 |
| |||||||
 |  |  |
 | |  |
 |
| | LinkBack | أدوات الموضوع | طريقة عرض الموضوع |
|
#1
04-04-2003
| |||
| |||
 قصتي قصة عجيبة !!!! بسم الله الرحمن الرحيم صحيح والله من وين بأبدأ !!!! .. من يوم أن أبوي توفى وأنا عمري ماتعدى خمس سنوات؟؟؟ والا من معاملت عماني اللي تبرأو منا بعد وفاة أبوي؟؟ على العموم أنا أبدا من أي مكان ... لأن قصتي قصة مليت من روايتها على نفسي ..!! أيه مليت من كثر تردادها على نفسي !!! لأني ما لقيت أحد أقوله قصتي ..!! لأن مافيه أحدن فاضي لي!!!!! فقدمت على أن انشرها بالنت غدي أحدن يسمعها ويدعي لي!!! وعلى العموم ..ايضا ماتفرق عندي هي من أولها أو من أخرها لأنها كلها نحس وتعب!!!!! خلنا نبدأ بس أبرك لنا !!! توفي بوي وأنا ابن 5 سنوات وابن 5 سنوات ما يدري وش السالفة أصلا!!! تكبدت أمي كل مصاريفنا أنا وأختي اللي أنا أكبر منها وقوبلنا بالتبري ((أي البرائة)) من قبل أعمامي .. وللأسف!!! بسبب موت الوالد عليه رحمت الله .. واشتغلت -أمي- عند الناس .. وقعدت تخيط .. مع رعي الغنم كل هذا لكي توفر لنا عيشة هنيئة !!! تستغربون - ترعى غنم - لأننا نقطن في قرية ومن عادة أهل القرية أنهم يربون الماشية والأغنام . يا عزوز لا تستطرد!!! آسف.. وأخذت تصرف علينا حتى بلغت سن العاشرة حينها قام راعي البقالة اللي جمب بيتنا بتوضيفي عنده - مدير عام- لالالا تصدقون!!! صبي عنده من عقب العصر إلين ما يسكر الساعة 10 مساءا مع العلم بأنني كنت أدرس حينها لكن وللأسف ما قدرت أني اتميز بالدراسة وذلك للظروف المحيطة بي من كل جانب !! المهم وضفني عنده بـ 300 ريال .... الحمد لله نعمة!!! آآآآآآآآآآه حينها بدأ المرض ينتشر بجسم أمي!! الله يجيرنا وياكم !!!! لكنها -جزى الوالدين على الله - ما كانت تعلمنا أنها مريضة !!! وهذا السبب الثاني أما الأول فهي لقلة ذات اليد .. وهو معروف!! تبون تقولون وين أخوانها !!! وين أمها !!! أمها اللي هي جدتنا .. متوفية من زمان .. وأخوانها مشغولين دائما !! طبعا هذي تصريفة من تصاريف تقولها لنا أمي أذا سألناها عنهم!! أما الأعمام ... فلا أكذب عليكم إذا قلت لكم بأنهم قد طردونا من بيتهم ((أنا+أختي+أمي)) مع بعض !!! سبحان الله ...!!! مع أننا ماقد سوينا لهم أي شيء !!!! لكني قبل كنت اذا بغيت أروح اسلم على عماني بيوم العيد كان يقول لي : رح خذ هذي خمسين ريال ولاعاد تجي تراك تفشلنا !!! مع أني كنت التزم الادب مع الكبير وأحافظ على الهدوء !!!!! طبعا هذا الكلام كله يوم أني صغير... لكن تبين لي كل شي يوم كبرت نرجع لأميمتي المسكينة عندما بلغ سني الـ16سنة كان قد استشرى المرض بأمي .. فأنطلقت أنا وهي واختي إلى الرياض لكي نعالجها وجلسنا شهورا نتردد على الرياض ذهابا وإيابا لعل وعسى ولكن لكل شي إذا ما تم نقصانو........... كان قدر رب العباد أسرع من أن نعالجها .... نكمل بكرا انشاء الله الجزء الثاني
_________________ ما قد شفت يوم مر علي من غير نحس !!! لا تتعجبون من كلامي تراه واقع بالفعل؟!؟! |
|
#2
04-04-2003
| ||||
| ||||
| اخوي انت سالفتك سالفة ... بس وش مقصدك من السالفة كلها ؟؟؟ الله يكون بعونك انت واهلك ... الله يحفظهم لك
