ياهلا والله وغلا..ياحيالله من جانا..وشلونكم>>اخلصي

بصراحه الى الحين وانا رايحتن وطي من ذاك اليوم اللي ضعت فيه عن اهلي

يالله استعدوا افتحوا كشراتكم تحمسا للسالوووفه..واقعدوا زين..وبققوا عنونكم..زين,,وافتحوا اذانكم..

-نصائح لقراءه الموضوع
1- شراريب صوف لمنع احتاكاك الارجل في بعضها البعض للي يبي يسوي نفسه يتدفى واللي ماعنده شراب صوف يلبس شراب العائله يفضل اللون اسود غامق (قولي قسم ) واللي ماعنده لاصوف ولا شراب عائله في ابليس يزمه وش دخلني فيه انا بسلامته يمرض .

2-يمنع منعا باتا التنغيف وانت تقراء الموضوع لما في ذلك من مضيعه للوقت خصوصا اذا كانت النغافه بيدك اليمين فكيف ومتى واين تضع يدك اليمين اذا بغيت الماوس؟ واللي منكم حاط الماوس بيده اليسار فمسموح له انه ينغف باليمين وايضا التنغيف مضيعة للوقت ومفسده لما كل شخص منكم بيضيع وقته في فن تكوير النغافه وممارسه هوايه التصويب وكيفيه التصرف في رمي النغافه ( يالله يارب تطلع النغافه رطبه)

3-محاوله تصريف اي واحد يدق على جوالك عشان تستمخ وانت تقرا موضوعي ( يا شيخه اسكتي بس محد طاقن لتس خبر)

4- لايفضل ابدن ابدن انك تفصل الخط وانت تقرا موضوعي لاني وبالعربي موب انا اللي بسدد فاتورتك الله يحييك اللي يبي يفصل يفصل واللي مايبي يفصل في بليس يزمه ثاني مره <== موب نذله ابد ابد

...احم....احم...
ذاك اليوم كنا بجده نبي السوق ..والوالد الله يخليه لنا..مايواطن شي اسمه سوق..وبالملعونه واخته وافق يودينا..طبعا بشروط منها انه بس اليوم السوق..ومانطول..و..و..الخ

ومن زود الحقانه انا كنت ابي سوق وامي تبي سوق ثاني..هو شاف الدعوى مطرسه وعيا..رحت انا له(اللي هو ماي بابا) وشوي واحب رجلينه ليييييين طاع

المهم حطينا امي بالسوق اللي تبيه ورحنا انا وابوي ...والمبزره>>قبلي ناطين..هم الاولين

المهم دخلنا للمركز اللي هو (اويسز مول..محمود سعيد) قال ابوي مالي حيل ادور وراتس من محل لمحل ابقعد بهالمكان وانتي اذا قضيتي تعالي لمنا وقعد بالمقهى اللي تحت..

انا تقدرون تقولون دهدره..ودبشه ..لأني اول مره امشي بسوق لحالي..ادربي هالراس على غير سنع...

...المهم رحت ودخلت كم محل..وانا من حيني مااعرف ادور لحالي,,وكنت حاسه ان ابوي منطق..واني طولت عليه...بس انا ماقضيت ابي اغراض وداريه ان مافيه الا هاليوم السوق..قلت ورا ما اروح اسكت ابوي اقول اصبر بقى شوي واقضي>>اتسذب بس اقالي سنعه

المهم ابوي موصف لي وين المقهى عشان ما اضيع ...مشيت بكل ثقه للمقهى>>لاحظوا ان ابوي قاعد بقسم الشباب وانا دخلت للقسم الشباب ادربي راسي مادريت>>قصمنجيه ماعلي شرهه

المهم يوم رحت وادور..وادور..واناظر الطاوله اللي كان ابوي جالس به..ومافيش حد...انا متأكده انهم هنا وين طسوا له

وكان المقهى مليان شباب وانا شاذه بينهم....بس والله ماطقيت لاحد خبر واروح واجي على طاولة ابوي اكثر من مليون مره ولافيه احد...بديت اناظر كل اللي قاعدين بالمقهى قلت يمكن غيروا مكانهم

ولاحياة لمن تنادي....عاد انا الدمعه عند الباب
ولامعي جوال...وليتي بعنيزه كان اهون على الاقل بديرتي....لكن
المهم واحد من اللي قاعدين تقريبا كان باين عليه عمره 39 او 40
يعني مب شاب...شايب شافن اتردد واتلفت وحالتي حاله يحسبن ابي شي...>>كلن يناظر الناس بعين طبعه

انا يئست وقلت ابروح ادخل لي كم محل همن ارجع للمكان..لعل وعسى القاهم بعد شوي

رقيت بالدرج الكهربائي ..يوم حطيت ايدي على الدرج ابتمسك واحط رجلي جا هالحمار وراي اللي اقولكم انه شايب وحط ايده فوق ايدي

