سلام عليكم من أم دحيّم (بشده) وتراني غير حايمتن كبدها اللي بدون شده ( <= تقل توصف حارة )
واليكم أيها التماسيح هذه القصة اللي تعبر عن أنكم مابالثوب أحد

كنت جالسة في هالضحوية اطزز واقرص وأغني ( ماهقيت أن البراقع يافتنني ... ومرة اغني .. يالومي يالومي ... ومرة أغني : بلا سمرانيه ولوه.. بلا سمرانية .. ولوه) وبينما أنا على هذه الحال اذا سمعت صوت أبا دحيّم يهابد ( تعبت من اللغة العربية <= ايه هين قولي ما اعرف ) المهم دخل ابو دحيم وجلس وتكى على مركاتن في العريش وبدأ يزاعق : ياهيش ياهيش حايمه وينتس جعلتس الماحي ...( <= اللي يسمع ابو دحيم وهو يقول ياهيش يظن اني مالي اسم ياشين التمساح اذا شاف نفسه ):D المهم جيت اركض يمه سم سم سم وانا اركض يمه وانفض اديني من الطحين وآثار العجين والمطازيز .. وامسح خشتي من العرق بطرف يدي ويملط سناء ( سواد ) :rolleyes:المقرصة في خشتي لين رسم شنب على وجهي ...( هذا درس لبنات هالوقت خلوهم يشفون وشلون نتعب مع رجالنا <= عاد من زين هالرجال;) : عور وينشق ).. ودخلت عليه في العريش وانا مسرعة وأثره مدد عصاقيله ومادريت الا وانا اتكرفع بهن واجي على خشتي ..قالي ابو دحيّم: ( بسملا عليك ياأم دحيم بسملا عليك يانظر عيني قومي يابعد هالدنيا قومي ياجعله فيني ولا فيك ... ) <= تحلم انها تسمع مثل هالهرج :pالا قالي وجع يمصع مصارينك وطاعون يشق خشمك لعنبو بليستس ماتشوفين ياهالرفلا وهو يرفسني برجله ويقول تعدلي عساتس تتعدلين بجهنم يامل الماحي .... الخ
المهم قمت قلت سم آمر يابو دحيّم يابعد هالدنيا ( وأنا اقول في قلبي آآآخ بس من دخلك بهالمفرمه يهالشايب الاشهب هالحين من زين عصاقيلك يومك ممدهن صايرات تقل عصاقيل ذولالك اللي يجون في دعاية هيئة الاغاثة ويطلبون تبرع لهم لمجاعة أفريقيا ) المهم قالي ودنا نسافر هالسنة .
قلت ماشاء الله وش الطاري السفرة مهيب عاداتك يا بودحيم
قال : اقطعي وأخسي . <= أنواع الاحترام للحياة الزوجية:D
قال : نبي نروح نأخذ عمرة الله ياخذ عمرك .. يلا روحي ولمي قشتس ولا تنسين تآخذين الدلة والقهوة أخاف يصكني راس هناك ومانلقى احد يقهوينا ( عاد من زين هالراس كل اللي فيه نخارير مهوب مخ )
أنا من الفرحة قلت سم ... وأنقز من مكاني واطير اركض ابي اولم العفش ومادريت الا يوم تكرفعت ثانية بعصاقيل رامي ( أبو دحيّم هههههههه اما ابو دحيم اسمه رامي اهين ) ;)وطبيت على خشتي وهو يسحب رجله من تحتي ويرفسني بكل ما أوتي من قوة ومادريت الا يوم فنقزت وطبيت على ظهري ... قمت وتنفّضت ورحت أضف عفشي
قام أبو دحيّم وراح وزبط الموتر وغير الزيت وجاء ووقف الموتر عند البيت وفتح الكبوت وجاب قوطي بوية ورقى عليه وبدأ يويز ( يويق ) في الكبويت اللي يشوفه يحسبه أكبر مكانيكي مادري انه ماعنده سالفة لكن يبي يكشخ قدامي وقدام عياله ..وهو جالس يعبي ماء المساحات – تراه مايعرف غيرها - ويوم قضى من المساحات قام يلمّس المكينه وكل شوي ماسح العرق اللي ينزل من جبينه ( حلوه جبينه) بطرف شماغه زي اللي يجي بدعاية شل سوبر بلس ... لكن الفرق بينهم ان هذاك شخصية وابو دحيم اللي يشوفه من وراء وهو مطنبس على الموتر ياويله .. الثوب مرتفع وطالعة العصاقيل والسروال نازلن نصه بحيث انك تشوفه من وراء الثوب طبعا صروال السنه التفت يمي وأنا أسحب الشناط اقربهن وقالي الموتر عليه حرارة
قلت : حط فيه تحميله
قال : أقول ضفي وجهك وروحي كملي شغلتس لا اتوطى في بطنك
رحت ورجع هو يويز في المكينه ويلمّسها وهو على هالحال قام وليدي الصغير وركب بالموتر وجلس يلعب ببراءة الاطفال وظغط على البوري يوم قمز ابو دحيّم من الروعة وصك راسه في الكبوت وجاء يم الغمارة ومسك وليدى من عصقوله ولزخه كف يوم رشق كل البلاوي اللي في خشمه على الجدار .. قم الله ياخذ عدوك لعنبو بليسك دفقت عقلي أهب ما كرهه هالبزر ..المهم قام أبو دحيم وركب الموتر ويشغل ويجلس يتوحى يقالك يبي يكتشف هل فيه صوت غريب أولا ؟ وهو لو تزعق باذنه يالله يوحيك من ثقل سمعه
.. دخل على ابو دحيم وهو يبف وينافخ يقاله تعبان من صيانة الموتر .. وقال اسدعدوا ترى بنمشي بعد صلاة الفجر هماه . قلت: سم
قال لا تنسين تصحين العيال وتنبهين عليهم مايسهرون عند الكيرم ( وش دعوى عاد اللي يبي يسهرون عند الرقمي أو الانتر نت) . قلت أبشر
وراح يم فراشه وفسخ الثوب وعلقه على طرف الباب حق الغرفة ونام وهو لا بس الهاف:confused: ( من زين هالعصاقيل يوم تلبس الهاف لا وبعد متشقق من البطى .. ومن زين الطبايع حاط رجل على رجل وهو منسدح )
أهـ :D

