آرائكم تهمني كثيراً

أتقبل النقد وأتمنى التوجيه
===========================


صدفة غريبة .. ما سأل من ثلاث شهور ..

واتصل .. يسأل عن أحوالي ..

من راح .. وهو سالي بدنياه وحياته ..

واليوم .. غريبة .. تذكرني ؟

وجا يتطمن على لون جرحي ..

جا يبي يتأكد إني ما زلت مهموم ..

يبي يتأكد إني ما زلت أنزف ..

واتجرأ بكل هدوء وسألني ..

ورديت السؤال بسؤال يهمني ..

وقلت له وانا أسابق حروفي ..

وأسابق نبضات جواله وجوالي ..

أبي أتطمن عساه بخير .. وقلت له :

وش أخبارك بشرني عن احوالك

علمني ؟ .. كيفها دنياك .. عساك بخير

وجاوبني ..! بخير .. بخير ..

و بصوت هادي ومضيوم :

قلتها من كل قلبي ..

يا عسى دوم بألف خير ..

ولا سمعني ..

ورد يسألني .. عن أحوالي .. واضطريت أجاوب :

(يا حبيبي) .. تسأل عن أخباري ؟

وحسيته تضايق يوم ناديته حبيبي ..

وبسرعة تداركت وقاطعته .. الحمد لله ..

أنا بخير .. من الله .. أنا بخير

واسترسل الحزن وبان في إجاباتي بدون شعور ..

وقلت له ...... تكفى

لا تسأل أكثر .. أخاف الدمع يتنثّر

وغلطت وقلت .. (يا حبيبي) ..

ورجعت آتدارك الغلطة وقلت ..

أوووه أقصد .. ياللي كنت أغلى حبيب ..

ماعندي لك إسم .. ولا عنوان ..

من عرفتك .. وانته حبيبي ..

بس تدري .. والله من غبت عن عيني وانا بخير ..

من رحت .. وآنا غير ..

كل يوم أتنفس .. رياح الحزن

وبكل ليلة .. أغني آهات وأحس بشجن

واكتب .. شعر .. وأهذي نثر ..

صرت شاعر .. في زمن تغير فيه حتى لون القصيد

صرت .. ضايع معا من ضاع بالدنيا ..

صرت أكتب نثر .. واجر وناتي على حروفي ..

بس واجهتني .. معضلة ..

قالوا لي .. تبي تصير شاعر

قدامك شروط .. وعلى يمينك ويسراك القيود ..

وصار .. يترصد لي بدنيا إحساسي مليون ناقد وشاعر

ما دروا ان الشعر .. متعة وطرب .. وتخفيف وعتب

مادروا ان كلمة شعر .. بالأًصل وبالأساس إحساس وشعور

وصار اعتماد النقد .. في حجم القصيدة ..

في وزنها وقافيتها والبحور ..

ما حد منهم تعب .. ولا تعمّق ..

ماحد منهم غاص في غبّ البحور ..

البحور .. أصلاً هيه موجودة في قلب السطور ..

تحكي حكاية عاشق مفارق .. ومجبور

تحكي حكاية ضيم .. أو تشتكي من جور

تنزف من الطعن في قلب المحب بسكين الخيانة ..

وفجأة وبدون دستور ..

انقطع هاك الحديث والشكوى ..

بسبة انتهاء رصيد المتصل ..

وعاد الحزن من جديد .. واستوطن القلب ..

وغابت أمنيات القصيدة ..

ورجع شاعرها يوزن قصيدة ..

ويسأل الدكتور .. عن رايه

يسأل يقول : .....

دكتور غسان وش رايك بوزن القصيدة ..

عن بحر القصيدة .. عن قافيتها ..

مسكين هالشاعر .. أو مسكين أنا ..

نسيت إني نسيت أضمّن إحساس الخيانة .. في هالقصيدة

نسيت أكتب عن إحساس الفراق .. أو عن إحساس الضياع

ورجع هالشاعر .. المجبور ..

وانشد قصيدة .. باهته بدون لون .. وبلا إحساس

موزونة .. وعلى بحر يسمونه المسحوب أو المجرور

لكن فيها فراغ .. ومساحة شاسعة بقت من غير نور ..

رائحتها .. تشبه الطبشور ..

والمصيبة تصدقون .. صفّق لها أغلب الجمهور ..


أخوكم

سعيد بن محمد الحارثي (المفارق) ،،