ياهوووووووووووو ليش مافي ردود اذا مالقيت ردود ماراح اكمل

في المستشفى وبالتحديد في غرقة جاسم .. الاهل متجمعين عند جاسم الا الريم وعلي وبومحمد .. دخلت عليهم فاطمه منخطف لونها .. انتبه عليها توأمها ..
عبدالعزيز: شو فيج فطيم؟ .. منخطف لونج
فاطمه بتوتر: ولا شي ..
عبدالعزيز: قلبي يدق مثلج .. شو فيج؟
فاطمه: اقولك مافيني شي .. اكشف عن قلبك فديتك ..
عبدالعزيز يهمس في اذن توأمه: بقولج شي واحد وانتي ادرى به .. انا وانتي طينه وحده .. يعني لا تحاولين تخشين علي سمعتي يا عسل ..
فاطمه ابتعدت عنه وابتسمت: العب غيرها .. وراحت عند مريم اختها ..
تم عبدالعزيز يناظر توامه فتره .. وبعدها طلع من الغرفه وشاف يوسف واقف في الممر .. راح يسلم عليه
عبدالعزيز: السلام عليك يوسف ..
يوسف مبتسم: عليكم السلام بو سعود .. شحالك ؟
عبدالعزيز: الحمدلله .. وانت علومك؟
يوسف: ما نشكي باس .. الا اشوف الاهل محتشرين بالغرفه . .
عبدالعزيز: اسوي لك درب ..
يوسف"يا ليت والله": لا مو مشكله .. خل الاهل ياخذون راحتهم .. برجع بعد ما يتوكلون
عبدالعزيز: امش نروح الكفتريا .. احس نفسي مخنوق .. وفي خاطري كلام ودي اقوله ..
يوسف بأهتمام: عسى ما شر بو سعود ..
عبدالعزيز وهو يمشي مع يوسف: يوسف .. عندي احساس غريب ناحيتك .. شعور ماعرف كيف اوصفه .. احسك قريب مني ..
يوسف استغرب من كلام عبدالعزيز: قريب مني .. شلون؟
عبدالعزيز قعد على الكرسي: مادري يا يوسف .. من اول يوم شفتك فيه .. وانا احس بهالاحساس ..
يوسف فهم شعور عبدالعزيز اللي ماقدر يفسره . لان عبدالعزيز توأم فاطمه .. ويوسف يموت في فاطمه ..
يوسف: يمكن ارتحت لي ..
عبدالعزيز ببرأه: اي والله ارتحت لك .. احبك فالله ..
يوسف مبتسم: اعتبرني اخوك الكبير .. وانا حاضر لك في اي وقت ..
عبدالعزيز: الله يسلمك يا يوسف ..
تموا يسولفون مع بعض .. ويوسف كان فرحان بكلام عبدالعزيز ..

اما في غرفة جاسم .. الوضع غير .. سوالف وضحك ..
مريم: بابا .. ها شو بتسون على موضوع عزيز .. متى بتروحون للناس؟
بوفارس: على الاسبوع الجاي انشالله .. بس يرخصون اخوج .. باكلم امج عشان تكلم اخوج
مريم: من تكلم فارس؟؟
بوفارس: لا يبه .. عزيز ..
مريم: ليش؟
بوفارس: لازم تكلمه .. تقوله عن العرس ومسؤليته .. وانه حياة جديده وانه مو لعب ..
مريم: وليش انت ما تكلمه ؟؟
بوفارس: باكلمه بس بعد الموافقه الرسميه من اهل البنت ..
مريم: اها .. عيل جي السالفه ..
بوفارس: اي هاي كل السالفه .. وباس مريم على راسها وحضنها .. شافهم خالد ..
خالد"ياحظك يا عمي .. لازم اكلم عمي .. مريم لي انا "
انتبهت فاطمه لنظرات خالد .. نزلت راسها وابتسمت .. تذكرت الشخص اللي خبطت فيه وهي داخله الغرفه ..
فاطمه"ليش قلبي يدق بسرعه لي تذكرته ؟؟ .. شكله مو غريب علي .. شايفته من قبل .. وااي للحين اشم ريحة عطره .. ابتسمت مره ثانيه"
فارس: فطيم .. فطامي .. كان يناديها وهي سرحانه بعالم ثاني ومبتسمه ..