_________________  |
|
#3
04-04-2003
| ||||
| ||||
| الله يعينك اخوي ومابعد العسر الا اليسر الشكوى لله معزه ولعباده مذله على اجر انشالله |
|
#4
04-04-2003
| |||
| |||
| بسم الله الرحمن الرحيم السلام عليكم ورحمة الله وبركاته اخي العزيز لقد مصعت قلبي مع تسبدي من كلامك وبتسا القلب والعين والله يكووون بعووونك ياعزوز وعظم الله اجرك وخل ايمانك بالله قوي . يا اينيمم انا اقولك وش قصده يبي يجمع تبرعات من المشاغبين وانا اول واحد يقط هاك عزوز هذي ريالين بالحصاله وشووف الشباب ترا ما يقصرون و السلام عليكم ورحمة الله وبركاته ALJockey |
|
#5
04-04-2003
| |||
| |||
| الجزء الثاني توفت الوالدة وأنا حين إذٍ.. ابن عشرين سنة!!! يعني معاناتنا معي الوالدة كانت منذ سبع سنين بالنسبة لنا أما بالنسبة لها فـ 10 سنوات ... المهم!!! طبعا كما هو المعهود من أقاربنا الجفاء التبري لدرجة أنهم ما اتصلوا يعزوننا حتى !!! طبعا وقتها كنت قبل كا تتوفى الوالدة قد خلصت من الثانوية وكنت اشتغلت بأحد الكاباين ((كبائن الاتصالات)).. والراتب كان 1500ريال نرجع مرة ثانية للسالفة!! تركنا الديرة اللي كنا بها.. ديرتنا ديرة النحس والجفا والتعب وعزلنا ومشينا للرياض... طبعا بيتنا آآسف الزريبة اللي كنا ساكنين بها كنا مستأجرينها من واحد ولعل يوم شاف أن الوالد والوالدة توفوا كرشنا منها ((أي طردنا )) وبصراحة معه حق لأننا يومها كنا ماندفع الايجار له وخصوصا أخر سنتين من عمر أمي لكثرة المصاريف المستلزمة لها .... لكن الله أقوى ...!!!! صحيح أني كانت أمنيتي أني أحتل هاك المنصب المالي عشان أقدر أوفر لأمي أحتياجاتها وكذالك لأخيتي الصغيرة ........ لكن ماباليد حيلة!! نرجع مرة ثانية وآسف على الاستطراد الممل!! رحنا للرياض ..!! وحالتنا مثل حالة بزر ضيع أمه بالسوق مايدري وين يروح له !! ولا يعرف أحد بهالسوق أبد وكذلك خايف!!! تخيلوها معي.. أبد حالتنا مثلها دورت شغلة أشتغلها بالرياض ومن هنا وهنا لقيت لي وضيفة تناسبني براتب 1800 ريال الحمد لله نعمة!!! وسكنت بغرفة فوق أنا واختي .. طبعا ودكم تعرفون وش بهالغرفة مدخل وتجيك على اليمين غرفة بتاع كله وفيه غرفة على الجهة أي على اليسار أصغر منها وحمام وجمبه دافور !!! هذي هي الشقة وطبعا هي لتميزها فهي أصبحت فوق السطح يعني ((فوء السطوح)) على لهجة المصارية .. خلصنا من هالشقة أشرح لكم حياتي اليومية .. من الساعة 7 صباحا أنطلق إلى عملي وهنا تجدر بي الاشارة إلى أني لم أمتلك يوما سيارة ولم أسقها قط !!! فلذلك كان علي لزاما أن أستقل الليموزين يوميا !!! وبعض الاحيان إذا شفت نفسي نشيط بعد صلاة فجر رحت للعمل مشيا على الاقدام حيث أنه يبعد عني 8 كيلوا متر فقط!!! وذلك توفير لقيمة الليموزين !!! تبون تقولون والله يا أنت بخيل !!! فأقول لكم بقيمت هذا الليموزين أكون قد كسبت وجبة العشاء لذلك اليوم فإن لم أوفرها فعليه العوض ومنه العوض!!!! أما بالرجعة من عملي فغالبا ما أرجع مع أحد العمال الذين بالمؤسسة والذين يمتلكون سيارات لهم !!!! وارجع من الدوام الساعة 6 مساءا للبيت .. ولا تسألني بعدها عن أي لأنني أكون مكدود