انا عجزت ابلع ريقي من الوحشه...سحبت ايدي ولا التفت وسويت نفسي ما انتبهت وانا قلبي ببطني من الروعه..ولصق بي الكلب لدرجه ان صدره نشبن بظهري .....وصلت بسلام ومشيت وهو وراي....زالمشكله ان شكلي مايجذب لاني علي عباة على الراس ومسكره نقابي(مغطيته) ومعي اكياس يعني باين اني جايه اشتري ماجيت العب....والبنات اللي بالسوق عبيهن تقل فساتين ومكياج كامل وعطورات وبلا وجلا وتاركهن وجاي لمي

المهم دخلت محل(مانقو) يوم دخلت للمحل كان مليان ناس التفت ابشوف وينه>>اشوى مب وراي..ارتحت قلت يمكن ضيعن
>>بالحيل ..اثره متغبي ورا الثياب وماشفته..انا على نياتي احسبه ذلف قعدت اتفرج على البضاعه وكان المحل كبير وفيه تفرعات ودواعيس ومن زود قرادتي اندمجت وانا اتفرج ورحت بآخر المحل وماعندي احد حتى عمال المحل مب لمي

والناس بعيدين بأول المحل..يعني محل صاد شوي..الكلب كان يراقبن من بعيد وانا ما ادري..بدا يقرب شوي شوي..خطوه خطوه>>كل هذا وانا ياغافلين لكم الله

لحد ما قرب لمي وحسيت ان احد وراي ما التفت لكن بطرف عيني ناظرت على جنب....جاء..يممممممممممه
انا ماكنت بوعيي ذيك اللحظه...والله كنت شايله كيس وثقال..ومااحس بثقلهن بهكاللحظه...بديت ارجف من الخوف..وتفكيري انشل..عجزت اتحرك من مكاني..وكنت ماسه بيدي جكيت..وهو آخر شي بدا يمشي بسرعه..وجاي لمي واثق من نفسه..يعني تقدرون تقولون حجرن..بزاويه بآخر المحل,,والمشكله الناس بعيدين عن..قلت لو يلمسن والله لاأصرخ..
قرررررب..لين صار كتفه بكتفي..وانا مسكته..بلعت لساني من الروعه..أخذ الجكيت من ايدي وانا تقل صنم
قال ..(الــــــــــــــــــله ذوقك حلو..اسمعي نقي اللي تبين من المحل..لك من الريال للمليون..وعلى حسابي..ولاتخلين شي كل اللي بنفسك خوذيه ورقبتي سداده)>>لاحظوا انه يتكلم وانا

يوم سكت..قعدت سنه عشان ابلع ريقي...والله العظيم احس ان قلبي ينبض بوسط راسي..واني ابدوخ وعجزت امسك نفسي..ويالله يالله تكلمت وقلت بصوت عالي(ممـــــــــكن ...تقـــــــــــلب..وجهـــــــك )

وانا اهرج ..لو يلمسن والا يقرب زود كان صحت..خلاص وصلت حدي..اهلي مدري وينهم..وديرتن مب ديرتي..وجا هالتبن كمل الناقص..

المهم هو..يوم قلت كذا..قال(اسف..اسف..)وشوي ويركع لي من شد التأسف<<حركاااااات خوفته
(حقك علي..والله اني مدري وشلون اعبر لك اني متندم..اسف ..واكرر اسفي)طيب خلاص طس يسد ياحظك دريت انك اسف

وبتل وهو يمشي يهذري..لحد ماراح..المهم انا اقش من هالخلاقين وانا ما اشوف وحاسبت بسرعه وطلعت..وربي رحمن ولقيت ابوي اشوا والا كان انتحر..

عاد يوم قلت لأمي السالفه..قالت ليتك قاشتن المحل ..ومخليته يحاسب..ويعرف وشلون يتميلح..وموهقته..عشان يصير كل شي على ظهره

والله مب شينه الفكره..لكن انا ذروقه..والا لو معي احد..كان يمكن كان اهون الموقف..بس عشاني لحالي اتديبش..

طولت عليكم..بس وش اسوي بخاطري اعلمكم..واقص لكم مأساتي

ملاحظه: حاولت بقدر الامكان (احلفي عاد) اني اخفف من اللهجه القصمنجيه البحته ...من كثر الشكاوي الي جتن ...يشتكون من صداع نصفي بالراس ...عشان تسذا قلت اتدلع شوي..خخ:p:p:p

سلام (وياويل الي يصرق سالفتي ترا ابا ابلعه الفنجال بالعرض)

منتديات مدرسة المشاغبين - ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه