. تبدى القصه يوم قررت مره من المرات أني اسافر الشرقيه ( لسبب احتفظ فيه لنفسي ) محد له دخل
.
.
.المهم حجزت و شريت و رحت للمطار (انتم للحين معي)..الزبده جايه قدام....
.
.
. ركبت الطياره إلا مليانه من ذا البشر (تقل العالم مابغت تسافر إلا ذا اليوم) و قعدت كالعادة استهبل على المضيفه شوي و اسوي نفسي ماني فاهم شي عشان توديني بنفسها للكرسي.. ويوم اقلعت الطياره ما قفلت الحزام (يعنني ما اعرف)
و تجي المضيفه تقفله لي بنفسها..انواع الخبث ( طلع لي قرون) وطول الرحله وانا اظغط بالازرار اللي على الكرسي ابي افتح الدريشه (ذبحني الحر) و كل شوي يجيني واحد من المضيفين و يقولي (يا بزر ورى ما تعقل تراك اذيتنا) و انا مدري وش اللي مزعلهم........( غبي)
.
.بعد ما تعبت من البربسه بالازرار جاني النوم..(وسلم علي وقالي ترى نبيك عندنا )..و كل العاده قلت له ابشر و رقدت..............
.
.و يوم خلصت العزيمه و قمت من النوم ..إلا والطياره فاضيه (سكوت يعم المكان)..خفت و قلت في نفسي لا يكونون المظيفين سووها فيني و خلوني نايم و نزلو الناس بعد ما وصلنا؟؟؟؟؟ و أطل براسي (اكيد مهو برجلي)مع الدريشه إلا ما حولك ارض.........يا ولد وش السواه انا لازم أكلم الطيار واعرف منه السالفه........
.
.واروح للكبينه و ادخل بشويش الا يوم شفت اللي ما ينشاف....يعني شوي وبغيت اصيح..........شفتلك:
.
.قطعت حديد لها راس و ايدين و رجول و فوق راسها فيه لمبه ( متأثر بفلام كرتون)..و قطعت الحديد هذي قاعده مكان الطيار و ماسكه الدرقسون بيد و بيالة شاهي باليد الثانيه(اكيد مهو الثالثه) لا و مشغله شريط بشير شنان (يا مسهرني)و دندن معه و اللمبه تولع و طفي..........
.
.قلت يا ولد تشجع وشف و شي السالفه و قبل ما أكمل هرجي إلا يوم إلتفتت علي وقالت : هلا ابو سامي و ينك من اليوم و انا احتريك.....هاه قاعدة تحتريني من متى المعرفه؟؟؟
قالت ما عرفتني قلت لا قالت انا الطيار الالكتروني اللي يحطونه بالطياره اذا تعبو من السواقه)..<ابشركم طلعت رجال>...............
.
.المهم قالي إجلس يا بو سامي خلنا نقهويك(انا بصراحه خفت بس مجبر اخاك لا بطل الطياره فاضيه و حديده قاعده تكلمني).
جلست قالي اضغط الزر اللي قدامك قلت ليه (مابي يصير لي مثل افلام كرتون اضغط الزر و أطير مع السقف)قال اضغطه وانت تعرف:::
تشجعت و ضغطه إلايوم طلعت قدامي دلة قهوه وفناجيل و تمر سكري..(اللي خلاكم تصدقون إن الحديده تكلمت يخليكم تصدقون ذي)
.قال لي تقهو يا بعد حيي ..تقهويت و عينت من الله خير و سألته عن اسمه قال : جنط بن خرده القرنبع.....من كبار القبايل اللي في الصناعيه و حراج الحديد(اساسا هو كان جنط هايلكس 92)قلت و نعم قال ما عليك زود............
.
.قعدنى نسولف و اجيب له سوالف العيارين و سوالف مدحت عضلات و نص لفه و ههو يجيب لي سوالف
المضيفات اللي معه طلع راعي بنات.....و بعد مده من الهذر جاني الجوع فقلت لجنط (صار خويي)
انتم ما تكرمو ضيوفكم قال ابشر اضغط الزر الاصفر::يوم ضغطه ألا و تطلع لي كبسة دجاج من اللي يحبها قلبك (يلعن ابو التنكلوجيا اثر العلم بحر)..واقعد اضرب بالكبسه بديني و رجولي ومن الجوع والحماس غصيت برجل دجاجه و قعدت اشاهق و اضرب بالسقف و انزل قالي : ابو سامي اضغط الزر الاخضر اضغط الزر الاخضر :::يوم ضغطه إلا و تطلع ديود من تحت الدرج تقل ديود بقره..
قالي:إحلب و اشرب يا بو سامي إحلب واشرب (اخت إفتح و إشرب)..مير ما امداه يكمل كلامه إلا وانا راضع و مخلص ........(طلعت بزر)
.
.المهم لا أطول عليكم بالكلام إخذت لي قيلوله بعد ذي الكبسه... و ما دريت بنفسي إلا يوم الطياره بدت تهدي و انا افقع من النوم و اقول لصاحبي هاه بشر و صلنا قال لا قلت اجل ليه هديت
قال : قدامنا تفتيش انت عطني الإستماره من الدرج و كمل نومتك (طلعت سياره ذي).......
.
.و الله واكمل نومتي و ما دريت الا يوم المضيفه تقومني و تقول: قم يا أخ وصلنا.......
....................................(طلع حلم)
.
...وسلامتكم............. عذراً على الإطاله....
<OBJECT WIDTH=320 HEIGHT=240><PARAM NAME=movie VALUE="http://www.home4arab.com/members//arts/ibdaacard/MATH.swf"><PARAM NAME=quality VALUE=high><PARAM NAME=scale VALUE=exactfit><PARAM NAME=menu VALUE=false><PARAM NAME=bgcolor VALUE=bgcolor="28,3C,0"><EMBED src="http://www.home4arab.com/members//arts/ibdaacard/MATH.swf" quality=high menu=false scale=exactfit bgcolor=bgcolor="28,3C,0" WIDTH=320 HEIGHT=240 swLiveConnect=true TYPE="application/x-shockwave-flash"></EMBED></OBJECT>
----------------
جبر الخواطر على الله........

منتديات مدرسة المشاغبين - القصص و الروايات و الحكايات قصص قصيرة و تعلم القصة story novelette

هههههههههههههههههههههههههههه مرررررررره روعه