لا تكسر الفانوس و الليل داهم= اترك بصيص النور يمكن يقدّيك
مثلك يصير بلعبة الوقت فاهم = لو ما عطيت الوقت وش لون يعطيك
الغاوي اللي بالخيالات واهم = لا يسمع الهادي و لا هو بهاديك
لا تستمع لأهل النمامه تراهم= يبون شبّه نارها بين أهاليك
و احرص على جيران دارك عساهم= يثنون لى جاك العدو طامعٍ فيك
الأهل تقوى بالمودة عصاهم = و القوم تخشى جمعك اللي يباريك
ما تبري القلب العطيب الدراهم = و لا تعيد العافية كثر أداويك
حار الفكر و الطرف بالليل ساهم= و شوفات فكري بددتها لياليك
ثوّر عجاجٍ مدلهمٍ و جاهم = وراه نوٍ ناصيٍ خضر أراضيك
الله ينجي دارنا من بلاهم = و الله من شر الليالي ينجّيك

طال ليل الشتا و البرد قصّ العظام = و اشتهر فيه هول الليل .. نوره كذوب
إحذر الدرب يا ساري عليك السلام= مبتدا الدرب واحد ثم ياتي دروب
لا تسلّف عصاتك و انت ساري ظلام = من يسلّف سلاحه في ليالي خطوب
ما ينوب المفرّط غير كثر الكلام= و الحسايف عقب زلاتها ما تنوب
أنصح الناس و هول الليل .. عندي هيام = صار نوره شمال و صار دربي جنوب
و القدم من حفاها ما تحمّل قيام = المسافة طويلة و أزعجتني هبوب
و أحسب النور عنده بيت و إلا خيام = أثره الوهم يلمع و أحسب إنه شبوب
و أحسب الشوف يصدق في عيون الغرام = أثره الحلم يقدح في العيون و يذوب
و أحسب الصوت من هول الليالي كلام= أثر صوته بليل البرد ضحكة لعوب
و أحسب إنه هلال الفطر عقب الصيام = أثر كذبه هلاله ما تفطّر قلوب
ضامني طول ليلي و اشتهيت المنام= و الشروق اشتهيته و اشتهيت الغروب
يا حبيبي فديتك و افتداك الانام = فيك كلٍ غلبت و منك صرت مغلوب

يا صاح انا قلبى من الحب مجروح=جرح عطيب ما لقى له من يداوي
لو ينشرى قربه شريناه بالروح=مير البلا شوفه غدى به هقاوي
أهل دمع فوق الاوجان مسفوح=على الذى ما هو بـ للغدر ناوي
انا ادرى انه مثلي اليوم مطروح=لاشك ما يقوى و لاني بقاوي
لولاي ادارى سر الاحباب لا ابوح=و ابيع بيعة الهبيل الفداوي
لكنى اجحد فيه عن كل مفضوح=خوفي عليه من الحكي و الدعاوي
حسبي على اللى حط فى الدرب ساموح=العذيل اللي جرّ كل البلاوي
من اول باب المواصيل مفتوح=يوم ان عذال المودة خــلاوي
واليوم يسد الباب لوح(ن) على لوح=و امسيت انا يا صاح قلبى شقاوي