مساااكم بالخير يالربع...
اليوم كنت بمجلس رجال عزيمه يعني <<< موب مجلس حريم؟..
المهم وخذلك من هالسواليف وتعرفون عاد اغلبهم شيبان وسوالف وفلة حجاج ومن هالحكي...
المهم غلب على المجلس سواليف عن شخص طول القعده تقريبا كانوا يتكلمون عنه وهو رجال شايب مهوب معنا لكنه موجود بالديره اللي هي " ولاية زلافونيا " شمال الرياض بـ 200 كيلو تقريبا (( عرفتوها ؟ )) .. وهالرجال اسمه ابو حمود لكن لقبه السطل او عيارته ومحد يعرفه الا بالسطل من صغره وهو ما يداني هالعياره لكن وش يسوي عاد ..
وانا بقولكم عاد بعض سواليفه المصرقعه في ذا ..

هذا واحد من الشيبان يقص يقول :
جيته يوم في بيته بتقهوى معه المهم جلسنا انا وياه وقدامه بريق (دلة) الشاهي.. يقول قلتله :شلونك يالسطل عساك بخير.. صب شاهي ..
قاله: انا ابو حمود موب السطل..
قال ذاك : الا السطل من صغرك وانت السطل..
قال : اقول ابو حمود..
قال : السطل..
قال : اقول ابو حمود ..
قال ذاك: اقول السطل وصب شاهي بس..
قال: منيب صاب...<<< حركاات مبزر ..
_ المهم وبعد شوي ويدخل عليهم واحد ..

ابو صالح: سلام عليكم..
السطل : هلاااا ابو صالح يالله ان تحييه..
ابو لافي( الللي كان جالس مع السطل) : هلا ابو صالح وين الناس ماتنشاف ولاش؟
ابو صالح : والله بهالدنيا نسترزق..
ابو صالح:ها يالسطل وش اخبار المزرعه معك..
ابو لافي: يالسطل صب شاهي للرجال << راعي حرش ابو لافي..

السطل: اقول ابو لافي تسنك براسك حرش انت وشيبتك..
ابو لافي: لا والله مابه حرش براسي..
السطل: وش به اجل؟؟
ابو لافي: وش به ؟ به مخ ..
_ فقعة ظحك من ابو لافي وابو صالح _
ابو صالح : وش بلاكم الحين انتو؟
ابو لافي: انا قلت شي ؟ اقول صبله شاهي يقول حرش ..
السطل: لا بالله يا ابو لافي ان ما عقلت لا علم عليك ابو سعد..
_ابو سعد هذا ابو البنيه اللي يبي يتزوجها ابو لافي_
ابو لافي : لالا تكفى يا السطل الا ذي عاد..
السطل: والله لقوله انه زليل حيا ويغازل بنات الناس وهو شايب(ن) ما به حيل يسوي شي..
ابو لافي: انا اللي مابي حيل اسوي شي..وهال22 ولد اللي عندي وش تسميهم.. اصبر خلني اعرس واوريك وش اسوي..
السطل: ايه هين هماه كلام يا رجال تسنك تيس معرعر ما بك حيل..
ابو لافي: والتيس ما خبرناه يسوي شي اخبر الخروف هو اللي يسوي..
_ فقعة ظحك من ابو لافي وابو صالح _
ابو صالح: اااااه يا بطني الله يقطع شرك يا بو لافي قطعت مصاريني من الظحك..
ابو لافي: هاه سطل قريح مابي حيل اجل؟ لا تخليني اقلب عليك الحين اخليك تعظ الارض تنسى انك رجاال <<< حركات ابو لافي وهو ورع ..
ابو صالح : ههههههههههههه...
_ طق الباب الداخلي_
السطل : خل اشوف وش يبون.. يالله يارب الجنه (( قاعد يقوم ))..
_عاد راح السطل داخل الحين_
ابو صالح: يا خي ماشالله هالسطل ما يشكي من سكر ولا ظغط ولا شي.. الله يخلف علينا بس..
ابو لافي: يا رجال ما غير بهالمزرعه يتغرغر بالديزل ويلهم حلبه وحبه سوده...
ابو صالح: ههههههههههههههههههههههههههه.. << موب زي كذا .. ظحكة شيبان طبعا..
_ترا من جد السطل يتغرغر بديزل واي مرض عنده علطول الديزل وبس_
ابو لافي: اجل تصدق ذاك اليوم وحنا بمزرعته جاه ولد بنته مفلوقت(ن) جبهته.. ويمسكه ويربص جبهته بالديزل ويرربطها.. ماار ينسدح الولد وينام اربعة ايام.. مهوب صاحي هالشايب <<< تكفى يالشباب انت .. _رجع السطل_
ابو صالح: يله اجل ابمشي انا..
السطل: وين وين اقعد خل نسولف ونحتسي ذا ما خلانا نسولف هو ووخشته..
ابو صالح: لا والله مرتن ثانيه والمهم ابقولكم الليله تجون عندي انتعشا ونسولف عقب الاخير(( الاخير = صلاة العشا ))..
ابو لافي : تم..
السطل: ابشر..
_راح ابو صالح_
السطل: وانت ما ودك تفارز..(( تفارز= تفارق = تنقلع ))..
ابو لافي : اقول امش امش صب شاهي بس..
السطل: اليوم ابو سعد سأل عنك بالمسجد يبيك تروحله الظاهر..
ابو لافي: اسألك بالله؟؟

