مشكوورة عالقصة..

الله يسلمك أخوي
مشكوووووووووور

العفووووووووووووووووو

الجزء الثالث عشر

بس شافة طايح ركض له بسرعه:" محمــــد."
شوق كانت واقفة مكانها وموعارفة وش تسوي لكنها طلعت بسرعه تنادي خواته وراحوا لسمر بالمطبخ من الباب الخلفي للبيت..سحر بس سمعت حمد بسرعه سكرت التلفون وطالعت بالجهه الثانية محمد اللي كان على الأرض. حطت إيدها على حلجها وفجت عينها لأنها ماتوقعت تشوف محمد طايح على الأرض!!
حمد وهو يحاول يرفع محمد اللي أغمى عليه:" محمد، محمد شفيك؟؟"
سحر إنصدمت لما شافته عالأرض، وراحت يمهم:" حمد شفيه محمد؟"
طالعها بنظرات كره وإزدراء وبعصبيه:" وانا شدراني."
عصبت وبكل وقاحة:" شفيك تصارخ علي جذي واطالعني بهالنظرات كأني ماكله حلالك."
حمد:" سحر واللي يرحم والديج فكيني مووقتج." وتركها وحاول يرفع محمد ويسحبه لأقرب كنبه. وبنفس اللحظة دخل سيف وأحمد وبصوت واحد:" محمـــد..!!."
وركضوا له بسرعه وساعدوه بحمله، طالع سيف سحر وكان رافع حواجبه وبإحتقار وبنفس النظرات اللي طالعها فيها حمد..!!
أحمد:" شفيه؟؟ وش صار؟"
حمد:" مدري كنت توني داخل والا اشوفه طايح بالأرض."
سيف:" أكيد صادة شي خل ناخذة فوق أحسن." وهو يطالع سحربإزدراء..!!
سحر إخذت عباتها وطلعت من البيت.. وبطلعتها كانوا البنات بيدخلون الصالة من الباب الخلفي.. ولكن قبل لايدخلون خلوا شوق تشوف الطريج سالك لهم لأنهم بدون غطا وحمد داخل..
شوق:" دخلوا الظاهر اخذوه فوق بسرررعه."
سمر:"اوووكي يالله بسرعه قبل لايطلع حمد."
وبسرعه دخلوا وركبوا باللفت لفوق ، وبس دخلوا غرفة سمر لحسن حظهم طلع حمد.
سيف:" غريبة وش فيه؟"
حمد:"و الله انا يوم ادخل كانت شوق واقفة عند الباب وسحر كانت بالصالة الثانية بس هذا اللي اذكره ومحمد على الارض."
سيف:" زين والحين وش بنسوي؟"
حمد:" انت روح قول للخدامة اتييب له شي يشربة أكيد قعد انا بدخل له اوكي."
سيف:" اوكي ."
دخل وسأل أحمد:" شصار؟ قعد والا بعده؟"
أحمد:"والله فتح عينه وغمضها، حاولت اتلكم معاه بس مارد علي."
حمد وهو قاعد على طرف السرير يم راس محمد:" محمد، بومشعل تسمعني؟"
محمد يسمعه بس ماكان يبي يفتح عينه ولايبي يشوف أحد. كانت كلمات سحر مازالت تتردد على مسامعه:" إنسان معاق، محمد نسيته ومسحته من ذاكرتي..." كلمات مب قادر يتجاهلها ومستحيل يتجاهلها!!
أحمد:" خيوو محمد شفيييك؟؟"
بس محمد مارد عليه، ودقايق ودخل سيف:" يوود هذا الماي."
حمد:"عطني اشووف، محمد اصحى أدري فيك تسمعني."
فتح عيونه وظل يطالعهم بنظرات تايهه ومعذبة وبصوت تملأه العبرة:" خلوني بروحي."
حمد:" شفيك ؟ شصاير؟"
محمد وبنبرة حادة شوي:" خلوووني برووحي."
سيف:" يمكن تعبان خلونا نطلع."
أحمد:" انا رايي جذي بعد خلنا نطلع."
حمد كان يطالع محمد اللي كان يطالع سقف الغرفة ونظرات الألم واللوعة فيها، كانت الحمرة اللي بعيونه تزداد شوي شوي. وكان حمد حاس ان محمد فيه شي بس مب متأكد منه.
حمد:" توكلنا على الله."
وطلعوا من الغرفة وتركوا محمد لآلامة ولوعاته، غمض عينه وطاحت منه عيونه دمعه مليانه ألم، وحسرة!!كان لأول مرة يصيح.. الكلام اللي سمعه عمره ماتخيل بيوم انه يسمعه:" آآآآآآآآآآآآآآآه،، آآآآآآآآآآآآآه ياسحر ليييش؟ ليييييش سويتي جذي؟ هذا جزاتي؟ هان عليج كل شي ،آآآآآآآآآآآآآه ياسحر، شسويت لج حتى تجازيني بهالمقابل؟ وين حبج لي ، وتضحيتج كنتي تقولين عنها؟ والا كل هذا راااح من يوم تكسرت وقررتي بإنج تنهين القصة بنفسج؟ ذبحتيني ، وحطمتي صورتج اللي كنت راسمها بخيالي ورفضت أسمع كلام الغير علشااااااانج ياسحر..!!" وبلحظة غضب أخذ كوب الماي اللي يمه ورماه بالطووف..!! وأنّ من قلبه أنين كان لأول مرة يصيح بهذي الطريقة..!! حسافة تذرف دموع على إنسان مايستاهل..!!

^^^^^^^^^^^^^^^^^^^^^^^^^

وبالصالة فوق طلعوا البنات بعد مالبسوا شيلاتهم عن حمد، وكانوا الشباب قاعدين هناك بالصالة.
سيف:" ويييييين على الله رايحين؟"
سمر:" لمحمد نطمن عليه."
سيف:" ردوا لغرفكم مايبي يشوف أحد."
شوق كانت بالغرفة داخل لأن مو من حقها تروح تشوف محمد معاهم!
خلود بإستغراب:" وليش مايبي يشوف أحد؟"
أحمد وبعصبية شوي:" ماندري وبسكم اسأله ودخلوا داخل يالله."
دخلوا لغرفة سمر مرة ثانية وعلامات الاستفهام والاستغراب على وجوهم..
خلود:" شفيه هذا معصب، شمسوين له؟"
سمر:" شدراني علمي علمج."
بدور:" الا تعالوو وين سحر؟"
خلود:" ايه صج وين راحت؟"
بدور:" يمكن راحت بيتهم."
سمر:" غريبة وش اللي خلاه يطيح؟ وليش مايبي يشوف أحد؟"
خلود:" يمكن لأن شاف الزفته سحر تحت.."
قاطعتها بدور:" بلا غباء ويعني شافها بطيح حشى جني هذي."
سمر:" مو وقت استخفافكم لو سمحتوا."
كانت شوق ساكته وتسمع استفساراتهم وتحليلاتهم اللي كلها ماوصلت ولو لجزء بسيط من اللي سمعته:" ياااارب وش هالبلوة اللي انا فيها، ليش انا اللي دائماً اصير بهالمواقف لو مارديت ماسمعت كلامها اللي يسم البدن ولاأحترت هالحيرة . أخاف اقول لهم وتصير لي مشكلة ويا سحر انا في غنى عنها، وش آسوي والله أحترت..؟!"
بدور:" شوووقو شفيج ساكته؟"
شوق:" هاا، ولاشي أسمعكم."
بدور:" شكلج سرحانه أعترفي في منووو؟"
شوق:" موفي أحد ومو سرحانه."
سمر وهي إطالع الباب:" خايفة عليه وايد."
شوق:" ان شاءالله مافيه الا الخير."
خلود بعد صمت وتفكير عميق:" انا شاكة في سحر."
سمر:" أتحفينا ياأم الافكار والشكوك."
خلود:" أكيد نزل وتكلم معاها ولما أحتد الكلام بينهم قالت كلام يجرحة و..."
وقاطعتها سمر:" روووحي زيين مولهذي الدرجة محمد ضعيف أن كلام منها يخليه يطيح ويتعب بهالصورة هذي."
بدور:" يمكن كلامها صح ويمكن غلط بس أنا اعتقد انه تعبان وبس."
خلود:" والغريبة طلعت من البيت بعد ماشافت محمد طاااايح، أقووولكم يمكن أهي السبب."
شوق:" انتوا الحين تستنتجون ولاكلمتوه اذا صار بمزاج اوكي سمر تروح له وتسأله تشوف السالفة."
سمر:" مااعتقد، هو موراضي يشوف أحد وأول مرة يسويها!"
شوق ظلت بحيرتها كانت راح تتسرع وتقول لهم اللي سمعتها لكنها تراجعت عن قرارها لأنها ماتبي تسبب خلافات عائلية وتكون هي السبب فيها.
شوق:" عن اذنكم انا بروح لغرفتي."
بدور:"لحظة بيي معاج."
خلود:" وانا بعد بروح لغرفتي اوكي نلتقي بعدين."
شوق:" ان شاءالله."
وافترقوا وكل وحدة بالها مشغول بمحمد واللي صار له شي غريب، بدور وسمر يقولون انه تعب وطاح ، أما خلود فشاكه بالسالفة ومومقتنعه ، وشوق فكان عندها الخبر اليقين لكنها مترددة في انها تقول لبدرو والا لسمر.

