تزف الفتاة الى عريسها في ليلة العمر
ويفرح الوالدان .. ويقولان :
الحمدلله ارتحنا .. بعد سلسلةٍ من المتاعب
وخلّصنا مهمتنا .. عاد نتفرّغ لانفسنا ( بعد هالعمر .. استحوا على وجيهكم يالله حسن الخاتمة )

.... وتنتقل الكاميرا الى بيت الزوجية لنقل المباراة اقصد الاحداث من هناك
مع تمنياتنا للجميع بقضاء وقت طيب وممتع

***************************************

المشهد الاول :
***********
الزوجة مع اول كلمة تزعل .. يعني لوقال لها ثوبك لونه صارخ على طول تتجه الى الشنطة
وتفتح الدولاب (تسوي زي ماتشوف بالتلفزيون .. ضعيّفة )وتضف ثيابها وتتجه الى -- > الاهل

[ نصيحتي .. اعقلي وخلّي عنك هالحركات لانه ماراح يعلّق الثياب مرة ثانية بالدولاب الاانتِ..
وزوجك اذا وصل حده وبغى يراضيك جاب لك مطبّق ..
وبعدين لاتختارين الوان صارخه .. انعدم الذوق ]

وكل يوم والثاني عند الاهل ومشاكل وقال لي وفعل وطبخي مايعجبه ( بعد انتم يالرجاجيل ابلعوا العافية وجاملوا ).. يعني ماارتحنا ولاطبنا ولاغدا الشر .. واهم شي ماتفرغوا لانفسهم

----------------------------

المشهد الثاني :
**********
تكون الزوجة جالسة على الفطور ( عاد مهوب لازم تعرفون وشو الفطور .. مهوب كل شي اعلمكم اياه )
وتقول : احس بدوخة .. وعرفنا .. مبروك المدام حامل
ويفرح الوالدان ( لا ماعاد يتهاوشون .. ابشركم اعقلوا )
ويقولون : نبي نربيه احسن تربيه ونعلمه احسن تعليم ونخليه دكتور قد الدنيا ( ايه الهرج واجد )
وهم مايدرون انها بدت سلسلة المتاعب

*مرحلة الطفولة ( يناسبه سيريلاك بالقمح والشعير .. شعير ؟؟ غنمه هو ؟ )
المتاعب :
لايطيح من الدرج / لاينكب عليه الحار / لا يقرب الفرن / ارتفعت حرارته / لاتسوي الشغاله فيه شي
... متى يكبر ونرتاح ؟؟

... ويكبرقليلاً .. ويعتاد حياة الشارع
لاتصدمه سيارة / لايماشي اكبرمنه / وين يروح بعد المدرسة / نجح ولاّ لا / جب لي سيارة /
مانيب مكمّل دراسة
... حتى يتخرج من الثانوية بعد جهد جهيد وتعب مديد وعيد سعيد
ويلفظ الوالدان انفاسهما الاخيرة قائلان :الحمدلله ارتحنا

--------------------------

المشهد الثالث :
**********
الابن او الابنة بعد الثانوية :
واسطات لدخول الجامعة / قبلوه ولاّ لا / القسم مهوب المطلوب / تمنن للدكاتره / المراجع صعبة /
المشاوير بعيدة / المعدل لاينقص / اتساع رقعة الدولة الاسلامية ( لاتاخذون في بالكم )

......... حتى يتم التخرج ويقولون :
الحمدلله ارتحنا ( مساكين مايدرون وش اللي ينتظرهم )
---------------------------------

المشهد الرابع :
**********
انواع الشحططه في طلب الوظيفة / كل يوم على الجريدة تدور اسمك ولايمكن العثور على الملقم اقصد اسمك

.. وتتجه بشهادتك العالية الى سوق الخضار
( طيب البنات وش يسوون .. جربن بسطات الحريم )
[ لا احد يجي ويقول المقال ناتج عن خبرة لكاتبته .. مااقصد احد ابد ]

... ويرن جرس الهاتف ( لازم التشويق )

ويزف احدهم اليك البشرى بقبولك في الوظيفة
وعلى طول وش يقول ؟ صح : الحمدلله اخيراً ابرتاح ... بعد مسكين

--------------------------------------

المشهد الخامس :
*************
الوظيفة في قريةٍ نائيةٍ مقفرةٍ مجدبةٍ ( هذي اطلال مهيب قرية )

... وهنا يبدأ شد الرحال والغربة .. ويبدا توزيع الدورية على الاهل للذهاب مع الفتاة ....
ويبدا البحث في شجرة العائلة للعثور على اخ من الرضاع او عم او خال للاقامة عنده وتنطيل الوجه عليه
.... ويبدا التقديم على طلب النقل

... وبعد عدة سنوات يتم النقل
وطبعاً يقولون الحمدلله ارتحنا .. وقلت مساكين
-------------------------

المشهد الاخير : ( لا مايموت البطل .. لاتخافون )
*********
يقبل على التدريس بحماس وجدية .. ويصطدم بالعقبات
مزاجية المدير / تعسف المشرف / عدم الانسجام مع زملاء العمل نصهم يبي يتقاعدون وانت دماء شابه /
شكاوي الطلاب
يعني تقول للطالب (شاطر) يشكيك لان معناها الاصلي ( حمار)
يعني قبل اي كلمة افتح المعجم وابحث عن اصلها
....
وتعود الى البيت منهكاً .. وتستقبلك الوالدة بقولها : نبي نفرح فيك
وتخطب فتاة ( اجل وش تخطب .. اكيد فتاة )
وتزف الفتاة الى عريسها في ليلة العمر
ويفرح الوالدان .. ويقولان :
الحمدلله ارتحنا ونبي نتفرغ لانفسنا ( للحين مصرّين )
ورجعنا على طير ياللي

مساكيـــــــن .. مافيه احد مرتاح

ودمتم في رعاية الله

منتديات مدرسة المشاغبين - منتديات الفسحة العامة