دقت على رقم جوال... تبي صديقتها منال... ورد عليها رجال!!! قالتله اووووه ,,ما عليش... وقالها على ايش ؟؟؟ قالت على الازعاج…قال لا,,ما يحتاج…قالت اوكيه باي…وقعدت تفكر بالجاي…وتقول والله صوته يهبل…خل اتصل مره ثانيه استهبل…على هالصوت,,اكيد انه وسيم… وغديه من اهل شقراء والا القصيم… يمكن اقدر اتعرف عليه… ويجي يوم احط.. عيني بعينيه…وتتصل اختنا بالله…ويرد وهو يقول,, هاااه وتقول,,مساء الورد… وهو ينصفق,,كن طايح عليه طرد!!! ما هومصدق هالمسكين… معقوله هذي تبين؟؟ يارب يارب ماتصير غلطانه... وتصير تبي رقم فلانه... ويرد,,, بصوت مرتبك... بكلام ماهو مفهوم مشتبك!!! مسا,,هلا,,مر,,أ أ أ,,والله... وتضحك هي بميانة واحد من الشله... ويضحك هو بعد مثل... الابله... وتقوله,,لا تصير مشغول؟؟ ويقول,,لا,,,,,,على طوووووول... وتقول طيب ممكن اتعرف؟؟؟ ويقول اكيد والله ...اتشرف... وتقول ,,طيب شسمك؟؟؟ ويرد انا؟؟وتقول اجل امك!!! ويقول,,هههههه انا سامي... وتقول عاشت..الاسامي... وقولها ,,,طيب انتي... اسمك لاهنتي... وتقول,,اناااااا ,,,انا ابتسام... ويقول ,,الله,,اسمك هذا بقلب وسام...وتمر ايام ورا ايام... وتسأله ,,,كيف شكلك؟؟؟ ويسكت شوي,,,,ام م م كيف اوصفلك... انا ماني طويل ول قصير... وسط ان صح التعبير... ماني سمين ولا نحيف... وفيني سمار على خفيف... وتقول,,طيب اوصف ملامحك... ويقول,,,ام م م تبين اصارحك...شفتي مين,,مين,,ايه شفتي طلال الرشيد؟؟ وفرحت وقالت,,ايييييه,,,قال مره قالّي سعيد... اني اشبهه شوي... واني كل ماشفته,,على طول انت تطري علي... ما ادري,,,بس احسّه يجاملني... قالت لا ما اعتقد,,,بس انتبه تتجاهلني... قال وش دعوه... قالت ايه هذي الهقوه... ويقولها طيب,,انتي شكلك كيف؟؟ وتقوله ,,لما تشوفني بتعرف التوصيف... قال,,اشوفك!! هو انا بشوفك؟؟ قالت,,طبعا ,,والا ماتسمح ظروفك؟؟ ويتواعدون في مكان... وحددوا الزمان... وتسأله,,وش نوع السياره؟؟ ويقول,,آآآه,,خساره... البي أم حقي راح تشليح... بحادث اقشر,,وماله تصليح... بس الحين معي سياره تمشي الحال... كرسيدا بيضا,,,عن القيل والقال... قالت بدون نفس,,,طيّب... رح بكره للمكان وخلك قريّب... من محل آيسكريم... بس انتبه تناظر للحريم... وتجي لموعدها... تبي تشوف فارسها... ومن بعيد,,, تشوفه مدعي الزين... عععععععععععع,,,طلع شين... قصير وأسمر ودب... لا,,,والكرسيدا عليه تخب... قال مين؟؟قال طلال... بسم الله عليه من هالاشكال... اهووووه بس,,رجعنا... الظاهر ان صوته خدعنا... ويقعد ينتظر وينتظر... وتمر دقايق وساعات والظاهر شهر... ويرجع بعد طول انتظار... ما يدري وش اللي صار... ويتصل عليها... وهو رايح فيها... الو,,ابتسام... ابتسام!!!,,اقول بل اوهام... ولا عاد تتصل مره ثانيه ارجوك... ياخي انساني,,الله يرحم امك وابوك... ويقول,,طيب قوليلي وش فيك؟؟؟ تكلمي الله يهديك... ليش ما جيتي؟؟؟ للوعد اللي عطيتي... قالت,,,بصراحه ما قدرت اطلع... عيّت امي وهاوشتني وقعدت عليّ تلعلع... تعرف تخاف علي,,وتبي مصلحتي... وبعدين بصراحه,,, الاسبوع الجاي خطبتي...


هي طويله بس اقروهاااا

الله يعطيك الف الف الف الف الف الف عافية يا خي والله موضوع جدا مميز,,,,,,نتمنى منك المزيد..............................

مشالله ...عليك اخوي عزوز...مسوي فيها مدرو اني انا الحطها بالمستندات ونت نسختها بس
مردوده لك ...يا عزوز

القصه حلوه وجريئه ومعاك حق وللأسف القصه هذي تصير كثييييير في هالوقت......
بس حبيت أطرح عليكم موضوع ياليت تشاركوني فيه يمكن يكون موضوع خاص شوي في السعوديه وبالخليج بصفه عامه....
انه تكون فيه فترة خطوبه أو ملكه قبل الزواج بفتره اللي خلاني أطرح الموضوع ان صديقتي ملكت واتطلقت بفتره بسيطه وبسبب تافه ومن أول شجارحدث بينهم
يعني أيهم أفضل في نظركم انه الشخص يملك قبل بفتره أويملك ويتزوج على طول.....
أرجو اني ما أكون تعديت حدودي
ولكم جزيل الشكر

يا reem تحية وبعد بالعكس موضوعك قيم وجيد وليس فيه اي نوع من التعدي وبالنسبة لراي ارى انه ان تكون الملكة قبل الزواج بفترة سبحان الله يصير في الامور امور يكون كل واحد عارف الثاني ما هو من اول مشكلة يحدث الانفصال وحتى لا تكون العلاقات هشّة..............
شكرا على طرحك للموضوع القيم وودت لو كان الموضوع مستقلا ............................
بركان(المشرف العام)