_________________

2


يوم أصبحنا قام أبو دحيّم وقالي اتزعدي ( صحي , أيقضي ) :Dالعيال للصلاة وخليهم يستعدون للمشية ، ( طبعا يقولها بنفسن شينه يعنني ابروح اتمشابكم مانن بها الروحة اللي يسمعه يقول يبي يروح بنا على الطيارة يم كولالمبور والا كوبن هاقن ... عسى عدو عيني يسافر مع شايب) المهم رحت يم دحيم لقيته منبطر على فراشه ومتحظن البطانية وريحة الغرفه اللهم ياكافى والعصاقيل طالعة وثوبه مرتفع لين سره ( ترى هذا طبعه اذا نام .. بالاضافة الى السعابيل اللي تعوم فوق المخده كالموج الهائج ) قلتله يالله يادحيم قم صل ترى ابوك مزكن على اني اصحيكم وانبكم ( أحثكم ) على الاستعداد للسفر الى الطايف وأبها نبي نوريكم القروده يمكن انكم ماشفتوها الا بالمرايه ( <= يقالك تذب على عيالها ) :pونبي نوريكم حصيانهم ... فتح بنص عين والثانية منلطسه من الغمص ( ايه لا تشرهون دايمن نقره مع اخوانه يمكن احد طارفها والا شي ) <= ماودها تقول ان ولدها طمل ;)
المهم فتح بنص عين وقال طيب خليني آخر واحد تصحينه ... رحت يم هاك البصوة وليدي عزيّز قلت هذا اكيد ابشوته لين مايوقع الا بالحمام لانه بصوة مهوب شي .. دخلت عليه غرفته قلت عزيّز .. مارد علي ... قلت عزيّز بصوت أعلى شوي .. لكن برضه مارد على ... أومير أسمي عليه ,وازعق ذيك الزعقه المخلوطه بشوته بطرف الرجل على عزيّز .. بسملا على مادريت الا هو نشبن في حلقي تقل قطو ..
المهم عجزت عنهم وتركتهم ورحت اصلي يوم خلصت والا هذا ابو دحيم يدخل على وهو صارن خشته ( ياشين الشيبان اذا ساولك حاجة تطلع بمنه ) قال هاه اتدسعتي ( صحيتي ) العيال
قلت له صحيتهم بس ماقدرت عليهم
أومير يصر خشته أكثر من الصرة الاولي بقفلتين ويروح يم غرفة دحّيم مطلق العنان لقدمية لتسيران به سريعا الى مكان الضحية الاولى من ضحايا الرحلة الميمونه
دخل على دحيم وهو على الحالة التى وصفتها منذ تزليل ( قليل) ويمسك دحيم من عصقوله ويسحبه لين دخله الحمام وكب عليه طشت ماء .. بسملا عليه وليدي قام تقل مهبول وهو يهذري ويخربط ( والله اني خفت عليه ينهبل لاني خابرتن أن مافيه الا نتفة عقل وقلت الله يستر لا تطير هالنتيفه ثمن ينهبل .. لان ابوه الله يهديه كل يوم وهو دافقن عقله ..) :cool:
