قصة مررره حلوه ((نهاية حبك اعدامي))

تحليل الشخصيات ..
طبعا هالجزء احلى جزء عندي .. لاني بيكون في محادثه بيني وبين كل شخصيه بالقصه .. طبعا راح ابتدي بالشخصيات الثانويه ..
طبعا انا طموح لازم اقول اسم الشهره احم احم..
فهد ..
طموح: هلا فهد شو اخبارك ؟
فهد: الحمدلله ..
طموح: دورك مؤثر فالقصه .. بس ما سلطت عليك الاضواء ..
فهد: اي انا ملاحظ .. بس ليش؟
طموح: ضفت شخصيتك عشان اسوي شوية جو بالقصه ..
فهد مبتسم: يسلمو يا طموح ..
طموح: العفو يا الفهدي حاضرين لك ..
أسماء طيوبه وعلى نياتها .. تكلمت معاها عالماشي ..
طموح: هلا أسامي ..
أسماء بخجل: اهلين طموح ..
طموح: شو رايج بدورج فالقصه ؟
أسماء: دوري ثانوي .. بس حلو ..
طموح مبتسمه: تسلمين لي يا حبوبه ..
أسماء مدت يدها وسلمت على طموح ..
سلطان الشاب الرزين والعبيط في نفس الوقت ..
طموح: الله حيهم ..
سلطان مبتسم: الله يحيج طموح .. شحالج ؟
طموح مبتسمه: طيبه .. اخبارك انت يا سلطان؟
سلطان: عايشين .. مع الربع الجسمي وأحمد ..
طموح: يعطيك العافيه .. بس شو رايك بدورك فالقصه ؟
سلطان: والله حركاتي شي .. والشباب المقاليع كول ..
طموح: انت مثلت شخصية الشاب المراهق اللي يحب انه يثقل جدام الحريم وماخذ راحته مع الشباب ..
سلطان: بس مغامراتي مع ربعي كول والله ..
طموح: اي لازم .. حركاتكم ماره علي من قبل ..
سلطان: يعطيج العافيه يا طموح ..
طموح: شرفتني يا سلطان ..
أحمد صديق سلطان والجسمي .. مادري ليش تخيلته ضعيف وايد ..
طموح: مرحبا أحمد ..
أحمد: هلا وغلا .. عيل انا ضعيف وطويل .. شو شايفتني ..؟
طموح: ما شفتك شي اي رجل ..
أحمد يقاطع طموح: خف ع الريس ..
طموح وأحمد: ههههههه ..
طموح: حليلك والله دمك خفيف ..
أحمد: شكرا شكرا ..
طموح: شو رايك بدوك فالقصه يا أحمد ؟
احمد: والله دوري حلو لاني كنت عبيط جدا جدا ..
طموح مبتسمه: اشكر انضمامك لقصتي المتواضعه يا أحمد ..

أحمد: حاضرين للطيبين ..
فاضل الشاب الشقي .. خفيف الدم والروح ..
طموح: هلا فاضل ..
فاضل: هلا والله ..
طموح: شحالك ؟
فاضل: طيب .. اعلومج انتي ؟
طموح: بتوحشوني كلكم ..
فاضل: خليني اعيش فالمكسيك الله يخليج ..
طموح حطت يدها على حلجها: هههههه .. من يعاف بلاده ؟
فاضل: والله كل شهر بنزل البلاد مره ..
طموح: صج والله .. لا مافي ..
فاضل بترجي: عاااااد ..
طموح: لا لا لا .. زين ممكن اخليك كل شهر تروح المكسيك شو رايك ؟
فاضل مبتسم: والله فكره بعد ..
طموح: حليلك يالفضلي ..
فاضل: لو سمحتي بس مريم بنت عمي تناديني بهالاسم ..
طموح: السموحه منك ..
فاضل: مسموحه الغاليه ..
طموح: زين ما قلت لي شو رايك بدورك ؟
فاضل: والله دوري كان ممتع جدا .. واحب مكان لي كان المكسيك .. والقصـــ
تقاطعه طموح: خير الشيخ .. شو احب مكان لك كان المكسيك .. شدخل المكسيك فالموضوع .. انا اسألك عن دورك يا رجل ..
فاضل: احم .. معليه لازم تراعيني شوي .. ما زالت ذكريات المكسيك تدور مثل الشريط جدام عيوني ..
