رحلة المقاريد الخمسة

رحلة المقاريد الخمسة <<< من زين الاسم على شان تكشخ فيه






مع بداية السنة الدراسية الجديدة .. قرر خمس طلاب من كلية طب الأسنان بالقيام برحلة الى مكة المكرمة لأداء العمرة .. والأشخاص هم كالتالي


مســفر .... شخصية قميلة خالس .. شخصية فاهية جدا جدا اجدد شي بالعالم .. من أعز زملائي بالكلية .. من الالقاب اللي اناديه فيها .. يالقطوة .. مس مس .. سفوري.. يابو شنب << لي سنة احاول يخفف شنبه اللي كنه شنب صعيدي ويقول لأ هالقرار خطير وراح اطرح فكرتك بالخطة الخمسية .. يعني بالعربي يصرفني << ماش صديق مو متعاون





فهــد ...صديزي وعضو من أعضاء شلة الـ 12 حرامي << امحق شلة

طبعا فهد هذي ثاني سفرة لي معه .. يعني تقريبا قافطني يعني لو فكرت اسوي اي مقلب صعب اني اسويه عليه لاني بنقفط بسرعة من أعز خمس اخويا لي بالشلة .. كائن لطيف جدا ومسالم




عبد الرحمن ... شخص رااااائع جدا بس ماصل بعض الشيء <<< قليل خاتمة مامداه مدح الولد الا ورجع نتف فيه

تعرفت عليه عن طريق مسفر .. دائما هو ومسفر مسنترين بالبريكات مع بعض .. شخص دائما مبتسم ماشاء الله عليه << تراني قلت ماشاء الله لاتبثرني بالكلية





ســامي ... ليدر طلاب طب الأسنان .. شخص ملتزم وخلوق جدا جدا .. هاديء جدا ودائما اجي بالكلية ابثره باسالتي اللي مادري وش تبي وماعمره زهق ماشاء الله عليه

شخصية محبوبة جدا بالقروب .. نتعبه كثير معنا لكن ماشاء الله عليه صبور .. من فوائد هالرحلة اني سافرت مع هالشخص ولا يهونون الباقيين طبعا





وبعد أن انتهينا اعزائي الزوار من التعريف بطاقم الرحلة ... اليكم التفاصيل




قبل بداية الدراسة بكم يوم اقترحت على الشباب فكرة العمرة ... وعرضت الفكرة على مجموعة من زملاء الكلية ... بالنهاية انتهى الموضوع على خمس اشخاص .. حجزنا الفنادق ودفعنا كل شي " لان برمضان الفنادق زحمة ولازم نلحق اعمارنا بدري مالها داعي ننام بالشارع وحجزنا وخلصنا امورنا ولله الحمد



بعد كذا حجز لنا مسفر خمس مقاعد بالخطوووط الجوية السعودية " الله يخسهم من خطوط " .. وتاكد الحجز وصارت الاموور تمام التمام





بعد كذا بدأ كل واحد يجهز عفشه رحت شريت لي احرام وكم غرض واليكم العدة بالصور << ياحبك للتصوير




أهم شي السبحة خوياي اول ماشافووووها قالو سلامات مصري ماش ناس ماعندهم ذوق


قبل الرحلة يوم جاني اتصال من فهد .. قالي نواف بدأت القرادة تشتغل .. قلت ليش شصار ؟؟ قال الرحلة تاجلت من 10 الليل الى 12 الليل .. قلت يالله كل تأخيرة وفيها خيرة


جا ثاني يوم وبديت اضبط شنطتي وكل شي .. وجاني بعد اتصال من فهد قالي نواف والله اننا مقاريد .. قلت شصار انفجرت الطيارة ؟؟ قال لا بس تاجلت الى الساعة 2 .. قلت الله يستر بس هالرحلة بديت اخاف منها المهم طلعت اسلم على خوياي وجلست معهم الى الساعة 12 بعدها رجعت البيت البس احرامي على شان امر الشباب وونروح المطار