السطل: ايه رحله رحله..
_ابو لافي عرف انها تصريفه_
ابو لافي: تدري هونت ما عاد ابي اخذ بنته ابقعد .. صب بس صب..
السطل:
_ المهم عاد تجمعوا الثلاثه ببيت ابو صالح بالليل وباسطين ومتكين عند الباب بالشارع يتفرجون باللي رايح واللي جاي وخذ يا استهبال _
ابو صالح: يالله ان تحييهم يالله..
ابو لافي: الله يحييك ويبقيك ابو صالح ..
السطل: تصدقون ولدي يوسف الله يصلحه اليوم جابلي هذا التلفون اللي ينشاال بالمخبى (المخبى = جيب الثوب ) ..بس والله مانيب حافظن الرقم زين للحين لامني حفظته عطيتكم اياه...
ابو لافي: تيلفون ينشال بالمخبى وين تشبك فيشه...هههههههههههههههههههههههههه<< على باله يذب عليه ما يدري انه فيه جوالات من جد...
ابو صالح: يغمز لبو لافي .. ويقول ايه مبروك يا السطل..

ابو لافي : الا وينه التلفون خل نشوفه بزهم على لافي بالاستراحه...
_ ابو لافي يطالع ابو صالح بطرف عين ويهمس له شف الذبه الحين
.._
السطل قام وفصخ بشته.. وطلع كيس من جييبه ملفوفه وملزقه..
ابو صالح: وش ذا.؟؟
ابو لافي: لاا يكون جايب معك حلبه وحبه سووده..
السطل : لا انت ووجهك هذا التلفون (الجوال).. يا خوي عجزت امسكه كل ما مسكته طاح من يدي قمت حطيته بكيس وبجيبي..
ابو لافي: نعنبوك يبي الواحد يتصل عليك كود عشر مرات عشان يمديك تطلعه وترد على المتصل..
_ فقعة ظحك من ابو صالح وابو لافي _
_ المهم شوي ويمرون ثلاث عواجيز بيسيرون بالحاره جارتهم_
ابو صالح: كحححححح كحح كححح<<< يتميلح مع وجه..
ابو لافي: يا وجه الله .. يا لبيييييه ياذا الغزلان ...<< موب عاقل
السطل: يله استح انت وخشك خل الناس بحالهم..
ابو لافي: اقول ابو صالح وش رايك بام الاخضر مع الاحمر << تراه زهري بس ما يعرفون الا الاحمر ..
ابو لافي: ولا لا لا شف اللي على اليسار وش زين مشيتها <<تعرج من ركبتها..
ابو لافي: ولا لا ابو صالح شف...
ابو لافي: ابو صالح وشبك..؟
ابو صالح: <<<<< هذي خشته وقتها ..
السطل: هههههههههههههه ابو صالح مفهي مع هالعجايز مهوب لمك..
ابو لافي:اقول السطل.. تسم رقم التلفون اللي معك وانا اخوك..<<يسمع بالترقيم..
السطل: اقول اعقل لا اعلم ابو سعد..
_ يوم مروا العجايز وصاروا معطينهم مقفاهم وهم معدين_
ابو صالح : الله الله.. تكفى ابو لافي شفلي اخت اللي بتاخذها من ابو سعد <<تحركت البروستاتا عند ابو صالح بعد سنين
ابو لافي: يا وجه الله .. اغدي مطااااازيز على ذا المقفى ..انا افدى هال***** << نسى نفسه..
السطل: اقول استحوا يا مال الطواعين تقل مراهقين.. وش خليتوا لهالشباب اجل ..
_اختفوا العواجيز من ورا الافق ( يعني ابتعدوا ما عاد يشوفونهم خلاص)_
ابو لافي: آآآآآآآآآآآآآآآآه وينك يا بو سعد عجل علينا بحصه يا بو سعد..
السطل: ابو لافي شف ابو صالح..
ابو صالح: <<< لا يزال مفهيا فهوتا عظيمه..
ابو لافي: خلاص يبوو صالح ..كود تجيبلك لترين ديزل تصبهم على وجهه يالسطل..
_فقعة(ن) جمااااعيه من الظحك رجوا بها الحاره_

* * * * * *
انتهـــــــــــى

على فكره شخصية السطل حقيقيه وهذي سوالف الرجال علينا طبعا مع بعض البهارات ( البهارات = شوية مبالغه وشوية كلام زايد وشوية ملح وكمون و ...) .. عشان تظبط الساللفه..

***سؤال لللاذكياء// اي واحد من الشخصيات الثلاثه اللي كان يقص علينا القصه ولا مهوب معهم ؟؟؟ <<< بيشوف استوعبتوا ولا لا..

آآآآسف على الاطاله .. واتمنى انه يحووز على رضااكم ...

منتديات مدرسة المشاغبين - ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه