قصة (غريبة بين اهلي)

قصة جميل يسلمو

وللة مجهود تشكري علية ويسلمو على القصة

العفوووووووووو أخوي

الجزء الرابع عشر

محد كان يتوقع اللي صار، كان الكل بعده يأمل ان اللي صار حلم مو علم..!! رفض محمد لسحر اكيد وراه سبب، ليش رفضها..؟ سؤال يباله جواب ومحد يقدر يجاوب عليه غير اثنين شوق ومحمد..!! وهذي أول مرة يجتمع هالأثنين. بعد ذيك الليلة العلاقة بين العيلتين ساءت قلوب انشحنت على بعضها، بالرغم ان الذنب الأول والأخير من سحر.
وفي بيت بومحمد كان قاعد بالصالة يتكلم ويازوجته ويحاول يعرف سبب تصرف محمد..
بومحمد:" أبي اعرف ليش سوى ولدج جذي، ليش سود بويهي؟ طول الفترة اللي راحت كان الكل يعرف ان محمد لسحر وهي له، ليش الحين بالذات قرر ان يتراجع؟ أكيد فيه شي؟ "
ام محمد كانت موعارفة وش تقول له:" والله العظيم يابومحمد انا مدري بشي وأنا نفسي مستغربة تصرفه هذا، فشلنا وياأختي حتى الحين ماشوفها ولاتكلمني."
ابومحمد:" كل هذا من ولدج الظاهر دلالج له قبل طلع الحين! والا وش معناته يوهمنا طول السنين اللي راحت والحين يهدم كل شي."
وقبل لاترد عليه دخل محمد الصالة، كان قاعد بره بالزراعه ماطالعهم وكمل طريقة لحجرته.
كان أبوه طول الوقت يطالعه ويبي يتكلم له، بس زوجته ماسكته وتقول له بصوت منخفض:" لا لاتكلمه الحين، خله لبعدين."
بومحمد ظل ماسك نفسة لايتهور ويعصب فوق ماهو معصب:" شفتيه حتى ماطالع ولافكر ان يعتذر ولايبرر اللي سواه."
أم محمد:" خله الحين أعصابه تلفانه وصدقني بكلمة وأعرف سبب الرفض."
أبومحمد:" قدامج يوم بس وتعرفين السبب والا راح يشوف شي مايعجبة."
أم محمد:" هدي أعصابك الحين وصلي على النبي وأصبر وبتنحل الأمور."
أبومحمد:" اللهم صلي وسلم عليه، عن أذنج." وطلع من البيت بدون مايقول وين بروح. كان مقهور حدة من تصرف محمد. أما أمه كانت ضايعه بين ولدها وزوجها موعارفة وش تسوي وياهم. ماكان أحد عندها الا بنتها شيخة أتصلت فيها وقالت لها اتيي البيت.
وهي قاعدة تفكر على الكنب بالصالة نزلت شوق كانت تبي تشرب ماي، شافت خالتها أم محمد قاعدة وكأن هموم الدنيا فوق كسرت خاطرها لأنها ماكانت تقدر تخفف عنها ولاتقول لها سبب رفض محمد لأنها كانت واعدته. قربت منها وسلمت:" السلام عليكم خالتي."
أم محمد رفعت راسها وبنظرة حزينة:" وعليكم السلام."
شوق:" شخبارج الحين؟"
أم محمد:"مدري وش حالي محتارة بين محمد وأبوه مدري وش اللي خلاه يسوي جذي؟ وش اللي خلاه يغير رايه يوم اللي رحنا لهم؟"
شوق كانت راح تقول لها وتريح نفسها بس هي واعده محمد ومايصير تخلف الوعد، وأكيد لوقالت لها راح تصير مشاكل فوق هالمشكلة اللي هم فيها:" ماعليه ان شاء الله خير، وتتعدل الأمور بينهم وأكيد محمد مارفضها الا فيه سبب مقنع والامايصير يسوي جذي مني والدرب."
أم محمد:" يتهقين في شي خطير؟"
شوق:" لاان شاءالله مافيه الاالخير."
طالعتها أم محمد وتذكرت أمها الله يرحمها، كانت تشبها وايد بطيبتها وأخلاقها:" الله يسمع منج وتنحل هالمشكلة، حتى أختي مخاصمتني ماأشوفها تتصل ولاتكلمني وكأنها محاربتني."
شوق:" شي متوقع خالتي بس صدقيني انها ماتحقد عليج لأنج أختها وأكيد راح تتفهم سبب رفضه لبنتها إذا عرفتوا السبب، وليش خالتي ماتصيرين أحسن وتتصلين تشوفينها أكيد هي تنتظر منج إتصال."
وبإبتسامة وتردد بنفس الوقت:" تتوقعين تكلمني أخاف تسكر السماعه بويهي."
شوق:" لاماأعتقد، جربي وماراح تخسرين شي."
طالعتها ومازالت تفكر، وبعد ثواني مدت يدها للتفلون ودقت على رقم بيت أختها، واللي رفعت السماعه العنود:" ألو وعليكم السلام."
أم محمد:" شخبارج العنود؟"
العنود:" بخير الحمدالله، شخبارج خالتي؟"
أم محمد:" الحمدالله نسأل عنكم، الا وين أمج؟"
العنود:" هني لحظة بناديها."
وراحت تناديها وأم محمد قلبها يدق وخايفة حدها من ردة فعل أختها وسمعت بالطرف الثاني صوت العنود:" الحين بتيي."
أم فيصل ومن غير نفس:" ألوو."
أم محمد:" الو السلام عليكم شخبارج وخيتي؟"
أم فيصل:"وعليكم السلام ماشي الحال."
أم محمد حست من كلامها إنها زعلانه وماخذه على خاطرها منها:" شخبار سحر؟"
أم فيصل:" والله بحجرتها من ذاك اليوم ماطلعت منها."
أم محمد كانت فاهمه من كلامها إن أنتوا دمرتوا بنتي وهي حابسة روحها بسببكم:" صدقيني ياخيتي انا مدري وش السبب وليش سوى جذي."
أم فيصل وبدون ماتقدر إختها أبداً:" اكيييييد بتقولين ماتدرين ولاتعرفين شي، موهو ولدج بدافعين عنه، هذا اكيد من فعايلكم والاهم وش حلاتهم كانوا، مدري وش اللي عفسهم، ايييه أكيد حرضتوه علشان يتركها ويفشلها قدام الكل والأجمع."
أم محمد منصدمة من أسلوب أختها وكلامها وموعارفة وش ترد عليها، وكانت تحس نفسها وايد تعبانه وطاحت منها السماعه. كانت شوق قاعدة يمها وبسرعه مسكت السماعه وكلمت أم فيصل:" الو خالتي انا شوق، خالتي أم محمد تعبانة وطاحت منها السماعه و...."
وقاطعته وبكل عصبيه:" وانتي شدخلج أخااااف انتي اللي مخربه بينهم، انتي من دخلتي هالبيت ماشفنا غير البلاوي." وسكرت السماعه بويهها.
شوق انصدمت من كلام أم فيصل لها، لأنها ماكانت تتوقع ردت فعلها تكون جذي، مسكت نفسها وحبست دموعها بعينها، وبسرعه دقت لسمر فوق علشان تنزل لأمها. نزلت سمر بسرعه من فوووق خايفة على أمها..
سمر:" خير شصاير؟"
شوق بخووف وتوتر:" من شوي أتصلت خالتي لخالتج أم فيصل، ومدري بالضبط شقالت لها تبعت ورمت سماعة التلفون."
سمر:" أكيييييد قالت لها شي، والا مايصير تتعب بهالطريقة هذي من والطريج."
أم محمد كانت تسمعهم مغمضة عينها، ماكانت مصدقة ان أختها تخلي اللوم عليهم هي وش ذنبها علشان تتهمها بتدمير حياة بنتها.
سمر:" يمه، يمه.." نادت على الخدامة وقالت لها اتيب لها ماي.
ويوم ردت الخدامة وعطتها الكاس فتحت أم محمد عينها.. سمر واللي استانست يوم شافت أمها بخير:" يمه يعني مافيج شي؟"
أم محمد:" ومن قال فيني شي، انا بخيروالحمدالله بس حسيت بدووخة."
شوق وهي تعطيها كاسة الماي:" خوفتينا عليج خالتي."
أم محمد:"لاتخافون ولاشي، انا بقووم الحين." وقامت من على الكنبة وتوها بتمشي طاحت عليهم..!!
سمر:" يمممممممه."
كان سيف توه نازل من فوووق وشافهم وهم يصارخون وركض لهم.. وهو يرفع أمه من على الأرض:" شصااااير فيها؟"
سمر:" بعدين أنت الحين ساعدنا." وخلوها على الكنبه ومددوا رجايلها. كان لونها شاحب واااايد. طالعهم سيف وكأنه ينتظر الجواب منهم.
سمر:" مدري شصاير فيها، كانت متصلة لخالتي وكلمتها شقالت لها وش ماقالت مدري وبعدين نادتني شوق تقول لي أمج تعبانة ونزلت ويوم يبنا لها ماي علشان تشرب قالت مافيني شي وتوها بتقوم الاهي طايحة.
سيف:" أكيد قالت لها شي، والا مايصير اطيح مني والطريج."
شوق كانت كلمات خالتهاأم فيصل مازالت تتردد في ذهنها بس ماحبت تخرب صورة خالتهم قدامهم وتزيد الطين بله.
سيف وهو يطالع امه اللي عطوها ماي تشربه:" يمه شقالت لج خالتي؟"
سمر:" مووقته انت تشوفها تعبانه."
سيف:" موشغلج، أنا أدري بخالتي أكيد قالت لها كلام يسم البدن."
أم محمد:" لاخالتك ماقالت لي شي، انا تعبانة من قبل لاأكلمها."
سيف واللي مومقتنع أبدااا بكلامها:" يمه ادافعين عنها لأنها أختج ، بس أنتي أمنا ومن حقنا نعرف شفيج؟"
أم محمد:" أنا قلت لك مافيني شي خلااااص."
سيف وقبل لايرتفع ضغطه ويعصب:" زين خلاص انا ماشي براحتكم باااي."
سمر:" ول عليه لازم يعصب الواحد."
أم محمد كانت وايد حاطة بقلبها وحزينة بسبب الكلام اللي قالته أختها لها، بس ماحبت اتضايق أولادها وتقول لهم وش قالت لها حتى مايكرهونها.

