ماشاء الله تبارك الله ماشاء الله لاقوة الا بالله اللهم انا نسالك الهدى والتقى والعفاف والغنى

روابط مهمة و مفيدة : لاستعادة الباسورد الرقم السري || كيف يتم تفعيل الاشتراك || أفضل طريقة لطلب كود تفعيل على البريد

*جلابص* · #1 08-11-2003

المقدمة :

مسيتو بالخير وصبحتوا بالنور <== حسب التوقيت المحلي لمدينة جرينتش ;)

أنــــا داري أني أبطب في السياسة والله يجيب العواقب سليمة
عشان كذا أرجو من جميع القراء ربط حزام الأمان دعونا نتمتع برحابة سيارات كاديلاك:cool:

أن أخطأت فمن نفسي والشيطان وبعض الناس اللي وجيهم تكف القطر وأن أصبت فمن الله
إذا تجاوزت الخطوط البنفسجية <== عنده عقده من اللون الأحمر فأرجو أن تشغلون اللمبات الحمر عشان ماأصدم في الصبات البلاستيكية اللي أنتم حاطينها .

<== نسى عمره أنه وخش جو والمزاحمية وضرما :rolleyes:

تــــحـــذيــــر (وقد أعذر من أنذر )

الموضوع طويلن بالحيل فعلى من يملكون أشتراكات بالساعات سرعة أغلاقها واللي أشتراكه بالشهر ياليت يخليه متصل عشان يكد الشركة كد <== قاهرته الشركات
كما أن هذا الموضوع يحمل في طياته نوعاً من البيرة بشئ من الكحول فعلى من يقدر المشروبات غير الكحولية سرعة الإتجاه إلى أقرب بقالة ليشتري ميرندا بدون كحوول لأنها تقرمش

يالله بلا حتسي زايد وتعالوا نشوف وش في جعبتي <== سمعتها في الأخبار وأبت حاستي الأدبية إلا أيرادهذة الكلمة في هذه المقدمة
7
7
7
بسراحة أنا هادا الموودوع بيؤرقني كتييير كتييير وحاولت يعني أنسى الموودوع وأتناساه بس مخي ماعم بيئبل هالشئ وفي كل مره بيؤرقني <== جاز له هالحتسي

أنا ياشباب وياشابات إذا وقعت في مشكلة تورطت وإذا تورطت وقعت في مشكلة وإذا وقعت في مشكلة نشبت وإذا نشبت يضيق صدري وإذا ضاق صدري أبدأ في الفضفضة لأي أنسان أرتاح له ولا بد أن اسولف له بكل محتويات صدري (حشا طلع دولاب) عشان أحس بما يسمى في علم الفسفسة بالأرتياح المغناطيسي ..
مرة من المراريت أرتحت للبنقالي حق البقالة اللي جمب بيتنا وقعدت أفضفض له عن معاناتي مع بنت جيرانا وأقص عليه معاناتنا الرومانسية والعاطفية والفسيولوجية وكيف تتحول المشاعر في داخلي إلى أحاسيس متأقدة تشتعل بين الحين والآخر وكيف أن طيبتي خلتني أكلمها بالجوال أربع وعشرين ساعة (وفي رواية ست وثلاثين ساعة) مما جعلني مطّفر دايم بحيث لا أستطيع أن اسدد الدين اللي علي عنده في البقالة (يصّرف البنقالي) .. وقعدت أقول له (ومالك علي حلف ياحق العلك هاللي أخذته منك وقاعدن أمضغطه بين أحناكي الحين مامعي حقة <== يبي يلمح للبنقالي ويفتك من شره ) مما جعلة يتعاطف معي وقال أنا فيه حل مشكل أنتا حبيبي .. بأدين (بعدين) هو فيه روح بابا بنت جيرانا وهو فيه كلام لبابا بنت جيرانا :
بابا هادا ولد مجنون فيه كلّم بنت أنتا (نهى الرسول عن النمامه ولكن من يمتثل).. بعدين بابا بنت جيرانا مصع أذن هيلة (توأمة روحي وحبيبة قلبي ومن بعدها وأنا أدق على تلفون بيتهم وهو يقول أدخل الرقم السري لو سمحت والا ضف خشتك هيلة ماتبي تكلمك .. وتعرفون ماقدرت أفك شفرتها )<== قام يقص قصة حياته :D

ـــــــــــ معــــانــاتي بأخــــتــــصـــــار ـــــــــــ

أنا عندي جوال <== قل والله .. والله ... هادا الجوااال رقموووه مميز يعني من اللي بعد الخمستين واحد وبدل ماأفرح بوووه لأن طول عمري أدعي أقول يالله أن ترزقني برقم جوال مميز عشان أمي تحفظه بسرعة ... وسبحان الله .. الله عرف نيتي ورزقني بجوال يحبه قلبكم .
لكن .......‍‍‍‍‍!!!!!
من وين أبدأ مشكلتي اللي تؤرقني من وين يااااارب أشرحها .. والله ماني عارف بس أبحاااول مع إني محرج منكم لكن ابتشجع وأقول لكم وش اللي خلاني هالأيام ضايق صدري وكاره عمري وحاط أسمي في الماسنجر (أنا تفشان مررررره)<= =أيه هين ..:p
فمن لي بعد الله إلا خششكم الطيبة لأشكي لها معاناتي .

