مواليد الستينات والسبعينات وبداية الثمانينات فقط

السلام عليكم ورحمة الله وباركاته


شحالكم ياعضاء مدرستي والله لكم وحشه مالها حد حبيت اطل عليكم واشوف شو صار في غيابي وحبيت انزل موضوع عباره عن ذكريات واتمنى يعجبكم الموضوع


وطبعا مواليد الخمسينات داشين معانا بالحسبه


تذكرون لما اييلك واحد مليق من العايله اكبر منك ويقولك تبي اسويلك ساعه وانت تمدله ايدك ويقوم يعضك هاييج العضه اللي تصارخ منها .



‏تذكرون لما كنا نصور فوري عند مصور الجمعية وطبعا غصبن عليك الخلفيه زرقه مب بكيفك ولازم تمشط شعرك بالمشط اللي عنده كله شعر وبعدين يغسلك الصورة بالآله اللي عنده ام ذراع والاطراف مشرشره يعني يكون حركه . ‏ويعطيك الصور بعد أسبوع



تذكرون ايام حصة الموسيقى قبل كان الدرس لمدة سنه عباره عن تــــــــــافــــــــــــاتــــــي فـــــــــــي تاتي والصفقه بصبعين بس .... ‏صدق كان منهج صعب .



تذكرون اول يوم دوام بالمدرسه كانوا يسلمونا الكتب كلهم مع بعض وصافينهم من الكبيييييييييير لي الصغير وطبعا الكبير كتاب العلوم وكانوا يربطونهم بحبل عشان ما يطيحون مع 6 ‏كشاكيل -



‏تذكرون المعجون الصغير اللي ريحته تعور الراس ومعاه عود لونه احمر وكنا نبطله بالمجلوب ونعصره ونلف العود عليه وننفخ عشان نسوي
نفافيخ وطبعا ما تطلع النفاخة الين تطلع بلاعيمك وياها .



‏تذكرون لما كانوا الاولاد يلعبون مباريات كرة القدم بالفريج واذاكان واحد من الفريق ناقص لاعب بعد ما يباله قولجي دفاع هجوم ماشاءالله غرندايزر مب قولجي وطبعا كان اللعب الين اذان المغرب اللين ما يقول الله اكبر


تذكرون لما كنا نشوف افتح ياسمسم وانتأثر بكعكي اللي ياكل بسكوت ونشتري بسكوت كاكاو ونيلس ناكل مثله ويا البسكوت المالح خخخ.



تذكرون يوم الجمعة ... ‏ننش من الصبح علشان نسمع أغنية في قصص الشعوب قصائص لا تنتهي وعالم حلو بهي يسكن في القلوب في قصص الشعوب .



‏تذكرون لما كانوا بالصيف يسبحونا من الطشت والمغرافه الزرقه او الحمره وانت تتنافض من البرد وتتريا متى يصبون عليك ماي اي بطل الدوش وفك عمرك....‏ياسلام على سياسة ترشيد المياه منذ القدم .



تذكرون تيلفون بوقرص اللي يخيب ثناك وانت تتصل وياااااااويلك يطلع الرقم مشغول لان مافي ريدايل والله يعينك لي بغيت تتصل مكالمه حق
البشكاره تلاقي اصابيعك تون .....‏صدق كانت معاناة.




‏تذكرون لما كنا نربط الشرشف على رقبتنا مثل سوبرمان ونصعد فوق الكبت وانط على الدواشق واخر شي ناقز غلط ومنكسره ايدك....

تذكرون شريط الشلق الاحمر اللي اذا اخترب المسدس ماله ما يباله كلام حًول على كعب الوالده وكمل عليه بالكاشي والا على كاشي الباب اخر شي الوالده مكمله عليك بالكعب


‏تذكرون لما كنا نحط بالفريزر العصير الطويل بونصين عشان يثلج وكل ماتروح تبي تاخذه تلاقي الوالده منزلته تحت وماثلج.....‏راحت الفرحه .



تذكرون لما كان الاولاد يغسلون الحوي بالبروش والصابون قمة الوناسه يمسك المساحه يعني يكون بيساعد واخر شي طايحله سكيتنج على الكاشي والزوليه وفليل وارمه ريله.