مر الوقت بطئ وممل، كانت أم محمد وشوق وسمر قاعدين مع بعض بالصالة، كانت كل وحدة فيهم ساكته وتفكر بنفس الموضوع لكن كل وحدة كان تفكيرها يودي لطريق مسدود ماعدا شوق اللي كانت تعرف بشي بسيط عن السالفة. وكانت تحمل هالجواب مثل الهم على قلبها. بعد نص ساعه انفتح باب الصالة كانت بدور داخله ويا شيخة..
شيخة وبدور:" السلاااام عليكم."
ردوا عليهم السلام وقعدوا معاهم كانت وجوهم تحمل الكثير من علامات الإستفهام والحيرة. قعدت بدور يم شوق اللي استانست يوم شافت بدوور:" هلا والله قووول تتصل تسأل لوبس خلاص نسيتينا."
بدور وهي فاجة عينها:" آآآياالظالمة موتوني وياج أول أمس، مثل مايقول المثل تاكل وتنكر."
شوق:" انا ياثقيلة الدم آكل وأنكر أوريج."
سمر:" أشششش هدووء شوي." وهي تغمز لهم بعينها علشان يطالعون شيخة وأمهم اللي كانوا يتكلمون عن سحر ومحمد.
شيخة:" يمه انتي تعرفين ولدج مابقول لي شي حتى لوتكلمت وياه."
أم محمد:" عيل نسكت ونسد السالفة؟ انتي ماسمعتي أبوج والاخالتج شتقول."
هني سمر حاولت تركز أكثر علشان تعرف شنو قالت خالتها، وانتبهت لها بنفس الوقت شوق.
شيخة بإستغراب:" وش قالت؟ متى كلمتيها."
ام محمد:" اليوم كلمتها بعد ماكلمتج بالتلفون."
شيخة:" زين شقالت؟"
أم محمد وهي اطالع البنات:" قومي وياي الحجرة دقيقة وبعدين أبيج اتكلمين أخوج تعرفين شنو سالفته."
شيخة واللي كانت موعارفة وش ورى هالسالفة:" يالله توكلنا على الله."
سمر:"افااااااا طالع أمي عندها الحاسة السادسة قامت علشان لانسمع شقالت لها خالتي."
بدور:" وانتي شتبين تعرفين، أكيد عاتبتها والا زعلانه منها."
سمر:"شنووو تعاتبها والا تزعل منها، هي شسوت لها علشان تزعل منها وتعاتبها؟ كل اللي صار مالنا دخل فيه، واللي يدري بأسبابه شخص واحد بس هو محمد."
شوق:" ماأعتقد أكيد في أحد ثاني يعرف السبب ومحمد ماسوى هالشي الا فيه سبب وسبب مقتع بعد."
بدور وسمر كانوا يطالعونها وهي تتكلم، شكلها كان يبين أنها تعرف شي وبنفس الوقت ماتعرف..!! شوق كانت خايفة تقول لهم السبب حتى بعد رفض محمد لسحر. ظلت إطالعهم وهي تفكر شلون تخليهم يفهمون ان السبب كان من سحروإن هي الغلطانه..؟!

^^^^^^^^^^^^^^^^^^^^^^^^
كانت حابسة روحها بحجرتها وتفكر بذيك الليلة، وكلمات محمد اللي مافارقتها ( أنا مابيها )..!! كان تفكيرها بيهلكها ومتعبها:" آآآآآآآآآآآه بس أعرف شاللي صااار حتى يرفضني؟ معقوولة أحد وصل له شي عن اللي بيني وبين فهد؟؟ لالا مومعقولة أصلا محد يعرف باللي بيني وبينه غير ميثة وعبدالعزيز، الا اذا كان في احد يدري من ميثووه وماقالت لي..؟ بس معقوووولة محمد يرفضني انااااا؟؟ هذا اللي كان يمووت فيني ومستحيل يتسغني عني يرفضني..؟! أكيد فيه سبب ولازم أعرفه." وقطع حبل تفكيرها مسج واصلها من ميثة...(( هاااي شخبارج؟ وينج مابينتي أمس تقولين لي تبيني ضروري، تميت انطرج بالمجمع ساعه ولايتي خير؟ ))
تذكرت ذيك الحزة انها مواعدتها علشان تقولها عن فهد، لكنها نست بسبب محمد وخباله..!!
دقت عليها بسرعه:" ألوو مرحبا."
ميثة:" هلا والله بهالصوت شخبارج؟ وينج انتي؟"
سحر:" انا بألف حيرة."
ميثة:" يمه شصاير عندج؟"
سحر:" قولي وش موصاير."
ميثة:" لايكون أحد عرف بعلاقتج ويافهد؟"
سحر:" لااااا فالله ولافالج، انتي وين الحين؟"
ميثة:" بره البيت رايحة اشتري لي جم غرض."
سحر:" بطريقج مري علي البيت بقول لج السالفة."
ميثة:" يعني مايصير بالتلفون؟"
سحر:" لاااا مايصير بسرعه لاأطولين زين، يالله بااي."
ميثة:" اوكي باااي."
سكرته وراحت تعدل نفسها قبل لااتيي ميثة وتشوف حالتها، بعدين وش يفكها من لسانها..!! وبعد ربع ساعه ويمكن أقل وصلت ميثوو ودقت باب غرفتها.
سحر:" دخلي."
ميثة:" مرحباااااا ياقمر."
سحر واللي ماكان لها خلق بالمرة:" دخلي بسرعه وسكري الباب."
ميثة بإستغراب:" شفيج؟"
سحر:" مدري وش صاير مدري."
ميثة:" شلون ماتدرين ، يعني انتي جايبتني من بيتنا علشان تقولين لي مدري، سحر صاير شي بينتج وفهد؟"
سحر تذكرت ذاك اليوم وطالعتها والغضب والقهر مالي قلبها ووجهها:" تذكرين ذاك اليوم اللي طلعت فيه ويافهد، رحت وياه لشقة و..."
ميثة واللي ماتفاجأت وكانت تعرف وش راح تقول لها:" مايحتاج تكملين عااادي."
طالعتها وعلامات الدهشة مرسومة على ويهها:" شنووو وش اللي عادي؟؟"
ميثة وهي تفصخ شيلتها:" حبيبتي شي عادي اللي صار، لأن أنا نفسي رحت نفس الشقة اللي انتي رحتيها..!!"
سحر:" انتي من صدقج اللي تقولينه؟"
ميثة:" أيه، ولاأحد يدري اني رحت لوماقلت لج أنا الحين."
سحر:" يعني كانت عندج سوالف وخاشتها عني."
ميثة:" ماكنت خاشتها، بس قلت مابقولج الا اذا انتي كنتي تقولين لي وش صار بينج وبين فهد."
سحر:" عبدالعزيز بيتزوجج؟ والا؟"
ميثة:" أكيد وش على بالج لايكون بخليه يلمسني مني والطريج."
سحر واللي لعب الشيطان بحياتها ودمرها:" أنا مدري بشي عنه من ذاك اليوم اتصلت فيه وردعلي ببرود لأول مرة ولاأتصل بعدها."
ميثة:" يمكن مشغول، لاتنسين انه يشتغل."
سحر:" أدري انه يشتغل، بس ماكان يتهرب مني."
ميثة:" ماعليه أنا بسأل عبدالعزيز وأخليه يشوفه."
سحر:"آآآآآآآآه ياميثه لودريتي شصار بعد."
ميثة وبلهفة ولقافة:" شصااااير بعد؟"
سحر:" تقدموا بيت خالتي ويوم سألني أبوي قلت موافقة."
ميثة بدهشة:" وافقتي."
سحر:" شتبيني اسوي يعني، أقول لهم لا كنت خايفة على أمي وأبوي، لكن صار اللي أدمر من هذا."
ميثة:" شنوووووو؟"
سحر:" محمد رفضني وقالها قدام الكل والأجمع ( انا مابيها )..!!"
ميثة واللي مومصدقة اللي تسمعه:" معقوووووولة؟؟ انتي اتكلمين من صدقج والا تمزحين."
سحر:" وانا لي خلق أمزح وياااج، ماعندج سالفة."
ميثة:"والسبب؟؟"
سحر:" مدري وش السبب لكن أكيد بعرفه."
ميثة:" وأمج وأبوج شقالوا؟"
سحر:" أمي حطت العداوة لبيت خالتي من زمااان، وأبوماسوى شي يقول أكيد صاير شي بيني وبينه خلاه يرفضني."
ميثة:" وش قلتي له؟"
سحر:" وش تبيني اقول له يعني، قلت له صدقني مابيني وبينه شي ولاأدري فيه أصلا ولاكلمته، واني مستغربه مثلهم."
ميثة:" والله غريبة تعتقدين إن في احد وازه عليج؟"
سحر:" ماأعتقد.." وسكتت شوي وهي تفكر لكن تفكيرها وصلها لطريق مسدود
وفجأة سمعت ميثة تقول:" عرفت عرفت السبب اللي خلاه يغير رايه."
سحر:" اتحفيني ياحلالة المشاكل."
ميثة:" هذي نسيبتهم اليديدة اللي يايه شسمها؟"
سحر بإزدراء:" شوق."
ميثة:" ايييييه هذي، أكيد هي اللي خربته وخلته يغير رايه شكلها أم سحووور."
سحر:" اي صادقة أكييييد هي اللي خربته، مدام أبوها راعي مخدرات هي وش بتطلع يعني دكتورة."
ميثة:" هههههههههههههههه حلوووة منج، بس الحين وش بتسوين؟ انتي من صدقج تبين اتزوجينة؟ والا بس حركاااات."
سحر وهي دازه راسها الخبل:" يالخبلة شتزوج فيه انتي خرفتي وفهد وين أذلف به نسيتي اللي صار بينا والا اتغيشمين؟"
ميثة:" لابس على بالي غيرتي رايج بعد."
سحر وكأنها أعلنت الحرب:" لا قدامهم أنا ماغيرت رايي، وراااح أعرف شلون خلته يغير رايه واذا مادمرتها ماكون سحر."
كانت صورة الشيطان مرتسمه بوجه سحر وميثة الخبيثة، حياة هالثنتين في دمااار وهم ياغافلين لكم الله، على بالهم اللي يسونه راح ينتهي على خير وان رب العالمين في غفلة عنهم. والمسكينة شوق بتشوف الويل من سحر وأفكارها النيرة..!!