^^^^^^^^^^^^^^^^^^^^^^^^^

طلع سيف وظل أحمد وحمد قاعدين بالصالة.. وظلوا اثنينهم ساكتين ويفكرون بمحمد وبعد فترة من الصمت..
أحمد:" الا ماقلت لي شيابك هني؟"
حمد:"هااا والله تصدق نسيت."
أحمد:"ههه مو منك من اللي شاغل بالك."
حمد:" والله محمد شاغل بالي غير أخوك اللي بطلع لي قرون براسي..!!"
أحمد:"هههههههههههه بعدين بناديك حمد بوقرون."
حمد:" باااايخة مثل ويهك أقوول خلنا نطلع بره ضاق صدري من القعدة هني."
أحمد:" اوكي يالله."
ونزلوا تحت وراحوا الحديقة بره.
حمد وهو يتمغط ويتثاوب:" ايييييه هني الواحد يقدر يتنفس."
أحمد:" ليش يعني داخل ماتقدر تتنفس؟ والا شكلك بتنام علينا."
حمد:"ههههه لااا مو قصدي بس داخل تعرف ملل هني على الأقل تشوف الطبيعه."
أحمد:"اهاااا زين يابوطبيعه."
ظل حمد ساكت ويفكر تذكر إن وجوده هني كان لغرض معين لكن اللي صار نساه ليش ياي. وبعد تفكير طالع أحمد وإبتسم:" أحمد بصراحة مدري شلون أبتدي وياك بس تذكر من كم يوم أخوك محمد يابني هني لموضوع يخصك إنت."
أحمد واللي صار قلبه يدق بسرعه:" اي أذكر خير؟"
حمد:" الخير بويهك، انا قلت لأختي مريم مثل ماقال لي محمد وردت علي الإجابة، أحمد ياولد عمي كل شي بهالدنيا قسمة ونصيب ومريم تعتبرك مثل أخوها يعني مثلك مثلي."
كان أحمد ساكت ويطالع الأرض، ماكان يسمع شي غير دقات قلبه اللي كل ماليها تزيد وتزيد وكأنها طبول الحرب!تجمعت بعيونه دموع ليش مايدري!! رفع راسه لحمد وبإبتسامة مليانه حزن:" ماعليه لاتزعج نفسك علشاني مثل ماقلت كل شي قسمة ونصيب."
حمد وكان حاس أن أحمد تضايق وحز في نفسه جواب أخته:" هذا العشم فيك ياخووي، وان شاءالله بتلقى البنت اللي تحبك وتحبها، يالله أنا أستأذن بس مااذكرك طمني على محمد اووكي."
أحمد:" ان شاءالله."
وراح حمد وترك حزن بقلب أحمد اللي ماتوقع هالرد هذا أبداً.. ظل قاعد مكانه ويفكر في مشاعرة وأحاسيسة إتجاه مريم اللي استحوذت على كل تفكيرة:" اييييه ماكل مايتمناه المرأ يدركه، بس ليش؟ معقولة تفكر بأحد ثاني؟ لالا مستحيل مريوم بنت عمي وأناعارف تصرفاتها وأخلاقها زين، بس شلون اقدر افكر بوحدة ثانيه غيرها، انا مانبض قلبي لها ومستحيل ينبض لحد ثاني غيرها، آآآآآآه ياالله .." حلم أحمد بأن مريوم تحبة وتكون زوجة المستقبل إنهدم ، لكن أحمد مستحيل يتخلى عن مشاعرة وحبه العفيف لها.

^^^^^^^^^^^^^^^^^^^^^^^^
سحر بعد ماطلعت من بيت خالتها.. دقت على تلفون ميثة:" الوووو هلااا وينج فيه؟"
ميثة:" بره وياعبدالعزيز ليش؟"
سحر:" حشى مو توج بالبيت مداج اطلعين؟"
ميثة:" وش اسوي خنقة بالبيت قلت أطلع، انتي وينج؟"
سحر:" طلعت من بيت خالتي، لوتدرين شصار."
ميثة:" شصاااير بعد؟"
سحر:" بعد ماسكرتي التلفون، مدري بالضبط شنو اللي صار بس كان محمد طايح يم الدرج وحمد يبي يشيله."
بدهشة:" طااااااااايح؟"
سحر:" اييييه انا انصدمت لما شفته، حاولت أعرف بس حمد الزفت قام يصارخ ولاأدري وش السالفة واللي كملها سيفووو بعد كان يطالعني بنظرات الكره والحقد، وطلعت من البيت من غير مااعرف السالفة."
ميثة:" وليييييه هذلين من وين طالعين لج، على شنو شايفين نفسهم، المهم يعني ماتدرين شفيه؟"
سحر:" ولايهمني، ولاأبي اعرف بعد، واصلا وجودي هناك كان غلط ولاعاد بنت السكير وجودها ملوووع جبدي ومكره البيت بوجودها."
ميثة بإستغراب:" بنت السكير؟ منو هذي بعد؟"
سحر:" هذي نسيبة ريل خالتي بومحمد ، مات ابوها وأمها ويابوها بيتهم والله حاااالتها حاله، بس بنت اللذين عليها جمااال."
ميثة:"هههههه يعني أحلى منج والاااا؟"
سحر:" تخسي الاهي أحلى مني، ولااتيي ظفر من أظافري..!!"
ميثة:"ههههههههههههههههههههه شفيج عليها جذي شكلج ماادانينها بالمرة."
سحر:" وووووع وش أدانيها، قمة في الوقاحة على شنو مدري ومسوية نفسها البنت الحكيمة المحترمة، ولاعندها ذووووق باللبس أبدااااااً ، وبالعربي الفصيح امبهدله."
ميثة واللي بتفطس من الضحك:" ليييش شصار بينكم؟"
سحر:" اففف سكتي عن طاريها ماحبها تقهر بمجرد النظر لها، اقوول اشوفج باجر والالا؟"
ميثة:" ايه يصير خير ."
سحر:"اوكي يالله بااااي."
رجعت البيت وكانت أمها وأبوها قاعدين بالصالة ...
سحر:" السلااااام عليكم."
ردوا عليها السلام، فصخت عباتها وقعدت يم أبوها..
أم فيصل:" شخبار بيت خالتج؟"
سحر:" زينين مافيهم شي.." وبعد ثواني وبدون إهتمام:" اي يمه نسيت اقول لج اليوم محمد طاح عليهم بالبيت مدري ليش."
أم فيصل وهي حاطة يدها على قلبها:" ووووي لييييش عسى ماشر؟"
سحر:" مدري، اتصلي لهم وسأليهم."
ابوفيصل:" قوووومي اتصلي وشوفي وش السالفة يمكن صاده شي."
أم فيصل:" ياحسرة ماطاح الايوم قالوا بيون يخطبون."
سحر بقلبها:" فككككككه"
أبوفيصل:" موهذااا وقته قومي اتصلي وخلي سوالفكم لبعدين."
ام فيصل:" زيييييين زيييييين."
وبعد دقايق رجعت لهم، بوفيصل:" بشري؟"
أم فيصل:" الحمدالله تقول خلود انه بخير بس تعبان شوي ماعليه شر ان شاءالله."
ابوفيصل:" ان شاءالله، هو يمكن تعب تعرفين حالته مايبيلها ذكاء."
سحر واللي ياتها الضحكة من كلام أبوها:" يالله انا استأذنكم بروح آرقد، تصبحون على خير."
بوفيصل:" وانتي من أهله يبه."
ام فيصل:" تعشيتي؟؟؟؟"
سحر:" مومشتهيه، تصبحين على خير."
أم فيصل:" وانتي من أهل الخير."
^^^^^^^^^^^^^^^^^^^^^^^^
صباح اليوم الثاني كأيب وحزين .. لمحة حزن كانت على بعض الوجوه..!! قلوب تايهه وقلوب في حيرة وحزن..!! الهدوووووء كان يملأ جو البيت ،، سمروأختها وشوق بغرفهم.محمد كان بغرفته مانام كان قاعد ويفكر بسحر وبالكلام اللي مثل السم..!! أما أحمد فكان حاله موأسوأ من محمد، ظل طول الليل يتقلب يمين ويسار، يفكر بمريم وردها اللي ماكان يتمنى يكون هذا. أما سيفووو فهذا كان هايم من البيت من صباحة الله، مايقعد أبدااا ولاأحد يشوفه..!!
أم محمد وهي تنادي الخدامة:"ميري ،، ميري....الله ياخذها وين طست هذي."
وطلعت الخدامة تركض بسرعه لها:" يس ماما."
أم محمد:" انتي وينج فيه صار لي ساعه أناديج."
الخدامة:" بره ينظف الحوش."
أم محمد:" انا موقايلة لج خلي تنظيف الحوش حق نادر>> الزراع ،، زييين روحي فوق قعدي لعيال ايوون يتريقون بتصير الظهر وهم للحين ماقعدوا."
الخدامة:" اوووكي."
وبسرعه راحت ،، وبويهها كانت سمر طالعه من غرفتها:" سمر ماما يقول نزلي تحت عشان في ريوق."
سمر:" اوووكي روحي قعدي أخواني."
ميري وهي ادق باب غرفة أحمد:" بابا أحمد، أحمد ماما يقول انزل تحت عشان ريوق."
ويالها جواب احمد اللي يرد من غير نفس :" مااااابي قولي لها مايبي."
وراحت لغرفة محمد ونفس الشي رد عليها بس بعصبية:" وانتي شتببببين، مااااابي."
ميري وهي تكلم نفسها:" مدري هذا بيت لخبط لخبط كل مايبي كيفه."
وراحت لخلود اللي فتحت الباب وكشتها قايمة فوق تحت:" خيييييير شتبين مقعدتني."
ميري واللي طلعت منها الضحكة غصب:"هههه خلود تعالي اكلي تحت ريوق."
خلود:" شفيج تضحكن سحيلة ذلفي بنزل بعدين، مايخلون الواحد ينام."و صكت الباب بويهها.
أما شوق فكانت قاعده بس ماحبت تطلع الا لما تقعد سمر والا خلود لأنها تستحي تنزل بروحها. ولما دقت الخدامة عليها الباب:" شوق يالله ريوق."
شوق:" زين سمر وينها؟"
الخدامة:" تحت ."
شوق:" اوكي الحين بنزل."
نزلت تحت وكانت سمر قاعده بروحها على الطاولة، إستغربت ماكان أحد قاعد وياها..
شوق:" صباااح الخير."
سمر:"هلا صباح النور.. صح النوم."
شوق:" هههههه صح بدنج، بس انا قاعده من زمان ومطالعت من الحجرة."
سمر:" يعني عيااارة والا دلع."
شوق:" لاهذي ولاهذي، كنت انطرج."
سمر:"اهاااا يعني دلع ، ستحين هااا."
شوق:" أمممممم اي."
سمر:" غريبة لامحمد، ولاأحمد، قاعدين هني."
شوق:" يمكن بعدهم نايمين."
سمر:" لحظة بسأل الخدامة كاهي يايه،، ميري تعالي وين أخواني؟"
الخدامة:" مدري كل واحد يصرخ مايبي مايبي خله يولي."
سمر:"ههههههههههههه تعصب اذا امي اطرشها فوق ولايرضون ينزلون يتعبونها المسكينة."
شوق:" هههههههه ماعليه خلها تسوي رياضة، الا خلود وينها للحين نايمة؟"
سمر:" لابتنزل اكيد."
وبعد دقيقتين بالضبط نزلت لهم:" صباح الخير."
شوق:" صباح الورد."
خلود:"وين أخواني..؟"
سمر:" مانزلوا تقول الخدامة مايبون."
خلود:"يه شفيهم اليوم محد يبي ينزل؟؟."
بس محد رد عليها وظلوا ياكلون وهم ساكتين وبعد عشر دقايق رفعت خلود راسها وطالعتهم:" بصراحة عندي احساس ان صاير شي واحنا ماندري فيه."
سمر:"وانتي للحين تفكرين؟"
خلود:" وليش ماأفكر، أخواني لأول مرة تشوفينهم مومتجمعين على الطاولة، وهذا مايصير الا اذا فيه شي، وهالشي هذا محد يعرفه غيرهم ولازم نعرفه."
سمر:"مدري يمكن اللي تقولينه صح، بس..."
خلود:" بس شنو؟ محمد طيحته غريبة أمس، وأحمد اللي من المغرب دخل حجرته وماطلع للحين مايصير ياسمرأكيد في شي."
شوق كانت محتارة وهي تسمعهم، تقول لهم والاتسكت وتدفن اللي سمعته للأبد بقلبها؟ والاتقول لهم وتريحهم من الحيرة اللي هم فيها.. لكن خوفها من المشاكل خلاها تسكت وخصوصاً إنها توها داخله هالبيت وماتبي تكون سبب في التفرقه بينهم..!