فاطمه: هااا .. هلا هلا فارس ..
فارس: الحلو سرحان بمن ؟؟؟
فاطمه منحرجه: هههههه .. لا افكر في صديقتي اللي شفتها من شوي ..
فارس: منو صديقتج ؟ ليكون اللي دوم تجينا البيت
فاطمه: اللي تجينا البيت .. شو السالفه ؟؟
فارس مبتسم: هههههه لا تخافين .. مو حاطها في بالي ... بس كنت ..
تقاطعه فاطمه: كنت شو ؟؟
فارس: خليني اكمل كلامي مع ويهج
فاطمه: زين كمل .. كمل
فارس: زين طال عمرج .. احمد بن راشد شافها كم مره والولد يبي يكمل دينه ..
فاطمه: والله .. وحليلها لطوف
فارس: اي وحليلها هاذي لطوف .. اسمها حلو
فاطمه وضربته على كتفه: ما يخصك باسمها ..
فارس: خخخخخخخ مو انا اللي باخطبها .. المهم كلميها عشان احمد يكلم عمه زين اختي
فاطمه: اوكي ولا يهمك ..
رن تلفون فارس .. طالع الجوال وابتسم .. كتم الرنه وقام بيطلع ومسكته فاطمه
فاطمه مبتسمه: وين رايح .. ليش ما تتكلم هني ..
فارس طالعها بنظره: اروح وين ما ابي .. ومشى عنها .. فاطمه استغربت من رد فارس .. وتضايقت .. طلع فارس من الغرفه ورجع اتصل بالشخص المتصل له ..
فارس: السلام عليكم
مناف: وعليكم السلام
فارس: شو اخبارج مناف؟
مناف: الحمدلله .. وانت اخبارك؟
فارس: تمام
مناف: حبيت اشكرك على المعروف اللي سويته فينا .. اليوم اخواني راحوا المدرسه وهم شبعانين .. وسويت لهم اكل خذوه معاهم المدرسه .. وعطتهم مصروف .. والله والله كانوا فرحانين ومستانسين .. ما قصرت و ...
قاطعها فارس: شوي شوي .. خلصتي الكلام ..
مناف منحرجه: آسفه .. بس من فرحتي .. الله يفك عنك اي كرب وحزن يا رب يا رب ..
فارس: آمين .. وبعدين انا ما سويت الا الواجب .. وحاضر في اي وقت ..
مناف: جميلك هاذي بتم طول عمري شايلته على راسي .. وما راح انساه لك ..
فارس"يالله .. شلون الفرحه في قلبها .. من مبلغ تافه بالنسبه لي .. فرحها هي واخوانها .. الحمدلله اني فرحتها هي واخوانها"
فارس: اقول مناف .. عندج اخوان وخوات صح؟
مناف: عندي اخوان .. انا البنت الوحيده ..
فارس: كم اعمارهم اخوانج ؟
مناف: فيصل عمره 10 سنوات .. عبود 8 سنوات والصغير نايف 4 سنوات ونسميه البوكيمون ...
فارس: ههههه وحليله .. ليش ؟
مناف: لانه من بعد المرض تغير شكله .. كنا بالمستشفى وفيصل يموت فيه وكان يبي يضحكه ... قاله تحولت من نايف الى نيوف .. ورد عليه عبود وقاله شدعوه بوكيمون .. ومن يومها ومانسميه الا البوكيمون ..
فارس: ههههه الله يخلي لج اخوانج .. بس شو المرض اللي في الصغير ؟
مناف: اخوي يعاني من سوء التغذيه .. وسكتت مخنوقه ..
فارس سكت ما عرف شو يرد عليها .. تموا فتره ساكتين .. فارس كسر حاجز الصمت بينهم
فارس: مناف
مناف: تفضل
فارس: دام فضلج .. انتي من وين جبتي رقمي ؟
مناف منحرجه: هاا .. رقمك؟
فارس: اي
مناف: ممممممم ... مره كنت رايحه محل ملابس اطفال .. وانت كنت تكلم صاحب المحل .. وعطته بطاقتك .. وطلعت .. لما رحت ادفع شفت البطاقه على الطاوله وحفظت الرقم ..
