|
| |||||||
 |  | |
 |  |  |
 |
| | أدوات الموضوع | طريقة عرض الموضوع |
08-29-2007, 09:16 AM
| ||||
| ||||
| لاتفوتكم رواية (((طلبتج لاترديني))) السلام عليكم ورحمة الله وبركاته بسم الله الرحمن الرحيم هاذي رواية أعجبتني وحبيت أنقلهالكم لاطول عليكم طلبتج ..لاترديني للكاتبة: *جواهر* ***الجزء الاول*** احب ابدأ بأبطال قصتنا واولهم غالية وهي البنت الوحيدة بين ولدين, عمرها 22سنة خلصت الدراسة وتنتظر الشغل وتخصصها ادارة اعمال، وتتميز غالية بابتسامتها الدايمة وعندها اسلوب حلو ومؤثر في الاقناع اما صفاتها الشكلية فهي متوسطة الطول ومليانه شوي وبيضا و لون عينها عسلي وشعرها بني طويل وجمالها متوسط لكن اللي يميزها فيها شي يجذب. بطلنا الثاني هو خالد اخو غالية ,هو بجر العايلة عمره 25 سنة يشتغل مبرمج كمبوتر في الاتصالات يحب البحر والسيارات ويتميز بالصدق وكلمة الحق علشان جذيه ربعه قلة اما صفاته الشكلية فهو طويل وضعيف ولون بشرته حنطي فاتح . اما باقي افراد العايلة فهم :عبدالرحمن (بو خالد)ريال متقاعد وامهم متوفية من 18 سنة ماتت بسبة الضغط المرتفع المفاجئ وبعد 5 سنوات تزوج من بنت خالته مريم ويابتله بس ولد واحد سموه سلطان . وعايلة بوخالد يعيشون في الراشدية بدبي من 3سنوات بعد ماانتقلوا من عجمان. والحين ابتدي القصة: غالية في غرفة خالد يالسة عالنت وخالد في الصالة يتصفح المجلة وبعدها قرر انه يرقد لان واره عرس اخ ربيعه عبدالله. دخل خالد غرفته شاف غالية مكانها عالنت، غالية طنشته ولا كأنه موجود . خالد : ابغي ارقد وغالية ولا كأنها موجوده في الدنيا وقف خالد ورا الكرسي اللي جالسة عليه غالية وفجأة صرخ:غليووووووووووووووووووووه غالية وبكل برود: ان شاالله اخويه لحظة شوي خالد: غليوه قومي من على النت تراني صبرت عليج وايد غالية: خمس دقايق بس ,والله ما اجذب عليك خالد: بعد للعشرة وبعد العشرة بفرج من الكرسي ،واحد، اثنين غالية: حرام عليك أنا ملانه وظايجة ،وانت مو حاس فيني خالد: عن هذي الحركات، زين مني مخلنج تلعبين بكمبيوتري غالية: لا تتمنن عليه باجر كمبيوتري بيوصل وبشرفنا وفيه برامج يديدة احسن من هذا الكحيان خالد: هب كمبيوتر هذا، وزير....،اقول قومي لاتطولين السالفة وهي قصيرة قامت غالية من على الكرسي وصدت صوب خالد (بنظرة شرسة):نوم العوافي خالد(بسخرية): آنسة غالية ،لاتنسين تصكين الباب وراج لكن برقة لوسمحتي غالية: شو شايفني دفشه شراتك؟ خالد: انتي ادرى بعمرج. خالد كان يعتبر غالية امه اللي توفت بعد يومين من ولادة غالية ، وكانت هي مصدر التوجيه والنصايح اذا مر بمشكلة . على طاولة العشا كانت العايلة تتعشى ام سلطان: بو خالد ما تعشيت؟ بوخالد: ما اشتهي ام سلطان: ما من شر؟ شي يعورك؟ بوخالد: لا الغاليه بس ما اشتهي سلطان: ابويه..... تسوي رجيم؟ اشوف كرشتك زايده هاليومين بوخالد: خسك الله شوف كرشتك قبل يالبعير ام سلطان: حرام عليك يا بو خالد تتوحى الولد بو خالد: هيه ما خفتي عليه خفتي على ولدج ام سلطان: يا ربي.... هذا ولدك مثل ما هو ولدي غالية: يا أم سلطان الوالد يتغلى دلعيه ، تراه يستاهل ام سلطان: اسكتي انتي يالسوسه, انا اللي تبغي حد يدلعها بوخالد: كبرتي يام سلطان على هالسوالف ام سلطان: جان انته كبرت كيفك , بس انا بعدني شباب بوخالد: كله منج ياغليوه, اسميج سوسه غالية: انا....حرام عليك انا شو سويت؟كله تعقونه عليه بوخالد: بس بس , خلصي عشاج وتعالي غالية: ليش شو السالفة بوخالد: انتي تعالي وبتعرفين قام بوخالد من عالكرسي وراح غرفته سلطان: باين السالفه جايده، شو مسويه يا غليوه غالية: اسكت انت انا واثقة من عمري ، بس انت خل بالك على دروسك سلطان: الحمدالله انا متفوق وشاطر مو شرات بعض الناس ما عندهم شغله غير الرقاد ام سلطان: اخ عليك يا سلطان تراد اختك وانا يالسه غالية: احسن لي اروح عند ابويه بدل ما احصل لي تعليق من ياهل مشت غاليه لغرفة ابوها ودقت الباب بوخالد: ادخلي الباب مفتوح غاليه: كيفك بابا؟ بوخالد: منيح بابا غاليه: اوه اوه بدينا نرمس لبناني، شوالسالفة؟ بوخالد: خلينا الحين من هذي الخرابيط غاليه: نعم ابويه بوخالد: تدرين اني ما اجبرج على شي انتي ماتبينه ، صح؟ غاليه: (وبدا قلبها يدق بسرعة) صح بوخالد: ابغي اعرف سبب رفضج لحميد بن راشد, لانهم كلموني مرة ثانية وباين انهم متمسكين فيج غاليه: يعني شو اقولك يابويه ،الصراحة مافيه شي ينعاب لكن انا مو مرتاحة إلهم بوخالد: يعني ما بتغيرين رايج؟ غاليه: احم ....لا بوخالد: على خير ان شاالله... خالد في غرفته يتسفر ويتعدل حق عرس اخ ربيعه عبدالله (حمد) خالد:يا الله وين فريت موبايلي؟ سلطان يالس في الصالة يشوف فيلم(Home Alone)على قناة 2 خالد:سلطان شفت موبايلي؟ سلطان:لا خالد:سلطون اتصل فيني سلطان:متى الحين؟ خالد:يالغبي ،اكيد الحين يعني بعدين! سلطان:خليت الذكا الخارق لك يا اخويه الكبير العاجل خالد:عن الفلسفه الزايده الحين ،اتصل وفكني خالد:سلطان سمعت صوته؟ سلطان:هيه الصوت قريب مني بس ما اشوفه خالد:هيه صدق سلطان :احس بشي تحتي........هذووه خالد:الله يخسك يالس فوقه اكيد اخترب سلطان:صدق اني متين لكن مو لهذي الدرجة راح خالد غرفة غاليه ودق الباب غاليه تتصفح المجلة في غرفتها :الباب مفتوح خالد :ابغي عطر شانيل وينوه? غاليه:بسك خلصته شلك في عطر الحريم؟ خالد:يالبخيلة والله بشتريلج غيره هاتيه ورايه عرس غالية:من 3 شهور تقولي نفس الرمسه بس ماعليه خذ خالد: حشى مو طالب عطر طالب مليون انا.. راح خالد العرس في مركز دبي التجاري, وغالية ما خلت مجلة ما قرتها وبعد دقايق رن الموبايل غالية:الوو اليازيه:الوو..