أنتم بالطبع تعرفوني كلكم وتعرفون أني شاب مستقيم وأطخم ويعيروني خوياي بالطاااووس من جمالي .. وتعرفون كمان أني لاني راعي بنات ولا أداني الغزل من أساسه وأصلاً فكرة إني أسمح لبنت تغازلني هذي من الأحلام اللي لازم تحلم بها أي بنت في الدنيا ولو تموت عندي مافيه أمل أني اسمح بكسر مبادئي اللي أنا رسمت طريقي عليها في هذه الحياة المليئة بالأشواك .. تعرفون يمكن تلعب علي بنت وتضيع شرفي بعدين ماعاااد أقدر أتزوج مستقبلاً .

مثلاً <== بدأ يشرح .. :D إذا دخلت السوق مع أهلك .. أمك .. أختك .. جدتك وهي تبي تشتري جلال للصلاة .. قاموا البنات يتميلحون قدامك اللي تدقك بكرسوعها في قزّاز وتأشر بأصابعها على أزرار الجوال(يعني عطني رقمك) .. واللي تقول لك في درعة ممكن تعطيني ذوقك في العطر هادا أحس أن ذوقك حلو
وأنت يتصبب عرقك مع أنهم مشغلين جميع المكيفات سبليت .
ولمّا تكون وحداني في السوق والنفاضة طاقة ركبك كله ذل من أن الهيئة تصيدك وتحصلك كاتب رقم جوالك على قطع وريقات بيض من دفتر ابو وجه ووجه ومحرف أسمك وكاتب محماس من زود التنكر.. ولا كتبت أسمك الحقيقي مما يدل على أن هذه الورقات تستخدم للترقيم (والله أستحي وأنا أقولهاولاني مثل اللي مايستحي ) بلشت بعمرك ولا لقيت اللي تعطيك وجه :D.

كل المثال اللي فوق عشان ألمح لكم بمشكلتي وعارف أنه ماراح يدخلكم الشك في أخلاقي ومبادئي لأنكم عارفيني زين وطابخيني لين تملهست (لا أحد يسألني عنهاويقول وش معناها) فأنا كم مره أكرر مراراً وتكراراً وفي كل مناسبة وعبر وسائل الأعلام المرئية وغير المرئية إني أنا ماني راعي بنات .. أخاف على شرفي ولا أقدر أخون ديني <== يادين الله .. وأحد قال غير تسذا ;)

قررت أتشجع وأقول لكم تفاصيل المشكلة باختصار (وفي رواية تفاصيل مختصرة)
جوالي يدق ويفصل .. هذا مشكلتي <== طيب رح صلحّه (تصدق أنك ماصل) :D
لا .. لا .. لا أحد يفهمني غلط .. يعني يدق دقة وحده ويسّكر وأنا من زود الشفاحة وحب الفضول وسعياً للأستطلاع وجرياً وراء الأكتشاف أدق على هذه الأرقام الغريبة اللي تدق على جوالي المميز وأشوف منهو ووش يبي وكثير من الأحيان إذا لم يكن كل الأحيان يطلعون بنات أصواتهم كصوت أحلام لا جت تغني (لا تناظر الساعة) وهي متحمسة .. يعني صوت ناعم بالمره وفي قمة الاغراء .
كنت كل ماأدق تحصل لي مثل هذا
طييييييييط طيييييييييييييييط هذا الجوال يدق عندها :
هي : ألووووو بكل نعومة
أنا هلا هلا .. أحد دق علي بيجر ( من كثر مايدقون ويفصلون قرر الجوال أن يحول نوعه إلى بيجر )
هي : ههههههه ههههههه ههههههه هههههههه شكل دمك خفيف هوهيااايههه هييي <== هذي ضحكة تغنج :D
أنا : أيه أمّا في هذي صدقتي تصدقين مدرس الفنية يقدرني يقول دمك شفاف (من لوازم الرسم) .
هي : بلاش كلام زايد (مدري طرح ) هادا جوال زينة .
أنا : لا جوال نحوّل <== مندبلتن تسبدي منهم بس يتحايلون فيني عشان يشبكونن.:cool:
هي : أجل سوري على الأزعاج .
أنا : وأنا مصري على الشفاحة .