طموح: خطير يا فضول خطير ..
فاضل: كلج ذوق يا طموح .. المهم دوري كان مناسب اسمي << شدخل .. ما علينا مثلت دور الشاب المقلوع .. الحياة ماخذته وكانت له عدة قرارات واختار الاحسن من بينها .. قراري اني اكمل دراستي برا كان قرار صعب .. بس الاشياء اللي بتترتب عليه في المستقبل بتكون في صالحي ان شاءالله ..
طموح: حلو حلو يالفضلي .. اتمنى لك مستقبل باهر وناجح ..
فاضل: تسلمين لي اخت طموح .. ومشكوره على الدور اللي لعبته في قصتج ..
طموح: العفو يا فاضل ..
علي الشاب اللي تغير وصارت شخصيته محبوبه عند الكل ..
طموح: السلام عليكم ..
علي رفع راسه وسكر الكتاب اللي كان يقراه: وعليكم السلام .. هلا طموح ..
طموح مبتسمه: شلونك يا علي ؟
علي تكتف وابتسم: طيب والحمدلله .. اخبار انتي ؟
طموح: طيبه .. شو تقرى ؟
علي: اقرى كتاب عن التكنولوجيا ..
طموح: حلو حلو .. زين شو رايك بدورك ؟
علي: احم .. والله فالبدايه ما عجبني الدور .. بس كان لازم العبه عشان خاطرج ..
طموح حاطه يدها تحت خدها: زين ..
علي: حبيت الهدوء والغموض اللي بشخصيته .. والتغير اللي صار له عجبني وايد بصراحه .. تغير للاحسن .. مشكوره يا طموح ..
طموح: تسلم لي .. وكان دورك حلو ..
علي: حاضرين لج يالطيبه ..
طموح ابتسمت لعلي ..
الريم .. المراهقه اللي اوهمت نفسها بحب فارس .. وصدمتها بخبر زواجه ومكافحته من اجل مناف ..
طموح: هلا الريم ..
الريم مبتسمه: اهلين طموح ..
طموح: شو اخبارج ؟
الريم: عايشين ..
طموح: ها الريم .. ليكون بعدج تفكرين في فارس ؟
الريم ويها صار احمر: هممممم .. لا خلاص حطيت في بالي هدف معين واسعى له ..
طموح: حلو حلو .. موفقه يا بنت ..
الريم: تسلمين ..
طموح: ابي اعرف رايج بدورج فالقصه ..
الريم: هممممم .. والله الريم شخصيه اندفعت بمشاعرها واوهمت نفسها بالحب .. عاشت قصة حب من طرف واحد من غير ما تدري شو اللي ممكن يترتب على هالوهم .. بس اكتشفت فالاخير انها لازم تنسى فارس اللي مستحيل انه يفكر فيها او يكون لها ..
طموح: عجبني تحليلج لشخصيتج يا الريم ..
الريم: عندي اضافه بعد ..
طموح: تفضلي حبوبه ..
الريم: بس اللي حبيته في شخصية الريم هدوئها فالحب .. بس عيونها فضحتها .. مشكوره طموح على الدور اللي لعبته ..
طموح: العفو يا قلبي ..
خالد .. الوسيم الهادي الرزين الرومنسي اللي كل بنت تتمناه ..
طموح: مرحبا خالد ..
خالد: هلا طموح ..
طموح: صج انك تشبه جدك سلطان ..
خالد مبتسم: لا ومع العلامه اللي في حاجبي صرت نسخه منه ..
طموح: اي والله .. ماشاءالله عليك يا خالد .. زين ابغي رايك يالشيخ ..
خالد: رايي يا طموح .. انج ابدعتي في زرع الخوف بقلوب قرائج .. مع هالجنيه اللي كل يوم والثاني تطلع لي انا وحبيبة قلبي مرايم .. شخصية خالد الشاب الهادي النشيط والمحب شخصه حلوه وايد .. ولعبتها انا بالطريقه اللي انتي تبينها .. هدوء وتمعن وتفكير في كل شي .. واهم شي رومنسيتي فالقصه .. تسلمين طموح على هالطرح ..
طموح: كلك ذوق يا خالد .. والله يبعد الجنيه عنكم ..
خالد: ان شاءالله .. بس شكلنا بنتعايش معها ..
طموح: الله المستعان ..
بومحمد (حمد) .. اقوى شخصيه فالقصه ..