فارس"مسكينه يا مناف": اي محل ..؟؟
مناف: اذكر انك كنت تقول لصاحب المحل انك تبي تشتريه منه .. وهالجمله لفتت انتباهي ..
فارس: عرفت المحل .. وشريته من الريال .. يعني شفتيني
مناف: الصراحه ما خذت بالي من شكلك عدل ..
فارس: سمعي .. اي وقت تمرين المحل اخذي اللي تبينه وطلعي .. زين
مناف: ليش؟!؟
فارس: اعتبري المحل محلج .. واللي تبينه لاخوانج مري اخذيه ولاتدفعين ..
مناف: لألأ .. عيب .. انا ماطر منك
فارس: انا ما قلت اطرين
مناف: ولا ابيك تشفق علي ..
فارس"نفسها عزيزه": انا ما اشفق عليج .. بس سمعي كلامي زين ...
مناف: يصير خير ..
فارس: ولا يهمج ..
مناف تضايقت من كلام فارس: انا باخليك الحين .. حبيت اشكرك على فرحة اخواني
فارس: الله يسلمج الشيخه ؟؟ وحس انها تضايقت من كلامه .. سكر منها عشان ما يضايقها زياده ..
انهى المكالمه ورجع غرفة جاسم .. كان يدور على فاطمه .. لانه حس انه زعلها
فارس"شفيني ازعل البنات اليوم"
فارس: فطيم ..
فاطمه: نعم فارس ..
فارس"بل من قلب ماخذه على خاطرها مني": تعالي معاي .. مرايم انتي وامي وايمان رجعوا مع عبدالعزيز .. انا وفطيم عندنا مشوار ..
ايمان بلقافه: وين المشوار ..
فارس: لقافه .. يلا فطيم .. يا جماعه احنا تستأذن .. الجسمي نمرك بكره باذن الله .. فاطمه كانت مستغربه من فارس .. سلمت على ابوها واخوها وطلعت ورا فارس .. وهم يمشون في احدى ممرات المستشفى .. تلاقوا مع يوسف وعبدالعزيز اللي كانوا طالعين من الكفتريا .. فاطمه ما كانت منتبهه لعبدالعزيز ويوسف .. كانت تمشي جنب فارس ومنزله راسها .. شمة ريحة عطره ولا شعوريا رفعت راسها .. وتمت اطالع يوسف بشوق .. واستغربت من شعورها .. وقفت على جنب وراح فارس يسلم على يوسف .. (على فكره فاطمه ما تغطي ويهها لما تطلع بس تتحجب عدل)
فارس: شحالك يوسف؟ سمعت فاطمه اسم يوسف وابتسمت ابتسامه ناعمه ونزلت راسها
يوسف: طيب الله يسلمك .. وانت شلون امورك ..؟
فارس: الحمدلله .. ها بو سعود .. شحالك اخوي؟
عبدالعزيز: تمام .. الاهل للحين داخل ..
فارس: اي
عبدالعزيز: وين رايح اخوي ؟
فارس: عندي مشوار
عبدالعزيز: اها .. ومشى راح عند توأمه .. تم فارس يسولف مع يوسف وياخذ اخباره ويسأل عن سلمان .. ويوسف ميت يبي يطالع فاطمه
عبدالعزيز: هلا فطامي .. شوفيج؟
فاطمه: هلا فديت عمرك .. مافيني شي
عبدالعزيز: على وين ؟
فاطمه: مادري عنه
عبدالعزيز: اكيد مزعلج
فاطمه منحرجه: لا مو مزعلني .. بس انا متضايقه شوي ..
عبدالعزيز: زين بناديه لج
فاطمه: فديتك يا عزوز ..
راح عبدالعزيز عندهم .. وفارس استأذن ورجع عند فاطمه .. وهو ماشي عبدالعزيز ناداه ..
عبدالعزيز: فارس ..
التفت فارس: هلا اخوي ..