مريت فهد ومسفر ... وعبد الرحمن مر على سامي وتقابلنا بالمطار


وصلنا المطار ووقفنا سياراتنا هناك .. واول مادخلنا الصالات الداخلية فجعنا بالخبر التالي :هي: ... تاجلت الرحلة للمرة الثالثة الى الساعة الى الساعة أربع ونص في أقرد من كذا ماعتقد


دخلنا جلسنا بصالة فرسان وتسحرنا وجلسنا نسولف شوي ولما جت الساعة ثلاث ونص طلعنا منها << على اساس ان الرحلة الساعة اربع ونص


أول ماطلعنا نشيك على الرحلة ... فجعنا للمرة الرابعة بتأجيل الرحلة للساعة خمس وربع ... قلنا يالله لا اعتراض على قدر الله الشكوى لله


بهذيك اللحظة .. اتصل مسفر على الفندق اللي حاجزين فيه قاله حنا حجزنا يوم الاربعاء وللاسف تكنسلت رحلتنا .. قال اجل الله يعوض عليك الليلة لازم تنحسب عليكم قرادة قرادة اللهم لاحسد



بدأو الناس اللي معنا بالرحلة تطلع عليهم علامات الزهق ووالعصية اللي يحك راسه واللي ينسدح ونام واللي جلس ينكت على خويه مسفر <<< مب انا ترى


هذي صورة بزر كان مسوي زحمة بالمطار مثلنا بزر فلة





بها الفترة .. جانا الخبر المفجع :هي: " الضربة القاضية " وتاجلت الرحلة للساعة ست ونص بعد مادرينا بها الخبر من موظف المطار .. اللي جلس يضحك شر البلية مايضحك .. واللي مسك احرامه وغطاه على خشته ونام .. واللي بدأ يقول نكت بايخة مادري وش تبي من الحياة << اثار الصدمة طبعا اللهم لاحسد



وجلسنا انا وفهد ومسفر وعبد الرحمن نتبيثر على بعض " نضيع وقت بطريقة حضارية " ونقول نكت بايخة وونضحك عليها والناس تناظرنا يحسبون فينا شي لاسمح الله



وبالنهــــــــــــــاية



اقلعنا ولله الحمد الساعة 7 و10 دقائق يعني تاجلت للمرة السادسة اللهم لاحسد .. بس ماقالولنا خلوها مفاجاه ماعلنوو عنها الا بعدين امحق خطوط << وووالله من القرادة اللي فيكم ولا الخطوط مافيها شي


ركبنا الطيارة .. طبعا كنا تعبانين بشكل مو طبيعي.. ولا فينا حيل نعتمر ولا نسوي شي .. قررنا اننا نرجع ننام واذا قمنا العصر نروح نعتمر ونفطر بالحرم .. واخذنا غفوة بالطيارة لين ماوصلنا لمطار جدة بسلام ولله الحمد بدوون أي اصابات


نزلنا المطار اخذنا سيارة اجرة ورحنا على مكة واقتحمناها بسلام وورحنا فندقنا اخذنا مفاتيح غرفنا ورحنا وبدوووون اي نقاش كل واحد القى بشنطته ارضا وانبطح على سريره انبطاحا ونمنا الى الساعة اربع وونص تقريبا


كنا انا وفهد وعبد الرحمن بغرفة .. ومسفر وسامي بالغرفة الثانية .. قام عبد الرحمن وقمت انا بعده ووقومت فهد .. وطبعا الفاهي مسفر للحين نايم رحت لغرفتهم امارس بثارتي المطلقة وجلست اطق الباب بطريقة مخلبية تنرفز لين ماقامو غصب من النوم وعلامات الحقد ووالانتقام واضحة على ملامح صديقي الفاهي مسفر :هي:




توضينا ورحنا الحرم صلينا العصر والظهر هناك .. وبدأنا عمرتنا

انقسمنا مجموعيتن .. انا ومسفر وعبد الرحمن بمجموعة وفهد وسامي بمجموعة



كملنا الطواف كامل ولله الحمد بعد ماخلصنا اذن المغرب .. وقفنا ورحنا نفطر .. وصلينا المغرب وبعدها كملنا عمرتنا الحمد لله وخلصنا قبل العشا بربع ساعة تقريبا