طموح: هلا حمد .. شحالك ؟
بومحمد: هلا طموح .. انا طيب والحمدلله .. شحالج انتي ؟
طموح مبتسمه: تمام .. بغيت رايك في شخصية حمد ..
بومحمد: ما راح ازيد على كلامج يا طموح .. صج ان بومحمد شخصيته من اقوى الشخصيات بالقصه .. يحب عياله ورباهم تربيه صالحه .. فرضه لشخصيته عليهم وحترامهم له كان له دور كبير في تغير مجرى حياة البعض ومنهم علي ولده .. اختلاف الافكار بينه وبين اخوه محمد (بوفارس) خلاه ينتقد طريقة تربية اخوه لعياله .. بس عموما بومحمد شخصيه حلوه ودخولها في الاحداث قوي ..
طموح: تسلم لي على رايك ..
بومحمد: يعطيج العافيه ..
طموح: الله يعافيك ..
ام محمد .. الحنونه
طموح: السلام عليكم ام محمد ..
ام محمد: عليكم السلام هلا يمه ..
طموح: شحالج ؟
ام محمد: الحمدلله طيبه ..
طموح: ممكن تعطيني رايج في دورام محمد فالقصه ؟
ام محمد: ام محمد لعبت دور قصير وثانوي تقريبا .. حنونه وقلبها طيب .. عجبني فيها تواضعها .. و وقوفها مع فارس والجده في عرس فارس وكل ترتيباته ..
طموح: كل الشكر لج ام محمد ..
ساره .. العنيده متقلبة المزاج العصبيه .. فاجأتنا بتغير شخصيتها ..
طموح: هلا ساره ..
ساره: هلا وغلا ..
طموح: ممكن اعرف رايج في ساره زوجة محمد ..
ساره: ممكن اعدل شي طموح ..
طموح مبتسمه: اي تفضلي ..
ساره ابتسمت بحزن: ساره طليقة محمد .. ماعادت زوجته .. تهورها وعنادها حولوا حياتها الى جحيم .. بغبائها خلت محمد يغرم ببنت عمه اللي طول عمره عدها اخت له .. ساره الغبيه شكت في محمد وفتحت عيونه على دنيا ثانيه .. واسلوب المعاير ما عجبني .. واعتقد انها تستاهل اللي جاها من محمد ..
طموح: يعطيج العافيه حبوبه ..
محمد .. الشاب المجروح .. ابو التؤأم نايف وناصر .. طليق ساره .. حياته تحولت الى جحيم من بعد اول مشكله واجهها مع ساره اللي خلته يغرم في بنت عمه فاطمه .. محاولاته في لانجاح زواجه فشلت لان زوجته كل مره تطلع له بسالفه وتحطمه زود ..
طموح: هلا محمد ..
محمد: هلاهلاهلا ..
طموح مبتسمه: شحالك ؟
محمد رفع حاجب: تمام .. اعلومج انتي ؟
طموح: طيبه ..
محمد: طموح .. انتي جسدتي بشخصية محمد .. الرجل المتسامع الحنون .. يصبر ويطول باله على الطرف الثاني وعطنينا مثال عليه زوجته ساره .. عطاها كم فرصه لانها تغير افكارها بس هي اللي جنت على نفسها .. وطبعا مالومه لو حب فاطمه .. لانه زوجته هي السبب .. فتحت عيونه على بنت عمه اللي طول عمره اعتبرها اخت له .. هو ما زال يكن لها بعض مشاعر الحب .. ولكن كلام فارس له وزواج فاطمه منعه من انه يتقرب منها او يعبر عن مشاعره لها .. زواجها من يوسف كان مثل الصدمه بالنسبه له .. على الرغم من ذلك الا انه ما زال يحب يوسف ويعتبره اخ وحبيب .. وساره في نظر محمد ( جنت على نفسها براقش ) مثل ما يقولون .. الفتت انتباهه لبنت عمه وخلت اوهامها تتحق بيد محمد ..
طموح: محمد ليش ما تفكر ترجع ساره ؟
محمد: خلاص يا طموح تعبت معاها .. هي سلطية اللسان في حالات غضبها والريال ما يحب البنت اللي مثلها ..
طموح: زين شو تأثير كلام فارس لك ؟
محمد: حددي اي كلام ؟
طموح: كلامه عن فاطمه اخته بطريق غير مباشر .. وانت تدري ان فارس يدري انك تحب اخته ..
