رحلتي البحريه والاميره جمانه

طبعا .. هذي سالفه لي من نظام خوذوا وخلوا



مره سامر ... مسكت معي قنص ضبان بالبحر

المهم قلت ياولد حرك قاربك .. ماعندك شغل ولا مشغله

المهم واجيب معي رادو واحط FM اللا على اغنية نوال اللا بزعل

عاد يوليييييييييييييه يالجو قمرا ونوال .. وعلى البحر ومحد حولك ومعاك سنارتك


المهم وانا جالس .. اللا وتشبك سنارتي ... عاد انا سويت الصياد الصغير وتمسكت بها

اللا والسناره تسحبني ..يهوووه وش الحل ... ونوال تطربني وانا متحمس مع السناره ومنطرب على صوت نوال


اللا من قوة السحب ..سحبتني تحت ..

اللا مادريت عن نفسي اللا انا تحت مره مره مره ..
طبعا من قوة الصدمه .
واناظر اللا انا منسدح ب سرير حرير .. في ذيك الغرفه الي مدري انا بحلم ولا بعلم

المهم ... اللا يوم جلست شوي اتمقل بنفسي .. وانا ملبس ذيك البجامه الي ودك تطلع تكشخ به مو بس تنام

اللا دخلت علي بنت طبعا علشان اوصفها صح لكم ..


الفقره هذي فوق 18علشان معنا طلبة مدارس معطلين

























من السره وفوق جسم مخصر لين حلو وصدر بارز وذاك الحلق الي كنها غزاله وذاك المبسم الي ولا احلى منه وذيك العيون الي ودك ماتشيل عينك بها وتطرح الطير من السما

طبعا هذا وصف الي فوق


نجي لوصف الي تحت ====<<<معصي يادشير مب واصفها لكم

طبعا الي تحت البطن جسم سمكه عادي .. ذيل وحراشف وكل شي

بكل بساطه اقول لكم هي عرووووووووووووس البحر

المهم تقدمت لمي طبعا لحظه بقول لكم هي مادخلت لحاله يوم انفتح الباب
دخلت هي وعروسات بحر حبشيات وفلبينيات .. وسمكين قرش يخرعون .. وهي معهم

طبعا هي جتني قالت هلا فارس قلت هلا والله ... قالت انا الاميره جمانه وهذولا الحاشيه حقيني والخدم وهذولا البادوقاردات ===<<<طبعا تقصد بالبادوقرردات سمكين القرش الي على بلاطه خلوني اعملها على نفسي من الخوف


المهم قلت هلا وسهلا .. وش السالفه .. وش جابني عندكم ..اذكر اني كنت ابي اصيد عندكم ... ومدري اللا وانا غاطس .. ومن قوة السفطه بالبحر والروعه الظاهر اغمى علي .. يوم صحيت ولني بهالغرفه .. الي ماعمري شفته ابد بحياتي


قالت ابد انت صدت طال عمرك وحده من السمكات ... وهي سحبتك عندنا ..طبعا يوم علموني ان فيه انسان .. ومغمى عليه .. وتوهقنا معه ..قلت جيبوه عندنا هنا يتعالج ونشوف وش قصته

المهم قلت انا ابشرك بخير وودي ارجع .. علشان مايفقدوني ...

قالت وراك مستعجل ... ابوي الملك وامي مسافرين .. احدى المحيطات ولافيه اللا انا .. وودي تشرف عندنا نمشيك ونوسع صدرك ونخلي فيه ذكرى حلوه لنا ولك .. قلت انا قدام صراحه ولا وراي اللا جونا البايخ فوق وهالحر والدشير .. ويالله ماعندي مانع

قالت بس فيه مشكلتين نسيت لقول لك اياه ..قلت وشو ..
قالت اول شي مانقدر نرجعك لفوق اللا واحد يصيدك ... ويسحبك فوق ..قلت ليش قالت مانقدر نطلع فوق لاننا نعيش تحت مره حنا
والمشكله الثانيه .. ترى ان جلست عندي فوق 3 ايام خلاص تصير زينا شكلك .. قلت وشلون ... قالت تصير زي عروس البحر ..بس ولد .. قلت امحق ..قالت بكيفك .. وانا احذرك لو ماودك


قلت انا ميخالف .. الحين خلينا نتمشى ويحلها حلال .. قالت خلاص ..غير وخذ راحتك ..

المهم واغير اللا وتجيني بعد 10 دقايق ..

اللا واطلع من غرفتي .. وامشي انا واياها والحبشيات الي معه والقرشين الوديقاردات الي يظرسون علي

ونمشي بذاك القصر اللي يطير العقل من اثاث مذهب ومن تماثيل ومن صور ومن كل انواع الفخامه

اللا ونطلع حوشهم اللا ذاك الهمر المظلل .. وشلون همر في بحر مدري .. المهم اركب .. وتركب

ويالله هاتك تمشيه ..