السلام عليكم غاليه:وعليكم السلام ورحمة الله وبركاته..وينج؟ماينسمع حسج؟؟ اليازيه:موجودة انتي اللي وينج؟المهم شحالج؟شو اخبارج؟ غاليه:الحمدالله بخير ويسرج الحال،واخبارنا تعرفينها اليازيه:شحال عمي؟ غاليه:الحمدالله بخير،الا اقول شحال المعرس؟؟ اليازيه:الحمدالله بخير ،بس انتي شلج تسئلين؟ غاليه:اووووووه،بدينا نغااار؟ اليازيه:لاحبيبتي امزح معاج بس هالفترة هو مشغول بتجهيزات العرس. غاليه:الله يوفقكم ويسعدكم. اليازيه:آمين ،وان شاء الله نفرح فيج عن جريب. غاليه:حبيبتي انا مو مستعيلة شرات بعض الناس،اول شي بشتغل وبظهر قيمة الشهادة وتعب السنين اللي مرت و بعدين بفكر بالعرس. اليازيه:شو تقصدين ؟انا مطيرة عالريل؟ غاليه:شدراني فيج؟ اليازيه:اقول...مع السلامة غاليه:السموووحة الشيخة ماروم على زعلج اليازيه:احلفي بس انتي؟اقول.. غليوه غاليه:نعم،قولي اليازيه:بخليج الحين،الوالده تناديني غاليه:سلمي عليها اليازيه:الله يسلمج ،يبلغ.. وبعد ساعتين خالد وصل وبوخالد يالس مع العايلة في الصالة يشرب حليب زعتر خالد:السلام عليكم بوخالد+ام سلطان:وعليكم السلام ورحمة الله وبركاته بوخالد:شواخبارالمعرس؟ خالد:بعد شو؟طاير من الفرحة ام سلطان:متى نفرح فيك ونشوف عيالك؟ بوخالد:آآآآآآآآآآآآآه متى ايي هذا اليوم؟يالله بالحياة خالد:ابويه انا مو مستعيل اول شي خلني اكون نفسي وبعدين يصير خير بوخالد:افااا نسيت اني موجود اعين واعاون؟ خالد:ماتقصر يا بويه بس بوخالد:بس شو؟؟ خالد:بالمختصر المفيد انا مالي خاطر بالعرس في الوقت الحالي وبعدين لازم ارقد الحين ورايه دوام اضافي باجر بوخالد:روح روح عن ويهي لاتتعلث لي، حشى هالعيال لا الولد ولا البنت يبون العرس عنبووه تقولين يام سلطان حد عامي عيونهم عن العرس ام سلطان: يا عبدالرحمن الزواج قسمة ونصيب واللي الله كاتبنه بصير.  |
|
09-03-2007, 09:34 PM
| ||||
| ||||
| رد: لاتفوتكم رواية (((طلبتج لاترديني))) مشكوووووووووووووووووووووووووووووووور ما قصرت بس روايه قصيره جدا درجة الحكاية ههههه تقبل مني المرور والتعليق دمتم
_________________  |
|
09-04-2007, 02:49 AM
| |||
| |||
| رد: لاتفوتكم رواية (((طلبتج لاترديني))) يسلمو على القصة . |
|
10-25-2007, 09:21 PM
| ||||
| ||||