المهم اطلق دحيم وراح يم عزيّز وانا طايرتن بساقته عشان اسمي على وليدي .. يوم دخل على عزيّز قاله قم وجع يمصعك عن الارض ياهالنزغه وهو يمسكه مع عصقوله مثل اخوه ويسحبه وانا واقفتن عند الباب اسمي عليه يوم طلعوا مع الباب جاك عزيّز هالنزغه ويتمسك بعصاقيلي وأنا اللي اطيح على خشتى في الارض واتنيوط هاك المكنسة واخبط عزيّز مع دمجته .. قلت اتركني جعلك القامة اللي تبلعك وماتبقى منك نتفه .. أهب ياذا النزغه ( <= وش رايكم بحنان هالابوين الرحيمين .. اشوى ان حقوق الانسان مايدرون عنا والا كان هالحين في المعتقل انا ورامي ههههههه عجزت اتخيل ان اسم ابو دحيّم رامي )
الزبدة : .. بعد عراك دام لساعات طوال قاموا العيال والبنات ( طبعا ماودي اقول وش صار مع البنات لاني ماودي افضح ببنياتي ثمن افسد عليهن مستقبلهن )
جبت الفطور عشان نفطر قبل نقظب الطريق .. وجبت السفرة من فوق المعلاق ( ترانا منول نعلق السفرة بمسمار على الجدار ) وحطيت الكورن فلكس وقلت الفطور وجلسوا العيال ومعهم رامي ( هههههههه تجني ضحكة غصب كل ماقلت رامي .. <= ودها يصير اسم أبو دحيّم رامي علشان تكشخ قدام أم محيسن وأم سليّم ) :D
المهم دار الحديث التالي على مائدة الافطار :
دحيّم وهو متربع وسيقانه طالعة وهو يغمس الخبز بالشاهي <= طلعت الفضايح أن فطورهم مهوب كورن فلكس ههههه ماهنا الاخبز وشاهي .. من زين هالعيال عشان اسويلهم كورن فلكس خبز افغاني ويخب عليهم ) : المهم قال دحيّم والخبزه بثمه يعلكها وهو يمسح خشمه بكمه : يبه هالحين الطايف يعرفون لهرجنا و عندهم عسكريم
أبو دحيّم يلتفت على دحيّم بكل ثقة وعلو : اقول والله من زين السؤال ايه ما الومك منهي امك بس لعنبو بليسك أنت وين شايفنا رايحين .. وش اللي مايعرفون لغتنا
دحيّم : طيب يبه ترى اذا رحنا نبيك تشتريلنا عسكريم .
ابو دحيّم : صك دحيّم من مؤخرة رأسه وقال انتزعم وأذكر ربك تسيف صار هرجتنا هالكمخه
دحيّم ضرب وجهه بالبياله من قوة ضربه ابوه وشرق بالشاهي يابعدي هو . :eek:
عزيّز : ياخي يادحيّم أنت كبير هالحين وش تبي بالعسكريم لعنبو بليسك شف شنبك طوله . .. وبعدين المفروض أبوي مايضربك وأنت في هالعمر
دحيّم : ايه صح ليه يابابا تضربني دنا ابنك ضناك
أبو دحيّم : رجف دحيم برجله وقال ورا ماتنطم هالحين وترح لابو سعد جارنا وتعطيه مفتاح البيت وتقوله لا تنسى تعلّف البقرة ترانا بنسافر اليوم
ابو دحيم يلتفت يم حايمه : اقول والله يالبقرة انها ابرك منتس ومن عيالتس
حايمه : افاااا عليك يابو دحيم أجل ابرك منا
ابو دحيّم : اقول انثبري وقومي قربي الشناط خلونا نحملهن
أهـ:D