الصراحه مشتني ماخلينا شي .. حتى السواق الخال حليل مره ..

طبعا قالت وين تبي تتغدأ قلت انا تسان بووه جريش زين ولا مرقوق ميخالف ==<<<سياحي من جد

قالت اقول الظاهر بعزمك على ذوقي ..قلت ميخالف يالله

المهم وتودينا محل زي التحليه عندنا .. شباب يرقمون وعرايس بحر .. يتمشن .. ابد ابد زينا

ونروح لمطعم اسمه المحيط الأيطالي .. قلت اووه حتى هنا المطاعم الفخمه ايطالي .. قالت ايه يخوي .. وانت وش شايفنا بعد ناقصين عنكم

المهم وندخل ويفتح لنا القرش الي معنا الباب وتمشي ويموشون ورارنا عرايس البحر الحبشيات .. وانا امشي مع الأميره

المهم ويستقبلنا لبناني بالمطعم ويختار لنا احلى جلسه بقسم العوائل ..

المهم قالت اطلب قلت ما اعرف شي ..قالت بطلب لك على ذوقي .. انا قلت يسلم لي هالذوق ===<<<مسوي برستيج

وتطلب لي شوربة روبيان .. وطبق الكافيار .. وذاك الجمبري المشوي ..الي يطير العقل

وحنا جالسين اللا واسمع لخبطه بالمطعم ..انا طلعت اشوف .. اللا اشوف ذيك الحيتان الظخمه الي جاره لها سمك مكشخ مع سمكه .. ومركبينهم الجمس ..

وانا خفت واناظر الجرسون قلت وش السالفه ..قال هذولا الهيئه ..ماخذين واحد بخويته ..


انا الصراحه خفت .. ودخلت .. وقلت لايقشوننا .. انا وانتي .. قالت اجلس ياوجه الفقر انا بنت الملك .. محد يقدر يجيك وانت معي

قلت هذا العز ولا بلاش .. ياحظ من اعرس بتس ..

وسكتت وجلست تاكل وانا اكل
المهم ونطلع .. عقب بخشيش عطته للجرسون كنه مصروفي شهر وانا طايرتن عيني ..وطلعنا نتمشى

المهم ونمر من قاعه .. قلت وش ذا .. قالت هذا ولد عمي توه متخرج من الثانوي وجايب رابح صقر مسوي حفله الأخ

قلت ووووووووه بس حتى رابح يجيكم هنا..قالت اييييه لو تبي بعد شاكيرا .. قلت ياسلام سلم ...

طبعا انا استغليت هالفرصه ..قلت نبي تسوين لي حفله ..قالت بمناسبة ايش ..قلت هاه بمناسبة جيتي عندكم ..وانتي اميره وفلوسك واجد ولا هي ظاره حفله وعلي

قالت براسك ... بس من تبي

قلت ابي نوال الكويتيه .. قالت خلاص بكرى وهي عندك .. قلت ياسلام .. بغيت اعزم دشيري ..بس تذكرت اني بالبحر ولا هم مصدقين اصلا وغير كذا حتى لو جو بيخربونها ولا هم طالعين قبل 3 ايام وبيتحولون عرايس بحر هالسرابيت اذا شافوا الفله والفلته

طبعا

ويجي اليوم الثاني .. وكل القصر مختبص لعيون الحفله حقتي وهاتك ياعز وطنخه حسيت اني محد قدي ..حفله مخصوصه .. واحلى بوفيه مفتووح .. وكل شي


يوم خلصت الحفله واحلى نومه


طبعا جا اليوم الثالث .. يعني الحين مستعد للرحيل .. وطبعا لي 3ايام لحد يدري عني ولا شي ..

وصراحه احلىليلتين بحياتي مرت علي ...

المهم جتني جمانه ... وهي ظايق صدرها .. قلت وش بك ياسمو الاميره ...

قالت بتروح ..قلت ايه ..وبارك الله بمن زار وخفف===<<<امحق زار وخفف اللا انا زرت وكرفتهم وفلستهم

وقلت انتي عارفه اخر يوم هذا وبعد الساعه 12 بالليل لو مارجعت .. تحولت مثلكم ... وانا صراحه ماودي ..اهلي يحتروني وربعي ينتظرونني ===<<<والله محد درى عنك ومبسوطين بغيبتك


قالت اسمع خلنا نتمشى الحين وبالليل ترجع القصر ونشوف وش يصير

قلت انا وش نشوف وش يصير ..قامت قالت تعال انت ماعليك .. وقامت وسحبتني .. وطلعنا ..