عبدالعزيز: لاتزعل فطيم الغلا .. وفي هاللحظه يوسف كان مشغول بجواله
فارس: ومنو يقول اني مزعل الغلا .. ليش هي شكت لك
عبدالعزيز: لا ما شكت لي ... احس فيها
فارس: سلامي على قلبك اخوي .. مع السلامه
يوسف الل كان مشغول بجواله من سمع عبدالعزيز يقول"فطيم الغلا" حس بحراره في جسمه وابتسم ..
يوسف"فاطمه .. فديت فاطمه صج انها الغلا"
نرجع لفارس وفاطمه اللي استغربت حركة اخوها وتضايقت منها .. ركبت مع فارس السياره وكانت ساكته .. دخلوا منطقه غريبه .. مظلمه ومهجوره .. استغربت فاطمه
فاطمه: فارس .. احنا وين ؟؟
فارس: الحين بتعرفين
فاطمه حست بخوف: شو اعرف ؟
فارس وقف السياره وسط بيوت مهجوره ومكسره حالتها حاله: تصدقين ان في ناس عايشين في هالخرابات اللي جدامج
فاطمه: مستحيل .. من الي يسكن هني غير الجن ..
فارس: زين شوفي اللي يمشي هناك ..
فاطمه خافت ومسكت يد فارس: وااي .. ليكون ذاك جني .. فارس طلعني من هني
فارس: مسك يد اخته وضغط عليها يطمنها: لا تخافين فديت قلبج
فاطمه صاحت: لا لا لالا رجعني البيت .. عاد فارس
فارس: فديت قلبج اختي .. تخافين وانا معاج .. وتم يهديها .. تدرين ان في ناس عايشين في هالخرابات .. هالبيوت مكسره وماعندهم اكل .. يتمون بالايام ما يذوقون العيشه ...
فاطمه تمسح دموعها: والله .. ليش ؟؟
فارس: انولدوا فقراء .. الحمدلله على النعمه اللي احنا فيها ..
فاطمه: الحمدلله على كل حال
فارس: فطيم فديتج .. مابيج تزعلين مني ..
فاطمه: انا مو زعلانه منك .. بس حركتك ضايقتني ماتوقعتها منك ..
فارس باس فاطمه على راسها: ولا يهمج يا ام فارس عديها لي هالمره
فاطمه مبتسمه: ههههه وليش ام فارس .. مصدق بسمي ولدي فارس
فارس: شلون مل صدق .. اختي حبيبتي ما تسمي علي .. افا ...
فاطمه: ولا يهمك يا بومحمد
فارس ابتسم لاخته بحنان ..
فاطمه: الا بسألك فارس
فارس: عيويني لج ..
فاطمه: فديت عيونك .. ليش جبتني هني ؟؟
فارس: بس عشان انسيج اني ضايقتج ..
فاطمه: علي انا هالكلام ..
فارس كان جايب فاطمه عند بيت مناف عشان يقولها قصتها بس لما وصل تردد وغير رايه .. ومارد على كلامها .. اكتفى بابتسامه .. اما فاطمه من داخلها كانت تتسأل عن السبب
فاطمه"شو سالفة اخوي .. بخليه على راحته لين ما هو يقولي اللي بخاطره"
مر الليل على فاطمه طويل ويوسف ما فارق تفكيرها ..
فاطمه"يالله للحين اشم ريحة عطره .. نظرته لي فيها كلام وايد .. صوته للحين اسمعه .. شو فيه هالانسان بدى ياخذ تفكيري .. ومن متى يعرف اخواني؟؟" نامت فاطمه واسأله وايد في بالها عن يوسف ..

"شوفتك يا منيتي صدفه رتبها الزمان .. وانا في صمتي اقول الله يا زين الصدف"
في نفس الوقت يوسف الهيمان ما قدر ينام من فرحته بمعرفة اسم فاطمه ... حب حياته ..
يوسف"سبحان الله ... والله صدفه جمعتنا .. وما احلاها من صدفه .. الحمدلله يا رب جمعتني معاها .. ويا رب تجمعني معاها برضاك آمين يا رب العالمين " نام الهيمان يوسف بعد صراع كبير مع السهر والتفكير بفاطمه حب حياته ..

التوقيت:
الساعه وحده ونص بالليل ..
المكان:
بيت بو محمد .. بالتحديد غرفة فهد وسلطان ..