^^^^^^^^^^^^^^^^^^^^^^^^
كان قاعد بروحة ومقفل باب الحجرة على نفسه، ماكان يبي أحد يدخل أو يكلمة. الأحداث اللي مر فيها غيرت حياته كلياً من الحادث اللي صاده لسماعه لكلام سحر المنافقة..!! كان شريط الأيام الماضية يمر عليه مثل الفلم بالسينما.. وقطع عليه مشاهدة الفلم صوت دقات على الباب ماكان يبي يسمع أحد ولايكلم أحد، يبي يظل بروحة وبس يعيش لنفسه وبس لأن ماعاد في شي ممكن يملي عليه دنيته بعد ماخانت مشاعر بنت الأصول. لكن صوت حمد جاه من ورى الباب مثل الصاروووخ:" وانت شفيك ماتفتح الباب؟ يعني ماتبي تكلمنا قول لي أقضب الباب ولاتورينا ويهك."
محمد ضحك غصباً عنه وقام وفتح الباب:" وانت على طووول صوتك مدفع قصر عليه شوي أذيتنا."
حمد:" بل حشى بدال ماتاخذني بالأحضان وتقول هذا ولد عمي من زمان ماشفته تقول أذيتنا."
محمد:" انت شفيك مزعج أدخل وسكر الباب وراك."
حمد:" لابسكره جدامي، أكيد وراي."
محمد:" ياخفة دمك."
حمد:" أحد قال عكس جذي، اقعد زييييين."
قعد محمد على الكرسي اللي يم طاولة المكتب وسكت، حمد كان يعرف باللي صار بس ماحب يفتح الموضوع الا لمن محمد يتكلم عنه، وفعلا بعد دقايق من الصمت تكلم:" أكيد سمعت باللي صار."
حمد:" ومن ماسمع."
محمد بنظرات إستغراب:" شلون؟"
حمد:" إستانس صرت حديث الساعه حتى بالشركة."
محمد وبعصبيه:" وشلوون عرفوا باللي صار؟"
حمد:" خخخخخخ الله يهداك يامحمد انت ماتعرف ان الاخبار مثل الشرار تنتشر، بس صدقني الكل حاقد عليك."
محمد:"كملت وليش بعد حاقدين علي؟"
حمد:" يقولون انك ظالم البنت ومومن حقك تسوي فيها جذي."
محمد:" في ستين داهيه، خلهم مايهموني."
حمد واللي أبعد نبرة المزاح من كلامة:" محمد ممكن تقول لي ليش غيرت رايك بآخر لحظة؟"
محمد:" بس موانت كل مرة جاي تقول لي سحر ماتناسبك سحر ماتصلح لك سحر مولك سحر وسحر وسحر خلااااص هذا انا نفذت اللي تبيه والا موعاجبك."
حمد:" أنا قلت لك هالكلام صح، بس انت ماكنت مقتنع فيه وش اللي خلاك تقتنع بلحظة وتغير رايك؟"
محمد واللي كان محتااار ومايبي يقول لأحد أن سمع منها كلام يسم البدن، طالعه وبنظرة لمعت فيها دمعة كان مختفيه داخله من لحظة اللي دخل فيها حمد الحجرة:" مدري."
حمد:" شلون ماتدري وانت اللي رافضها موهي؟ محمد أدري في سبب وسبب مقنع بعد اللي خلاك تغير رايك وتقول رفضك بهذي الطريقة، صدقني إذا ظليت كاتم اللي بداخلك ماراح ترتاح وراح تنفجر بيوم من الأيام وتموت قهر، فضفض وقول لي اللي بقلبك والا مايصير تقول لي والا انا مو ولد عمك وصديقك."
محمد وبنظرات مكسورة وحزينة:" توعدني ماتقول لأحد؟ توعدني ياحمد؟"
حمد واللي حس إنه محمد مكسور الجناحين:" أوعدك إني ماأفتح حلجي لأي أحد."
محمد:" تذكر يوم اللي طحت فيه؟"
حمد:" ايه أذكره زين، ليش؟"
محمد:" كنت أنا نازل من حجرتي وبقعد تحت، تفاجأت بوجود سحر كانت قاعدة اتكلم رفيجتها بالتلفون وياليتني مانزلت وماسمعت اللي سمعته." وسكت عن الحجي لأنه كان غاص بدموعه ولاقادر يكمل.
حمد:" شفيك سكت كمل كلامك شسمعتها تقول؟"
جمع قوته ومسك نفسه وقال له:" تبي تعرف شقالت، قالت مستحيل أوافق على انسان معاق، انا اصلا محمد نسيته ومسحته من ذاكرتي خلااااااااص، وانتي تعرفين ليش."
حمد واللي ماقدر يمسك أعصابه:" الحقيييييييييييييرة."
محمد:" حمد أرجوووك لاتسب."
حمد:" بس هذي انسانه ماتستحقك ولاتستحق دمعه من دموعك، انا مدري شلون حبيتها ولاسمحت لها بيوم إنها تخدعك بإسم الحب."
محمد:" كلماتها حفظتها على قلبي مستحيل أنساها أبدااااااً، مثل السم بجسمي يسري، كان ودي أنتقم منها لكن ماقدرت إلا بهالطريقة، إني أرفضها يوم اللي نتقدم فيه لها وأخليها تحس باللوعه والمر اللي عيشتني فيه."
حمد:" بس وش السبب اللي خلاها تغير رايها بعد ماكانت متمسكة على قولتها فيك لآخر لحظة بحياتها؟"
محمد:" مدري ولاأبي أعرف شي عنها، أنا خلاص لازم أمسحها من حياتي وأدفنها بالحيا مثل مادفنتني."
حمد وبقهر:" لاااا، انت لازم تحيا، وتعيش حياتك طبيعي ولاتفكر فيها أبداااا أدري النسيان صعب وجرح الكرامة أصعب، بس وش ذنبك تعيش على أنقاض ذكراها واتعذب وهي تعيش حياتها مستانسة."
محمد:" ومن قال أفكر فيها."
حمد:" اي واضح والدليل انك حابس نفسك بالحجرة ولاتطلع منها."
محمد:" وين تبيني اروح."
حمد:" إطلع رفه عن نفسك ، واذا تبيني امرعليك علشان تطلع بيي لك بس انت قوول."
محمد:" مدري بشوووف." سكت ثواني ورد قال:" حمد البيت بصدعون راسي أبوي مايبي يكلمني الا اذا عرف سبب رفضي لها، وأمي مريضة."
حمد:" وليش ماتقول لهم باللي صار أريح لك."
محمد:" موأنا اللي يسوي جذي، مومن طبعي مااقدر، انت تعرف لوأقول لهم شقالت سحر وش بيصير؟ بتدمر عايلتنا خالتي أكيد ماراح تصدق والا راح تقلب حياتنا مصايب."
حمد:" وانت تتوقع ان العايلتين راح يتمون مثل ماكانوا لا أصحى ياحبيبي خالتك أكيد بتعلن الحرب وماراح ترتاح الا اذا زوجتك أنت وبنتها وعرفت سبب رفضك."
محمد واللي أول مرة يقول هالحجي:" يخسوو虈ن موانا اللي يمشوني على كيفهم انا أتزوج اللي ابي مواللي يبون."
حمد:" انت شكلك بتسوي صراع بينك وبينهم وانت محتار والله حيرني معاك مدري وش اسوي."
محمد:" لاتسوي شي، بس اللي ابيه منك محد يعرف اللي قلته لك."
حمد:" اخوانك يدرون والا لا؟"
محمد:" لامحد يدري." وسكت ثواني وتذكر:" ايييييييه نسيت أقول لك ان شوق سمعت كلام سحر."
حمد:" اي شوق؟"
محمد:" بنت بوعبدالله اي شوق بعد."
حمد:" وشلون سمعت؟"
محمد:" مثل ماسمعت أنا، بس قلت لها انها ماتفتح حلجها بكلمة وحدة."
حمد:" اهااااا وانت تظمن انها مااتكلم؟"
محمد:" ماأعتقد شكلها ماتبي مشاكل لأنها إذا فتحت حلجها بتستوي لها مشاكل هي في غنى عنها."
حمد:" اها وخصوصاً أهي مالها أحد غير بيتكم وماأعتقد بعد تسوي مشاكل علشان لاتنطرد."
محمد:"عفيه عليك ماشاءالله عليك ذكي."
حمد:" من زماان أنا ذكي بس محد حاط باله."
محمد:" زين بالمبارك عليك."
حمد:" بقول لك سالفة بس مدري هي وقتها والا لا."
محمد:" قووول وش ورانا غير السوالف والمشاكل."
حمد:" تذكر يوم اللي ناديتني علشان أسأل أختي مريم عن رايها بأخوك؟"