رجعنا غيرنا ملابسنا ولبسنا ثيابنا ورحنا نصلي التراويح


بعد ماخلصنا اخذت كم صورة للحرم بجوالي .. وهذي كم صورة










بعد ماخلصنا صلاة وطلعنا من الحرم .. كنا جوعانين جدا جدا .. لدرجة اني كل خمس دقايق اقووول مسفر تراني جوعان انتبه بعضك .. يقولي طيب انا وش ذنبي << احس اني وحش لما يقووولي كذ


بعد كذا انقسمنا مجموعتين .. ناس تروح تجيب السحور .. وناس يروحووووون للخطوط يقصون البوورندق .. رحنا انا وفهد نجيب السحور


طبعا كـ " شباب جايين من الرياض " اكبر طموحهم في هذه اللحظات 77777777



على طاري البروست

][][ فاصــل اعلاني ][][

نصيحة أخوية : لاتفكر انك تتعشى من كنتاكي اذا كان عندك ثاني يوم دوام طويل .. تجنبا للمخاطر ... شكرا على حسن استماعكم



عــدنا

رحنا وطلبنا انا وفهد مالذ وطاب ماخلينا وجبة عندهم ماطلبناها .. اخذنا اكلنا ورجعنا الفندق


ولما رجعنا لقينا الباقيين منتظرينا حطينا الاكل وبدينا بالهجوم والضربات المباشرة واكلنا اكل مو طبيعي الحمد لله<< طلعنا حرة القرادة اللي صارت لنا



بعد ماخلصنا جلسنا نتكلم ونسولف وطبعا انا استلمت صديقي الفاهي مسفر وجلست اقوله ياخي انت ليش فاهي كذا .. قطع كلامي عبد الرحمن .. قال نواف نصيحة لاتستهبل على مسفر ترى ربي يعاقبك قلت ليش صاير شي؟

قال توو بعد ماقصينا البوردنق رحنا للسوق نشتري اغراض وجلست اناديه يالفاهي .. وعلى طول اول محل دخلناه اشترينا منه اغراض نسيت الحساب عند الرجال وطلعت ومانتبهت قلت افا اجل القطوة مب هيين << مسفر عطاني نظرات قالي يجيلك يوم المهم كملنا سواليف

جلست اتكلم عن فهاوة مسفر .. قلت تصدقون ان مسفر كل ماحط ملابسة عند مغسلة كل مارجع عطاه راعي المغسلة سلسلة مافتيح ناسيها مية ريال ناسيها بالثوب ومرات ينسى اشياء اعظم واعظم وومسفر يناظرني بحقد ويقولي طيب طيب يجيلك يوم قلت لا لاتخاف انا مني بفاهي مثلك



بعد كذا اذن الفجر .. رحنا الحرم صلينا وجلسنا شوي بعدين رجعنا غرفنا ونمنا


قمنا على الساعة 10 ونص .. كالعادة مسفر ماقام مالت عليه

رحت ابثرته كالعادة لين ماقام .. لبسنا ورحنا صلاة الجمعة

هذي صورة صورتها بعد صلاة الجمعة .. شوفو الزحمة كيف




رجعنا جلسنا شوي بعدين رتبنا شنطنا استعدادا للرحيل


ركبنا ليموزين ورحنا لجدة تقريا الساعة 3 .. على اساس ان رحلتنا الساعة خمس ونص << على اساس حطو تحتها ثمانين خط



وودعنا مكة كان نفسنا نجلس فيها اكبر قدر ممكن بس حسبي الله على الخطوط السعودية



بعد كذا ..وصلنا المطر .. وليتنا ماووصلنا جتنا الفاجعة الكبيرة والسربرايز الفظيييع من الخطوط الجوية السعودية





اللهم لاحســـد رحلتنا تكنسلت في أقرد من كذا



مسفر بدأت ملامح وجههة تتقلب .. وسامي عصب لأول مرة اشوف سامي يعصب .. وانا جالس اوزع ابتسامات وفهد يشكشك << ماننلام ولا؟