الحدث:
فهد كان نايم وفجأه وعى من نومه والتفت صوب الدريشه وشاف قطوه سوده .. استغرب من وجودها .. لان غرفته بالدور الثاني .. قام من فراشه وقف عند الدريشه والقطوه ما تحركت من مكانها .. ضرب الجامه بيده .. واختفت القطوه .. طلع من الغرفه راح الحوش يدور على القطوه .. خذ معاه لوح خشب وتم يدور على القطوه .. شاف القطوه وتم يركض وراها لين حشرها في زاويه .. وانهال عليها ضرب باللوح والقطوه تصرخ ولان بعض الضربات ماجات على القطوه كان اللوح يضرب بالارض والصوت عالي .. قعد بومحمد من نومه .. طلع من غرفته متخرع من الصوت اللي سمعه .. وطلع معاه خالد اللي اصلا ما كان نايم ..
خالد: شو صاير يبه ؟؟
بومحمد: مادري يبه ..
نزل خالد تحت وشاف باب الصاله مفتوح وبومحمد شغل ليتات الحوش ولحق خالد .. بس فجأه وقفوا مكانهم من اللي شافوه جدامهم ..
خالد بخوف هز كتف فهد ..
فهد التفت على خالد .. كان خالد خايق انه ما يشوف ويه اخوه .. خايف تطلع له الجنيه بدل اخوه .. تلاقت عيون خالد وفهد ؟؟ و ويه فهد كان ملطخ بدم القطوه وكان يتنفس بتعب .. ويطالع خالد بنظرات غريبه .. خالد التفت على القطوه الميته على الارض ومنظرها مقزز ويخوف .. واللوح في ايد اخوه كله دم القطوه .. استغرب وحس انه ما يقدر يتكلم ..
قرب بومحمد من فهد ومسح ويه فهد بيده ..
بومحمد بقلق: شصاير يا فهد؟
فهد كان يطالع ابوه وعيونه كلها كلام مو قادر يعبر عنه ..
سحب خالد اللوح من يد اخوه بهدوء .. وترك بومحمد يكلمه ..
بومحمد: فهد يبه قولي شو فيك .. ؟ ليش سويت جي .. شو اللي طلعك بهالليل؟
فهد ما قدر يحبس دموعه اكثر وارتمى بحضن ابوه يصيح .. ولانه ما يتكلم تطلع منه اصوات غريبه لما يصيح .. بس هالمره صوته كان حزين .. شاله بومحمد ودخلوا داخل وام محمد كانت تراقب اللي صار بهدوء وخوف في الصاله .. اول ما دخلوا راحت عند بومحمد تسأله عن اللي صار ..
ام محمد: شو فيه فهد؟
بومحمد: مادري والله .. خليه يهدى ونعرف منه كل شي بعدين ..
ام محمد: يبه خالد شو فيك منخظف لونك ؟
خالد بتوتر: مافيني شي .. بس مستغرب من اللي سواه فهد!!
وفي هاللحظه دخل محمد و وراه سلطان وفاضل..
محمد: عسى ماشر؟
ام محمد: المصايب تتحذف علينا من كل صوب يا محمد..
راح محمد عند امه وحضنها: انا لله وانا اليه راجعون .. اذكري ربج يا يمه .. الحمدلله على كل حال
ام محمد تصيح في حضن ولدها: آه يا محمد .. آه .. الله يعينا على بلاوينا .. وتمت تصيح بحزن .. في ذيك الليله .. كل بيت بومحمد قعدوا من النوم حتى علي .. بس كان خايف ينزل لانه معاقب .. كان الغموض سيد الموقف .. محد قدر يفسر تصرف فهد ..
" آه يمه ما بيديني شي .. والقدر حكمه علي .. لو بيديني هاك عمري .. خذ حياتي وهاك عمري .. ولا اشوفك تشتكي .. يمه عذبني البجي .. يمه ... يمه .. يمه ما بيديني شي"

ام مناف: مناف .. مناف قومي اخوج تعبان
مناف تفتح عيونها بتعب: نعم يمه ..
ام مناف: قومي .. نايف تعبان .. جسمه نار وما يقدر يتنفس
قامت مناف متخرعه: نايف تعبان . وينه ؟؟
ام مناف: في غرفتي مع فيصل ..
