اي بالله اخطوا والخطا اللي جابهم عين الصواب=مبطي وانا اشوف الطمع يكشف رداهم واستره
ما يملي عيون الحسود بهالزمن غير التراب=ومن لا يتوب من الخطا تحرم عليه المعذره
اللي من اولها خراب اكيد تاليها خراب=والبندق اللي ما تثور في هدفها تذعره
ودك اليا من جاتك الغلطه من الناس القراب=الصاحب اللي ما كسبت محبته ما تخسره
مشكلتي اني ما عرفت احسب لصدتهم حساب=قلطتهم صدري على ذكرى قصيد وحنجرة
صوت يطول بمنبره واخطاب ما بعده خطاب=والطيبه اللي زعزعت صوت الخطيب ومنبره
ما فيه دمع صوبوه احبابي بوجهي وخاب=ولا زرق حزني على غالي ولا فج انحره
كل الزهاب اللي معي ذكرى من اصحاب الزهاب=واللي بقى لي من عذاب اشرس طريقي واخطره
لان تجنبت الغرق عديت من فوق السحاب=لان اكثر اصحابي ورق ما شفت للطيب اثمره
والله ما حطيت بين الحقد والخوه حجاب=حتى غدوا ربعي يحدوني على الضيق اشكره
البارحه ثارت على رقاب واوتني رقاب=البارحه يا ثقل دم البارح ويا محقره
اهب يا وجه الحسد وشلون جمعهم وغاب =كيف السنين اللي عطتني بعثرتهم بعثره
اثر المصايب ما تجيك الا من الناس القراب=وبهالزمن حتى الخوي اللي تثق فيه احذره
لا بارك الله في رفيق تزعله كلمة عتاب=ولا جمع الله الرجال اللي تفرقهم مره
عودت نفسي كل ما شددت لليمه ركاب=ما اصد وجهي عن طريق الا ليا جبت اخبره
الصاحب اللي ما يجي من صحبته غير العذاب=نذر علي إن ماهجرني ولا انا اللي با اهجره
من يفتح لفرقاي باب افك له عشرين باب=واذا خويي ما يقدر خوتى ما اقدره
أن روحوا فانا برى منهم ليوم الحساب=وان جرحوا قولوا لهم ما حركوا في اشعره
شفهم لهم حول السنة ولا خذوا مني جواب=احسن دوا للي يحاول يستفزك تحقره
انا جمعت اوراقهم بكتاب واغلقت الكتاب=يا وقت لم اللي تلمه وانثر اللي تنثره
ما كنت احاتيهم صغير عاد احاتيهم شباب=اما ذخرني صاحبي لليوم الاسود مذخره
عقب اكتئاب البارحه ماعاد انا حمل اكتئاب=الطيب جرجرني وانا ماني بناقص جرجره
اللي يخاف من الظما يترك لنا طرد السراب=واللي ماهو بقد الظلام ووحشته لا يسهره
انا تجرعت الظما لين احترق وجهي وذاب=انا كسرت بخاطري قبل الصداقه تكسره
انا خسرت اللي غيابه غير عن كل الغياب=انا غفرت لعالم ما تستحق المغفره
انا اكثر انسان تعلم من كثر ما اخطا وصاب=انا اخر لسان يتكلم في زمان الثرثرة
انا القصيد اللي نزع من دفتره مليون ناب=وانا الوحيد اللي جمع مليون ناب بدفتره
جفني وجرحه السهر حيلي وهدته الصعاب=دمعي هدر ضحكي ندر عمري وضيعت اكثره
شيبت بعقول العرب هيبت روس ما تهاب=جمهرت ناس عمرهم ما يعرفون الجمهره
ما صرت ذيب الا لان اللي حوليني ذياب=ما كنت اغيب الا لان العفو عند المقدرة
ترى حلاتك لا حملت لصاحبك كلمه عتاب=ان ما نطقت بها بوجهه ما تذمه بظهره
في هالزمن ما يملي عيون الحسود الا التراب=ولا الحظيظ الطلقه اللي ما تصيبه ما تذعره
ودك اليا من جاتك الغلطه من الناس القراب=الصاحب اللي ما كسبت محبته ما تخسره