محمد:" ايه أذكر ماقلت لي شصار؟"
حمد:" بنفس اليوم اللي طحت فيه أنت انا كنت ياي أقول لأخوك ان مريم تعتبره مثلي."
محمد:" يعني مثل أخوها."
حمد:" ايه."
محمد:" أنا اشووف أحمد ماله لويه بالبيت ومتغير، وعلى طول حابس روحة بغرفته مادريت إنه لهذا السبب، كان بالي مشغول بنفسي وبس."
حمد:" مسكين حسيت له من يوم اللي خبرته ان مهموم ومتضايق حتى بالشغل ماصرت أشوفه ولاأيي الديوانيه مثل قبل."
محمد:" ماعليه خله علي بكلمه وان شاءالله يتفهم."
وتوهم ساكتين الا احمد داق الباب:" ممكن أدخل؟"
محمد وهو يطالع حمد بإستغراب:" اي ممكن."
فتح أحمد الباب، كان شكله متغير كان طبيعي جداااً ولا كأن صاير فيه وش سبب هالتغيير المفاجئ؟ الله أعلم.
حمد:" اهلا وسهلا وينك ياأخي ماتبين؟"
أحمد بإبتسامة عريضة:" هني وين يعني."
محمد:" تعااال بسألك، شخبارهم تحت؟"
أحمد:" مدري بس كأني وأنا ياي الحجرة سمعت شيخة وهي تسولف وياأمي تحت."
حمد:"بل الله يستر."
احمد:" ليش شصاير؟"
محمد:" لابس تعرف الإجتماعات صايرة علشان يعرفون سبب رفضي لسحر."
أحمد:" اهاااا,,, لحظة تعااال الاصج ليش انت رفضتها؟"
محمد:" بس مابيها غيرت رايي."
أحمد:" علي هالحجي معقولة من والطريق تغير رايك الافي سبب."
محمد:" إحنا وهالأسباب عااااد."
وقبل لايتكلم حمد دق سيف الباب ودخل، الايقول حمد:" ياولد كملت."
سيف وهو حامل بيده تفاحة ياكل فيها:" خير شصاير؟"
محمد:" لاماصاير شي بس سكر الباب."
سيف:" اوكي." سكر الباب ودخل قعد يم حمد.
أحمد:" زين ماقلت لي وش السبب؟"
محمد:" السبب اني عرفت إنها ماتصلح لي وغيرت رايي بس."
سيف واللي كان مشغول بأكل التفاحة وبسالفة ثانية غير اللي يتكلمون عنها.. وبعد ماخلص منها دار لهم علشان يتكلم:" محمد أبيك بسالفة."
محمد:" خيران شاءالله ، انت بعد تبي تعرف السبب."
سيف:" أي سبب؟ انت اتكلم عن شنو؟ انا موياي علشان سالفتك لا."
حمد:" ياي حق شنو عيل؟"
سيف:" ماكلمتك انت."
حمد:" بل حشى لاتاكلني عااااد."
أحمد:" هههههه، انا اعرف حق شنو ياي."
محمد:" خير شعندك؟"
سيف:" مدري أخاف الوقت مومناسب."
محمد:" لاتعلني وترفع ضغطي قول شعندك."
سيف:" أبي أخطب."
حمد:"هههههههههه والله وكبرت."
سيف:"خخخ بايخ ."
محمد:" زين بالمبارك وش تبيني اسوي"
سيف:" ابيك تكلم أبوي."
محمد:" ماأقدر كلمه إنت."
سيف:" وليش ماتقدر تكلمه؟"
محمد:" اووووه ياسيف مسوي نفسك يعني ماتدري انت تشوفه يكلمني والا كلمته من يوم رحنا بيت خالتي."
سيف:" وش علي انا يعني انت تسوي اللي تسويه واحنا انطيح فيها."
أحمد:" شقاعد تخربط أنت."
محمد:" ماعليه خله يقول اللي يبي ، بس انا ماأقدر أقول لأبوي شي آسف واذا تبي انت روح كلمه، موانت اللي تبي تخطب خلاص روح له."
سيف:" أنا أقدر اقول له بس يمكن يرفض خصوصاً بعد مارفضت انت سحر."
محمد:" مدري، يمكن يرفض ويمكن يوافق، انت كلمه وش بتخسر يعني."
سيف:" أوووكي على أمرك بكلمه وبشوووف لكن خله يرفض ولايقعد يصارخ علي بطلع حرتي فيك."
محمد:"هههههههه سو اللي تبي تسويه اوكي يالله روح أشوف كلمه."
سيف:" بعدين الحين هو طالع."
حمد:" زين عيل الحين بروح البيت أستأذنكم."
محمد:" وين أقعد توها الناس."
حمد:"لابس مواعد ناصر أروح وياه بيت رفيجة معزومين ولازم أروح أسبح وأغير هدومي."
محمد:" أهااا عيل سلم عليه وعلى عمي لاتنسى."
حمد:" يوصل ان شاءالله، يالله قوموواا واحد منكم يسوي لي طريج لاياكلوني الحريم اذا طفت بدون إحم ولادستور."
سيف:" الحين انا بطلع يالله."
حمد:" اوكي يالله شباب مع السلامة." وهو يوجه كلامه لمحمد:" ماوصيك لاتفكر ودير بالك على نفسك زين أوكي."
محمد:" ان شاءالله جدي."
وطلعوا اثنينهم من الحجرة وظل محمد وأحمد بروحهم قاعدين، كان محمد يفكر بأخوه وتغيره السريع والمفاجئ كان يحارس أحمد يتكلم لكنه ظل ساكت فقرر إنه هو اللي يبدأ بالكلام:" أحمد شخبارك؟"
أحمد يطالعه وهو عارف شيقصد:" إنت عرفت؟"
محمد:" ايه قال لي حمد."
أحمد:" وقال لك انها تحب واحد ثاني؟"
محمد بإستغراب:" وااااااالله؟؟؟"
كان محمد مايدري وندم أحمد إن قال له، ماكان يبي يخلي طاريها على كل لسان، على الرغم من إنها ماتحبه إلا إنه كان مازال يحبها ويغار عليها بعد..!!
أحمد:"هو حمد مايدري؟"
محمد:" ماأعتقد لأن قال لي بس انها تعتبرك مثل أخوها."
أحمد:" الظاهر مايدري واناجيت وخبصت الأولي والتالي."
محمد:" لاتخاف إذا كنت تتوقع اني بقول لحمد لا، ماراح أقول له أي شي وسرك بأمان."
أحمد:" هذا العشم فيك ياخوي."
محمد:" إنت تحبها؟"
أحمد إبتسم له وقال:" كل واحد ياخذ نصيبه."
محمد:" أدري كل واحد ياخذ نصيبه وان شاءالله انت بتلقى اللي تستاهلك وتحبها وتحبك."
أحمد:"ايييييييه خلها على الله."
محمد:"الله كريم، بس أبي أسألك، وش اللي غيرك فجأة يعني أمس كان حالك غير اليوم وكأنك موأنت."
أحمد:" شاورت نفسي لمتى بظل حزين وحابس روحي بالحجرة ماأشوف أحد ولاأحد يشوفني، يعني لاهي أول وحدة ولاآخر وحدة وفي غيرها وايد ، صح أنا أحبها وكان ودي تكون زوجتي بس الله موكاتب لي آخذها، ودايما يقولون اللي يحب يتمنى للي يحبه السعادة. وأنا مابي لمريم غير انها تكون سعيدة بحياتها." طالع أخوه اللي كان سارح بكلامه وقال:" حتى انت ياخوي تقدر تنسى سحر، انا مدري وش السبب اللي خلاك ترفضها بس أكيد إنه سبب قوي ومقنع وهذا شي راجع لك ماأبي أجبرك واخليك تقوله لي، بس انا ابي اقول لك انتبه لنفسك وعيش حياتك، الإنسان له عمر واحد ويعيش مرة وحدة مومرتين فياريت تنسى اللي صار وافتح صفحة جديدة بعيدة عن حياتك اللي راحت، وأكيد في يوم من الأيام راح تلقى البنت اللي فعلاً تستحق انك تحبها، وراح تذكر كلامي هذا."
محمد كان مستغرب من أخوه شلون يقدر يقول هالكلام وبإقتناع تااام..!! شلون هو موقادر يصير مثل أخوه اللي اصغر منه..!! كان يفكر بكلامه وساهي بأحلامه..!! انتبه محمد على أخوه وهو يقول له:" أتمنى تسمع كلامي ونصيحتي ، وأتمنى تعذرني على كلامي يمكن تزعل مني لأني أصغر منك."
محمد بإبتسامة يملأها الأمل:" لاوليش أزعل أنا بالعكس فخور بإن عندي أخ مثلك، الله لايحرمني منك."

