((( 4 ))))

كبرت شوي وصرت بالمتوسط بس للحين ماعقلت .. كل شوي مصفقه أتباعي اللي معي وهم بنت خالي .. وأختي أم أمان .. كانن متمردات على أوامري ولا يسمعن كلامي خصوصا بنت خالي لأنها مخططه تاخذ مكاني بس عشم ابليس بالجنه .. أذكر مره قلت لبنت خالي تجي لبيتنا عشان تلعب معي وفعلا جت بس ماطولت ويوم جت بترجع لبيتهم ضربتها بس مو بيدي .. ضربتها بحجر على رجلها وقعدت تصيح وأمي سمعت صياحها وهاوشتني وقلت لها ليه تبي تروح لبيتهم أنا للحين ماشبعت من اللعب توقعت أمي تتفهم موقفي بس قرصتني قرصه خلتني أنسى إسمي ودخلتني داخل البيت بالقوة .. بصراحه انقهرت ليه تسوي فيني كذا لا وقدام بنت خالي بعد .. حقدت من قلب على بنت خالي لأنها هي السبب وقررت أنتقم منها إذا رحت لخوالي .. بس يوم رحت لهم نسيت السالفه وقعدت ألعب مع البنات

*******

(((( 5 ))))

دخلت سنه ثالث متوسط أنا وبنت خالي وكنا جالسات بآخر الفصل وحشششش بخلق الله و كركركركركر والظاهر أزعجنا اللي قدامنا .. لفت علينا وحده من اللي قدامنا وقالت انتن وبعدين معاكن .. ترى مو زين تحشن بالبنات .. تخيلن نفسكن بمكانهن حرام عليكن .. وبعدين إذا بقيتن على أسلوبكن هذا الكل راح يكرهكن .. صراحه انحرجت من نفسي وسكتت .. وبنت خالي سكتت بس بعد ماصفرت الحصه وقامن البنات وصار الفصل حوسه رجعنا نحش مره ثانيه ولا كأن البنت قبل شوي ناصحتنا .. ومن كثر مانحش ونعلق على البنات صرت أنا أعلق على شكل بنت خالي وهي تعلق علي ونكركر .. صح إني مستانسه مع بنت خالي لأنها بفصلي بس للحين عقدة المدرسه معي والحين صايره عقدتين من الرياضيات اللي خلاني أكره حياتي .. ومستحيل أجيب أعلى من 2 بالإختبار .. المهم انتهت السنه وكالعاده لازم أستلف من المدرسه طماط .. قلت لأمي يمه خلاص أنا ماني قادره أتحمل أبي أفصل من المدرسه سنين وأنا متحمله كابوس المدرسه وكل يوم تهزيء وتفشيل قدام اللي يسوى واللي مايسوى حرام عليكم تعقدت .. توقعت أمي تصفق فيني الجدران بس شكلي كسرت خاطرها وقالت لي روحي لأبوك وقولي له وإذا وافق أنا أروح للمدرسه وأفصلك .. بيني وبينكم ماصدقت خبر وأروح ركض لأبوي الله يغفر له ويرحمه وقلت له السالفه طبعا مع كم دمعه وماقال شي لأنه يحبني كثير .. ومن بكرى راحت أمي وسحبت ملفي وحسيت إني حره ومسكت كتبي وحطيتهن قدامي وأول كتاب أخذته كان كتاب الرياضيات وأمسكه وأقطعه مليون قطعه وبعدها قطعت باقي الكتب وطلعت بالحوش وأحرقتهن كلهن وتفرغت لشغل البيت عشان أمي ترتاح وماتغير رايها وترجعني للمدرسه

*******

(((( 6 ))))