محمد: بجاوب عليج يا طموح ببساطه .. كلام فارس مثل السكاكين بقلبي .. بس ما زعل منه فارس حبيبي .. بس سالفة انه درى عن حبي لها والله اعتقد انه فاهم ان هالشي مو بيدي ..
طموح: زين ليش ما تحاول تخلي فاطمه اخت لك مثل قبل ؟
محمد: رسمتها في بالي الحب الاول والاخير ..
طموح: زين ارسم لها غير هالرسمه ؟
محمد: ماقدر يا طموح ماقدر ..
طموح مبتسمه: مشكور يا محمد لتحليلك للشخصيه ..
محمد: العفو ..
الجسمي .. فديت طوله .. شخصيه الكل حب مواقفها اللي تجسدت في الطفل جاسم ..
طموح: هاي جاسم ..
جاسم: اهلا اهلا ..
طموح: شحالك ؟
جاسم: طيب ..
طموح: تكلمني عن الجسمي لو سمحت ؟
جاسم: الجسمي فديت طوله .. هههههه .. شخصيه حلوه وبريئه .. بس بدى جاسم يتأثر بتفكير ام فارس شوي .. والعتب بعد على بوفارس اللي موفر له كل متطلباته .. بس الجسمي حبوب كشخصيه .. وكيوت كشكل .. يحب ايمان اخته وايد .. ويموت في ابوه ..
طموح: مشكور جاسم حبيبي .. فديت طولك ..
جاسم بخجل: العفو ..
ايمان او ام كشه .. مراهقه متمرده ولسانها طويل .. لها مواقف حلوه ومو حلوه في القصه .. انسانه متناقضه وبسرعه تغير رايها في الناس ..
طموح: ايمان ..
ايمان: اهلين طموح ..
طموح: شلونج مع القصه ؟
ايمان: هذاني ازف وانزف ..
طموح وايمان: ههههههه ..
ايمان: ايمان الفتاة المراهقه العصبيه العنيده .. شخصيتها قويه مثل امها ويا ويل اللي بيدوس لها على طرف .. تحب اهلها بس عنيفه في تعاملها مع الامور .. دمها خفيف وفجأه تسوي حساسه وممكن تصيح ..
طموح: يسلمو يا عنيده ..
ايمان مبتسمه: الذوق انتي يا طموح ..
طموح: تسلمين لي الغلا ..

فاطمه .. بطلتنا النعومه .. متوسطة الجمال بس تنحب من شخصيتها الحيويه .. عاقله وقلبها كبير وبسرعه يحب .. حبت يوسف فارس احلام ولا خطر على بالها .. وصلت مشاعرها ليوسف على ورق بحرف من قلبها .. وصارت ام لبنوته كيوت سمتها هيفاء .. و زوجه لزوج يحبها ومحافظ عليها يوسف ..
طموح: شلونج فطيم ؟
فاطمه مبتسمه: هلا والله .. انا طيبه .. انتي شو اخبارج ؟
طموح: طيبه والحمدلله ..
فاطمه: شخصية فاطمه .. الاموره الطيبه .. متوسطة الجمال الدلوعه .. تحب اهلها وتداري عليهم .. المفضله عند ابوها واخوها .. توأم عبدالعزيز .. شخصيتها حلوه وايد فالقصه ودورها ضبطته .. رقيقه وتحب يوسف وايد .. غارت عليه لما قالوا عنه وسيم .. حبته ومافكرت في حد غيره .. اكتشفت الاهتمام المفاجئ لها من صوب محمد والد عمها .. كانت متفاجئه وايد وبدت تخاف من اهتمامه لها .. تموت في فارس اخوها ودها تسوي كل شي عشانه حبت مناف وصدفه جمعتها بمناف فالجامعه .. لها جمهور طبعا .. محمد وسلمان ويوسف .. بس اللي فاز بقلبها العاشق المجنون يوسف .. اجمالا فاطمه من احلى الشخصيات بالقصه ..
طموح: تسلمين لي على هالتحليل القوي ..
مريم الجميله .. الدلوعه .. حبت ولد عمها و وقفت معاه في حياتهم ..
طموح: حيالله الدلوعه ..
مريم بخجل: الله يحيج .. شحالج طموح ؟
طموح: الحمدلله حبوبه .. ممممم ؟؟ تكلمينا عن مريم شوي ..