| رد: لاتفوتكم رواية (((طلبتج لاترديني))) اسف على التاخير مشكورين على الردود بس ترا الرواية أجزاء **الجزء الثاني** ثاني يوم تحديدا الساعة سبع وربع نشت غالية، صلت الضحى واظهرت من غرفتها. خالد يالس يتريق بروحه:منوه؟؟غليووه ناشة من فيرالله، غريييييييبة!!! غالية: اي فير ،بتستوي ثمان. خالد:ادريبها ثمان ،بس ظاري هالوقت انتي في سابع نومه غالية:ادري بس اليوم بسير مع ابويه عند يدتيه خالد:خير شوفيها ؟شو صاير؟ غاليه:مافيها غير العافية،بس هي متصلة ببويه من ايام، تتشره عليه من مدة ما زارها. خالد:غريبة ،ابويه ماخبرني غالية بخبث:متى يخبرك ،وانت طول الوقت ظاهر مع ربعك خالد: يام لسان ،انا مو شراتج لاشغله ولامشغلة ،انا ورايه اشغال ومسؤوليات غالية:اوه..الساعة ثمان ،الحين بيخصمون من معاشك. خالد (وهو ماد ايده صوب غالية وشال الصحن):اقول..اغرفي لي بلاليط غالية:شو؟بتاكل خالد:هيه باكل الا هي ربع ساعة ،محد بلاحظ غاليه:كيفك رجعت غالية لغرفتها وفتحت كبتها ،تختار الها شي تلبسه غاليه:شو البس؟؟اممممم احسن شي البس مخورة اومغربية عشان تستانس ام عبدالرحمن. بس اي وحده؟؟؟الحمرا او الخضرا آخر شي استقرت غالية على مخورة ،القطعة فيها الوان ربيعية فاتحة ومطرزة بكازوات صغيرة ورقيقة،وبعدها اتسبحت وادخنت ويابت عباتها وشيلتها وعطرتهم بدهن العود ودخنتهم وعلجتهم وراحت اتشوف ابوها. بو خالد يالس في الصالة يقرا الملحق الاقتصادي وحس بحد ياي صوبه يوم صد شاف غالية جان يبتسم الها غالية ردت له بابتسامة:صباح الخير(وحبته على راسه) بوخالد:صباح النور ،اتجهزتي؟ غالية:ايوة يا بابا انا جاهزة امتى حنروج لتيته بوخالد:ماحيدني مخلف مصرية غالية:هههههه بوخالد:ان شاء الله عقب ساعة غالية:بابا بوخالد:مااحب اقرا الجريدة وحد يكلمني غالية:بسم الله علينا بوخالد:نعم آمري ،تدللي شو تبين؟( وفر المجريدة عالطاولة اللي جدامه) غالية:شرايك،ناخذ ليدوه هديه بوخالد:انا مومتفيج امر على مكان غالية:عنبوه هذه امك اللي ربتك بوخالد:لا حول ولا قوة الا بالله..شوايبلها كاكاو باتشي؟ غالية:هيه.. ليش لا بوخالد:عيل سيري عند عمرو قولي له يمر اول على وافي وياخذلنا باتشي وبعدين يوقف السيارة جدام الباب. غالية:ان شا الله (والبست غالية شيلتها وراحت له) في هذي اللحظة اظهرت ام سلطان من المطبخ وفي ايدها صينية القهوة والفنايين. ام سلطان:ماشاالله جهزتي؟ غاليه:هيه وبعد ساعة بنروح الهم ام سلطان:كان بخاطري اظهر معاكم، متولهة وايد على خالتي ،بس شواسوي سلطان بتم بروحه في البيت غالية: اسميج مدلعتنه ام سلطان:بعد جيه مادلعه ؟ولديه ،حشاشة يوفي غالية:احسن لي ادخل ام سلطان:آه يا الغيرة غالية:اناا اغار من سلطون؟