يوم أنا طالب هقيت اني عرفت،،
كل مافي الكون من سر الحياة،،
يوم أنا طالب تحمست ووعدت،،
اني أصلح ماتبين لي خطاه،،
يوم أنا طالب على الغيمه رسمت،،
ضحكة الدنيا على عذب الشفاه،،
يوم أنا طالب تخيلت وحلمت،،
اني ألبس من هدب شمسي عباه،،
يوم أنا طالب حسبت اني وصلت،،
أثرني مادست بالرجل الوطاه،،
وانتهى ربيع الأحلام وظهرت،،
أصدم الواقع ويصدمني عطاه،،
ينجرح شوف العيون الى التفت،،
كن في حجر العيون أكبر قذاه،،
ان بغيت أمشي لقيت اني وقفت،،
وان رفعت الصوت ماجاني صداه،،
الحقايق فاجأتني مابدأت،،
والزمان أسرع من اللي في رجاه،،
وانكسر غصن الخيال اللي زرعت،،
والتوى صدري على تسعين آه،،
لكن اني رغم هذا ماانهزمت،،
واستمريت ادعس على الشوك بحفاه،،
كلما زادت مواجيعي صبرت،،
بين ثلج وبين جمرات الغضاه،،
ماغلبت الوقت لكن ماانغلبت،،
أعتصر نبعي من بطون الصفاه،،
كلها لعيون معشوق عشقت،،
ديرتي ديرة رفيعين الجباه،،
في ثراها غالي احبابي دفنت،،
وفي سماها أجمع الحلم وهواه،،

منتديات مدرسة المشاغبين - الشعر و الشعراء منتدى للقصيد و القصائد النبطي و الفصيح البوح بالخافي