_________________

3


حملنا الشنط وجرجرنا هالبزراين لين ركبنا في الجمس وانا طبعا ركبت قدام <= مهيب تحب الركب قدام ابد :D
وركبت قدام وأبو دحيّم ماسك دركسون السيارة بكل اديه وصارّن خشته ومادن بوزه مترين اللي يشوفه يقول هذا يسوق طيارة والا تريله على هالحماس ومايبي احد يحتسي يقول اسكتوا لا تخبلون بي .
المهم توكلنا على الله ومشينا يم مكة ويوم مشينا لنا ثلاث ساعات قال ابو دحيّم ابوقف تحت هالكبري باخذلي غطة وأنوم وأنتم زينو الغداء . وقفنا وفتح كبوت السيارة يقالك يبي يبرد عليها .. ونزل فراشه وراح تشطر عنا ولف خشته وعيونه بشماغه وتوسد حذيانه ونام .
وجلست انا اقطع البصل والطماط وغسلت الرز وربصته ( <= ماتعرف تطبخ غير حبة هالرز ومن فوق هالشايب بعد ):cool:
دحّم وأخوانه بدو يلعبون بالتراب ويتلاحقون وانا ماغير اصارخ عليهم تعالوا لا تروحون للشارع تصدمكم السيارات وبعدوا عن ابوكم لا تبلشونه وش يفكنا من لسانه هالشايب وابلشت عمري معهم
دحيّم الله يصلحة مطفوق شوي ومهنا ذيك التكانه بالحيل ( يعني العقل لك عليه ) جالس يلعب مع اخوانه وكانوا حاطين صابون مع ماء بغراش ومعهم ليات يدسوها بوسط هالغرشه ثمن ينفخون باللي لين تطلع بالونه من الصابون .. دحيّم طير بالون صابون وبدأ يناظره وهو يرجع على وراء يبي يتابع مصير هالبالون وهو يرجع مادرى الا يوم وطى بطن ابو دحيّم وطب فوق بطنه لين صارت خشة دحيم عند خشة ابوه
دحيّم من الروعة وليدي قام وابتسم في وجه ابوه يقالك يبي يرضيه ويوم ضحك قطر من خشته سعبول وبثم أبو دحيم مباشرة
أبو دحيّم : وجع يوجعك وماحين يمحاك عن الارض ياشايب هالجن لعنبو بليسك أنت كل ماتكبر تنهبل زود ;) .. قم لا بوك لابو اللي جابوك .. ومن زين الطبايع شكلك عاملها وماتوضيت زين ريحتك تقلا ريحة بيارة الله يحوم تسبدك
نقز وليدي وعض ثوبه وكفخ يمي يبي يهج عن ابوه
ابو دحيّم أخذ الزبيرية من تحت راسه وحلتها على دحيّم يوم صكته من دمجته وطب على خشته في الارض وانا اللي اجيك اركض واسمي على وليدي يوم رفع خشته من الارض واثرها كلها تراب وبين شفايفه جعل .ومايقدر يفتح بعيونه من التراب
قضينا من هذي وبدأوا يلعبون لعبة المغبا : يعني وحد يخفي حاجة والبقية يدورونها
جا وليدي الصغير وغبها في مكان وقال يلا اتحدكم تلقونها .. هالدبيشه دحيّم بدأ يدورها ويمشي وعيونه في الارض من زود الحرص .. ومشي لين وصل ابوه وهو نايم وقام ورفع فراش ابوه يبي يدورها تحته يوم تدربى ابو دحيم وطب في الارض وخشته على التراب .. قام على وليدي دحيّم وجلده وهو يلعن ويشتم ..
دحيّم قام يركض يبي يهج عن ابوه ومع هجته شاته ابو دحيّم يوم ارتفع متر عن الارض وجاء على خشته وتكسرت سنونه .
المهم قام ابو دحيم وقال يلا عطونا الغداء وجبنا الغداء وجلس ابو دحيم وناديت العيال ابيهم يتغدون مع ابوهو وجو كلهم ويوم جاء دحيّم وهو يتكرفع بنعول اخوه ويطيح على الغداء ويكبه على التراب
ابو دحيّم قام ورفع دحيّم مع اذانه وشاته لين ركب السيارة . <= نقص هالولد :D