هالياهل ام سلطان:فديتتت روحة غالية:آآآآآآآآآآآآآه عالحب،ماعليه بسير عند يدوه بخليها تعطيني جرعة حنان ام سلطان:ههههههه وبعد ساعة اظهروا من البيت واركبوا سيارة الرنج وراحو بيت اليدة الموجود في عزرة بالشارجة،وهم في السيارة بوخالد:شوي شوي ،شوبلاك مسرع عمرو:بابا انا امشي مية بوخالد:جذاب تتحراني ماشوف الكيج عمرو:بابا هاذا شارع فاضي مافي مشكلة بوخالد:شو ماشي مشكلة امش ستين غالية:اذكر الله يالوالد بوخالد:لا اله الا الله غالية:محمد رسول الله،وبعدين صدقة ،الشارع فاضي والناس في دواماتهم،فعادي اذا سرع بوخالد:شدراج بالشارع وعلومه غالية:آآآآه متى اسوق وارتاح بوخالد:في الاحلام ... غاليه:جيه ابويه ؟الكل يسوق؟تعرف ربيعتي اليازية؟...تسوق بوخالد (صد لغالية بنص عين):انا شليه بفلان وعلان،بعدين ماشي سواقه يعني ماشي سواقه. صخت غالية وهي معصبة وشلت مجلة معقوقة في السيد الوراني للسيارة. بعد ربع ساعة وصلوا ونزلت غالية ونزل ابوها وادخلوا البيت. بوخالد وهو يفتح باب الصالة:هود..هود ام عبدالرحمن كانت يالسة عالقنفة البيج تشرب قهوة فالصالة:هدا هدا بوخالد وهو يتجدم غالية:السلاااام عليكم ام عبدالرحمن:وعليكم السلام والرحمة بوخالد:شحالج الوالدة ؟عساج طيبة ام عبد الرحمن:والله طيبة ولا موطيبة،انته يهمك؟ بوخالد:اوووه باين انج ماخذه على خاطرج مني،كله ولازعلج يا ام عبدالحمن. ويت غالية وحبت يدتها على راسها:شحالج يدتيه؟ ام عبدالرحمن:الحمدالله بخير ويسرج الحال بوخالد:جيه يعني ماهزبتيها شراتي؟ ام عبدالرحمن:والله يقولون ...اغلى من الولد ولد الولد بوخالد:جذيه يعني،الحين انا الزعلان وماخذ بخاطري منج ام عبدالرحمن:وينهم الباجيين؟مااشوفهم بوخالد:عندم دوامات ام عبدالرحمن:الحين خالد في الدوام وسلطان في المدرسة ،وام سلطان وين؟تداوم في ميلس الحريم؟ بوخالد:الله يهديج يا امي سلطان محد عنده في البيت والاجان يبناها معانا غالية (بدلع):كفايه وجودي... ام عبدالرحمن:ههه وزود بعد غالية:وينها عاشه بنت عمي سالم؟ ام عبدالرحمن:في بيتهم،(اشرت بايدها صوب التلفون):اتصليبها،تتغدى معاج. بيت سالم عم غالية ملاصق بيت اليدة غالية (وهي تنش):ان شا الله بوخالد:امي يبتلج باتشي ام عبدالرحمن:شووو؟ بوخالد:باتشي،هالكاكاو ام عبدالرحمن:تعرف فيني سكر،ناوي تذبحني بو خالد:استغفر الله العظيم،كلي شويه لاتكثرين ورجعت غالية يلست حذال يدتها بوخالد:كله منج ياغليوه غالية:بسم الله،جيه ان شو مسويه؟ بوخالد:العيوزتتحراني ناوي عليها بهالكاكاو غالية وهي تضحك:ههههه ام عبدالرحمن:انا اقول عبدالرحمن متى افتكر فيني؟ بوخالد:ياربي... في هذي اللحظة انفتح باب الصالة والكل صد صوب الباب،والا يظهر واحد شاب، طويل لابس كندوره لونها بيج ونظارة شمسية. غالية من شافته لفت الشيلة عدل على راسها وماعرفت شو اتسوي!!!!!! |
|
10-30-2007, 11:39 AM
| |||
| |||
| رد: لاتفوتكم رواية (((طلبتج لاترديني))) حلوة القصة بس وين تكملتها |
|
| مواقع النشر (المفضلة) |
| أدوات الموضوع | |
| طريقة عرض الموضوع | |
| |
-
-
العرض العادي