قامت من سريرها وركضت غرفة امها .. منظر اخوها يخوف ..
مناف: فيصل روح شوف تاكسي بسرعه .. بالبس عباتي وبالحقك
ام مناف: اي تاكسي بتلقونه الحين ..
مناف: انشالله بنلقى .. فيصل بسرعه روح .. طلع فيصل من الغرفه يركض ومناف لبست عباتها شلت اخوها ولحقت فيصل بسرعه ..
مناف وهي طالعه من البيت: يمه قعدي مع عبود .. ولا تقولين له رحنا المستشفى ..
ام مناف غرقانه بدموعها: وااي على ولدي .. يسرعه مناف يمه ..
طلعت من البيت ولقت فيصل حاير مكانه ..
مناف: ها فيصل .. وين التاكسي
فيصيل بخيبه: مافي .. الشارع فاضي ..
مناف دارت فيها الدنيا .. اخوها يحتضر بين ايدينها ودموعها على خدودها .. قعدت على الارض واخوها في حضنها .. جى على بالها فارس .. مالها غير فارس .. اتصلت له وسط دموعها كلمته ..
فارس خايف: شو فيج مناف .. ليش تصيحين ..؟
مناف: الحقني .. اخوي بيروح مني .. ارجوك .. فيصل كان مستغرب من مكالمة مناف
فارس: شو فيه اخوج ؟؟ انتي وين الحين ..؟؟
مناف: انا فالشارع .. مافي ولا تاكسي ياخذنا المستشفى .. ارجوك تعال .. اخوي بيروح من بين ايديني ..
فارس: فالشارع!! خلاص الحين جاي ..
مناف: ارجوك بسرعه .. ارجوك
سكر منها وكان مو مستوعب الموقف .. ما عرف كيف وصل المنطقه اللي فيها بيت مناف .. شافها قاعده على الارض و ولد في حظنها واخوها واقف عندها .. اول ما وصل فارس .
فارس: شصاير ؟
قامت من مكانها مناف: الحقني .. اخوي تعبان ..
فارس: ركبوا السياره يلا بسرعه .. وكان يشوف نايف يطالع فوق ويبتسم كأن احد يكلمه .. وصلوا المستشفى ونزل فارس خذ نايف من يد مناف وركض فيه داخل وفيصل ومناف وراه .. وهو داخل المستشفى سمع صوت من نايف .. وشاف عيونه مفتوحه يطالع فوق ومبتسم .. عرف ان نايف مات .. وقف مكانه وحس الزمن يمشي شوي شوي .. جات الممرضه وخذته من ايدها وراحت داخل .. فارس واقف مكانه مو قادر ينسى شكل نايف وروحه تطلع .. مات بين ايده .. حس برعشه في جسمه .. مناف حضنت فيصل وتمت تصيح .. فيصل كان غريب .. ما بين عليه الحزن او الخوف .. مشاعره تجمدت من طلعوا من البيت .. كأنه حاس ان اخوه بيموت .. اما فارس مازال منصدم من اللي حصل له .. تموا ينتظرون فتره لين طلعت الدكتوره من غرفة الطوارئ .. وكانت حزينه ..
قام فارس من مكانه: ها دكتوره بشري ..
الدكتوره: انت ابو الولد ؟؟
فارس دارت الدنيا فيه .. حس انه خلاص مات .. وانهم ماقدروا ينعشون قلبه ..
فارس: تفضلي دكتوره ..
الدكتوره: ما عرف كيف اقولك هالخبر .. انت انسان مؤمن .. والموت حق علينا كلنا .. وهني فارس غمض عيونه وحس انه مايقدر يوقف على ريله .. تكمل الدكتوره .. احنا حاولنا نسوي اللي علينا بس جبتوا لنا الولد وحالته صعبه جدا .. الولد يعاني من جفاف حاد وسوء تغذيه .. وفقر دم .. جابته لنا الممرضه وقلبه ما يشتغل .. حاولنا ننعشه بس مافي فايده .. بسبب الاعراض اللي قلت لك عنها .. الله يصبركم .. وامه حالتها حاله .. لو احتجتوا شي اخوي نادوا الممرضات .. لان زوجتك منهاره ..