مرت السنين بسرعه وكبرت وصرت عاقله وأخواني كبروا بس ماعقلوا والدليل إن اليوم صارت مجزره دمويه قدامي ذكرتني بمجازر هتلر وجنكيز خان .. وكان أطراف هالمجزره أختي أم امان واختي الثانيه السوسه .. والسبب في هذه المجزره الداميه ان السوسه لبست بلوزة ام امان بدون ماتدري عنها ام امان .. بس الرادارات اللي عند ام امان اعطتها انذار ان ممتلكاتها تعرضت للإقتحام من قبل الغزاة .. والله لايوريكم وش صار .. جت ام امان تمشي بسرعة صاروخ ارض جو واصطدمت بالسوسه واسمع عاد اصوات الإصتدام تقول صوت حادث ماتسمع غير التكسير والتكفيخ والتفحيط أقصد الصراخ .. الحمد لله ان امي ماكانت موجودة ولا كان صار فيها شي لا قدر الله من هالمعركه اللي صارت .. طبعا كل معركه لازم يكون لها قائد وهذا اللي حصل .. الميدان ياحميدان .. طب جازورا وهو يمسك ام امان ويلصقها على الجدار بضربه وحده .. ومسك السوسه مع بلوزتها وسحبها بقوه ودفها يبيها تهرب يقال يبي يفزع لها ياخي تسلم منك ماتبي لك فزعه .. وأنا الله يسلمكم كنت متفرجه على الأحداث الحاصله قدامي ولا حركت ساكن .. العمر غالي ولا عندي إستعداد أغامر بعمري وأدخل أحجز بين الطرفين إلا إذا كنت عايفة عمري عاد ذيك الساعه أفكر أدخل معمعتهم .. المهم انتهت المجزره بإنتصار ام امان وهزيمة السوسه هزيمةً ساحقه .. مع إن أم أمان حصلت لها تكفيخ من جازورا لو حمار مايتحمله بس هي عندها عادي أهم شي استعادت ممتلكاتها المسلوبه .. أما السوسه غرقت البيت بدموعها لدرجة لبسنا أطواق نجاة .. وبغينا نغرق بس الله ألهمنا للتفكير بفتح الشبابيك والابواب والحمد لله نجونا بأعجوبه ..

******

(((( 7 ))))

اليوم صحيت بدري الساعه 12:25 الظهر وحلمت بأشخاص من زمان ماشفتهم وحسيت بالحنين لهم .. واحس اني تعبانه ومالي خلق ومعدتي تعورني .. انا عكس الناس مدري ليه .. الناس اذا حلموا بأحد غايب يستانسون انهم شافوه .. انا لا اتعب ويتعكر مزاجي ليه مدري .. ولقيتها فرصه أرتاح من كرف البيت شوي .. وكل ماأحد قال لي شي قلت أنا تعبانه لحد يكلمني عشان ماأتعب حيل .. قالت أمي قومي قامت ضروسك محد تعب غيرك .. كل الناس تتعب وتشتغل .. والله إني تعبانه صدق بس مايصدقوني من ماضيي الأغبر يوم كنت صغيره إذا بغيت أغيب أحط تحت عيوني لون غامق وأفركه بيدي عشان يصير كأنه هالات وأقول لأمي أنا مريضه أبي أغيب .. بالبدايه أمي كانت تحسبني صدق مريضه بس بعدين كشفتني .. وصارت ماتصدقني حتى لو كنت تعبانه صدق وللحين ماتصدقني ..

*******

(((( 8 ))))

على سريري وأسمع أنشودة الأسى مني تمكن ..