أحمد حضن أخوه وكان مستانس منه، وبنفس الوقت كانت قلوبهم اهم الأثنين مليانه ألم وحيرة..!! طلع من حجرته وهو يمسح دمعة طاحت من عيونه بعد ماسكر وراه الباب. كانت الصالة الفوقية خالية مافيها أحد والبنات كلهم قاعدين تحت. ماكان عارف وش يسوي متملل واااايد ولايعه جبدة من القعدة بالبيت حب إن يغير جو فقرر انه يطلع ويرفه عن نفسه وخنقة البيت..!!

^^^^^^^^^^^^^^^^^^^^^^^^
كان قاعد ويافهد ومجموعه من الشباب الفاسد بشقة لعزوبية مالتهم، إنتبه لتلفونه اللي كان بيفطس من الرنين..!! قاام وشاله كانت ميثة صارعته من الإتصالات شاله وبنبرة اللهفان:" هلا حبيبتي شفيج عسى ماشر؟"
ميثة:" هلا حبيبي لامافي شي بس بغيت أسألك فهد وياك؟ لأن سحر تسأل عنه وخايفة عليه."
عبدالعزيز وهو يأشر على فهد ويقول له إنها ميثة وتسأل عنه:" لحظة حبيبتي أشوف دقيقة من على الباب."
ميثة:" اوكي."
وبسرعه راح قال له:" اسمع حبيبة القلب تسأل عنك ومطرشة ميثوو تسألني عنك، شقول لها؟"
فهد واللي بسرعه يستحضر الأفكار:" أممممم قول لها اني مريض وبالشقة صار لي يومين."
عبدالعزيز واللي فهم غرضه من هالجذبة:" عفااارم عليك صج انك داهيه."
فهد:" بسرعه روح لاتشك بالسالفة."
عبدالعزيز:" اوكيشن." وبسرعه رد عليها:" أقوول عمري آسف تأخرت عليج."
ميثة:" لاعادي، بس ماقلت لي تعرف وين نلقى فهد؟"
عبدالعزيز:" ماقلت لج المسكين مريييييض وااايد وصار له يومين بالشقة قاعد وأنا الحين وياه ومن شوي توهم الربع طالعين وبعضهم قاعدين يزورونه."
ميثة:" وااعليه بسكر الحين وبتصل في سحر أخبرها زين عمري يالله مع السلامة."
عبدالعزيز وبيفطس من الضحك:" زين يااا... عمري."
وبس صكت التلفون وعبدالعزيز فالت روحه على الكنبه وفاطس من الضحك وهو يقلدها:" زين عمري يالله مع السلامة."
فهد:" هههههههههههههه مالت عليك على هالويه اللي عليك وش هالصوت."
عبدالعزيز:" لاتغلط صوت حبيبتي هذا هههههههههههههههههههاي."
فهد:" الله ياخذها على الشكل اللي عليها، والله كأنها أرقوز موآدمية من هالألوان اللي بويهها."
عبدالعزيز:" والله أخااااف منها اذا ماتصبغ ويهها تخرررع ."
فهد:"الله الحين تخرع من قبل لا."
عبدالعزيز:" لايااااحبيبي وقت الحاجة ههههع غييير...!!!!"
فهد:" أقووول قوووم نقعد ويا الربع لايسألون وينا."
عبدالعزيز:" يالله قووووم."
كانت نواياهم خبيثة وبنفس الوقت سحر وميثة كانوا خبيثات يعني تنطبق عليم الآية الكريمه (( بسم الله الرحمن الرحيم : الخبيثون للخبيثات والخبيثات للخبيثون ،، صدق الله العلي العظيم ))

^^^^^^^^^^^^^^^^^^^^^^^^
إتصلت على تلفونها بس ميثو ماكانت ترد وزااادت حيرتها وخوفها على فهد، ماكانت تدري وش تسوي ولاهي عارفة تتصرف. وبين ماهي تفكر سمعت دق على الباب كانت قافلته فأضطرت تقوم تفتحه كان أخوها فيصل خافت يوم شافته ليش ماتدري.
سحربإستغراب:" فيييصل..؟!!"
فيصل:" ايه فيصل، شفيج مستغربه؟"
سحر:" لا مومستغربة، تفضل ليش واقف بره."
فيصل:" مشكووورة."
سحر كانت متوترة وخايفة تتصل ميثة على التلفون وماتعرف تتكلم قدام أخوها، فقعدت على السرير يم تلفونها وحولته لصامت وقلبته على ويهه حتى ماينتبه له فيصل والشاشة تولع.
فيصل كان مقهووور من اللي صار ووده يعرف سبب رفض محمد لأخته:" سحر ممكن أسولف وياج شوي؟"
سحر:" اي عادي."
فيصل:" بسألج وأبيج تجاوبيني بصراحة وبدون لف ولادوران، ليش محمد رفضج؟"
سحر وجمعت دموووع التماسيح بعينها بسرعة البرق:" واذا قلت لك إني ماعرف السبب وأنا نفسي محتارة ليش رفضني."
فيصل:" سحر طالعيني، وحطي عيونج بعيوني."
رفعت سحر راسها وطالعته بعيونها اللي صاروا مثل الجمر، كان منظرها يخدع أي واحد مايدري هي وش مسوية ولايعرفها زين لكن فيصل كان يعرف أخته ويعرف حركاتها، بس هالمرة كان يحس إن إخته مظلومة وإنها انظلمت من أعز الناس.
فيصل:" عيل ليش رفضج؟ معقولة مني والدرب يسوي جذي الافيه سبب، واكيد انتي تعرفينه."
سحر:" والله العظيم مدري بشي ولاأعرف ليش رفضني، روح كلمه وأسأله ليش؟ يمكن أحد لاعب عليه والا مسوي له شي، جاي تسألني ياخوي ليش ماتسأله اهو." حضنت مخدتها وقعدت تصيح كان أخوها محتاربس كان لازم يروح يشوف محمد ويعرف منه السبب لأن مومعقولة يصير بأخته جذي ويسكت..!!
طلع من الحجرة وتركها بروحها، بس طلع رفعت راسهاومسحت دموع التماسيح وهي تقول لنفسها وتتوعد:" أنا تسوي فيني جذي يامحمد، لكن اذا مادمرت حياتك وخليتك تندم على الساعه اللي رفضتني فيها ماكون سحر، انا اطيح دموعي هذر علشانك تخسي..!! أنا اللي غلطت وقبلت فيك كان المفروض أرفض لكن آآآآآخ التمني مايفيد الحين بس الأيام بينا وبتشوف."