^^^^^^^^^^^^^^^^^^^^^^^^
قعدت من النوم والفرحة موواسعتها، اليوم راح يحددون يوم الملجة..!! قامت بسرعه من على السرير، رتبته ولأول مرة بحياتها!! طالعت روحها بالمنظرة وتقول لنفسها:" مدري وش كان عاجبة بالبقرة..! مع إني أحلى منها بمليووون مرة، بس يالله الحين أهي انتهت من حياتي وانا اللي راح اتزوجه..!!" هدى وماأدراكم ماهدى عمرها ماراح تفهم ولابتتغير..!!
وبسرعه غسلت ويهها ودخلت الحمام أخذت دووش سريع ونزلت تحت>> حال عليها يوم النظافة العالمي..!! وبصوتها اللي مثل الغراب:" يمـــه، يمـــه.. وينج؟؟"
وياها صوت الأم المصون من المطبخ:" بالمطبخ تعاااالي هني."
هدى:" صباح الورد ياأحلىىى أم..!!"
أم عبدالله:" صباح الخير، شخبارج اليوم؟"
هدى:" أحسن من كل يوم، أحس اني بطير يمه، بطييير من الفرحة وأخيييراً يه اليوم اللي راح يغير حياتنا الفقر هذي وانعيش بأحسن عيشة."
أم عبدالله وهي مستانسة لأنها قدرت تحقق وتتقدم ألف خطوة لقدام بعد وفاة بوعبدالله:" الله يدوومها عليج ونااااسة."
كانت هديل واقفة عندباب المطبخ وتسمعهم وهي تستهزئ من اللي قاعدين يقولون وناوين يسوونه:" والله غلللط اللي تسوينه ياهدى غلط ، اضيعين عمرج ويا واحد كبر ابوج."
هدى:" اششششش تكفين لاتعورين راسي، خليني انا مستانسة اليووم وادري فيج محترة وبتنبطين لأني بتزوج قبلج وراح آخذ واحد غني."
هديل وهي تبتسم لها بكل برود:" غلطانه، وأحسدج على شنو على شيبه." قالتها وطلعت من المطبخ وماعطت هدى فرصة ترد عليها.
هدى والقهر وصل حده:" يممممممه شوووفيها، تبي تقهرني وتبط جبدي، والله لوماهي أختي صطرتها وكفختها."
أم عبدالله:" ماعليج منها صبري علي شوي، بس تتزوجين بوعمر وشافت خيره عليها، وعلينا بتغييييير أكييد."
هدى:" مااعتقد هديل واعرفها مثل سحيلة، اهي اللي خربتها عليناالله ياخذها ان شاءالله."
أم عبدالله:" ماااااعليج منها الحين الله فكانا منها ومن بلاويها، سمعي إذا يه بوعمر سمعي أكيد بيسألج شنو تبين وماتبين، إنتي سكتي أنا اللي راح أتكلم."
هدى:" زين وش راح تقولين له؟"
أم عبدالله:" سمعيني الأكيد إنه ماراح يرفض لنا طلب وخصوصا انه متمسك بهالزيجة، بس الأكثر من هذا يابنتي انه ماراح يطلق زوجاته، بس راح أطلب منه يسكنج في بيت بروحج ولازم كل شي يوفره لج من خدامه وسواق وغيره."
هدى:" زين يمه، مابتسون لي حفلة؟"
أم عبدالله:" ياخبلة حفلة الحين؟ ابوج ماصار له سنة مانقدر، بس شي بسيط بالبيت وخلاص."
هدى واللي كانت تبي تعزم صديقاتها وتقهر بعضهم:"كان ودي بحفلة بفندق والا صالة."
أم عبدالله:" ماعليه بدال هالخساير خلي هالفلوس بجيسج أحسن لج."
هدى:" وانتي الصادقة يمه، زين متى بيي البيت؟"
أم عبدالله:" قلت له بعد صلاة العصر أحسن تعرفين مايصير أخليه أيي بليل."
هدى:" أحسن، يالله انا بروح تبين شي؟"
أم عبدالله:" لاياعمري تسلمين بس قولي لأختج اللي منسدحة لي بالصالة اتيي اتساعدني بالطباخ وتروح تخم الحوش."
هدى بإبتسامة خبيثة:" ان شاااااءالله من عيوني."<< عسى عينج البط .
طلعت من المطبخ وموقادرة تمسك نفسها من الفرحة ودها اطير،<<< وتنشدخ بالأرض.

