اذا المراجل لبسة شماغ وعقال
يالله يابنات نلبس العمايم

ما عاد يفرق زول حرمه ورجال
دام الفعايل تشبه البعض دايم

المرجله ما هيب كلمه وتنقال
وتروح ما راحت هبوب النسايم

وإلا خشونة صوت أو رفع الأثقال
أو رزة صدور وفعل الزلايم

ولا هي بعد مفتاح موتر وجوال
وإلا ردى لسانن حديثه شتايم

المرجله شيمه عن القيل والقال
رفيع نفس (ن ) حر بالجو حايم

المرجله عقلٍ وزن وزنه جبال
ودون العقل وش فرقنا والبهايم

يا مسندي لو مايل الوقت بي مال
يا ولد أبويه يا عظيم العزايم

يا معرب الجدين من العم والخال
يا نخوة المفزوع وقت الهزايم

المرجله يا خوي هي طولة البال
هي العزم هي الصبر فالظلايم

فيها الكرم عزه دله وفنجال
فيها الكرامه عن ردى الطبع شايم

والدين لامنه خذا القلب منزال
مشى طريق الحق وابليس نايم

ومن لا عرف ربه في طيب الحال
لابد وقت الضيق بالهم هايم

حتى صلاتك مع جماعات ورجال
في خيرها يا خوي نعم الغنايم

ولامن نصف ليلك قم صفي البال
يا عظم أجرك بين ساجد وقايم

ولا من رفع ربي له كل الأعمال
حسن الذكر لا قالو فلان صايم

وخلك شريف القصد يا طيب الفال
سوء المقاصد فالبيوت الهدايم

واحذر تبيع النفس في درب الأنذال
وتتبع خوي إبليس راع النمايم

النفس خيل لك إذا كنت خيّال
ومن لا قوى نفسه قوته الهزايم

ولا صرت ما تدري لو يش أنت رجال
والله خسارة فيك ذبح التمايم

منتديات مدرسة المشاغبين - ممنوع مخالف مكرر

ليست مشكلتي ان لم يفهم البعض ما اعنيه؟!
وليست مشكلتي 000ان لم تصل الفكرة لأصحابها؟!
فهذه قناعاتي00وهذه افكاري وهذه كتاباتي بين يديكم
اكتب ما اشعر به00 واقووول ما انا مؤمن به00
انقل هموم غيري بطرح مختلف 00
وليس بالضروره ما اكتبه يعكس حيااتي الشخصيه00
هي في النهاايه 00مجرد رؤيه لأفكاري 0

-



( 272161A8 )