المهم و نطلع بهالهمر الأسود ومعنا الحاشيه الكريمه من هالحبشيات والبوديقردات من هالقرش الي كلهم عضلات ومسدسات

المهم قالت اسمع انا ماطلعت معك اللا ابي افضف فض لك شي .. قلت وشو

قالت اسمع انا صراحه ما احب ولد عمي ولا ابي اعرس منه ..

قلت انا طيب والحل

قالت شف بصراحه .. حبيتك من اول نظره ولا ابيك ترجع اليوم وبخليك معي علشان تتحول مثلنا لعريس بحر .. ومنها اعرس بك
انا طبعا طارت عيوني

قلت وين ما اقدر .. سلامات ... وين اتحول مثلكم .. ولا بعد اعرس عليك .. وبدوناهلي مايدرون===<<سوا لازم موافقة ولي الامر

قالت اها بس .. روحه منت رايح .. والظاهر تعرف من انا ولا انتب طالع ... من عندي ابد .. وتعرف اليوم اخر يوم لك وبعدها الساعه 12 بالليل بتتحول ..

قلت بيني وبين نفسي وبوجه خانقته العبرا .. ياليل الليل انا وش جابني هنا ووش خلاني اطيح بهالنكبه الي انا لانيب قدها ولا شي

قالت وش تهوجس به .. قلت هاه ابد .. بس جالس افكر شوي

قالت يعني موافق ... قلت نعم ايه ايه موافق .. ===<<وانا خايف خوف وذارق اصلا

المهم انا ساكت طول اليوم .. واناظر الحبشيات ..و قلت بيني وبين نفسي ياعزتي لي .. وش هالعرس الي بيجي غصب عني .. وانا كني المره مالي كلمه ورأي .. وهيالي بتصير لي محرم بعد

المهم وتخطر براسي فكره .. .. وقلت وقفي باسكن روبنز بشتري لي ايس كريم ..ببرد علي

قالت .. اوكيه .. وتقول ياجوهر ==<<طبعا جوهر هو الخال السواق حقه

المهم وفعلا نوقف هناك

المهم وتقول انزلي يا عزيزه جيبي ايس كريم لفارس ===<<<عزيزه احدى الحبشيات الي معه ..

طبعا انا قلت لا لا انا بنزل ... قالت لا هي بتنزل ..انت نسيت انك بتصير رجلي .. ولازم اعودك على العز والبرستيج الاميري

قلت ايه ميخالف بس بنزل انا علشان اختار النكهه.. قالت اوكيه بس خلها هي الي تشيل ..ولا تتعب نفسك ياحياتي

قلت ايه ايه ابشري==<<< امحق عز وبرستيج .. وهو ايس كريم ماتعودوا يشيلونه بعد

المهم وانا انزل .. قلت للحبشيه .. عزيزه ابي جوال ..قالت رووه خد من اميره جوال ..انا مسكينه

قلت يابنت الحلال اذا اعرست به بشتري لك شركة جوال مو جوال بس

خقت الحبشيه وقالت خذ .. المهم وادق على صعو

هذا صعو خويي حق المهمات الصعبه ..اي فزعه اي خدمه سريه يظبطها لي وينفع

يعني يطبق قاعدة الصديق وقت الظيق بقوووووووووووووه

المهم طبعا ليش انا قلت بتصل عليه ...
علشان انا تذكرت كلام الاميره فوق وهي تقول .. اذا تبي ترجع لازم واحد يصيدك حنا مانقدر نرجعك

وطبعا انا بتصل عليه ... علشان يصيدني

المهم .. واخذ الجوال من الحبشيه .. واروح الحمام علشان اكلم على راحتي .. وادق على هالسربوت يصيدني

المهم ..واكلم ...

صعو ..قال هاه .. قلت وينك ..قال من انت ... قلت انا فارس ... قال ياخي منين تكلم ياسربوت ..جوالي ..ماطلع به رقمك ... قلت بعدين اشرح لك وش السالفه ...

قال وش بغيت .. قلت ابيك بخده ...طبعا هو يوم قلته ..قال ابشر بعزك ==<<<يقدر الفزعات على عماها هالسبكيه


قلت اسمع مر بنده وتقض لك سناره وحط به .. اي طعم .. واجدعه بالبحر ...
قال ليش؟ .......... قلت علشان تصيدني ..قال ياخي انا دلخ صح ..بس مو الى هالدرجه .. وين يالأخو شايفك سمكه

قلت ياخي اخلص ... بعدين اشرح لك ... قال طيب البحر عريض .. وين القاك ..قلت لحظه ..