رحنا كلمنا موظفين الخطوط .. قالو رحلتكم تكنسلت وحطينا بعضكم برحلة الساعة ست الا ربع " بعضكم يعني عوائل " والباقيين حطيناهم برحلة الساعة سبع ونص .. الباقيين اللي هم احنا المساكين اللي مالنا رب

عزيزي القاريء .. اليك نصيحة اخوية : اذا كنت أعزب ..ولاتملك عائلة ولا تملك الا الدجة .. الله يكون بعونك بها المواقف بتقعد تقشر بصل زي ماسووينا



طبعا سمعنا خبر غريب وحنا بالمطار

سمعنا ان يمني تاجلت رحلته لصنعاء لليوم الثاني واول ماسمع الخبر نقز من الدور الخامس من الفندق اللي ساكن فيه ... ماينلام مشتاق لاهله .. بس الحمد لله ما مات




جلسنا بالمطار .. اشكالنا تضحك طبعا حاطين شنطنا وجالسين فوقها فهد قال بحاول فيهم يطلعونا برحلة ست الا ربع


.. ونشب لهم نشبة خطيرة جدا تشهد لها الدول والأمم

وجلسنا ننتظر لين ماجت الساعة 5 وربع .. وفهد يحاول وحنا فاقدين الامل خلاص .. لين ماجا فهد مسرع يقوول يالله يالله بسرعة لقينا اماكن اسرعو قبل لا يغيرون رايهم <<< امحق خطووط .. اول مرة اشوف خطوط نظامها " اسرع تلحق " لانظام ولا شي يالله لاتبلانا بس



اخذنا شنطنا ورحنا طيرااااااااااااان على الطيارة ورجعت اشكالنا طبيعية بعد ماكانت اشكالنا تنرحم اللي يشوفنا يدري ان في شي غلط صاير لنا


ركبنا الطيارة طبعا مافي مقاعد معينة كل شخص يجلس بالمكان اللي يبيه ... وحنا بالطيارة شمينا رائحة مألوفة رائحة ترد الروح والارواح رائحة مخلبية

بالاخير اكتشفنا انه رائحة حبيبنا




لقينا واحد من ربعنا الله يفشلهم جايب معه كرتون ربعنا فاهمين الدنيا غلط مادري ماعندي مطاعم بالرياض ولا شسالفة


افطرنا بالطيارة وزين كان معنا تمر بالشنط ولا تمر الخطوط السعودية الله يكرم النعمة رصاص مسدسات مو تمر ... حالته صعبة .. ووزعنا التمر على المقاعد المجاورة واللي جنبنا عطونا قهوة وفليناها ولله الحمد والمنة والفضل



وبالنهـــاية وصلنا المطار بسلام

تقسمنا كالعادة سامي وعبد الرحمن راحو ركبو سيارة عبد الرحمن

وانا ومسفر وفهد ركبنا سيارتي

المفاجأه


اكتشفت اني ناسي سيارتي مفتوحة ولا سكرتهها ومسفر فقع ضحك وقال شفت شفت ربي عاقبك قايلك لاتستهبل علي بهذيك اللحظة بغيت اخنقه واقطعه اربا اربا << تستاهل محد قالك تستهبل عليه



وبهذا أعزائي الكرام انتهت رحلة المقاريد الخمسة بسلام ... الحمد لله ماكان في اي اصابات حتى مع الاحداث اللي صارت


][][ قرارات اصدرناها بعد نهاية الرحلة ][][

أولا ... قررنا الرحلة الجاية اذا نبي نسافر كل واحد يروح بطيارة على شان نشوف القرادة جاية من وين بالضبط .. انا بصراحة اعترضت على الفكرة لاني داري القرادة من وين << رحم الله امريء عرف قدر نفسه

ثـانيا .. قررت أني مانادي مسفر بـالفاهـــي .. مالها داعي يجي يوم انسى مفتاح بيتنا وانام بالشارع تبا لك يامسفر

ثالـثا .. قررنا المرة الجاية نحجز على الساعة 5 الفجر .. على شان تقلع رحلتنا الساعة اربع العصر مالت عليهم من خطوط







وهكذا انتهى الجزء الثالث بسلام ... اتمنى ان يكون قد حاز على رضاكم