مناف وفيصل كانوا حاضنين بعض وينتظرون فارس ..
مشى فارس متجه لمناف وفيصل وكان خايف شلون بيقولهم ان اخوهم مات .. كان يتمنى انه يكون في حلم .. لان الموقف صعب عليه ..
فارس: مناف ..
مناف قامت من مكانها: متى بنشوف اخوي ..
فارس منزل راسه: مناف .. اخوج وسكت ..
مناف: شفيه اخوي .. ودني اشوفه .. يلا
فارس: مناف .. اخوج راح عند ربج ..
مناف: لا .. يلا نروح له .. ليش واقف ..
فيصل قعد على الكرسي وصاح بصمت ..
فارس: مناف .. اخوج مات ..
مناف: لو سمحت هاي موضوع ما يمزحون فيه ..
فارس: انتي اقوى من عواطفج يا مناف .. لاتكابرين
مناف لاشعوريا ارتمت في احضان فارس: يعني خلاص .. ماشوفه بعد اليوم .. لا لا لا لا لا لا .. شلون برجع البيت من دونه .. وش بقول لامي ..
فارس ماعرف كيف يتصرف .. ومناف في حضنه تصيح .. مسكها من كتفها وقعدها على الكرسي .. وقعد جنبها يهديها ..
مناف: ابي اشوفه .. ارجوح
فارس: انشالله .. بس اكلم الممرضه .. مشى بعيد عن مناف وقلبه يدق بسرعه .. مشاعره اختلطت بشي من الخوف والحزن والصدمه ..
رجع لمناف .. وخذها مع فيصل .. دخلوا الغرفه .. شافوا جسمه الصغير ممدد على الفراش ومغطى بالكامل .. وانهارت مناف واغمي عليها .. شلها فارس وفيصل نادى الممرضات .. خذواها غرفه ترتاح فيها .. اما فيصل رجع لاخوه الممدد .. وكشف عن ويهه .. اول ما شافه صاح بصوت عالي .. فارس كان واقف عند باب الغرفه يراقبه ..
فيصل: نايف .. لاتروح نايف .. من بيقعدني للمدرسه كل يوم .. من بينتظرني عند باب البيت لي رجعت .. رد علي نايف .. من باعلمه الكاراتيه .. من اللي بيرسم لي ورد وطيور .. من اللي باحضنه وبابوسه وباعضض خدوده .. نايف .. نايف .. شبقول لامي لي رجعت البيت من دونك .. من بيلعوز عبود .. شبيسوي عبود من دونك .. شاقول لامي وعبود .. نايف .. ارجع نايف .. وتم يصيح بصوت عالي وينوح .. فارس ماقدر يستحمل حزن فيصل .. حضنه وتم يهديه ..
فارس: اذكر ربك يا فيصل .. الموت حق علينا .. اخوك راح عند رب العالمين .. المفروض تفرح له .. راح الجنه .. صدقني انه فرحان الحين .. خلك قوي يا فيصل .. انت ريالهم .. انت المسؤل عنهم .. لا تضعف يا فيصل ..
طلعوا من غرفة نايف .. وقعدوا على الكراسي اللي برا ينتظرون الممرضه تطمنهم على مناف ..
ليلة فارس كانت طويله .. موت نايف بين ايدينه .. انهيار مناف .. وغموض فيصل الغريب ..
كل اللي عاشه فارس في ذيك الليله .. عاشه معاه شخص ثاني .. كان مستغرب من وجود مناف ونايف وفيصل .. كان يراقب فارس من بعيد .. ويتسأل بينه وبين نفسه من يكونون اللي مع فارس ..
( يا ترى من يكون هالشخص .. وشو بيفسر وجود مناف واخوانها بالنسبه لفارس؟؟)

ملكة بكبريائي ارجوك طلبتك انك تكلمين القصه باسرع واقت اذا عليك امر بس مرة تعلقت فيها ابغى اعرف ايش بصير

مشكوووووورة اختي واااايد على القصة الروووعة والي اكثر من روعة ارجوكي كمليها بسرعة والله يوفقج دايماودوم

_________________