^^^^^^^^^^^^^^^^^^^^^^^^
طلع من حجرته وحامل هموم الدنيا فوق راسة، أول شخص كان بويهه شوق اللي من شافته حاولت تتباعد بأسرع لحظة، كان منزل راسه ويفكر لكن مرورها يمه خلاه يرفعه لأنه تذكر شي لازم يسويه..
محمد:" شوووق ممكن لحظة؟"
وقفت بعد ماتجاوزت عنه بخطوتين وبعد مابلعت ريقها:" نع ... نعم؟"
محمد واللي كان مايبي يبين لها ضعفة وانكساره:" أرجوووج اللي صار واللي سمعتيه ذاك اليوم مابي أحد يسمع عنه ولايعرفه، انا ادري انج سمعتي كل شي، من جذي مابيج اتكلمين وخصوصا خواتي لاتيبين لهم طاري ولاتلمحين حتى لهم بأي شي."
شوق وبدون ماترفع راسها واطالعه:" ان شاءالله، في شي ثاني؟"
محمد:" سلامتج، عن اذنج."
ومشى محمد للحديقة حتى يبتعد عن الجو اللي يخنق داخل البيت.. أما شوق فبعد ماابتعد عنها اخذت نفس عمييييق وتنهدت:"أفففففففف طلع روحي."
ودخلت حجرتها وهي تفكر بمحمد وشكله اللي مايسر أحد بالمممممرة:" غريييبة ليش مايبي احد يعرف باللي قالته؟ هي الغلطانة موهو؟ المفروض مايسكت عنها، معقووولة حب أكثر من ثلاث سنين ينهدم بهالسرعه هذي؟وين الاخلاص وين الوفا؟ حسافة قلووب الناس مشغولة بالمظاهر والانانية وحب النفس بس، اما مشاعر الناس صارت لعبه بيدهم، مثل الكرة، والاقميص يغيرونه وقت مايبون والايرمووونه، اااايه الله يستر علينا ويرحمنا برحمته، مايستاهل محمد كل اللي صارله، كان مخلي أمله وقلبه بمكان غلط، لكن صج لي قالو الحب أعمى..!!" وفجأة تذكرت أختها هدى اللي قالت لها هديل انه بوعمر بيخطبها جريب وبسرعه راحت للتلفون واتصلت لها وكانت تتمنى ان هدى ماتشيل التلفون ولاخالتها، وخاب أملها لما سمعت صوت هدى:" ألووو ، ألوووو مااااترد؟؟"
كانت شوق خايفة ترد وتسكر هدى السماعه بويهها فسكرت الخط وقررت انها تتصل بعد ربع ساعه. واتصلت بعد مرور هالربع ساعه وهي تفكر بكلام محمد، وبأختها هدى. وأخيراً أحد ردعليها وكان عبوود:" ألووو.."
شوق:" الوو عبود حبيبي شخبارك؟"
عبود وبدهشة:"شوووووووووق."
شوق:"اي حبيبي هذا انا، شخبارك؟ وخواتك شخبارهم؟"
عبدالله:" كلنا بخير، ليش ماتمرين علينا، والا انتي الحين ماتحبيني؟"
شوق واللي دمعت عينها بسرعه:" لااااا بس انت تعرف اخاف ايي لكم وخالتي ماتستقبلني ان شاءالله مع الايام بزوركم لاتحاتي، الا وينهم الحين؟"
عبدالله:" مدري فيهم، أمي وهدى بالمجلس يعدلون المجلس بيي ابوعمر العصر."
شوق:" شنووو؟ حبيبي وين هديل؟"
عبدالله وهويأشر لهديل اللي كانت نازلة من فوق:" كاهي الحين يايه تكلمج."
هديل وهي تأشر له:" منوو هذي؟"
عبدالله:" اخذي هذي شووق."
هديل:" الووو عاش من سمع هالصوت."
شوق:"عاشت ايامج ياعمري، شخبااارج انتي؟ وحشتيني واااااااااايد."
هديل:" وانتي أكثر يالقاطعه، ماتسألين ولاتقولين عندي أخوان اسأل عليهم."
شوق:" والله موقصدي صدقيني دووم على البال انتو بس تعرفين مايصير كل دقيقة قاضبة السماعه ومتصلة."
هديل:" ماااعليه امززززح معاج، انتي شخبارج؟"
شوق وهي تتنهد:" خلج مني انا بخير، انتوا شصاير عندكم اسمع عبود يقول خالتي وهدى يعدلون المجلس بيي بوعمر؟"
هديل:"ااااااااايه خلاص ناويين ينفذون اللي براسهم، واليوم العصر بيي وبحددون كل شي."
شوق:" زين ماحاولتي تقنعينها، حرااام تضيع مستقبلها مع واحد كُبر ابوها."
هديل:" والله تعبت من كثر ماتحجيت بس مافيهم فايدة، لفلوس عمت قلوبهم وعيونهم، هدى تقول اني اغار منها ومابي لها الخير، وامي طبعاً وياها بكلامها، بذمتج هذلين شيتعدل فيهم."
شوق:"لاحول ولاقوة الابالله العلي العظيم،هديل حبيبتي سمعيني اهم شي انتي وعبود خلكم بعيد عنهم، وخصوصاً عن هذا بوعمرلاتحتكون فيه وايد يعني لاتقعدون معاه بمكان واحد حاولوا تبعدون هذا ماله اماااااااااان. وخلج دوم على اتصال وانا بعد ان شاءالله ماراح اقطع وبتصل لج ولعبود."
هديل:"ماتقصرين، الله لايحرمني منج ان شاااءالله."
شوق:" شدعوة ماسويت شي، وانتوا اخواني مايصير اتخلى عنكم."
هديل:"الله يخليج ان شاءالله و..." وقبل لاتكمل كلامها سمعت صوت هدى:" يالله شوق بسكر الحين هدى طالعة من المجلس."
شوق:" انتبهي لنفسج زين،مع السلامة."
هديل:" الله يسلمج."
وبسرعه سكرت السماعه وانتبهت لها هدى، اللي شافتها وهي تسكرها وبقلة أدبها المعتادة:" كنتي تكلمين منووو؟"
هديل:" موشغلج."
هدى وبقهر:" شنووو موشغلي؟ قولي منو كنتي تكلمين والا اخبر امي."
هديل:" قولي لها، لأن محد كانوا غلطانين."
هدى:" مااالت اي وين يتصلون دام اللي ترد صوتها يخرع الاوادم."
هديل:" احترمي نفسج هدايووو، انا أكبر منج واحترميني."
هدى:"هههههه احترمج، اقوول روحي بس كملي خبالج فوق وياأوراقج وكتبج اللي مامنها غير عوار الراس."
هديل واللي مااستحملت كلامها وقامت لها وعطتها كف على ويهها:" هذا علشان تحترمين اللي اكبر منج ولااطولين لسانج،ياقليلة الأدب."
هدى ظلت واقفة وحاطة يدها على خدها، وقبل لاتركب هديل الدرج كانت يد هدى ماسكه شعرها وساحبتها:" آآآآآآآآآآآآآآي."
هدى وبكل عصبيه وطوالة لسان:" ياحمــارة، انتي تمدين يدج علي." وظلت اتجر وتمشع شعر هديل اللي ماكانت عارفة شلون تبتعد عنها، وبصراخم وصياحهم ثنتينهم طلع عبود وهو مستغرب من اللي قاعدة تسويه هدى وركض لها وعضاها بذراعها وصرخت من قمة راسها ورفسته..!!
هديل بسرعه ركضت له وحضنته:" عبووود عسى ماتعورت."
عبود:" لا، بس هذي يبي لها تأديب."
هدى:" تعااال ياالكـ....،،"
هديل ومسكتها من يدها قبل لاتضربه:" انتي ابداَ ماتستحين على ويهج." ودزتها على الارض وركبت بسرعه الدرج هي وعبود. لما دخلت الحجرة رمت روحها على السرير وتمت تصيح، ومارفعت راسها الا يوم حست بيد عبود تمسح على راسها، طالعته وحضنته:" حبيبي عورتك الزفته؟"
عبود:" شووووي بس هي ليش طقتج وجرتج من شعرج؟"
هديل:" لأن عقلها صغير وماتحترم اللي أكبر منها ولاتحترم الغير."
عبود:" انتي ليش ماتقولين لي شصاير؟ "
هديل:" حبيبي مابي أعور راسك بعدك صغير."
عبود:" انا موصغير، أنا عارف وش اللي يصير بالبيت بس انتي ماتقولين لي شي."
هديل وهي تمسح دموعها:" ماااعليه خلها على الله، بس ابيك توعدني أنك ماتقرب منها ولاتعاندها هدايوو علشان لاتأذيك زين."
عبود:" بس اذا ضربتج انا بضربها، لازم اوقفها عند حدها."
إبتسمت له حضنته وتنهدت تنهيدة عميييقة وهي تقول بقلبها:" والا وكبرت ياعبدالله، الله يخليك لي ياااارب ولايحرمنا من بعض."

كانت حياتهم كل مالها تتغير سيطرة هدى وتسلطها عليهم وأمهم اللي مومهتمه بأحد غير هدى ست الحسن والدلال..!! اليوم راح تتحقق أحلام هدى وأمها بأنهم يغيرون حياتهم التعيسة بنظرهم..!! وباليوم هذا راح تتغير حياة هديل إلى تعااااسة..!!

^^^^^^^^^^^^^^^^^^^^^^^^
قعدت ويا أختها العنود بالصالة يطالعون مسلسل من المسلسلات المأساوية المعتادة..!! سمعت صوت تلفونها كان مسج واصلها فتحته وكان من فهد ( صباح الخير حياتي وحشتيني موت، محتاج لج وودي أشوفج اليوم وبأقرب وقت ممكن، انتبهي لنفسج بااي ) إبتسمت إبتسامة عريضة وكتبت لحبيب القلب مسج ( هلا حبيبي وأنت وحشتني أكثر، ماعليه راح أيي لك بالمول كالمعتاد ونتفق وين بنروح بعدين، نلتقي هناك بعد ساعه بالكثير باااي ).وبعد ماأرسلت المسج قامت، وإنتبهت لها العنود:" وين مابتكملين الحلقة؟"
سحر:" بشوف الاعادة الحين بطلع."
العنود بإستغراب:" بطلعين؟"
سحر:" أي بروح بيت ميثة بتغدى هناك وبقعد وياها لبعد المغرب ويمكن نطلع بعد."
العنود:" قلتي لأمي؟"
سحر وبكل ثقة:" أمي ماراح تقول شي، الحين بروح اقول لها."
العنود:"زين براحتج."
سحر:" أكييييييد براحتي." وراحت وثواني وهي داقة باب حجرة أمها.
أم فيصل:" دخلي."
سحر:" شخبارج يمه؟"
أم فيصل:" بخير حبيبتي."
سحر:" يمه أدري حبيبتي انتي."
أم فيصل:" خيييير شعندج اعترفي شتبين تقولين؟"
سحر:" يمه أبي اروح بيت ميثة الحين وبتغدى هناك وياها والعصر يمكن نطلع وان شاءالله مابتأخر وايد بعد صلاة المغرب ويمكن قبل أنا راده البيت."
أم فيصل:" لامافي تروحين اتغدين ببيوت الناس، ولاتنسين أن ابوج قايل ماتطلعين الظهر."
سحر:" عاااااد يممممه واللي يسلمج خليني اروح، واعدتها اتغدى وياها."
أم فيصل:" وليش توعدين قبل لاتسألينا؟"
سحر:" زين يمة آخر مرة وبالمرة الثانية اقولكم قبل."
أم فيصل:" مدري سألي أبوج."
سحروبكل دلاعه:" يمه تدرين بأبوي بالشغل يعني مابيعطيني ويه الحين يممممه."
أم فيصل:" زين بس تردين قبل أذان المغرب يعني العصر انتي راده موتخلينا نحاتيج."
سحر وهي حابتها على راسها:" من عيوني يالغالية."
وطلعت من غرفتها بسرعه وراحت تتصل لميثو، وفعلا اتفقت انها بتروح وياها المجمع وبعدين بتخليها ويا فهد. وبأسرع وقت كانت سحر وياميثة بالمول.
ميثة:"وأخيراااا شفتج وينج ماتسألين ماتمرين علي ،، لو خلاص كنسلتينا وماعاد لنا لزوم بعد حبيب القلب؟"
سحر:" واللي يسلمج حمدي ربج زين قدرت أطلع أمي مدري وش فيها مشددة علي."
ميثة:" يمكن سامعه شي؟"
سحر:" فال الله ولافالج، وثانياً لوسامعه ادري فيها بتيي لي وتسألني."
ميثة:" اهاااا ، زين شخبارج بيت خالتج؟"
سحر:" مدري فيهم، ومابي أسمع شي."
ميثة:" غريبة، زين ماتبين تسمعين أخبار محمد؟"
سحر:" وليش ماعاد له لزوم."
ميثة:" كيفج، ماقلتي لي متى بيي فهد؟"
سحر:" كاهو ياي."