^^^^^^^^^^^^^^^^^^^^^^^^
اليوم يوم سعدها وأخيراااا راح تتحقق أحلامها، الملجة اليوم وبطير من الفرحة>> الله يطيرها بنار جهنم..!! كانت مزينة البيت ومعدلته وماخلت بخور الا وخلته << فطست اللي بالبيت. كانت أمها مستانسة علشان انها بتفتك من هالبيت النحس على قولتها، لكن هديل كان شعورها مختلف عنهم، كانت متضايقة وخايفة من اللي جاي. انتبهت على صوت أختها النشاز وهي تقول لها:" انتي للحين ماعدلتي نفسج، ماتبين اتيين وياي بخليهم يعدلون كشتج هذي."
طالعتها هديل بحمق:" اذا تبين روحي عدلي كشتج انتي والله شعري ناعم مايحتاج شي."
هدى:" كيفج بالطقاق اللي يطقج عمرج ماتعدلتي." واتباعدت عنها وهي جارّه وراها جيس وش كبره فيه أغراضها وفستانها مال الملجة:" يمه يممممه، انا بروح وياموزوو الصالون اتعدل زين."
أمها كانت بالميلس بس صوتها كان يوصلها:" زين روحي الله يوفقج."
وطلعت هدى وظلت أمها وعبود وهديل بالبيت، كانت أم عبدالله منعفسة فوق تحت قاعدة وتعدل وتشيل وتحط ومومخلية شي الاوسوته علشان تراوي الناس ان بنتها موأقل من غيرها!
هديل كان ضايق خلقها بالبيت ومومشتهيه اللي بالبيت، كانت تفكر بحياتها اللي جايه وشنو راح يكون مصيرها تحت إيدين أمها، وتذكرت شوق اللي كانت واعدتها انها تتصل فيها، رفعت السماعه ودقت على أرقام التلفون وياها صوت من زماااان ماسمعته:" ألوو.."
هديل:" السلام عليكم."
شيخة:" وعليكم السلام."
هديل:" شخبارج خالتي شيخة؟"
شيخة كانت شاكه بالصوت انها تعرفه بس مومتأكده:" بخير الله يسلمج، منو وياي؟"
هديل:" انا هديل ماعرفتيني؟"
شيخة بدهشة:" هديييييييل..!! هلاااا حبيبتي شخباااارج انتي وشخبار أخوانج؟"
هديل:"الحمدالله بخير نسأل عنكم."
شيخة:" وشخبار أمج؟"
هديل:" أمي مافي أحسن منها وخصوصاً اليوم."
شيخة بإستغراب:" ليش يعني؟"
هديل:" ماقالت لكم شوق ان اليوم ملجة هدى؟"
شيخة وبفرحة:" صج؟ مبرووك وعقبالج ان شاءالله."
هديل:" هااااااا...!!!"
شيخة:" شفيج ؟؟"
هديل:" انتي تدرين انها بتاخذ بوعمر؟"
شيخة من سمعت الخبر وقفت:" شنوووووووووووو...أبوعمر!!!"
هديل:" ايييه بوعمر، أدري شي ماكان متوقع ولاعلى البال."
شيخة:" وشلووون جذي مامنعتيها؟"
هديل:" حاولت بس مافيهم فايدة أمي وهي نفسها راضيين ومقتنعين ولايمكن أحد يغير رايهم، وانا مابيدي شي أسويه غير اني اسكت وأرضى باللي بتسويه بنفسها..!!"
شيخة:" لاحول ولاقوة الابالله، الله يهديهم ان شاءالله."
هديل:" الله يسمع منج."
شيخة:" زين أكيد انتي مومتصلة علشان تسمعين صوتي."
هديل:" ههههههههههه لاشدعوة."
شيخة:" لالالا أدري فيج الحين بناديها لج."
ودقايق وكانت شوق عندها:" ألووووو."
هديل بس سمعتها صاحت، ماقدرت تمسك نفسها:" شوووووق."
شوق واللي خافت من سمعتها تصيح:" خييير شصاير فيج؟"
هديل:" شوووق والله أبي اشوفج أبي أطلع من هالبيت واللي يخليج تعاااالي."
شوق:" ياريت يااااارييييت أقدر أيي وأشوفج وعبدالله، بس انتي تعرفين أمج."
هديل:" الله يخليج تعااالي بموووت بروحي بينهم، اليوم ملجة هدى وموقادرة أتنفس أحس اني بختنق."
شوق:"إسم الله عليج، انا ولاأنتي."
هديل:" بتيين الحفلة؟"
شوق:" ماأعتقد."
هديل بأسى وحزن:" واذا قلت لج انهاعزمكم بتيين؟"
شوق:" مدري."
هديل:" ليش تحاولين تتهربين؟"
شوق:" مااتهرب بس ماأقدر أيي خطوبة أختي اللي ماأتمنى لها التعاسة."
هديل:" هي اللي رضت فيه وودت نفسها لهالطريق، ارجووووج تعاااالي انتي والبنات."
شوق:" بسألهم، بس لاتزعلين ولااتضايقين اذا مايينا."
هديل:" مدري..!!"
شوق:" حبيبتي هديل علشاني لاتصيحين ولاتزعلين ، اللي اذا قدرت ايي بتشوفيني أول الواصلين."
هديل:" بنشووف." وسكتت ثواني وقالت:" يالله بسكر الحين شكل امي طلعت من الميلس، ماأوصيج لاتنسين اتيين."
شوق:" اذا الله أرااد ، يالله مع السلامة ولاتنسين اتسلمين على عبدالله."
هديل:" يوصل، مع السلامة."
وسكرت السماعة بعد ماحاولت تمسك نفسها عن لصياح ، لأن أمها كان يايه وشاقه الحلج من الوناسه:" هااا من كنتي تكلمين؟"
هديل ماتوقعت ان أمها شافتها:" هااا، هذي شوق."
أم عبدالله بعصبيه:" شنووووو؟ ومن قال لج تكلمينها؟"
هديل واللي تشجعت وقالت:" شفيها موأختي؟ قلت اتصل فيها وأعزمها على خطوبة هدى."
أم عبدالله فجت عينها وبطلت حلجها ع الآخر:" هاااااااااااااااا...!!"
هديل:" ايه يمه شفيها مافيها شي، وثانياً لازم نعزمهم لاتنسين شوق أختنا وتصير لهم بنفس الوقت."
ام عبدالله واللي حسبت ان بنتها تبي تحر شوق وتراويها ان هم موأقل منها ولاهي أحسن منهم:" اهااااا انا فهمت قصدج زين من هالدعوووة تبين تحرينها وتبطين جبدها."
هديل كانت بعيدة كل البعد عن هالتفكير السطحي لكنها حبت تساير أمها بالحجي:" ايه صح لسانج يمه."
أم عبدالله:" شكلج موهينه ياهديلوو بس آآآخ لواطيعيني كنا وصلنا العلالي."
هديل تكلم روحها:" الا بتودينا ف بلاوي...!! وادمرين حياتنا."
أم عبدالله:" الا انتي للحين مالبستي يالله قوومي جهزي نفسج لاأحد أيي ويشوفج جذي تخرعينهم بعدين..!!"
هديل:" زيييين يمه."

^^^^^^^^^^^^^^^^^^^^^^^^
وصلت هدى من الصالون كانت متغييييييييييره وااايد، هي صح صارت حلووة بس مثل مايقول المثل: السبال بعين أمه غزال..! بدوون مبالغه كان شكلها عااادي يعني أي بنت بتتعدل وتصبغ ويهها بجم لون بتصير حلووة..!! لكن سلاطة لسانها مازالت ماتغيرت وقلت أدبها:" هييييي عبووود شراااايك فيني موصرت أهبل."
عبدالله واللي يموووت على معاندها ومجاكرها:" تخرعين موتهبلين."
هدى:" أخرع بعينك ياثقيل الدم."
عبدالله:" موأكثر منج..!!"
كان عبدالله متعلم طوالة للسان منها ، ماكان جذي أبداااً تغير بس طلعت شوووق من البيت، قلة أدبه وطوالة لسانة كانت على هدى وبس..!! كانت هديل فوق تجهز نفسها وتلبس، خلصت بسرعه ونزلت وأول وجه تشوفه كان هدى اللي قاعدة اطالع روحها بكل تكبروغرور، هديل كانت إطالعها بنظرات شفقة وسخرية، سمعت صوت هدى اللي ماكلفت عمرها وطالعت إختها:" شراااايج فيني؟ موصرت أهبل والله وكأني موأنا أحس اني إنسانة ثانية."
هديل بصوت خافت:" الله يكملج بعقلج."
هدى والتفت لهديل تنتظر إجابتها لكن تفاجأها وذهولها خلاها تسكت وتبلع لسانها بعد، كانت هديل مثل الأميرات بالأحلام بسيطه هادئة وناعمة وملامح دافئة وجميلة..!! شعرها كانت مخليته على ظهرها مثل ستار الليل الاسود..!! أما الفستان اللي كانت لابسته جداااا بسيط بس كانت هي محليته أكثر وأكثر..!!
هدى أنقهرت منها واايد يوووم شافتها، نست كل شي غير ان اختها أجمل منها بمليوون مرة بدوون الألوان المائية اللي على ويهها..!!
هديل وبدون ماتبين لهدى إنها فهمت نظرات الغيرة والحسد بعيونها:" ماشاءالله وااايد صايرة حلوووة ياهدى."
هدى وتبي تبين إنها طبيعيه:" أدري من زمان مايحتاج تقولين لي."
ضحكت بنفسها، موتوها تسألها شرايج فيني..!! بس هديل حبت تقهرها شوي وتزيد حراق أعصابها:" أمممم هدى ماقلت لج أمي عزمت بيت بومحمد العاصي..!!"
هدى واللي انصدمت بهالخبريه:" لااااااااااا لييييييش..؟!"
هديل:" علشان تراويهم حلااااج وشلون صرنا وبنتصور..!!"
هدى:" بس أكيد بتيي وياهم لبقرة شوقووو وأنا ماحبها ولاأطيق أشوفها وبتنغص علي حفلتي."
هديل:" انتي شعليج منها خليها تولي."
هدى:"افففففففف وش هالبلاوي."
هديل:" عن إذنج بروح أشوف أمي."
هدى ظلت واقفة مكانها ومقهووورة حدها:"اووووه ، ياربي وش هالنحس حتى بحفلتي ماتخليني أتهنى واري وراي ماتفارق هالبقرة أبداااً، لكن ليش أحرق أعصابي أنا اللي راح آخذ بوعمر موهي، بس أخاف أتيي وتخرب علي..؟ لالا ماتقدر، بس هذي حية من تحت تبن..!! أففففف آخذ حذري منها أحسن."
هذا كان حالهم في بيت بوعبدالله شك وغيرة وحسد وكره أكبر ممايكون..!! وأحلااام مبنية على ظلمة ورماااااد آمال..!!

^^^^^^^^^^^^^^^^^^^^^^^^
بعد ماطلع من عند إخته سحر، قرر إنه يروح لمحمد ويشووف السالفة وينهي الموضوع، كان في باله ألف إستفهام وإستفهام مالهم جواب الامن محمد والا سحر اللي تنكر معرفة أي شي..
وصل البيت ودق الجرس ، فتحت له الخدامة وخلته يدخل..
فيصل:" ممكن تنادين لي محمد."
الخدامة:" أوكي."
دخل الصالة وقعد كان الكل فوق بحجرهم وماحد قاعد تحت، ظل قاعد لين مالمح محمد ياي..
محمد ومع محاولة بائسة للإبتسام:" هلا والله فيصل منوورالبيت."
فيصل:" البيت منور بأصحابه."
وبعد ماسلموا على بعض:" محمد مابي أطول عليك يمكن إنت عارف ليش أنا يايك البيت."
محمد:" أعتقد جذي."
فيصل:" زين يعني مايحتاج أبدأ من البداية ولانطول السالفة وهي قصيرة ممكن أعرف ليش سويت جذي؟"
محمد:" فيصل أختك ماتناسبني."
فيصل:" ماأصدق إنه هذا السبب، يعني معقوله ترفضها بنفس اليوم اللي اتقدمون فيه؟ ليش ماقلت لخالتي قبل لاتروحون بيتنا؟ لوبس حبيت تحرجها وتهينها قدام الكل؟"
محمد:" يمكن أنا غلطت بإني قلت رفضي بوقت غير منااسب بس هذا مايجبرني اني اوافق."
فيصل:" أنا موجاي لك علشان أقول لك تعال تزوج أختي ، أنا أبي أعرف السبب وبس."
محمد:" قلت لك السبب وماعندي كلام ثاني."
فيصل تضايق وااايد من أسلوب محمد ومن كلامه:" وكأنك قاعد تقول لي إطلع بره."
محمد:" حشى ماقصدت هالشي بس كل اللي اقصده ان السبب وعرفته ماأعتقد ان في شي ثاني ممكن أقوله لك."
فيصل:" ماأعتقد، وهذا انا أقول لك يامحمد ترى اذا عرفت إنك ظلمت أختي لاتلوم الا نفسك."
محمد:" اسمعني ياخوي انا ماظلمت أختك ولاأحب أظلم حد وانا لوماشفتها غير مناسبه ماترددت بلحظة إني اتزوجها."
فيصل:" والله انك محيرني، وش معنى يوم اللي تقدمت فيه رفضتها؟؟؟ ماأعتقدت إنك أخطأت إختيار الوقت أحس انك خاش عني شي وماتبي تقوله، اذا فيه شي ليش ماتقول لي صدقني ماراح أقول لأحد."
محمد:" آسف ماعندي شي غير اللي قلته لك إنها مومناسبتني فيه إختلاااف كبير بين تفكيري وتفكيرها، أعذرني يافيصل ماأقدر أسوي لك شي."
فيصل واللي ماتحمل كلمه ثانية منه:" هذا كل اللي عندك؟"
محمد:" ايه."
فيصل وبعصبيه:" مع السلامة يا....... ولد خالتي." وبسرعه طلع من البيت بعد ماصفق بالباب صفقة رجت الجدران..!! ظل محمد قاعد مكانه ويفكر بفيصل وطريقة تفكيرة:" إييييه يافيصل أدري تحب أختك بس ماأقدر أقووول لك، آآآآآآآآآآه ياااارب سااعدني وصبرني على اللي ياي."

