ساقت مشاوير الشقى واردف الليل..........وسريت ودروب السهر سرمديه
ازريت اسوق الهم واحط واشيل............ وتعبت اكابر والمواجع نديه
الحيل مل من التعب مابقى حيل...........والجسم ماله بالسهر مقدريه
البهذله والمهزله والغاربيل............ابطال وسنين العمر مسرحيه
والهم والحرمان والحزن والويل.......... ضيوف وجروح الوفى شاذليه
والصمت والهوجاس بوح التعاليل.........والخوف مسرى والليالي مطيه
يالله عسى درب السنع بالمقابيل.......... والى الليال الي مضن جرهديه
حرن كفخ واستاسرته المحابيل.......... عقب السما الرحبه هوى للوطيه
حرن غدر فيه الزمن والمداخيل............ مقرود وكفوف العطايا رديه
غـلطة عمر جنيت منها البهاذيل......... ذنوب غيري حطها الله عليه
غلطه ودحدرها القدر بالمحاصيل.............. رضيت بالمقسوم غصبن عليه
تناقلتها شلة القال والقيل............. حطو عليها لين صارت قضيه
قامت تنهاشني رخوم الرجاجيل........... اهل الملامه والعلوم الرديه
بالله قلي ياسود الوجه يالليل............ وضح النوايا كيف صارت خطيه
قلي من الي ضلل الحق تضليل ......... ومن علم الوافي يخون بخويه
ومن بروز الاوهام خدعه وتمثيل.......... ومن طلسم الواقع وخان الوصيه
من قالي دروبك سهود وتساهيل...........ومن علم الضحكات تمشي عليه
من كفن دموع الوفا بالمناديل............ ومن هو جزا الحسنه بمليون سيه
الي قتل حلم الضلوع المناحيل.......... وقال انقتل فيك العوض والبقيه
جاوب سؤالي ياسود الوجه يالليل........... وضح النوايا كيف صارن خطيه
وسلامتكم........... اخوكم كل شي

منتديات مدرسة المشاغبين - الشعر و الشعراء منتدى للقصيد و القصائد النبطي و الفصيح البوح بالخافي