ولفت راسها وشافته ياي صوبهم:" والله كشخة صاير شفيه.؟"
سحر:" والله حبيبي من زمان جذي كاشخ، انتي ماعندج نظر"
ميثة:" زييييين."
سحر:" سكتي وصل."
فهد": السلام عليكم."
سحر وبإبتسامه تسحر الكل الا فهد:" وعليكم السلام..!!"
ميثة وهي تغمز لسحر بعينها:" يالله أنا استأذن، متى تبيني امرج هني؟"
سحر:" بتصل فيج اوكي؟"
ميثة:" أوكي، باااي."
مشت وخلتهم اثنينهم قاعدين مع بعض، كان فهد يطالعها بنظرات شيطانية ويبتسم:" حبيبتي شخبارج؟؟"
سحر:" بخير دامك بخير."
فهد:" واذا قلت لج اني تعبان؟"
سحر:" سلامتك ياعمري شفيك؟"
فهد:" تعبان من بعدج لي، أبيج على طوووول يمي مانفترق أبداً."
سحر واللي كانت مصدقة كل حرف يقوله لها:" وانا بعد صدقني ماتغيب عن بالي أبدااا أشوفك بكل الوجوه، ماعدت أتحمل لمتى بنظل بعاد عن بعض؟؟"
فهد:" أدري يمكن طولت بس صدقيني انتي لي وانا لج ومستحيل اتخلى عنج ، انتي قلبي وحياتي اللي مستحيل استغني عنها." كان يقول هالكلام وماسك نفسه عن الضحك لأن مومصدق روحه انه قاعد يقول جذي.
سحر:" أتمنى نكون لبعض، لأن اللي بينا موشوي."
فهد:" اكييييييد مافي شك، بس عمري الحين وين تبينا نروح؟"
سحر وهي اطالع اللي حولها:" مدري أي مكان هادئ غير هني."
فهد واللي كانت ادور براسة افكاره الشيطانية:" زين قومي انا عندي مكان هادئ."
سحر:" يالله."
طلع وياها من المجمع رايحين للسيارة ، كانت هذي بداية البداية لنهاية سحر..!! ركبت السيارة اللي كانت جاماتها رايبون يعني لاحد يشوفها وهي داخل. كان فهد يسوق السيارة وسحر قاعدة اطالعه كان فهد شاب وسييييم وااايد ومستحيل اي بنت ترفضة..!! طبعاً هذا راي سحر اللي يهمها المظهر والثروة..!! وصل بعد ربع ساعه تقريباً لبناية وقف السيارة في واحد من الباركات المخصصة لهذي البناية..
فهد وهو يبتسم لها:" وصلنا."
سحربإستغراب:" وين؟"
فهد:" فووووق."
سحر:" لأ موراكبه."
فهد وهو يتحايل فيها:" حبيبتي، حياتي أنتي موقلتي تبين مكان هدوء، كانا يبتج مكان هادئ وحلووو ومحد بشوفج هني، وبتاخذين راحتج أكثر."
سحر وهي مومقتنعه:" لأ يعني لأ، مونازله ودني أي مكان الا هني."
فهد:" ياعمري وين تبين تروحين كل مكان فيه ناس، وانتي ماتبين تشوفين أحد يمكن يعرفج صح؟ فأنا يبتج هني أحسن صدقيني ماراح يصير فيج شي، يالله عاااااد."
سحر وهي اطالعه ومومتأكده من قرارها:" زين بس مابنطول."
فهد وهو شاق الحلق:" من عيوووني."
قبل لاتنزل من السيارة لثمت ويهها حتى لاأحد يعرفها، وبسرعه دخلت باب البناية، كان فخمة وراقية وااايد ماتوقعت انها بهالروعه. كانت الشقة مرتبه وحلووة، الأثاث اللي فيها كان فخم ظلت إطالع المكان وتتأمله، صارت تتخيل إنها عايشة ويافهد تحت سقف واحد وإنها ماراح تفترق عنه للأبد، إنتبهت من أفكارها وأحلامها على يد فهد اللي حطاها على جتفها:" وين سرحان الجميل؟"
سحر وبإبتسامة:" أبداً، بسألك هذي شقتك؟"
فهد:" تقدرين تقولين جذي."
سحر:" شلون؟"
فهد:" هذي مستأجرنها أنا وقايل للوالد أني أبي أستقل وأعيش بروحي، وهو اللي يدفع لي الإيجار على احساب الشركة."
سحر:" اهااا."
فهد:" زين عمري شفيج واقفة قعدي، والا موعاجبج المكان؟"
سحر:" لابالعكس، فصخت شيلتها وعباتها وظلت قاعدة يمه وحاطه راسها على جتفه."
كان الشيطان قاعد بينهم معاهم ومعشعش بقلوبهم وبجسدهم..!! ظلوا ساكتين فتره لين ماسمعت صوته يقول لها:" أحبـــج."
سحر:" وأنا أكثر."
فهد:" موأكثر مني."
سحروهي تبتسم له:" من قال؟"
فهد:" أنا أقول."
سحر:"ليش؟"
فهد وبكل خبث قرب ويه منها وحباها بخدها، ماكان يبي من هالحركة الا ان يحرك مشاعرها ويتلاعب فيها أكثر وأكثر، وصار اللي كان يبيه ووصل لمبتغاه، وطاح الفاس بالراس.

^^^^^^^^^^^^^^^^^^^^^^^^

دخل الصالة بسرعه وبدون ماحتى يسلم، وبروح فوق لأخوه أحمد.
شيخة:" حشى سلم عااااااااد."
سيف بدون مايدور لها:" سلام سلام..!!"
نجود:" يمه عليه شفيه جذي مايعطي ويه."
سمر:" شوفي وش عنده."
شيخة:" الله يعينه على حاله، الا شخبار بيت خالتي؟"
خلود:" مدري فيهم من طلعوا للحين ماردوا بيتنا مرة ثانية بس ذاك اليوم اتصلت تطمأن على محمد."
شيخة:" اهااا، الابسألكم ماسمعتوا أمي قالت شي عن خطوبة محمد والا لا؟"
سمر:" بلى، قالوا بيتقدمون بس أشوف السالفة سكتوا عنها يعني كان المفروض من ليلتين يروحون بيت خالتي بس مرض محمد وماراحو."
خلود:" الا شفيه محمد، يوم اركب اسلم عليه احس انه موطبيعي؟"
خلود وهي اطالع سمر:" والله من ذاك اليوم اللي يت فيه سحر البيت اهو طايح بالسرير ولاطلع الامرة مدري مرتين ولايرضى ياكل ولاشي."
شيخة:" هو كلمها؟ صار بينهم شي؟"
سمر:" مدري، احنا كنا بره تالي جتنا شوق وقالت انه محمد طايح يم الدرج، وسحر طلعت من البيت ماكانت موجودة."
خلود:" بس شوق كانت هني بالصالة، أكيد شافت شي والا سمعتهم؟"
سمر:"لاااا شوق مااعتقد مومن طبعها توقف وتسمع كلام الغير، الااذا انتي جذي وكل يرى الناس بعين طبعة " قالتها وهي تضحك عليها.
خلود:"اوووه وش قصدج انا اتجسس لاحبيبتي."
شيخة:" زين خلاص لاتصدعونا الحين، بروح اشوف وش فيه بعدين."
خلود:" بيي وياج؟"
شيخة:"لا مابي أحد."
خلود وهي مبرطمة:" زييين أكيد بتاخذين وحده هذلين المقعدين هني." وهي تأشر على خواتها.
شخية:" لاماباخذ أحد شفيج."
سمر:" الا تبي تلزق وتعرف وش صاير."
نجود:" وينها بدور وشوق؟"
سمر:" فووق قاعدين."
نجود:" هي للحين تستحي تقعد وياكم تحت؟"
سمر:" يعني شوي اذا متجمعين ويااخواني ماتقعد وايد خمس دقايق وتقوم تستحي وايد، واذا بس البنات احنا يعني عادي تقعد ويانا بس الحين خبرج وصلت رفيقة دربها بدور خلاص مابنشوف ويوهم."
شيخة:" سمر شخبارج نورة؟"
سمر بإستغراب:" وش اللي ذكرج فيها الحين؟"
شيخة:" يعني الاول اشوفج وايد تروحين بيتهم واهي بعد اتيي البيت الحين مااشوفها ولاأشوفج اتكلمين عنها مثل قبل، في شي؟"
سمر:" لامافي شي بس تعرفين الاجازة الحين مانشوف بعض وايد، ويعني مومثل اوقات الجامعه على طول وياها."
شيخة:" زين شخبارها بعد؟"
سمر:" اقووول خيو بدون لف ولادوران شعندج تسألين عنها؟"
نجود:" انا اعرف."
سمر:" شنو؟"
خلود:" يعني بذمتج ماعرفتي؟ انا عرفت شتقصد."
شيخة:" بل ياكلون الواحد بقشوره."
سمر:" اي اي عرفت شتبين بس مابقول لج شي."
شيخة:" سموورة حبيبتي يالله لاالحين سحبتج من شعرج ."
سمر:" سويها وتشوفين شسوي فيج."
نجود:" سمر بلا دلع يالله تكلمي."
سمر:" يه شتبوني اقووول ماعندي شي اقوووله."
شيخة وهي تتقرب منها:" يالله عاد حبيبتي انتي بسوي لج الكيكة اللي تحبينها."
سمر:" سوي الكيكة اول وبعدين بقول خخخخ."
خلود:" ماناقص الانحب ريولج."
سمر وهي مادة ريولها لها:" هاااج يالله حبيها."
خلود:" مالت عليج يالكريهه، باعديها عن ويهي."
شيخة:" انا اللي الحين بفطسها." ومدت يدها لرقبتها ومسكتها:" هااا الحين بتقولين والا لا."
سمر وهي تضحك:" اذا ذبحتيني مابتعرفين شي."
شيخة:" لا بعرف، بروح لنورة ."
سمر:" شعندج الحين يالله روحي لها."
نجود:" لاأختنا الحبيبة هني نروح لنورة شدعووة."
سمر:" زين خلاص بقول بس موعلشان اني خايفة منج، لابس مزاجي هو اللي قرر."
شيخة وهي تاركتها:" الله ع المزاج يالله قووولي لاالحين التمينا عليج كلنا."
سمر:" زين شتبون تعرفون؟"
شيخة:" كل شي."
سمر:" شنو كل شي؟"
شيخة:" يعني اللي تعرفينه قوليه."
سمر:"ماعرف شي غير ان المفروض بعد جم يوم يبي سيف من ابوي يتقدم رسمي لبيت نورة حتى يخطبونها له، بس تعرفين لازم يخطبون لمحمد أول بعدين بروحون لسيف، بس."
شيخة:" بس....؟!!"
سمر:" شتبين بعد ماعرف شي غير."
شيخة:" علينا."
سمر:" والله العظيم ماعرف شي ، واذا على بالج نورة بتقول لي أشياء خاصة فيها والا سيفوه بقول شي غلطانه."
شيخة:" اهاااا زين عيل، اهم شي انه يخطبها ويركد شوي."
نجود:" الله يسر لهم ان شاءالله ونفرح بأخوانا الباقي."
شيخة:" ان شاءالله."
ومرت سالفة ورى الثانية ونست شيخة تروح لمحمد وتشوفه وتسأله شفيه..!!! وبغرفة أحمد..
سيف:" انت شقاعد تقول وش تبي تسوي يعني تذل نفسك لها؟"
أحمد:" انا ماقلت جذي، انا أقول ان مريم ماراح تاخذ أحد غيري ولازم ألقى حل."
سيف:" اي احل واي طريقة، أحمد البنت قالت تعتبرك مثل أخوها لاأكثر ولاأقل، يعني ماراح تغير رايها. ونصيحة مني لاتحاول تتعب نفسك بنات الناس وايد يعني ماحبكت الا ويامريم."
أحمد:" أنت اللي تقول جذي؟ وين كلامك قبل أنا مستحيل اتخلى عن اللي أحبها و..."
وقاطعه سيف:" ياحبيبي ماانكر كلامك بس مو انها تعتبرني مثل اخوها واروح اغصبها يابنت الناس تعالي حبيني بتزوجج."
أحمد:" اوووووووووه ياسيف الله يخليك لاتقعد تعور راسي، تبي تساعدني أهلا وسهلا ماتبي بعد مشكور وماتقصر."
سيف:" ياأخي انت شفيك ماتفهم ، ثانياً أنا لأني أحبك وأخاف عليك قاعد أقول لك إبتعد عنها الله يرزقها ويرزقك."
أحمد:" مابي غير مريم."
سيف:" انا لله وانا اليه راجعون، انا مدري شلون أفهمك.." سكت سيف شوي وكان محتار شلون يقول لأخوه الكلام اللي يعرفه، لكن قطع حبل تفكيره صوت أحمد:" الحين بتساعدني والا لا؟"
سيف بعد تفكير وقرر إن يقول له اللي يعرفه:" أحمد أبي أقول لك شي بس مابيك تاخذ الأمور
بعصبيه."
أحمد رفع راسه وطالعه:" خير شعندك؟"
سيف وبشوية تردد:" أدري إنت تحب مريم وهي ماتحبك، وان اهي قالت انها ماتبيك لأنها تعتبرك مثل أخوها."
أحمد:" سيف بدون مقدمات وكلام انا عارفة ادخل بالموضوع."
سيف:" بس اللي ماتعرفه، ان مريم مارفضتك علشان إنها تعتبرك مثل أخوها لا، لأنها تحب شخص ثاني."
كانت كلمات سيف صدمة كبييييرة بالنسبة له، لأنه هذا آخر شي كان يتوقعه من ان مريم تحب انسان ثاني. كانت وايد أسئلة ادور براسه طالع أخوه بعيونه اللي تجمعت فيها لدموع:" مستحيل، من هذا؟ ومن يكون؟ وشلون؟ لأ مايصير، اكيد انت تبيني أبتعد عنها، حرااام عليك ياسيف تشوه صورتها."
سيف وبعصبيه:" حراااااااااام عليك انت، ياولد الناس البنت تحب غيرك يعني طلعها من راسك، وادعي لها الله يهنيها بدال ماتقعد مثل الحريم تندب حظك وحابس روحك مثل الحريم. ياأخي مريم في غيرها واحسن منها. صدقني بتلقى البنت اللي تسعدك."
أحمد وبصوت مبحوح:" خلني بروحي."
سيف:" لاحول ولاقوة الا بالله العلي العظيم، انت الظاهر مابفيد وياك الكلام وبترفع ضغطي، اقووم احسن."
طلع من الحجرة وخلاه والصدمة اللي تلقاها، كانت المشاعر اللي بقلبه متضاربة، أسئلة وايد مالقى لها أجوبه، حس نفسه ضايع بين نفسه ومريم..!! ماتوقع انها تحب واحد ثاني، وان الأمور بتنتهي بهالسهولة، وان الآمال اللي بناها بالأمس إنهدمت اليوم وبهبة ريح وحدة..!!
^^^^^^^^^^^^^^^^^^^^^^^^
دخلت غرفتها ودموعها مغرقة وجهها، لحسن حظها إن امها ماكانت بالبيت ولاأختها، رمت روحها على السرير وظلت تصيح وتفكر باللي سوته، ماكانت تتوقع إن الأمور راح تتطور وتوصل بينها وبين فهد لهذي الدرجة..!!
سحر وهي تفكر بحالها:" شسويت بعمري شسويت..؟! لازم اللي صار بينا محد يعرفه حتى ميثة، لأ لازم أقول لها علشان تساعدني والا أضيع أنا بروحي..!!شنو أضيع وأهي منو علشان تكون أحسن مني أنا راح اتصرف واطلع حل لنفسي..!! خلني الحين اقوووم اسبح." وهي قايمة سمعت صوت دق على باب غرفتها:" منوو؟"
وتفاجأت لما سمعت الصوت:" هذا انا أخوج."
مسحت دموعها بسرعه ورتبت نفسها وفتحت الباب:" هلا فيصل."
فيصل لاحظ لون عيونها الحمرة بس ماحب يسألها بالبداية:" شخبااارج يالغايبة؟"
سحر:"هااا انا؟"
فيصل:" لا الخدامة."
سحر:"أنا هني بالبيت يعني وين بروح."
فيصل:" شفيج؟ فيج شي؟"
سحر بخوف:" هااا لالامافيني شي، ليش؟"
فيصل بعد ماقعد على الكرسي اللي يم الدريشة:" لابس أحسج موطبيعه كأنج كنتي تصيحين؟"
سحرتفاجأت منه:" لااااااااا بس هذا الكحل كان داخل بعيوني ولماطيرته دمعت وصارت حمرة، بس مافي شي."
فيصل:" اها زين، زين ." وسكت ثواني ورد سألها:" وين أمي؟"
سحر:" مدري وين راحت."
فيصل:" ليش ماكنتي بالبيت؟"
سحر:" بلى، أقصد لا كنت في بيت ميثة يوم رديت ماكانت موجودة ولاالعنود."
فيصل:" سحر انتي للحين تماشين هالبنت؟"
سحرطالعته بإستغراب:" ليش يعني شفيها؟"
فيصل:" انتي تعرفين شفيها وماأعتقد ان لازم اذكرج كل مرة بسمعتها..!!"
سحر:" من قال لك هالحجي،اذا تقصد طلعاتها والا شكلها لاتخدعك المظاهر."
فيصل:" سمعيني ياسحر إحنا شباب وكل شاب يتباهى بطلعاته ومغامراته وياالبنات واللي يعرفها واللي طلع وياها واللي واللي، والناس تشوف مومغمضة..!!"
كلام فيصل خلاها تخاف وااااايد وتفكر باللي قاله ألف مرة، لكن الشيطان كان أشطر منها وعمى عينها وقلبها عن البصيرة..!!
فيصل:" سحر، سحر؟"
سحر بعد فترةانتبهت له:" هاااا خير؟"
فيصل:" أي خير؟ انتي شفيج سرحانه؟"
سحر:" لابس وحدة من ربعي عندها مشكلة وقاعدة أفكر في حل يمكن أساعدها."
فيصل وهو قايم بيطلع:" زين أخليج أنا بروح بيت خالتي ماتبين اتيين؟"
سحر:" لا مابي، بس سلم على نجود."
فيصل:" يوصل، يالله مع السلامة."
سحر:" مع السلامة."
كان راسها يعورها من كثر التفكير، بسرعه قامت وتسبحت واخذت تلفونها واتصلت لفهد، لكن فهد مارد عليها، حست بالخوف أكثر وأكثر وردت دقت عليه ثانية وثالثة وأخيراً رد عليها:" ألووو."
سحر:" هلا، وينك فيه ماترد؟"
فهد:" كنت بره ويابيتنا، آسف حبيبتي ماقدر أكلمج الحين بتصل فيج بعدين." وسكر الخط على طول حتى ماعطاها فرصة ترد عليه. كانت مستغربة من تصرفه، وظلت سرحانه باللي صار، وأخيراً اتصلت لميثة الشيطان الثاني لها..!!
سحر:" ألوووو."
ميثة اللي كانت نايمة:" بعدين بعدين."
سحر:" شنو بعدين أقول لج الو تقولين بعدين."
ميثة بعدين انتبهت لنفسها انها تتكلم بالتلفون:" هاا لالالا آسفة كنت نايمة."
سحر:" مفهية انتي ولاتدرين بالدنيا، مداج تنامين ماصار لج ساعه من تركتج."
ميثة:" زين هدي أعصابج شفيج معصبة علي جذي، قولي شتبين آمري."
سحر:" أبي أشوفج باجر ضروري."
ميثة:" وين ألقاج بالمول والا بالبيت؟"
سحر:" لابره مابي أحد يسمع أي شي من اللي بقوله لج، سمعي مابطول الحين أسمع صوت بره، بعد صلاة العصر اوكي لاتنسين."
ميثة:" اوكي يالله باي أبي أنام."
سحر:" زين لاتعورين راسي باي."
سكرت التلفون ودق باب حجرتها..
سحر:" الباب مفتوح."
دخلت أمها وهي مستانسة وااايد، كان عندها أخبار حلووة وااايد..
أم فيصل:" يمه سحر متى رديتي؟"
سحر:" من زمان بعد الصلاة على طول."
أم فيصل:" زين عندي أخبار بتفرحج."
سحر:" خير؟"
أم فيصل:" كنت في بيت خالتج وقالت لي أنهم باجر بيون يخطبونج لمحمد."
سحر كانت بوادي ثاني غير اللي أمها فيه، ماكانت فرحانه ولاكانت تسمع شي من اللي قاعدة تقوله لها.
أم فيصل:" هاا ارتحتي الحين وأخيراً بتم اللي تبينه."
سحر وبإبتسامة عريضة مصطنعه:" أي يايمه وأخيراً.."
أم فيصل:" يالله حبيبتي انا بروح أجهز العشا، ولاتنسين باجر جهزي نفسج زين."
سحر:" ان شاءالله يمه."
طلعت أمها وردت أهي لأفكارها:" يعني شلون الحين؟ خلاص مكتوب آخذ محمد، يوم اللي كنت أبيه كان مومستعد ولاعنده الوقت ان يخطب ويوم اني حبيت وكرهته وتركته ياي الحين يبي يخطبني، بس انا ماحبه ولاأبيه يكون شريك حياتي، أنا مابي غير فهد مصيري خلاص صار مرتبط فيه، وماراح أقدر آخذ أحد غيره..!!" وقفت تفكير وفجأة قالت لنفسهاو بصوت مسموع شوي:" خلاااااص لقيت الحل، باجر اذا يو البيت أقول لهم مابيه..!!"
هذا كان قرارها إنها تقول ع الملأ إنها ماتبيه وإنه مونصيبها..!! سحر ماكانت تدري وش مخبي لها القدر، وش اللي انكتب لها من اللحظة اللي هدمت فيها حياة هالإنسان..!!