تتوالى الأزعاجات اللي كل أعذارهم هادا جوا هند .. وهادا جوا لوجين .. وهادا جوال رفعة.. وهادا جوال سوسو (يعني سارة) .. وهادا جوال فلان وعلان .. تصدقون مره دقت علي عبلة تقول هادا جوال عنتر .. قله أني في السوق الدولي

الخلاصة إني كل شهرين أسدد مبلغ وقدره 5000 استرليني (يتعامل مع أرقى شركات الاتصالات .. تعرف عندنا تنافس على ودانه) من هالأزعاجات والتعقيب عليها وفي بعض الأحيان تصك العشرة الآف دولار (ولا تلحقوني مشروووه ) .

مرة من المراريت قررت أكرش هالبنات وأحوس مريرهم .. صعبة تجيني بنت تلعب بمشاعري لين تاخذ اللي تبي ويضيع شرفي ومالي ثم أنا أتورط وابلش بعمري
دقيت على رقم دق على بيجري (آسف جوالي) وسّكر وليتني مادقيت
طيييييييييييط طيييييييييييط <== صوت الجوال يدق في أذني
طع .. طع .. الخط فتح
أنا بصوت ناوي شر : الوووووووووووووووووه
هي : مرحبا عيوني .. مين أنتااا
أنا : سمعت عيوني ورحت فيها .. ابد أنتي دقتي علي طال عمرتس قبل شوي .
هي : ايووووا .. أنا دئيت عليك وكنت غلطانه بالرئم .. وسوري على أزعاجك .
أنا : ابد ياطويلة العمر تقدرين تزعجين على طووول .. وأزعاجتس راحة
هي : شكلك ظريف ...‍‍‍!!!!!
أنا : تقدرين تقولين ظرف .. وشو له أسلوب التحقير<== أول مره تمر عليه هالكلمة ويحسبها تصغير للظرف اللي توضع فيه الرسائل .
هي : لكان .. أنا عم بخزن برئمك وبدئ علييييك مرة تانيااا .
أنا : ياليت تكون الدئة أأأريبه <== تأثر على طول

.

بعد يومين .. دق الجوال وسّكر

أنا : أأأل ووووووووووو بابا فين <== يستهبل :D
هي : أهلين .. تصدق ودي أتعرف عليك .
أنا طاير في العجة : صززززز أنا فيصل من الرياض عمري ثلاث وعشرين أطخم بالحيل حتى جدي يومن ولدت يقول شكل الولد هذا طالع على كلوديا شيفر رومانسي بالحيل يعيروني في الحارة بــ (أسير الشوق ).
هي : ياروحي على دمك شو خفيف ... تصدق أنك أول واحد يدخل قلبي <== الجملة المعتادة عندالبنات .
أنا : وأنا أقول وشذا الصالة اللي فيها زحمة ومفروشة زل أحسب أني داخل قصر أفراح .. أثاريه قلبتس <== على بالي ابتميلح .
البنت بشئ من الزعل : ياللا باااااي أمي جات أكلمك مره تانيا .
أنا : بخيبة أمل كنت أبقول متى طيب
إلا أنها كانت مرسلة لي أهداء نغمة موسيقية رومانسية تصد من الجوال عندما تضغط زر نو في وجه واحدن يكلمك
طوووووووووط ...طوووووووووط ...طوووووووووووط .

