كان فيه رجاّل توّه معرس وفقران ما عنده قرش .. قال لمرته : يامره بأروح أسج في الأرض أدوّر رزق الله قالت : الله يوفقك
مشى الرجال ومعه ثلاث من الإبل ويوم هو طالع من ديرتهم ألا ومنادي ينادي من يشتري النصيحة من يشتري النصيحة ( كانت النصايح تباع بالأول ما هو مثل هالحين ترمى بالزبالة )
قال بأشتري النصيحة من ذا يمكن تنفعني
قال بكم نصيحتك ؟ قال المنادي الحكيم : عندي ثلاث نصايح بثلاث من الإبل .
قال : هات نصيحتك الأوله ؟
قال الحكيم : إذا سافرت لا تخاوي اللي عيونه زرق وسنونه فرق
قال : الثانية ؟
قال : إذا بغيت تمرح ( تنام ) لا تمرح بوسط وادي
قال : الثالثة ؟
قال : أجلّ عمل الليل لين تبدي الشمس
قال وهذي الثلاث نياق
ومشى أخونا بالله ما معه شي .. وأظلم عليه الليل وهو بالطريق ألاّ وذاك الرجال اللي متلطم قال بأخاويك قال : تم
مشوا شويّ وقال خوينا خلنا نمرح تحت هالشجرة قال خويّه تم
المهم نزلوا وفك خويه اللطمة ألا وعيونه زرق وسنونه متفرقات عن بعضها
تذكر خوينا النصيحة وإستشك في قلبه وما نام طول الليل
قبل يطلع الصبح فتح خوينا عبنه ألا وأبو عيون زرق فوقه بحصاة كبيرة يبي يذبحه وعلى طول يزرق خوينا من تحته ويلتف من حوله ويخنقه وقال وش تبي
قال أبي أذبجك وآخذ قروشك قال خوينا إلا أنا اللي بأذبحك وآخذ قروشك
المهم توسل له وفكه خوينا بعد ما خذ كل اللي معه
قال في نفسه هذي النصيحة الأوله وطاحت بحسابها
كمل طريقه ألاّ وهاك الوادي اللي كله ناس ودكاكين ذهب وأقمشة وأنعام نزل تفرج لين أظلم عليه الليل ونام بأحد الفنادق اللي بالوادي ( خيمة طبعاً وخمس نجوم بعد ) يوم إنتصف الليل إلا وفي قلبه صوت الحكيم ( لا تمرح بوسط وادي ) ويفز ويطلع وينام على شنق الوادي وما هي ألاّ لحظات والسيل الكبير يجتاح الوادي ويقشّ كل من فيه بدكاكينهم وحلالهم
جلس خمسة أيام على جرف الوادي لين إنتهى الماء ونزل وأخذ الذهب اللي ثبت في بطن الوادي من الدكاكين
وقال هذي النصيحة الثانية طاحت بحسابها
أقام الرجال بالقرية اللي جمب الوادي سنين ودنين وسوى دكاكين وإشتغل لين جمّع مال وحلال وأنعام وخير وفير
المهم قال هاذا يسدني أبي أرجع لأهلي بعد الخمس طعشر سنه غربه
رجع ووصل بيتهم بالليل دخل مع الباب ( ما فيه بييبان مشرّع ) لقى مرته راقدة وجمبها ذاك الرجال المنسدح
قال في نفسه ( إعقب مرتي تخوني في غيابي أفا يالعلم )سل سكين يبي يذبحهم ودقّ بقلبه صوت الحكيم : أجّل عمل الليل لين تبدي الشمس
قعد برّا لين جا الصبح دخل البيت لقى مرته تسوي القهوة والرجال المنسدح جمبها رحبت برجالها : يا مرحبا يا أبو فلان هلا والله ، يا فلان قم سلّم على أبوك .. طلع ولده جا عقب ما راح
قال وهذي الثالثة
وإنتهت السالفه


وسلامتكم.....

------------------
دولجـبي الهوجاس مع هبت النود......والحال من نس الهواجيس ذايب

منتديات مدرسة المشاغبين - المنتدى الاسلامى