المهم وارجع على الحبشيه والايس كريم مايع بيده ..قلت ..وين حنا فيه .. قالت بحي السافرات ..===<<<اف حتى عندهم

قلت يابنت الحلال القصر كم نبعد عن شاطي حق الأرض .. قالت يأني هدوود .. قلت ايه الحدود

قالت كمستأش كيلوا .. قلت زين ..واركض للحمام .. قلت 15 كيلوا ..قال خلاص

بحط لك طعم هامبرجر .. علشان السمك ماياكله ... قلت ابيك ترمي الحبل .. تحت مره .. لين ياصلني قال ابشر والوعد الساعه 11 ... قلت تكفى لا تتأخر .. قال ازهلها بس اذا جت الساعه 11 ولا طلعت بمشي .. ===<<<الكلب متعود على الدقه ويحبني بطلعه عند باب بيتنا كالعاده


المهم واخذ ايس كريمي المايع ... واركب الهمر . وانا مدبر الخطه صح ...المهم ... ونتمشى نتمشى
طبعا الاميره عروس البحر ..حاطه براسه اني خلاص بجلس وبتحول ..وعلى قوله ..بعرس به .. وتحط ابوه بألأمر الواقع وبعرس به... وانا معطيه جوها ..ماتدري ان الخيانه الوعد الساعه 11 انا وصعوا العزيز ..هي وقت النحشه

وانا صراحه واثق بصعو خويي (ملك الفزعات) .. المهم ونتمشى لين جت الساعه 10

وقلت انا ودي ارجع القصر اريح .به .. قالت وش بك ..قلت طفشان شوي ..

قالت يالله عقبال .. ماتتحول ..واعرس بك وابسطك ...

قلت بصوت خافت ايه هين

قالت وشو ..قلت لا لا ايه هين مافي شك ..بتبسطيني وبقوه


المهم وانطق بغرفتي .. وعند الباب هل الحرس القروش .. يقال لهم حارسيني وفي نفس الوقت يبون يظمنون اني مب طالع الين تعدي المهله واتحول مثلهم ..علشان تظمن هالتعبانه اني صرت مثلهم .. وتظمن العرس ..

المهم وانا ادور وش الحل وش الحل .. واشوف الدريشه ... وتخط ببالي فكره

واربط انواع الشراشف حقت السرير على شكل حبل .. وتجي الساعه 10:55 وانا اتذكر .. تهديد صعو اذا مالقاني بيمشي .. لان الصراحه انا انواع اللطعات ..وهو صح حق فزعات لكن غبي .. يعني بيسويها ويمشي الكلب


المهم ..والحمدلله واطلع من الدريشه عقب ماربطت الشراشف واتسلل ... من القصر ..

اللا .. واشوف هاك الحبل .. الي يتدودل ... بهامبرقر ... وحوله سمك ...

ووحده سمكه عجيز تقول .. اف وش هالطعم ... والله ناس ماعندها زووق حتى الطعم مايعرفوا يختاروا==<<< سمكه حجازيه

المهم قلت وخروا بس .. واتعنقط بالطعم واعظه .. واسحبه ... ويالله فهم

وجلسنا سنه .. يشد ولا يسحب .. لأن صعوا ظعيف الصراحه .. ولا فيه قوه ... الين جت الساعه 11:55

يعني مابقى شي الله يقلعه 12 بالليل واتحول وباقي خمس دقايق ...

اللا ويقزني حدا التكارنه الي بالقصر .. ويصرخ .. يقول هذا عط ... المهم وتدري الاميره ... ويجون يركضون .. يبون يسحبوني

واشوى ... ويقوا يسحبني ... وانا واياه شيل وحط وذولا وراي مابقى شي وياصلوني ... يبون ياخروني هالخمس دقايق .. واتحول عندهم

طبعا واشوف ذاك القرش الي جاي من القصر.. انا من الخوف اشتغل انزيم الخوف .. واقمز على على فوق وصعوا يشد

الين طبيت في القارب وطحت وانا اشاهق .. وهذا القرش .. يناظر فيني من تحت ..ويقول فلت ياخسيس

وانا اقول .. انقلع انت ومعزبتك .. قالت ايش قالت اعرس بس ===<<<اقولها وانا اشاهق تافل العافيه

صعوا يناظر ... ويقول وش بك .. قلت رجعنا بس البحر ... طلعنا وانا اقول لك بعدين


والحمدلله ... رجعت ... واللا كان باقي 5 دقايق ... واتحول عريس مدري عروس بحر عندهم

واتزوج هذيك الاميره الخبله ... مع انها حبيبه وكريمه .. بس سلامات تبي تعرس بي بالغصب ...ولا تعودت على كلمة لا الظاهر

وابشركم رجعت ووطبعا لاحد فقدني ... وصعوا مسك علي السالفه ... واهم شي بس اني رجعت .. والحين موجود بين اهلي .. بلا بحر بلا خرابيط



طبعا المعذره ان كان طولت عليكم