قبل ربع ساعه صارت هوشه بيني وبين السوسه وحدث بيننا مداعبات خفيفه من شد شعر وقرص .. طبعا أنا ماطالني شي من اللي ذكرت لأني أنا اللي سويت هالمداعبات بالسوسه وهي ماقدرت توصل لراسي لأني أطول من إنها تلمس راسي ولو ماخفت على نفسي من التسمم كان عضيتها .. مشكله القصر مايخليك تاخذ حقك من خصمك خصوصا إذا كان عملاق .. والحمد لله ان جازورا ماكان موجود ولا كان صارت علوووووم .. أولا لأنه أطول مني مع إني أكبر منه .. ثانيا مايصدق تصير مذبحه أقصد هوشه على طول يطب يستعرض مهاراته علينا من رفس وتكفيخ وغيره من الإستعراضات الكثيره التي لا تعد ولا تحصى .. جتني رساله call me من السوسه بس طنشتها أنا عارفه تبي تعتذر على المعركه اللي صارت بيننا .. وبيني وبينكم أصلاً ماعندي رصيد بس سويت نفسي سحبت عليها هي ورسالتها .. كان ودي أطلع أطلق رجولي شوي بس عندنا حريم جيراننا .. صراحه هالحريم أشك إنهن من البشر .. تجيك الوحده عندها طاقه مدري من وين جايبتها .. من تفتح عينها بدت تفرفر من بيت لبيت حتى الظهر الشمس في كبد السماء لو تطلع خمس دقايق انصلخت من الحر وصرت مفطح مشوي وهالحريم عادي عندهن الظاهر صار عندهن مناعه .. قبل لا يجون قلت لأمي صرفيهن والله إن جلسن يلصقن مثل صمغ أبو ريالين مايقومن قالت أمي مادام راسي يشم الهواء ماأرد أحد عن بيتي حسيت إن أمي متأثره بالأفلام البدويه .. تصدقون فكرت أقوم آخذ نعالهن وأرميها بالشارع زي ماكنت أسوي يوم إني صغيره بس تذكرت إني الحين كبيره وعاقله ونهرت نفسي بشده على حركات المبزره .. سقى الله تلك الأيام يوم إني مأذية خلق الله ولا أحد سلم من شري حتى جيران خوالي ماخليتهم بحالهم .. كنت إذا رحت لخوالي أجتمع مع بنات خوالي ونسوي شله ونطلع بالشارع مسويات فيها يعنني قويات ونستقوي على البزارين اللي أصغر مننا .. أذكر مره ولد جيران خوالي الكبير مسكنا ومحطنا لين شبعنا لأننا ضربنا أخوه الصغير وأخذنا اللي معه المسكين توه راجع من البقاله ومبسوط باللي شراه بس يافرحه ماتمت اعترضنا طريقه وشفنا شغلنا معه ..

*******

(((( 9 ))))

كالعاده على سريري وأسمع أنشودة يادار ..

على يميني ام امان وعلى يساري السوسه كل وحده تقط كلمه على الثانيه ولا هن معبرات اختهن الكبيره اللي عندهن .. صح هن كبرن بس ماعليهن شرهه مبزره .. أنا قلت لأمي أبي غرفه لحالي آخذ راحتي فيها .. والله حقوقي مضطهده بالبيت أنا الكبيره المفروض لي غرفه ابي انام على راحتي واصحى على راحتي بدون ماأصحى كل يوم على إزعاج أم أمان أو صراخ السوسه .. بس مافيش فايده شكلي أودع وأنا ماحققت أمنيتي بغرفه لحالي .. بس ماعليه راح أبقى لآخر نفس لحد ماأحقق اللي أبيه .. وصرت كل يوم أحن فوق راس أمي وأقول لها لو أبوي عايش كان حط لي غرفه لحالي كنت أبي استدر عطفها وفعلا بدت تفكر بالموضوع بس السووووسه خربت علي وقالت إذا تبون تحطون لها غرفه أنا بعد أبي غرفه .. وأمي كنسلت الفكره من بالها وقالت مافيييييه غرفه .. كلكن تنامن مع بعض .. شفتوا الحسد وش يسوي

*******

(((( 10 ))))

مره من المرات جالسه أفكر وش أسوي عشاء .. أبي شي جديد أفاجئ فيه أمي عشان تمدحني قدام أم أمان والسوسه ويشوفن وش كثر أنا سنعه .. المهم قررت أسوي مكرونه بالبشاميل ودخلت المطبخ وقعدت أحوس بالمطبخ وماتسمع غير قرقعة القدور وطقطقة الملاعق .. اللي يسمعني يقول تسوي وليمه مو مكرونه بالبشاميل .. بعد ساعه وشويات تقريبا خلصت شغلي وطلعت من المطبخ وجهزت السفره وجلسنا .. أنا قاعده أوزع إبتسامات ومنتظره أمي تبدأ بالمدح عشان أقهر خواتي بس اللي صار إن أمي يوم ذاقت المكرونه قالت تكرم النعمه .. وش هذا ؟؟ جايبة لي مكرونه مسلوقه .. وطوط طوط طوط كلام مشفر .. أنا طاح وجهي وقلت أصلاً أنا الغلطانه اللي طبخت وقمت عن السفره ودخلت غرفتي وجلست أصيح من الفشله ..

*******

هذي بعض المواقف اللي أتذكرها مع إنه في أشياء كثيره بس الذاكره لكم عليها

أدوات الموضوع
مشاهدة صفحة طباعة الموضوع أرسل هذا الموضوع إلى صديق
طريقة عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر رد
يوميات البنت الغير متزوجه	-FOFO	ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه	3	03-26-2011 09:44 AM