تذكرون لما كنا نستقبل الحجاج من زود الفرحه واللهفه على الصوغه واخر شي كم مسواج وقحفيتين والكاميرا الحمره وسياده والبنات قطعه خام مالت هنود وساعه.


تذكرون لما كنا نشوف مسرحيات الأطفال مثل السندباد والزرزورر والف باء تاء اللي فيها عبدالرحمن العقل ولما الحرامي يكون وراه نصرخ من قمة راسنا ورااااااك وراااااااك وهو يقول وينه وينه يميييييين يميييييين....‏ياعيني على الاستهبال .



تذكرون عزايم قبل والصماط المفروش على كبر الصاله اللي على صورة ميوه ( ‏فواكه ) ‏وريحته لازم ريحة مطبخ وجالسين على المده اللي يوم تقوم تلاقي ريلك كلها شخوط من المده....‏يا خي شو هالزهد بس.





تذكرون ايام الدراسه قبل يعني يكون بنشد حيلنا بالدراسه ونشتري قلم فسفوري اصفر ولا برتقالي عشان نظلل على الشي المهم اخر شي مظللين
‏على كل الكتاب وين الشي المهم مادري.


تذكرون ايام الكشخه قبل كانت عباره عن سيارة هوندا بيضه اكورد باب واحد ولازق على الرقم من ورى شعار نادي الأهلي يعني كووول والمشط بالدرج اللي على قبضة يد سيارة الجاكسون وحاط بالمسجل فرقة الدانه ولا عبدالكريم .

تذكرون لما تطوروا الشباب بالطلعه عقب سوق مرشد ونايف قاموا يروحون مركز الغرير ويدشون محل محل ويتطمشون رفيق هذا بكم وهذا بكم) ‏لين يطردهم راعي المحل لما يعرف ان المخبا مافيه الا ريالين حق الرده يا بالتاكسي ولا بالباص .



تذكرون اول ما يسرقون الأولاد سيارة أبوهم كانت الريل اليمين على البترول والريل اليسار على البريك من الثواره .... ‏ولازم طبعا يمر على الربع بالفريج يصيح ويلات عليهم....‏واديلوووووو بريك وبترول


تذكرون لما كانت جائزة البيبسي سياره بالمغاطي مالت الغراش كنا الظهر نسير ورا الدكان ونبطل السحاحير كلها وبعدين نرد نسكرهم اي كلام تشوف الغازات كلها طايره ومتبخره وصاير ماي مايوه .



‏تذكرون لمايقول الاستاد ان هذي الصفحات ملغيه ايوااااااااااا تعال شوف التشخبيط اللي على الصفحه من فوووووووووق اللين تحت ولا نطرها من الكتاب.....‏ليش هالحقد عاد ......


تذكرون لما نتضارب مع ولد الييران وتقوله وخرعن بيتنا وعن رصيفنا يقولك مب رصيفكم هذا رصيف الحكومه
كلام منطقي الصراحه , ‏وييلس يحوص جدام البيت ويمر عدالك ويقولك ماجستك ما جستك خخخخخ .




تذكرون لما يروحون الأولاد السوق مع الوالد يشتري لهم قطع كنادير حق العيد ..‏اخر شي شاري طاقه كامله نفس اللون وتشوف باول يوم العيد من الوالد اللين الاخو الصغير نفس الكنادير ( ‏تقول فرقة عياله.)



تذكرون يوم يبغون الشباب يشلون حديد قبل يترسون قواطي النيدو اسمنت ويحطون بينهم بيب حديد وهووووووووبا واخر شي منكسر ه ظهورهم ....


‏تذكرون المسجل الأسود مال استاد الانجليزي يوم يدش علينا فيه قمة الوناسه اليوم ما فيه شرح يعني مافي اسئله ونرووووح نشغل الراديو يوم يكون مشغول ويا الطلاب .....





تذكرون الدفتر العنابي اللي في صوره الشيخ زايد الله يرحمه من ورى .


تذكرون لما نقلد رقص مايكل جاكسون ونسوي حركه الرجعه وحركه الايد اللي على الجامه ونغني بيييييييييييلييييييييييه بييييييييييلييييييييه شو بيله مادري.



ولا تنسون تلفونات أول . الأنيس والجوال والقناص