مريم مبتسمه: مريم شخصيه متواجده في كل بيت .. جمال ودلع ورقه والكل يتمناها .. حبها خالد الوسيم اللي يزعجه ظهور ما خلف العالم المرئي بصور متعدده .. مريم البنت الصبوره واللي وقفت مع خالد على الحلوه والمره وهي قبل الزواج عرفت بسالفة الجنيه اللي طلعت له وتقبلته و قررت انها تسانده .. مريم مثال للبنت الي اجتمعت فيها اشياء وايد في وقت واحد .. الجمال والدلع والرقه والاسلوب والحظ الحلو اللي جمعها بخالد ولد عمها .. ونقدر نقول عن زواجهم التقليدي ..
طموح: كلج ذوي يا دلع انتي ..
مريم: الذوق انتي يا طموح ..
طموح: ترا استحي ..
مريم وطموح: هههههه ..
عبدالعزيز توأم فاطمه المقلوع .. راعي المقالب مع جده الشيبه الكشخه ..
طموح: هلا عبدالعزيز ..
عبدالعزيز بوناسه: واخيرا نطقت طموح ..
طموح مبتسمه: ههههه .. ما تخلي حركاتك يا بوالزوز ..
عبدالعزيز: هههههه .. حلوه منج بسلا تعيدينها ..
طموح: احم .. خل ندخل فالموضوع احسن ..
عبدالعزيز: وانا بعد اقول جي ..
طموح: زين رايك في بوسعود فالقصه ؟
عبدالعزيز حط ريل على ريل: والله يا طموح الصراحه مثل عبدالعزيز انا ما شفت .. بالنسبه لي احسن شخصيه فالقصه كلها .. كان المفروض ان كل اضوائج تتسلط عليه ..
طموح: بن عمي .. بلاش غرور وثقه عميه بالنفس ..
عبدالعزيز اعتدل في قعدته: احم احم .. ما علينا .. توأم فاطمه كشخصيه ما عليها كلام .. حبوب ودمه خفيف .. حركاته مع الكشخه جده روعه وتضحكني وايد .. بخصوص انه انرد لما تقدم لصديقة اخته .. هممممم .. انا اشوف انه زعل ومالومه .. لان بعد البنات لما يردها اليال بتزعل .. فهو شعور ما يقتصر على بنات او شباب .. سوالف بوسعود مع فاضل ويوسف وعلي بصراحه ما عليها كلام .. واللي حبيته في شخصية عبدالعزيز وفاطمه لما يحسون ببعض وقت الزعل والضيق .. ما قصرتي يا طموح على هالشخصيه اللي اضفت للقصه طابع فكاهي حلو ..
طموح: يعجبني الرد يا بوسعود ..
عبدالعزيز: تحت امرج احنا ..
طموح: تسلم الغالي ..
ام فارس .. متعاليه ومتسلطه ولسانها طويل ..
طموح: مرحبا ام فارس ..
ام فارس: هلا طموح ..
طموح: ممكن اعرف رايج بشخصية ام فارس (مزنه) ..
ام فارس: مزنه لعبت دور حلو وايد .. يعني فالبدايه طلعت ام فارس بصورة الام الحنونه الطيبه وهي فعلا كذلك .. بس اظهرتي ويها الثاني لما انحطت بموقف زواج فارس من مناف .. على الرغم من ان شخصيتها قويه .. بس ماقدرت تأثر على بوفارس .. وكلمته هي اللي تمشي على الكل ..
طموح: بس ما تحسين انها وايد شريره بالحركه اللي سوت مع مناف وامها ؟
ام فارس: اكيد .. حركتها مو حلوه ودليل على انها حاقده عليهم .. بس لي متى بتتم مقاطعه فارس؟؟
طموح: هممممم .. مادري هي قلبها اسود .. ما حنت على ولدها ولا فرحت له .. عالعموم مشكوره يا ام فارس ..
بوفارس .. الاب الحنون الصديق المتعاطف ..
طموح: السلام عليكم ..
بوفارس: عليكم السلام .. هلا طموح ..
طموح: طبعا انت مثال للاب المتفتح .. الصديق .. الحنون .. المحب ..
بوفارس: والله شخصية بوفارس نادر ما نلقاها هالايام .. يعني لما عرفت بقصة رسايل فاطمه ويوسف عالج المشكله بنفس الاداة .. و وقف مع ولده لين وصله لأخر المشوار .. ومفاجأه كبيره انه كان مالج على ام مناف .. يفكر بعقلانيه و متفتح لابعد الحدود .. حنون وايد ويظهر مشاعره لعياله .. يموت في فاطمه وايد وهي المفضله بالنسبه له .. وايد مرن مع عياله و لا حاط حواجز بينه وبينهم .. شخصية بوفارس من الشخصيات الجريئه فالقصه
طموح: كلك ذوق يا بوفارس .. وبالفعل شخصية بوفارس من كثر الشخصيات جرأة فالقصه ..
فارس .. شخصة الهمت الكل .. فالقصه الريم اوهمت نفسها بحبه .. ومناف اللي بس خذت قلبه .. محمد ولد عمه رفيق دربه .. امه عدوته .. ابوه صديقه .. جدته وقفت معاه وساندته .. فاطمه اخته دلوعته ..
طموح: هلا فارس ..
فارس مبتسم: هلا طموح ..
طموح: شحالك ؟
فارس: مرتاح والحمدلله .. طبعا تبين تعرفين رايي في فروس ..
طموح مبتسمه: اكيد ..
فارس: شخصية فارس طبعا شخصية الرجل الي كل بنت تحلم فيه .. من ناحية الشكل والشخصيه .. فارس انسان مرح ويحب الضحك والسوالف والحياة .. لما يحزن يغالط مشاعر الحزن بالضحك والوناسه .. حب مناف الفقيره اللي فالبدايه اشفق عليها عشان حالتهم .. بس بعدين ماقدر انه ينكر حبه لها .. حب فيها شموخها اخلاقها تواضعها .. واللي ذبحه زود جمالها .. صج فارس تعدى الخطوط الحمرا مع مناف .. بس صحح غلطته بالزواج اللي كان مخطط له من البدايه .. حبه لمناف طغى على كل مشاعره .. حب مناف استوعب قلب فارس بالكامل .. مشاعره اتجهت لمناف وبس .. قلبه يخفق لها هي .. عيونه ماتشوف الا هي .. انفاسه لها .. ضحكاته لها .. كلامه لها .. فارس بكل ما فيه لمناف .. فارس لو خسر العالم كله عشان مناف ما بيهتم .. لان مناف كل عالمه ودنيته وحياته ..
طموح: روعه كلامك .. كمل ..
فارس مبتسم: فارس فالقصه يحب خواته ويفضل فاطمه عليهم .. ايمان تغار بس يحب خفة دمعها ولسانها الطويل يحب مريم الرقيقه ودلعها .. يوجه عبدالعزيز وجاسم على طول .. علاقته القويه بمحمد ولد عمه عطت شخصيته طابع الصداقه .. فارس الشخصيه اللي لاقت جمهور من القراء .. وسيارته الرنج الاسود سوت خوش شغل ..
طموح: اما ان الرنج الاسود سوا شغل .. بصراحه سوا شغل عدل .. مشكور يا فارس على كلامك يا ذوق ..
فارس: حاضرين لج يا طموح ..
طموح: تسلم لي يا راعي الرنج الاسود ..
الجوهره وابراهيم وعلاقة حب استمرت 8 سنين ..
طموح: السلام عليكم يا جماعه ..
الجوهره وابراهيم: وعليكم السلام يا طموح ..
طموح: شحالكم يا جماعه ؟
الجوهره: الحمدلله ..
ابراهيم: تمام ..
طموح: طبعا ابي اعرف رايكم في الجوهره وابراهيم ..
ابراهيم: الجوهره كانت الام الحنونه ليوسف وهنادي .. ضحت بمستقبلها عشان اخوانها .. قتلت طموحها عشان تشوف الفرحع فعيونهم والبسمه على شفاهم ..
الجوهره مبتسمه: وابراهيم مثال للرجل الطيب الصبور .. صبر عليها 8 سنين .. وبعدها الله رزقم بحياة حلوه بسيطه ومتواضعه .. بذرتها حبهم وثمارها لولو وخليفه ..
طموح: ابراهيم والجوهره سلطت عليهم الاضواء فالبدايه وانهيت قصة حبهم نهايه حلوه ..
ابراهيم والجوهره: مشكوره يا طموح .. تشرفنا بالمشاركه في قصتج ..
طموح: الشرف لي حبايبي ..


هنادي ونواف .. هنادي الفتاة الشقيه المرحه .. ابراهيم (صاحب الجريده) الرجل التقليدي ..
طموح: مرحبا ..
هنادي ونواف: هلا طموح ..
طموح: ابغي اعرف رايكم بادواركم ؟
نواف: هنادي الشخصيه المرحه اللي حبت خالها بسرعه .. دمها خفيف ودايما تجيب الكلام لنفسها ..
هنادي: هههههه .. نواف (صاحب الجريده) حبته هنادي بعيونها قبل قلبها .. نواف الرجل الشرقي .. شاف هنادي وقرر انه يتزوجها .. وحركة انه تعرف على خالها حلوه وايد وعجبتني ..
نواف: كلي ذوق ادري ..
هنادي: تبي تاكل الجو عني ..
طموح: هههههه .. حليلكم يا عصافير .. مشكورين وماقصرتوا ..
ريما الرقيقه بنت سلمان .. اجتماعيه وبسرعه اخلطت بالكل .. حبت يوسف ودوم تسوي له افلام ..
طموح: هلا ريما ..
ريما مبتسمه: هلا طموح ..
طموح: ريما كلميني عن شخصيتج شوي ؟
ريما: هممممم .. ريما بنت سلمان المسكين .. اللي يون طول الليل .. ريما حنونه ودلوعه شوي .. تحب ابوها لانه عوضها عن حنان كل السنين اللي ضاعت من عمرها .. وتحب جوجو وتقولها كل شي .. طيبه واموره ودمها خفيف ..
طموح: صج انج حبوبه يا حبوبه .. يسلمو ريما ..
يوسف العاشق المجنون .. الوسيم الجذاب .. الزمن جمعه صدفه بفاطمه ..
طموح: حيالله المزيون ..
يوسف منحرج: كلج ذوق يا طموح .. الله يحيج ..
طموح: تكلمنا عن العاشق المجنون لو سمحت ..
يوسف: العاشق المجنون حب فاطمه والصدف جمعته معاها اكثر من مره وخلته يتعلق فيها .. واحلى صدفه اللي جمعته مع اهلها .. حب فاطمه بكل ما فيه .. و فاطمه كانت سبب في انه يخلص الجامعه ويكون نفسه .. وايد كان معجب بحركة بوفارس لما كتب له رساله .. حس انه عرف من يناسب .. شخصية يوسف كل بنت تتمناها .. من ناحية الشكل والاخلاق والشخصيه ..
طموح: سلامي عليك يا يوسف ..
يوسف: كلج ذوق يا طموح ..
طموح: يعطيك العافيه ..
ام مناف .. طليقة بوفارس .. دارت دنياها و بنتها تزوجت ولد طليقها ..
طموح: مرحبا فاطمه ..
ام مناف: هلا وغلا ..
طموح: تكلمينا شوي عن ام مناف ..
ام مناف: فاطمه في يوم من الايام كانت متزوجه محمد .. بس ما صار نصيب والكل راح في حاله .. اكيد الكل يسأل عن سبب انفصالهم .. بصراحه طموح فكرت في سبب .. بس مالقت فقررت انها تخلي السبب اونه سر .. خخخخخ طبعا فاطمه شخصيتها طيبه وايد وتحب عيالها .. و موت نايف أثر فيها وايد .. وصدمتها ببنتها لما عرفت انها تكلم فارس قبل الزواج .. بس تدخل فارس فالموضوع غير من رايها فيه ..
طموح: عجبتني ان طموح ما لقت سبب فخلته سر اونه .. ههههههه ..
ام مناف: كلج نظر يا طموح ..
طموح: عاد وين اطلع سبب الحين .. خلاص القصه انتهت ..
ام مناف وطموح: ههههههه ..
طموح: تسلمين يا ام مناف ..
عبدالله الطفل البريء .. اضاف جو حلو بالقصه بشخصيته البريئه وضحكاته الحلوه اللي ملت صفحات القصه ..
طموح: عبود ..
عبدالله: ههاااااااي .. هلا ..
طموح مبتسمه: شحالك حبيبي ؟
عبدالله: الحمدلله ..
طموح: كلمني عن عبود ..
عبدالله: عبود طيب ويحب نايف اخوه .. و وايد تأثر بموته .. بس دخول فارس في حياتهم غير اشياء وايد .. وايد يحب يقلد فيصل .. برأة الاطفال تلقينها في عبدالله ..
طموح: فعلا ان عبدالله بريء .. مشكور يا عبود ..




مناف بطلة القصه .. الرقيقه الطيبه الخلوقه .. اللي خذت قلب فارس غصبن عنه وعنها ..
طموح: هلا مناف ..
مناف: اهلين طموح ..
طموح: باختصار تتكلمين لنا عن مناف ..
مناف: طبعا مناف الفقيره اللي استرخصتها ام فارس شخصية بنت مكسوره مالها سند في الدنيا من بعد موت ابوها لقت في فارس كل الحنان والحب اللي كانت تبحث عنهم من بعد وفاة ابوها .. طبعا معروف ان اهل مناف من صوب امها مو معترف فيهم .. مناف كانت شايله هم اخوانها وخايفه عليهم .. بس دخول فارس في حياتهم غير اشياء وايد .. مناف حبت فارس بكل ما فيها والدليل رفضها للدكتور حامد .. تمسكت بفارس حتى من بعد اللي سوته فيهم ام فارس الشرسه .. الصدفه الحلوه اللي جمعتها بفاطمه و مريم كانت مثل الحلم بالنسبه لها .. وصدمتها باغراب صدفه في حياتها .. هو ان بوفارس كان مالج على امها من قبل .. مناف الحبوبه الحين عايشه مع فارس و ولدهم نايف الصغير ..
طموح: يسلمو يا قلبه ..
مناف: هههههه .. فارس يقولها احلى ..
طموح: تسلمين يا عسل ..
فصيل الطفل الرجل .. الحياة القاسيه اللي مر فيها علمته اشياء وايد ..
طموح: مرحبا فيصل ..
فيصل: هلا طموح ..
طموح: يا فيصل .. عطنا نبذه عنك ..
فيصل: شخصية فيصل الطفل الرجل على قولتج .. ظروف فيصل اللي مر فيها حتمت عليه انه ينسى امر طفولته يفكر في حياته جدام .. فيصل مر بتجارب وايد علمته شلون يستوي ريال .. وغير تعلقه بفارس واختلاطه فيه طول الوقت خلاه يفكر بنفس المنطق والطريقه .. شخصيته غامضه ومحيره .. ماتعرف متى ممكن فيصل يضحك ولا يبكي ولا متى بيعصب ..
طموح: تسلم على هالتحليل يا رجل ..
فيصل مبتسم: العفو وحاضرين لج ..
طموح: كل الشكر لك يا فيصل ..
الجد .. الشيبه الكشخه .. راعي المواعد والسوالف البطاليه مع عبدالعزيز ..
طموح: هلا يبه ..
الجد: اهلين ..
طموح: بكم كلمه اوصف لي الجد ..
الجد: الشباب يقتهرون من جمالي .. والبنات ذايبين فيني ..
طموح: ههههه .. يسلم راسك ..
الجده .. الحنونه اللي وقفت مع فارس لين آخر المشوار .. و وصته على مناف ..
طموح: السلام عليكم ..
الجده: هلا وعليكم السلام ..
طموح: بعد ابي منج كلميتين توصفين فيها الجده ..
الجده: احب عيالي عيالي كلهم .. بس فروس اكثرهم .. دوم يلعوزني .. صدمتني هيا بطريقة تفكيرها هي و مزنه مرت ولدي محمد ..
طموح: يعطيج العافيه ..
الجده: الله يعافيج ..
طموح: تسلمين على هالسطر الغاليه ..
هيا .. العمه الحنونه .. والصدمه الكبيره في طريقة تفكيرها ..
طموح: هلا هيا ..
هيا: اهلين ..
طموح: كلمينا عنج ..
هيا: طبعا هيا انسانه قررت انها تززوج الوحده من بعد عبدالرحمن اللي توفى .. بس الكل انصدم بطريقة تفكيرها
طموح: تسلمين يا هيا ..

.......................
ودمتم بالف خير

انشاء الله تكون عجبتكم القصة والسموحه في التاخير

ربي يبارك فيك

وااااااااااااااااااو
من جد ,,,حلوووووووووه
كلك ذوووووووووووووووووووق
انتظر جديدك الحلوووووووووو....
مشكوووووور والله يعطيك الف عافيه ......
علي الموضوع
في حفظ الرحمن ........

تسلمين يااااااذووق على الموضوووووع
الراااااااااااائع
والله يعطيكي العااااااااااااااااافيه