^^^^^^^^^^^^^^^^^^^^^^^^
دخل البيت معصب حده ومتنرفز وكان قاعد ويحرطم، شافته نجود وإستغربت من حالته:"خير شفيك؟"
طالعها بنظرات إتهام:" أي خييير ايي من ورى أخووج شفتي شسوى؟؟"
نجود:" وأنت بعدك على هالسالفة، أكيد عنده أسباب خلته يرفض."
فيصل وانقهر زود من أسلوبها وطريقة كلامها:" أي أسباااااب يامدام تخليه يسوي اللي سواااه أي اسبااااب تخليه يرفضها يوم اللي يتقدم لها، ويجرحها قداااام الكل ويهينها."
كانت نجود مستغربة طريقته بالكلام وعصبيته الزايدة عن حدها، لأول مرة كان يصارخ بويهها ويقولها فووق كل هذا يااامدام..!!
نجود وحاولت ماتشعلها فوق ماهي مشتعله:" زين انت رحت سألتها؟ يمكن تعرف شي."
فيصل:" وش توقعين كنت قاعد أسوي رايح العب، سحر ماتعرف شي انتي لوشفتيها وهي تصيح ماقعدتي تبررين اللي سوااه محمد، لااااا ويوووم رحت لحضرة جنااابه وش تتوقعين قال؟"
نجود:" شنووو."
فيصل:" ماتناسبني، هذااا اللي قاله إنها ماتناسبه عذر أقبح من ذنب، وكأنه كان يتلاعب بمشاعرها المسكينة."
نجود:" حرااام عليك يافيصل تتهمه جذي يمكن فعلاً شاف انها ماتناسبه بس مالقى الفرصه المناسبه اللي يقول لها فيها انه مايبها."
فيصل:" روووحي زين انتي وتبريراتج ، هذا انتي وأخوج ، يعني تشوفين الفرصه المناسبه انه يقول لها بنفس اليوم اللي راحوا فيه؟ صدقيني اذا ماخليت محمد يتأسف ويندم على اللي سوااه في سحر ماأكون فيصل."
خافت من كلامه وتهديداته ماكانت عارفة وش تقول له، محتااااره بين سحر ومحمد فعلاً كان شي يحير بالنسبة لهم.

^^^^^^^^^^^^^^^^^^^^^^^^
وأخييييييراً رد عليها:" هلا حبيبتي."
سحر:" هلاااا حياتي والله تولهت عليييك ليش ماقلت لي انك مريض؟"
فهد:" ماحبيت ازعجج وأخوفج أكثر."
سحر:" أنت ذبحتني يوم ماقلت لي."
فهد:"لهذي الدرجة تحبيني؟"
سحر:" أمووووت فيك."
فهد:" أحبببببج."
سحر:" وأنا أكثر."
فهد:" أبي أشووفج."
سحر:" من عيووووني..!!"
فهد بهاللحظة تأكد إن لحس عقلها خلااااص وإنها مستحيل ترفض له طلب، كان يلعب فيها مثل الكره بالضبط يشوتها وترد ترد له..!!
فهد:" اتيين لي الحين الشقة؟ "
سحر:" شلووون ماأقدر أطلع بروحي، والسايق ماأقدر أخليه يوصلني عندك."
وبس كملت جملتها والا باب حجرتها إنفتح كان أخوها فيصل، حست بذيج اللحظة إنها قلبها طاااح في بطنها...!!
فيصل:" تكلمين منووو؟"
سحر:" رفيجتي."
فيصل:" زين أبيج بعد شوي."
سحر:" زين بييك الحين."
سكر الباب ونزل تحت، وعلى طووول ردت على فهد:" ألووو حبيبي هذا أخوي يبيني شووي أرد اتصلك بعد شوي وأكمل إتفاقنا."
فهد:" أحببببببج."
سحر:" ههههههه، أقول لك أخوي تقول لي أحبج."
فهد:" أدري سمعتج بس اانااااا أحبببج."
سحر:" وأنااا أموووت بحبك."
فهد وبقلبه:" آآآآآمين ونفتك...!!" ورد قال لها:" زين عمري يالله روحي له لاتتأخرين وردي بسرعه."
سحر:" أوكي دقايق يالله باااي."
فهد:" بااااي."
بسرعه سكرت تلفونها ونزلت لأخوها تحت كان قاعد ويفكر بس شافها ناداها:" تعاالي بسرعه أبيج بموضوع."
سحر:" خير شصاير؟"
فيصل:" أنا رحت لمحمد من شوي وكلمته."
سحر:" وبعدين؟"
فيصل:" تدرين وش كان سبب رفضة؟"
سحر:" أكيييد لا، شنووو؟"
فيصل:" انج ماتناسبينه."
سحربإستغراب:" هااااااااا...!! ماأناسبه؟ شلووون وهو اللي طول عمره كان يقول محد يفهمني غيرج."
فيصل:" وهذا انا اللي مستغرب منه، انتي متأكده انج ماقلتي له شي خلاه يرفضج بهالصورة؟"
سحر:" صدقني ماسويت ولاقلت له شي."
وقبل لايتكلم دخلت أمه الصالة بعد ماسمعتهم يتكلمون:" وأنت تعتقد إن اختك كان ممكن تسوي شي، هذي بنتي وأعرفها زين."
فيصل:" عيل يمه ممكن تقولين لي ليش سوى جذي."
أم فيصل:" أيييه أعرف."
سحر وفيصل طالعوها بإستغراااب:" شنوووووو..؟؟"
أم فيصل:" شووووق ."
فيصل:" شووووق.؟"
أم فيصل:" ايه شوووق بنت بوعبدالله الخلفان، هي السبب."
إستغربت سحر وصول هالفكرة براس أمها، حست بذيك اللحظة إن تفكيرهم كان واحد..
فيصل:" شلووون والبنت ماصار لها فترة في بيت خالتي."
أم فيصل:" ولو هذي بنت العقربة بدرية وشوق مهما كان بنت أبوها، خبيثة أكيد ، انت ماشفت شلون تغير محمد فجأة من دخلت بيتهم ، أنا قعدت أفكر وإستنتجت انها هي اللي مخربة بينهم ولاعبة بعقل محمد."
فيصل وبعدم إقتناع:" يممممه محمد موياهل ينلعب بعقله."
سحر:" انت ماتعرفها حية من تحت تبن أكييييد كانت تسوي له أشياااء ومحد يدري فيها، تتمسكن لين ماتتمكن."
أم فيصل:" أي تسوي نفسها البنت الطيبة وتغافل الجميع وتحاول تخرب على بنتي لكن حريمتها ماأخلي تنفذ اللي براسها."
فيصل:" لاااا مااعتقد إن هذا سبب رفض محمد أنا قلبي حاس ان في شي غير."
أم فيصل:" لاياولدي مافي شي غير هذا السبب ، وأعتقد انها موبس لحست عقل محمد الا عقولهم كلهم."
سحر:" انت ماتشوفهم شلون يحبونها ويخافون عليها وعلى مشاعرها ماكأنها داخله بيتهم من جم شهر بس."
فيصل:" معقووولة؟!"
سحر:" الامعقولة ونص، عيل ماتفسر تصرف محمد ، أكيد هي اللي قايلة له يرفضني بهالوقت بالذاااات ، لا وحب يراويها جرأته خلوها اتيي وياهم."
فيصل:" لالا وش تخربطون انتو ماأعتقد محمد يسوي جذي"
أم فيصل:" اذا مايسوي جذي عيل وش اللي يسويه ها؟ ماتقول لي؟"
فيصل:" مدري، بس انا اللي باط جبدي طريقته بالكلام وياي حسيته وكأنه يطردني من بيتهم يمه."
أم فيصل:" شفت هذا أكيد هي اللي وازته وتبي تخرب بينا وبين بيت أختي."
سحر:" هو وش قال لك بعد؟"
فيصل:" قال ان انتوا مو مناسبين لبعض وان كان صح غلطان بإختيار الوقت اللي قال فيه الخبر بس هو مومجبور إن يوافق، وقال هذا اللي الكلام اللي عندي وماعندي شي أقوله."
أم فيصل:" ياحسااااافة عليك يامحمد ماهقيت ان وحده مثلها تلعب عليك..!!"
سحر:" شفتي يمه، انا قلبي كان ناغزني من أول ماسمعت إنها دخلت البيت، بس ماسمعتوني وقلتوا لي البنت طيبة وزينة وحراام ومدري شنوو ، وهذي آخرتها وياها."
أم فيصل:" اي والله ياحبيبتي ماسمعنا كلامج، انا بعد كنت خايفة منها وقلت لأختي بس قالت لي لا البنت ماعليها حجي وأخلاقها زينة."
فيصل:" حرااام عليكم يمكن تظلمون البنت."
أم فيصل:" انا ابي اعرف انت ويانا والا وياهم؟"
فيصل بإستغراب:" شنو ويانا وشنو وياهم هي حرب يمه؟ كل اللي في الموضوع ان محمد خاش علينا شي ومايبينا نعرفه بس."
أم فيصل:" اسكت انت بس ماتعرف تفكر ولاتعرف تشوف، احنا الحريم نعرف لهالسوالف وباجر بتقول لي والله وصدقتي يايمه."
هذا كان تحليل أم فيصل وبنتها اللعينة..!! شوق ماكانت تدري بشي عن الشتيمة اللي دايرة عليها والأفكار السودة اللي ملت بعض قلوب اللي حولها..!! والخافي أعظم..!!

^^^^^^^^^^^^^^^^^^^^^^^^
رجعت لحجرتها بسرعه بعد ماطلع فيصل من البيت ، واتصلت بفهد اللي كان ينتظر اتصالها على أحر من الجمر..
فهد:" وينننننننج؟"
سحر:" هلا حبيبي آسفة تأخرت عليك."
فهد:" خوفتيني."
سحر:" شدعوة وين كنت بروح غير لأخوي."
فهد:" أدري، بس بعدج عني يخوفني ويشوقني لج أكثر وأكثر وأكثر."
سحر:" ياعممممري أنت."
فهد:" والحين ماقلتي لي متى بتيين؟"
سحر:" قلت لك ماأقدر الا اذا طلعت وياميثة أخليها توصلني."
فهد:" اي يعني متى بتقولين لها؟"
سحر:" مدري باجر شرايك؟"
فهد:" ياليت اليووووم."
سحر:" حبيبي صدقني اليوم ماأقدر، زحمة شوي عندي خلها لباجر وأوعدك أني ماأخلف وعدي وأييك بأسرع مايمكن."
فهد:" ترى وعد الحر دين عليه."
سحر:" من عيوني."
فهد:" تسلم لي عيونج ياحياتي انتي."
سحر:" أحببببببببببببببببببببببببببببك."
فهد:" وأنا أموووت فيج وانتظرج باجر بأسرع مايمكن."
سحر:" لاتستعيل."
فهد:" مشتتتاااااق لج وايد، الظاهر انج مومشتاقة لي."
سحر:" غلطااااان ودي اييك الحين قبل باجر."
فهد:" لو يصير صج اتيين؟"
سحر:" أكيد."
ظلوا طووول الليل يسولفون بسوالف مالها معنى وبعيدة عن الحياء كل البعد، كانت سحر كل يوم عن يوم يزيد دمارها أكثر وأكثر.

^^^^^^^^^^^^^^^^^^^^^^^^
كان قاعد ينتظر أبوه يرد من الشغل، ويضرب أخماس بأسداس ويفكر شلون بيبدأ الكلام وياااه كان خايف أن ابووه يرد له هالطلب اللي كان ينتظره أكثر من سنتين..!!
دخل الصالة وكان سيف قاعد بروحه ينتظر:" سيف وش مقعدك بروحك هني؟"
سيف:" هلا يبه، لا بس كنت أبيك بموضوع ممكن أكلمك فيه على إنفراد؟"
بومحمد طالع الصالة اللي ماكان فيها أحد غيرهم:" أعتقد ان احنا بروحنا."
سيف من كثر خوفه وتردده قام يقول حجي موبمكانه << الله يعينه خخخ ،، قعد بومحمد على الكنبه اللي مقابل سيف:" اقعد شفيك واقف."
سيف بتوتر:" هااا، اي اي الحين اقعد."
بومحمد:" يالله قول شعندك؟"
سيف:" أ.... أممممم ...!!"
بومحمد:" شفيك تبي فلوس؟ ناقصك شي تبي شي؟"
سيف:" لالا."
بومحمد:" عيل قوول تراني تعبااان وأبي أرتاح."
سيف وبدون مقدمات فجرها بويه أبوه:" أبي أخطب."
بومحمد مايدري يضحك والا شيسوي كان سيف يقولها وهو مغمض:" زين شفيك جذي خايف."
سيف:" منو؟ انا؟؟"
بومحمد:" عيل أنا."
سيف:" شقلت يبه؟"
غمض عيونه وظل ساكت يفكر ، سيف إحتار موعارف وش يسوي يقول يقعد، خاف انه يرفض وتبوء محاولته بالفشل << حلووة تبوء هذي.
وفجأه فتح عيونه:" سيف."
سيف بخوف:" آمر يبه."
بومحمد:" تقصد نورة بنت بوناصر صح؟"
سيف وقف قلبه شلون يعرف أبوه إسمها؟:" ايه يبه صح اللي تقوله."
بومحمد:" على بركة الله باجر أتصل في بوناصر، ونخطبها لك."
سيف واللي مومصدق انه وافق بهالسهوله هذي:" صج يبه، الله يخليك لنا ياااااارب." وقام وحب راسه وطاااار بسرعه فووق يبشر أخوووانه.
أما بومحمد كان فرحان لأن واحد من عياله كبر وقرر ان يتحمل مسؤلية بحياته، وبنفس الوقت كان متضايق لأن أكبر عياله هدم أول حلم كان وده يحققه.!!

^^^^^^^^^^^^^^^^^^^^^^^^
بذيك الليلة ظلت صاحية طووول الليل ماعرفت تنام وظلت بعض الأفكااار السودة تحوووم براسها:" آآآآآه يااااارب إرحم عبدك الضعيف." شوق كانت تفكر بإختها وباللي قاعد يصير من حولها بهالبيت، كانت تشوف شلون حياة هالبيت بدت تتغير..!!
( ايييييه ياترى بقدر أخش هالسر لمتى؟ معقووله تنتهي هالسالفة على خير؟ انا وش ذنبي تلومني على اللي صااار؟ انا ماسويت لها شي ولاأذيتها، والا سحر معقولة توافق عليه بعد اللي قالته عنه، الله يكافينا شرها، باين عليها قووويه...." طالعت الساعه كانت 12:30 ، (أففف للحين مارقدت مدري شفيني هالأيام ماأرقد بسرعه، أقوووم أطلع شوي بالصالة بعدين أرد أدخل.) وفعلاً طلعت بعد مالبست شيلتها وغيرت هدومها مرة ثانية ولبست طوويل..!!
كانت الصالة ظلمة الا من بعض الأبجورات لمولعه حتى مايصير المكان عتمه. وصوت الهدوووء يعم المكان..!! طالعت المكان وإختارت كنبه مقابلة البلكونه اللي اطل على المسبح..!! كانت الكنبه كبيرة بحيث ان شووق يوم قعدت ماكانت تبين فيها..!!

بالطرف الثاني من الصالة وفي غرفة محمد بالذات، كان قاعد يفكر صعب عليه إن ينسى اللي صار بين يوم وليله..!! محمد بعد كان موقادر ينام، ضااايق خلقه من الأحداث الأخيرة ( ايييييييييه ياااارب وش هذا اللي قاعد يصير لي؟ انا شسويت علشان يصيدني جذي؟ كل حياتي كنت ماشي سيده، استغفر الله ربي شقاعد أقوول هذا مقدر ومكتوب ، بس اللي صار لي وياسحر بسبتها هي اللي جبرتني اسوي جذي، كانت تقدر تصبر واتحمل لكن الغرور عماها والأنانية ذبحتها..!! حسااافة عليج ياسحر حسااااااااااافة ماتمنيت ايي اليوم اللي نفترق فيه، كنت مابي غيرج شريكة لحياتي ذبحتيني طعنتيني.!! ) كان واااصل حده من التفكير وإعادة الذكريات والأيام اللي مضت، ماكان يقدر يتحمل أعصابة وصلت ع الآخر. طالع الساعه كانت 12:45 بالنسبة له توها الناس لأن ماكان يرقد أبداااااً..!! سحب عكازه وقرر إنه يطلع بره ويقعد بالصالة يغير جو هالحجرة اللي يخنق.
فتح الباب بالعدااال حتى محد يسمعه والا يقعد أحد..!! كانت الصالة هادئة جدااا ومحد فيها..!! سكر الباب وراه ووقف بمكانه ياخذ نفس عميق وكأنه عمرررره ماتنفس..!! طالع الصالة وطاح نظرة على الكنبه اللي مقابل الدريشة ، كان المنظر هناك وااايد حلووو وكل مرة يطلع فيها يحب يقعد هناك، مشى على راحته وهو يطالع القمر ، كانت السماء مثل السجادة الزرقاء ، مزخرفة بالنجوم والقمر كان بوسطها ، ياته الضحكة هذي كانت تخيلاته يوم هو صغير كان يتمنى يركض بهالسجاة الزرقاء ويجمع النجوووم..!! وصل عند الكنبه والمسكين كان توه بخلي العكاز على جنب وبيقعد تفاجأ بشوووق اللي كانت غايصة فيها..!!

ياترى شووق شنو راح تكون ردة فعلها؟ ومحمد؟ وبعيدااا عن هالمشهد سحر وفهد لوين بوصلون هذلين؟ وش راح يكون مصيره هالشلة الفاسدة..؟ وسيف ياترى راح يخطب بسلاااام والا فيه شي راح يعكر عليه فرحته؟؟ وشوق وأم فيصل؟ ومحمد ونجود؟؟ مشاكل وأبواب إنفتحت من دووون سابق إنذاااار..!! وش مصيرهالقلوب ..؟