المهم الاحداث بصراحة كثير وماودي اذكرها كلها عشان ماتطول القصة وتملون منها بحاول اختصر
كملنا مشوارنا ووصلنا مكه وأخذنا شقه هناك وراح أبو دحيّم مع العيال ياخذون عمره وكان دحيّم يمشي وراء ابوه وهو يتلفت ويتفرج على هالعالم واذا وقف ابوه من الزحمه قام دحيّم وصدمه ( لانه مايدري ان ابوه وقف ) همن أبو دحيّم يصكه بكوع يده

قضينا من مكة ورحنا يم جده
رحنا يم البحر وفرشنا فراشنا وجلسنا على الشاطئ في جلسه مفعمه بالرومانسية
ابو دحيّم قام وفصخ ثوبه عشان مايتعرفط ( <= من زينه عاد تراه ثوب الدفه ويوم يفسخه عشان يحرم معربده وداسه بوسط كيسه ويوم قضا من الاحرام رجع ولبسه بدون تسوي )
المهم فسخ ثوبه وجلس بسروال وفنيلة ( السروال اللي الى الركبة .. ذاك أبو حبل )وصاير تقل خريطة الفارسي من الوسخ وكان منسدح ويتفرج على البحر .. فجأة جت مرة من اللي يبعن عند البحر وجلست عندنا وفلت بضاعتها .. أبو دحيّم قام وتواسى وواسى لحيته ومد رجلينه يقالك يبي يغريها على هالسيقان اللي تقل سيقان جرادة الله يحوم تسبده ( <= يقالك انها ماغارت ):p
شرينا المقسوم منها وراحت وهذي أول مرة اشوف ابو دحيّم يشتريلنا شي بدون مايحسربنا
جاك دحيّم وقال يبه ابسبح بالبحر
ابو دحيم : طس كودك تغرق ونرتاح منك
قام دحيّم وفسخ ثوبه وفسخ الفنيلة وطلع الهيكل العضمي يادافع البلا تقل من حقين المجاعة
طب دحيّم بالبحر وبدأ يطافش ويلعب مع اخوانه مستاني وليدي وهاجن كشرته وجاك هالمنسم وغيّص راسه بالماء يقالك يبي يقلد عدنان ( ذاك حق عدنان ولينه ) يوم طلع عيونه حمر من الملح ويكحكح من طعم البحر وطلع من البحر جاين يمي وخشمه يتقاطر وسعابيله تذرف من الصياح يوم طلع من الماء أنسلح سرواله عشان الماء مثقل عليه وماهنا ردفن يشيله .. وهالدبشه يمشي مادرى عن شي
قاله ابوه : دحيّم استر عورتك لا بارك الله فيك ولا في اللي يجيبك معه
رجعنا للشقة : وقام ابو دحيّم وتصل على جارنا ابو سعد وساله عن البقرة
ابو سعد : ابشرك يابو دحيّم البقرة حقتكم اضنت وهي بالنفاس هالحين وجابت عجلة ماهنا ملحها
يوم اشتب ابو دحيّم وقال يلا حملو عفشكم نبي نرجع للديرة
الله لا يعيد هالبقرة نكدت علينا ( <= عاد يقالنا مبسوطين بهالرحلة) :D
مايستفاد من هالهذر كله :
1- حنان الاب الزائد مع أولاده يصيّرهم الى خكاريا كما هو واضح من دحيّم ومعاملة ابيه معه .
2- ديمقراطية الازواج في الرحلات كما فعل ابو دحيم
3- الرحلة المقصود منها الوناسة مهوب لعنة الخير .. وياليت كل الناس يصيرون مثل ابو دحيم أدب وأخلاق وحسن منطق وحسن تربيه ومعاملة راقية يالله من فضلك
بقية الفوائد اتركها لكم تستنتجونها وتعلقون عليها
وسلامتكم
أختكم حايمتن كبدها ((أم دحيّم)):D

_________________

هلا والله بحايمتن تسبيدتها.....

بالله وحش حيات التمساحه بلا تمساح ولاشي.....

ياليت ابو دحيم يلعفتس ويمعط شويشتس:D:D:D


عصويد التمساح

_________________

:cool::cool::cool::cool::cool::cool::cool::cool::c ool:
يسلموووووووووووووووووووووووووو حايمتن كبدها على الموضوع

ويعطيك العافيه

_________________