ومنعصر وحالتي حالة !!! فتستقبلني أخيتي بالبشاشة واللطافة والابتسامة الجميلة !!! ويجدر بي ألى أن أقول لكم أنها كانت مالية على البيت !! أجي ألقى البيت نظيف وجميل وابتسامة مصطنعة جميلة !! وازحف زحف إلى أن أجد الفراش من التعب .. وبعض الايام أنام بثيابي!! وحياتها هي الاخرى معاناة أخرى .. فهي تجلس بالبيت وتقوم بتغسيل لمن أراد ذلك من سكان العمارة العوائل طبعا !!! وتتقاضى على ذلك أجرا زهيدا جدا جدا !!!! استمريت على هذه الحالة 5 سنوات حتى ارتقى راتبي إلى 2500ريال ولله الحمد وكنت قبلها قد جمعت فلوسي حتى اشتري سيارة لي على قد المقام .. طبعا مهنا فلوس ..ولا اهنا أبو يقول لي وش تبي يا وليدي كامري ولا كرسيدا !!!؟؟؟ ولا عندي أم تقول يا وليدي خذ سيارة زينة عشان أبي أفتخر فيك قدام الناس !!! ولا عندي مثل ماعند عيال عمي !! ماخذين السيارات من يوم أنهم ولا عندي مصرف مثلهم !!!! ما عندي إلا أختي وهي لا تهش ولا تنش!!! لأنني وبكل أسف أنا انسان منبوذ من قبلهم ومكروه لأن أبوي وأمي ماتو وحنا صغار !!!!! والله ياهو ذنب بعد!! قهر والله قهر !! تشوف غيرك متدلع وشبعان وأنت جوعان وما تلقى شي تاكله وتضطر إلى أنك تمشي إلين ما تتفطر قدميك عشان تقدر توفر قيمة الأكل!!!!!!!!!!!!!!!!!!!!!!!!!!! الله يرحم الحال بس!!! طبعا تحسن حالي بعد ما شريت لي سيارة واستمريت على حالتي الجديدة لمدة 3 سنوات ... وبعدين تدرون وش صار .. جا واحد وبغى.....!!!!! أعلمكم بالجزء الثالث انشاء الله ==================== الاخ EMINEM مقصدي من هذا كله أني أبي أفضفض عن ما بقلبي من هموم وضيقة صدر وبعدين إذا كانت ما اعجبتك قصتي فتراني أمتنع عن كتابتها عشانك بس !!! ((حتى بالانترنت محدن فاضي لي))!! الاخ سفير الشغب الله يجزاك خير وتوك ما بعد قريت شي!!! الاخaljockey الله يجزاك خير وعارفين انك ماتقصر والله يا صنايدي ووفر دموعك ذي لأنك في كل مرة تبي تكبها إذا قريت قصتي!!!
_________________ ما قد شفت يوم مر علي من غير نحس !!! لا تتعجبون من كلامي تراه واقع بالفعل؟!؟! |
|
| مواقع النشر (المفضلة) |
| أدوات الموضوع | |
| طريقة عرض الموضوع | |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر رد |
| قصتي مع مدير المدرسه | هلالي حارق دم النصر | ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه | 11 | 08-06-2009 05:19 PM |
| قصص عجيبة عن الاستغفار | عبد الله 77 | القصص و الروايات و الحكايات قصص قصيرة و تعلم القصة story novelette | 16 | 05-12-2008 04:31 PM |
| ((((((**مرسيدس** عجيبة غريبة مادري ايش هرجتها)))))) | المجرم الحنون | السيارات و الدراجات الناريه الشارع الاصفر تقحيص تفحيط تطعيس ترهيم | 25 | 12-10-2007 06:14 PM |
| قصتي مع البنت اللي اتصلت علي الفجر .. ابي الحــــــــــــــل ..ابي رايكم بسرعه | مجرد مشاعر | منتديات الفسحة العامة | 37 | 12-03-2007 01:45 PM |
| قصتي يوم رحت اخطب نانسي عجرم | mgn000nha | القصص و الروايات و الحكايات قصص قصيرة و تعلم القصة story novelette | 11 | 11-23-2007 09:08 PM |
-الدورات
التدريبية بجامعة نجران-
العرض العادي