^^^^^^^^^^^^^^^^^^^^^^^^
كان نور الشمس مالي البيت ع الآخر، الجو كان حار ورطب الصيف مهلك الكل والأجمع، كانت كل غرفة بالبيت تحتوي على سر من الأسرار الحلووة والتعيسة واللي ممكن تهدم حياة ناس..!!
أول وحدة كانت تقعد من النوم هي خلود، أول مرة بالتاريخ كان المفروض يسجلون هاليوم في كتاب غرائب وعجائب..!! والا صدق او لاتصدق..!! كانت قاعدة بروحها تفطر، والا سيف ياي وشعرة معفس وعليه جلابية النوم اللي ماغيرها من قعد..
خلود:" وش في شكلك جذي كأنك متهاوش وياقطو..؟!"
سيف:" موشغلج فجي مناك..!"
خلود:" بل.."
سيف:" وين أحمد؟"
خلود:" مدري فوق يمكن."
سيف:" ومحمد وينه فيه؟"
خلود:" هذا صار له جم يوم مايطلع من حجرته ولاياكل ولايبي أحد يدخل عليه."
سيف:" غريبة هذا من ذاك اليوم وحالة جذي منقلب أكيد صاير عنده شي ولايبي يقول."
خلود:" لحظة دريت ان اليوم بيخطبون سحر لمحمد؟"
سيف:" لاتوني داري؟ من قال لج؟"
خلود:" البارحة خالتي وياالعنود كانوا هني وأتفقوا على كل شي."
سيف:" ياسلام ومحمد بخبر كان، مايدري بتخطيطاتهم."
خلود:" لااهو من قبل متفق وياأمي والبارحة قالت لخالتي."
سيف:" اها،سمعي اذا احد سأل عني قولي طلع بروح لنواف زين يالله باي."
خلود بإستغراب:" تعااااال وين بتروح بثيابك هذي؟"
سيف واللي نسى يغيرهم، وهو ضارب بيده على جبهته:" اووووووووه نسيت زين ذكرتيني."
وهي تضحك:" هههههع اللي ماخذ عقلك."
سيف:" ها شقلتي."
خلود:" اقول روح غيرثيابك لااتأخر."
سيف:" على بالي بعد."
وهو رايح للفت بينزل طلعت بويهه شوق:" صباح الخير."
شوق وهي منزلة راسها:" صباح الخير."
بعد ماابتعدت قعدت تضحك على شكله لأنها أول مرة تشوفه جذي، ودخلت غرفة الطعامة وخلود بروحها، وبخطواتها الخفيفة:" بوووووووو."
خلود من الزهقة نقزت وبغت اطيح من ايدها كاسة الشاي:" بسم الله يالكريهه خرعتيني."
شوق:" افااا انا كريهه."
خلود:" اوووه موقصدي اللي فهمتيه بس.."
وقاطعتها:" هههههههه أمزح وياج ادري ماتقصدين، أولا صباح الخير وثانياً وين سمر للحين ماقعدت؟"
خلود:" لاللحين مدري وش فيها؟"
شوق:" قلتي للخدامة تقعدها؟"
خلود:" لاماقلت، حتى أمي للحين نايمة مدري وش فيهم اليوم."
شوق:" غريبة."
خلود:" اليوم بتيين ويانا بيت خالتي؟"
شوق:" لامالي سالفة أروح، انتوا خواته أنا شكو."
خلود:" يه شفيج انتي جذي كل شي اطلعين له ألف باب."
شوق:" شنوووو؟"
خلود:" انتي وحده من الأهل يعني عادي، انا بقول لأمي وأكيد عادي مابتقول شي."
شوق:" لا واللي يرحم والديج مابي لاتقولين لها."
خلود:" موكيفج زين بتيين يعني بتيين ويانا."

كان محمد قاعد على السرير وعيونه من ذيك الليلة عافت النوم..!! كان كل همه وتفكيره سحر وكلامها، كان يفكر بكلام الحب وإنها ماراح تتخلى عنه مهما كان، بهاللحظة بس عرف سبب تغيرها عليه، ليش كانت تعامله بجفا وبرود، الحين بس عرف انه أساء الإختيار وان حمد كان على حق يوم قال له انها ماتستاهلك..!! بس الحين شلون يواجه حمد ويقوله انك كنت على حق، وان كل كلامك كان صح، شلون يقول لأهله، والناس اللي تعرف انهم لبعض من يوم اهم صغااار؟! شلون..؟ وفجأة قرر إنه ينهي كل اللي هو فيه من حزن وألم، بهاللحظة قرر ان يوضع حل لهالمهزلة..!! << مثل ماسماها..!! دور تلفونه واتصل بأخوه أحمد..
كان أحمد قافل تلفونه وقاعد بحجرته اهو الثاني، فأتصل لسيف:" الوووو."
سيف:"هلا بومشعل."
محمد:" انت وينك فيه؟"
سيف:" بره ويانواف."
محمد:" وين أحمد؟"
سيف:" بالبيت حابس روحة بالحجرة مثل بعض الناس."
محمد واللي ماكان له خلق يسمع عتاب ولامزاح:" زين يالله باي."
سيف بإستغراب:" باي."
سكر التلفون وقام من على السرير، كان يحس رجايله ثقال وايد لأن من زمان ماحركهم ولامشى من أربعة أيام..!! طلع من حجرته وكانت بويهه سمر اللي كانت توها قاعدة من لرقاد:" صباااح الخير ياعريس..!!"
طالعها بإستغراب:" شنووو؟"
سمر:" من أقدك ياعم الليلة بيخطبون لك حبيبة القلب."
محمد حس بكلامها مثل السجاجين بقلبه، حاول يتمالك نفسه وإبتسم لها:" من قال لج هالحجي؟"
سمر:" البارحة كانت خالتي هني."
محمد:" وسحر وياها؟"
سمر:" لامووياها كانت طالعه وياصديقتها ميثة، لاتحاتي كل شي بيمشي تمام."
محمد واللي سرح شوي:" اهاا ايه تمام."
سمر:" محمد ماتبي تفطر؟"
محمد:" بعدين، بعدين." وقبل لايروح سألها:" وين شوق؟"
سمر بإستغراب لأن أول مرة يسأل عنها:" الظاهر تحت، تبي شي؟"
محمد:" اي ناديها انا بقعد هني."
سمر:" ان شاءالله." راحت يم اللفت ورفعت سماعه التلفون وقالت للخدامة تنادي شوق، وهي راحت تفطر.
محمد كان قاعد وقلبه شاب ناااااار، وبعد جم دقيقة كانت شوق يايه له قلبها شوي ويطيح في بطنها..!!
شوق:" السلام عليكم."
محمد بدون مايرفع راسه ويطالعها:" وعليكم السلام."
شوق:" خير ان شاءالله."
محمد:" الخير بويهج، قعدي ليش واقفة."
أخذت أبعد كنبه عنه وقعدت عليها:" تفضل تقول سمر تبيني."
محمد:" ايه، بس حبيت أذكرج ان الكلام اللي سمعتيه مابيه يطلع بره لأي أحد، وانا عارف ان الليلة بيتنا بروحون بيت خالتي يخطبون سحر."
شوق:" ان شاءالله ع البركه."
محمد واللي مايبي يسمع اي كلمة مبارك ولاشي:" سمعيني اذا سألتج سمر وش كنت أبي قولي لها اني أسألج عن أي شي، قولي لها عن بوعمر مثلا عن اي شي."
شوق:" ان شاءالله، في شي ثاني."
محمد:" لاسلامتج."
شوق:" عن اذنك."
محمد:" اذنج معاج."
راحت عنه وهي مومصدقة ان ماأغمى عليها من الإرتباك والخووووف..!! وتوها بتدخل حجرتها الاخلود وسمر بويهها:" بسم الله، خرعتوني."
سمر:" اعترفي وش كان يبي منج."
شوق:"هههههه اشوفج صرتي مثل بعض الناس."
خلود:" خلووود وش قصدج، فضووولية؟"
شوق:" انتي قلتيها انا ماقلت شي."
سمر:"لاوالله، ماني فضولية بس غريبة اول مرة يطلبج."
شوق:" لاكان يبي يسألني عن بوعمر."
خلود:" ووووع قطيعه ان شاءالله هذا اللي كانوا بعرسونج عليه."
وفجأة تذكرت شوق إختها:" ذكرتيني أمس راح يخطب اختي هدى."
سمر وخلود بإستغراب:" شنووووووو..!!"
شوق:" تعالووااا داخل الحجرة الحين بقولكم السالفة، ودخلوا ثلاثتهم وظلوا يسولفون عن السالفة، وبعد دقايق قالت لهم:" زين الحين بتصل بشوف شصارزين."
سمر:" يالله اتصلي بسرعه خل نشوف شصار."
خلود وهي تضحك:"ههههههه والله كأن فلم هندي."
سمر:"ههههه الله ياخذ ابليسج على هالتعليق." وهي تأشر لها إنها تسكت.
شوق:" الووو السلام عليكم."
هديل:" هلاااااااااااوعليكم السلام."
شوق:" شخبارج؟ وشخبارج عبود؟"
هديل:" بخيردامج بخير، شخبارج انتي؟"
شوق:" انا بخير، شخبار هدى؟"
هديل:"هدى وامي طالعين راحوا يشترون اغراض الملجة..!!"
شوق:"يعني خلاص مصممة تسوي اللي براسها."
هديل:"و اكثر من الأول وخصوصاً ان احنا بننتقل لبيت أكبر من هذا وبنعيش هناك، وبيكتب لها البيت بإسمها بعد مايتزوجون..!!"
شوق:" لاحول ولاقوة الابالله العلي العظيم، هالبنت بتضيع روحها ويااه."
هديل:"الله يهديها ان شاءالله، بس انا خايفة منه مااحس انه بني آدم عيونه زايغه..!!"
شوق:" اعوذ بالله منه، خلي بالج زين ومثل ماوصيتج لاتحتكين وياهم وايد خلج وياعبود بعاد عنهم، وتحملي فيه زين."
هديل وهي تمسح دموعها:" ان شاءالله من عيوني."
شوق:" تسلم عيوووونج، يالله انا الحين بسكر وان شاءالله بتصل لج مرة ثانية."
هديل:" ان شاءالله، انتبهي لنفسج وسلمي على البنات."
شوق:" يوصل، مع السلامة."
سكرت السماعه بسرعه واستلمتها سمر:" ها بشري؟"
شوق:" خلاص حددوا الملجة، وراحوا يشترون أغراض، وبتصير الخطوبة قريب."
خلود:" لاحول لله، والله انها انخبلت."
سمر:" خلووووود عيب."
شوق:" لاعادي ادري فيها انخبلت وانعمت بسبة لفلوس وصخ الدنيا..!!"
سمر:" الله يهديها ان شاءالله."
شوق:"ان الله يهدي من يشاء، ولكنك لاتهدي من أحببت، واتمنى من ان رب العالمين يهديها قبل اتضيع مستقبلها ويااه."
خلود:" ان شاءالله."

^^^^^^^^^^^^^^^^^^^^^^^^
مر اليوم بسرعه بدون أحداث تذكر، غير العصر تجمعوا كلهم بالبيت علشان بالليل بروحون بيت خالتهم حت يخطبون سحر، كانوا مستانسين وايد وأخيراً بصير عندهم عرس..محد كان يحس باللي بقلب محمد غير شخص واحد الااهي شوق اللي سمعت كلام سحر اللي مثل السم..!!كانت قاعدة وياهم وكلهم يسولفون ويضحكون، ومازن يلعب وياخلود.
شيخة:" وين محمد؟"
أم محمد:" فوق قاعد بغرفته."
شيخة:" بروح اشوفه."
نجود:" تعاالي بيي وياج."
شيخة:" زين تعالي."
أم محمد:" لاتبطون وتخلوني وياعيالكم يصدعون راسي."
شيخة:" زين يمة."
بدور:"يدتي حبيبتي من بروح وياكم بيت خالتي؟"
أم محمد:" كلنا بنروح مافي أحد بيقعد هني."
بدور وهي اطالع شوق:" يعني الكل بيطلع؟"
أم محمد:" اي ليش؟"
بدور وهي تأشر على شوق:" أي لأن بعض الناس مايبون يروحون يقولون ماله داعي."
أم محمد:" من قال جذي، لابتيي ويانا."
بدور وهي تكلم شوق:" شفتي بتيين غصباً عليج."
شوق واللي احترق ويهها:" انتي ابدااااً ماتيودين لسانج."
أم محمد:" شفيها يابنيتي انتي صرتي منا وفينا، مايصير بعد انخليج هني ونروح احنا."
ونطت خلود مرة وحدة:" انا قلت لها بس اهي مارضت."
سمر:" بل هي تلعب واذاينها هني حشى فاااار انتي."
خلود:" اسم الله علي، انا فاااار..عيل انتي شنووو."
أم محمد:" بس لاتعورن راسنا مانبي نروح مصدعين."
نزلت شيخة ونجود بعد ربع ساعه من راحوا لمحمد، كان طبيعي ولايبين عليه شي، حاول مايظهر لهم أي شي حتى مايشكون فيه ولايخرب تخطيطاته..!!
وبعد عشر دقايق إجتمعوا كلهم تحت بعد ماجهزوا نفسهم، حتى أحمد سحبوه وياهم مع ان كان تعبان من كثر السهر والتفكير بكلام سيف اللي قاله..!!ومامر وقت والا واهم قاعدين في بيت خالتهم سوالف وضحك ووناسة، كانت سحر بعدها فوق تجهز نفسها، لريال هالمرة اجتمعوا بالصالة الثانية ويا الحريم داخل البيت والكل كان قاعد ومتغطي.كانوا يبون الفرحة تكون بمكان واحد..!! نزلت سحر بعد ماصبغت ويهها بجم لون ولبست أحلى ماعندها..!!
وصوب لريال...
أبومحمد:" أنا أعتقد يابوفيصل انت تعرف احنا ليش يايين الليلة، ومايحتاج انطولها واهي قصيرة."
أبوفيصل:" اي مايحتاج ومدام لعيال كلهم موجودين خلنا نتوكل على الله."
كانت سحر قاعدة وتفكر بمحمد، شلون راح تقول لهم انها ماتبيه وانها مو من نصيبه..!!
وبعد خمس دقايق من تفكير متعب، سمعت صوت بومحمد وهويقول لهم:" يالله ياجماعه توكلنا على الله وماأعتقد ان أحد عنده إعتراض." وهو موجه كلامه لبوفيصل:" اسأل بنتك اذا هي موافقة."
أبوفيصل:" يبه سحر، انتي موافقة؟"
سحر كانت خايفة وموعارفة وش تقول لهم، وظلت فترة تفكر وتفكر وتعيد تفكير وكلهم كانوا يطالعونها وينتظرون الإجابة." بالجانب الثاني كان محمد يطالعها وهو يقول لنفسه:" بشنو تفكرين ياسحر؟ قوليها قولي ماأبيك وريحيني طلعي على حقيقتج."
وبعد إنتظار سمع صوتها:" اي موافقة." انصدم محمد من ردها عليهم ماتوقع انها توافق بعد الكلام اللي قالته، شلون بعيش مع وحدة ماتحبه وتكرهه..!!"
أبومحمد:" يالله توكلنا على الله."
وفجأة وقف محمد:"لحظة..."
أبومحمد:" خير ياولدي شفيك؟"
محمد وهو يطالع سحر:" انتوا أخذتوا رايها وماأخذتوا رايي."
أم محمد:" ياولدي مايحتاج احنا نعرف رايك، وش معناتها جيتنا هني."
محمد:" يمه خليني اكمل كلامي." سكت شوي وسند نفسه على العكاز أكثروقال:" انا مابيهااااا..!!" قال هالكلمتين وهو يضرب بعكازة بكل قوة ع الأرض، كانت صدمة للجميع.. كانت شوق قاعدة اطالع سحر واطالع عيون محمد اللي اشتعلت جمر..!! أبداً محد كان يتوقع الكلام اللي قاله محمد، رفضه لسحر كان موعلى البال ولاعلى الحسبان أبداااااَ..!! لكن كل شي تغير بهذي اللحظة..!!

نيران مشتعله ومشاعر متضاربة، أسرار كانت تحملها القلوب..!! وأقدار محتومة وإنكتبت لهم محمد وسحر ياترى شنو راح يصير فيهم؟؟ الأهل بعد رد محمد هذا اللي خل الصدمة تفتح أبواب وأبواب..؟! أحمد المسكين اللي كان يتوقع ان ممكن يخلي مريم تحبه بأي طريقة، وش راح يكون حاله؟ وسيفووه راح يقدر يخطب نورة بعد اللي صار؟؟ والا راح يأثر عليه..؟!