بعد ثلاث أيام ..
الجوال .. يدق نص دقة ويسّكر

أنا ماصدقت خبر
طييييييييييييط طييييييييييييييط
هي : أهلين حبيبي <== يسمون هالكلمة (بنج الرومانسية)
أنــا (بالطبع متبنج ): وش قلتي .
هي : وش فيك عندك أحد حبيبي .
أنا : لا والله بس رايح أجيب منديل .. أحس أن واحدن لامخ خدودي بطماط <== يقالك خجلان
هي : حبيبي .. أنتا تحبني وإلا لا ؟؟ <== على طووول ماعندها وقت ;)
أنا : تصدقين قيس كان يغار مني يقول ماغطى عليّ في حبي لــ ليلى إلا وانت وخشتك في حبك لموضي (نسيت أقول لكم أن أسمها مويضي ).. حتى أن الكتب كتبت أن سبب موت قيس يوم راح يهيم على وجهه في الصحراء هو أنه منغبن مني .. حتى أنا حسيت بضميري يأنبني عشاني كنت السبب في مقتله .
هي : حبيبي أبي منك خدمه .
أنا : عيوني لتس .
هي : لا عيونك خلها لك عشان تشوفني بها إذا تقابلنا
أنا :تـ قـ ـا بـ لـ نـ ـا <== مندهش مايعرف هالحركات .
هي : أيه وليه مستبعدها حبيبي .. بس أنا محتاجة هالخدمة عشان أكلمك أكثر لأن وقتي مايسمح وأبي أكلمك متى ماأشوف أمي نايمة <== تصريفات البنات دايم .
أنا : ووشي الخدمة ياخشمي .. قولي بعد أني محتاج خشمي عشان اشوفتس به
هي : أنا ابغى شحن سوا عشان اقدر أكلمك وأعطيك الوعد <== تستخدم أسلوب التبنيج الأحاسيسي .
أنا (بعد تفكير عميق من هول الصدمة.. تعرفون مطفّر ) : ووش المقابل.
هي : ياشينكم يالشباب ماتصدقون على الله البنت تطلب منكم شئ تبون مقابل
أنا أقولك وش المقابل وفكر فيه
أشـــحـــن ســــــوا .... نــطـــلــع ســــــــوا
طووووووووط ... طووووووووط ..... طووووووووط ..... طووووووووط
كالعادة النغمة الموسيقة التي أعتادت عليها أذني
بالطبع أنا يومن كنت اسألها وش المقابل ماكنت أعرف وش سوا فأضظريت أسأل ابوي عنها <== أي شئ ماتعرفونه أسألوا أبوانكم عنه .. حتى علامات البلوغ يعلمونكم وشي . :cool:
يبه وش معني :
أشـــحـــن ســــــوا .... نــطـــلــع ســــــــوا
سالت من عيني أبي دمعتين .. أغرورقت بها وجنتاه .. فسألته ماذا بك ياابتاااه <== تحسونه في مسلسل تاريخي
فرد علي :
لقد توفي جدك عليه رحمة الله وهو يردد هذه المثل الذي جعلنا نعيش في دمااار من بعده .. فبدل مانورث وراه ملايين .. أكتشفنا بعد ذلك أن شركة الأتصالات تطلبه ديناً بمبلغ خيالي <== في وقت جدي كانوا يسلفون سوا .. يعني راحت دراهمه في سوا :D
مهوب مثلنا الحين حاطتها الأتصالات في البقالات كل هذا عشان تسوي أحراج للشباب

==========

مايستفاد من الموضوع أعلاه :

أولاً: لا تردعلى اللي يدق دقه وحده ويسّكر حتى لو كان بنت
ثانياً : ليش البنات مايغازلون إلا بأرقام سوا .. تساؤل يحتاج لأكثر من إجابة ؟؟
ثالثاً: رزق الأتصالات على المهبل .. وألأ وش السبب أنهم خفضوا الجوال العادي وخلوا سوا ماخفضوها .. كله عشان يسترزقوون من ورى هالمغازلجية
رابعاً : لا تطلع رقم مميز يبلشونك البنات .. يدقون ويسكرووون على كل رقم مميز بأعتقادهم أنه منغنغ وبيشحن سوا .. وبعضهم مثلي محطوط رقمه مميز ومطّفر ولا فيه أمل يشحن سوا وأسمه في البلاك لست حقت مؤسسة النقد السعودي.
خامساً : مهوب كل وحدة تقول لك حبيبي أنها تحبك يمكنها تبي شحن سوا
سادساً: أستفد من تجارب الناس اللي قبلك .. شف جدي مات وهو يردد هالمثل وماورّث إلا الديون
سابعاً : أعلم أن مخافة الله هي الوحيدة التي ستقيك شر خسائر الجوال وبطاقات سوا فأجعلها نصب عينينك .
ثامناً: ................... دقيقة أبرجع لكم أكمّل

<== دق جواله دقة وسّكر :D

منتديات مدرسة المشاغبين - ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه

الشيخ مناحي · #2 08-13-2003

معللللللللللليش

اسفين بدوووووووون زعل الحق يلحقك ؟؟؟؟

http://www.eqla3.com/vb/showthread.php?threadid=110119

الباسل · #3 08-13-2003

ههههههههههههههههههههههههاى

الله يرج ابو جيرانكم ياشيخ قل امين

اشحن سوا تاكل هوااااااااااا:D

موضوع رهيب تسلم وماقصرت

تحياتى

جواد العلي · #4 08-15-2003

:confused:

أدوات الموضوع
مشاهدة صفحة طباعة الموضوع أرسل هذا الموضوع إلى صديق
طريقة عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر رد
طريقة لشحن البطارية	كسلانة	ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه	45	12-29-2007 05:48 PM