أنا من الناس الي يحبون يتابعون افلام المغامرات الاجنيه خاصه الامريكيه عشان اللغه مفهومه ..(( ايوا مفهومه والدليل يوم انك في امريكا وكنت في اللفت معك عجوز يوم تقول لها هوريو وقالت لك فاين قلت لها واي قصدك تقول الله يجعله )).:
المهم تأثرت مره في فيلم العراب .وحبيت ازور المناطق الي جاها العراب ..تقول هالعراب كنه .خالد بن الوليد احد رموز الجهاد والعزه والفخر ماهوب .خنزير كل حياته القتل والنهب والسلب..
المهم و بحكم اني فاقد البصيره وأي فيلم اجنبي يأثر معي ويعيشني في خيال واقعي .شلون تجي مدري المهم..شرت على خويا لي وقلت وش رايكم نسافر..ايطاليا ونشوف البلد الي فيها العراب .وناكل من ذا الاسبكتي والمعكرونه ..يقولون حتى ان حليبهم الصبح سبكتي معصور طويل الاجل.
.المهم ..واقوم انا واقوم واروح واشتري ملابس السفر ومن بينهم سيجار كوبي عشان احطه في طرف اثمي.
واقوم واقص تذاكري واخذ اثنيين من خوياي معي…. طبعا على حسابهم عشان محد يفهم غلط
وصلنا مطار روما وجلسنا ساعه عشان حنا نص لغه انجليزيه و ربع لغه ايطاليه والله ماخلي سوالف نص وربع لاحرمني ربي من شواية الخليج
المهم عطلونا اشوي عشان شكو ان حنا ارهابين والسبب واحد من خويانا كان يوم انه صغير يعبث بوجهه يقاله يعني انه شر وانه فتوة حارتهم المهم ان شكله كان باين عليه الرهبنه وقطع الطرق وتسبب في تعطيلنا ساعه كامله وبعد اشوي خلونا ا نروح بعد ماتاكدو ان حنا لانحذف لانلقط حصا

بعدها خذنا تاكسي ورحنا فندق في وسط روما وبدلنا ملابسنا وتغسلنا وقلنا نبدا السياحه..المهم رحنا ماخلينا مكان ويوم جا وقت الاكل قلت لصحابي وش رايكم ناكل سباكتي وبيتزا ومعكرونه ولازانيه خلونا نحس ان حنا في ايطاليا ديرة العراب..واقوم واطالع في وجيهم عقب ماقلت كذا ولا اقول في خاطري وين احس اني في ايطاليا وانا جالس اشوف وجيه تذكرني في معالم المنفوحه و الجراديه وطريق النعيريه
دخلنا المطعم وكنا لابسين كبابيس نقلد فيها غدوتنا العراب ولا ننسى السيجار الكوبي وجلسنا على طاوله وكنا كلنا في صوب واحد يعني على كرسي واحد تقول نستنى باص سيكيكو
المهم كان قدامنا طاوله فيها ثلاثه كانو مقابلين بعض بس يوم شافو المنظر وحنا جالسين جنب بعض حبو يتتريقون علينا قامو قلدونا وجلسو على صوب واحد وهم يضحكون ..وكان من بينهم واحد يمشي على زنده كل حارتناوبزرانهم وشيبانهم وأئمت المساجد والمؤذنيين
المهم كان جالس يناظرني ولا هو براضي يشيل عينه مني واقوم انا من الهبال واحط راسي براس سور برلين .وانا كلي ايمان ان القوة بالقلب ماهوب بالعظل.(( جات المتينه تفرح مالقت لها مطرح))
ويقوم ويناظرني واقوم واناظره والشر راكبه وشي بسيط راكبني
بس وقفت اشوي حبيت اسوي مفارقه بيني وبينهه فيما لو ضرب عندي الفيوزعندي لا سمح الله وقمت وضربته لقيت انه ثور استرالي وعلى يمينه فرس بحر امريكي وعلى يساره خرتيت افريقي .يعني الرجال متوسد النعمه .ويوم ناظرة لي انا وخوياي لقيت اني طبل شرطة الحرس الوطني للموسيقى وعلى يساري عصا طقاقه مظهور حقها وعلى يميني عود تنظيف اسنان وارد البكر يعني ماراح نحتاجه الا اذا بقت الضروس على حالها ولا جاها شي .
المهم كني رجعت لعقلي اشوي وشفت انه مافي وجه مقارنه بيني وبين مناطح الثيران
.لكن هو شكله ابليس راكبه ومتخيلني وسادة تدريب ملاكمه وغير كذا يمكن كان حاب انه يجرب يدخل سجن على شي مايسوى..المهم الرجال قام يطالعنا ويشر لي بصبعه بطريقه بارعه حسبي الله عليه خدش حيائنا
واقوم واسوي عمري اتفرج على ديكور المطعم ولا كني شفت الحركه لكن اخينا الظاهر كان حالف الا يخلي هالليوم محفور في ذاكرتي كم سنه جاني وقرب مني وقالي(( يور....)) وقمت وقلت له ثانكس يعني حليم انا ووجهي المهم يوم شاف اللي قدامه ماعنده ماعند امي حصه قام وحاول يكفخني واقوم واطمر في وجهه كالليث (( يدور الباب )) المهم انجبرت وابتليت به واقوم اتلاشط انا وهو ويقومون اصحابه ويفزعون معه ويقومون اصحابي يفزعون يدورون طريق الباب المهم والله من كثر الدبغ الي جاني كنت ابغا استنجد وجلست اضيع في الحروف وانادي نادو السرطه بليش والله مانلام نسوني اني في بلد اجنبي
المهم ونقوم في هالخنقه ذي كلن يضرب من صوبه لين شفت اصحابي شردو وخلوني بروحي مدري ليش يمكن يقصدون يروحون يبلغون الشرطه (( يا حبي لي وانا احسن الظن ))
ولا قهرني غير ذاك الدلخ من اصحابي الي جالس الايطالي يورم في وجهه وهو يقول اذا في امك خير تعال النسيم لا وياليت يقول النسيم كان يقول النشيم..انا في الحقيقه ضنيته يتكلم ايطالي حتى قلت مساءالله يتكلم ايطالي لين شفت فتحه في ضروسه وعرفت ان فيه نفس الفتحه الي في ضروسي
وتالي عرفت ان خوينا كان ناوي يكذب على خويانا بالرياض ويقولهم صارت مواجهه بينا وبين المافيا بالرساس..يعني الرشاش
والي قهرني اكثر ان حنا في وسط الدبغ والمعمعه هذي ويجيني واحد منهم يقولي رفيع ماودك اساعدك .((صحيح من شاور ماعطا .))قلت له لا مشكور خلك في نفسك ..(( فاقد الشي لايعطيه
المهم جات الشرطه ومن عقبها كل ماضحكت حسبوني خوياي مسوي ممر للماي في ضروسي ..واقوم واحاسب الفندق وامسك ذاك التكسي واقوله بليش اونت قو ثو اربوث..المهم ودانا ونزلنا المطار وحنا طالعين قرينا لافته مكتوبه بسبع لغات من بينها العربيه تقول يا غريب كن اديب ..وانا في خاطري اقول حسبي الله عليهم ماحطوها لنا في الدخول عشان كنا رحنا لهم نسئلهم وش تبون في غريب؟؟؟



ملاحظه قصة خياليه

منتديات مدرسة المشاغبين - منتديات الفسحة العامة

.
........................

الفنان

.

.
مع محبيتي
.