██░ لـــمن لـــديه ذائـــقه شعريه██░ الجزء (1)██░

السلام عليكم ورحمة الله وبركاته


مسائكم خيّر

وش اخباركم وش اعلومكم عساكم بخير.

طبعا هالعمل هو اللي شجعني فيه أخوي محمد بالاداره كنا نتبادل الحديث حول الشعر وبالصدفه يوم امس كان بجواري شقيقي أمس فقال اذا كان هناك أحد لم يكون صورة بشعره فلافائده منه إطلاقا وذكر لي عدة أمثلة .

وأحببت أن أضع بين أيديكم مجموعة رائعة للشاعر نايف الصقر
الذي أنا بصفة شخصية أعتبره من الشعراء الذي أنفرّد لوحده
بالصور الجميلة والرائعه والمعبرّه فالشاعر الذي لاتوجد بقصيدته صوره رائعه يعتبر فقط تجميّع ابيات قافيّه ووزن ولكن هناك شعراء فعلا يضعون هذا نصب اعينهم واذا لم توجد صور بالقصيده فهي عاديه جدا وببساطه كل شخص يستطيع القيام بذلك واحببت أن اجمع لكم قصائد أقتطفتها مساء هذا اليوم للشاعر نايف صقر كتابه وسماع أتمنى أن تنال إعجابكم .

هذاالجزء الاول طبعا اذا لقيت أهتمام بالشعر الذي يحمل صور جميّله ورائعه راح اكون معكم بالجزء الثاني إن شاء الله .



لا اخفيكم سرا ان كثيرا مانقرأ قصائد ولكن قليلا مانجد صور رائعه كصور يضعها شاعرنا نايف صقر .

ومثلا كهذا البيت الرائع لنايف صقر لا اعلم هل احد يعرف معنى الصوره التي قصدها الشاعر

العشب الأزرق سامر الشيح والقمح.
................. يوم اسقته عذب السحايـب بردهـا




وبحفظ الرحمن

يقولون الشعر وصل القلم والصفحه الطرقى=وانا اقول الشعر قدح الخيال ونار صوانه
حبيبي والبحر سور التراب ودفتر الغرقى=لو اني ماكتبتك لامني ملحه ومرجانه
حبيبي لاهمت حبر العروق الغيمه الزرقا =على رمل الورق دمي سحاب هل هتانه
حبيبي كل ماذعذع جفاك وناحت الورقى =يتل البال قلبي واهدي السجات جنحانه
حبيبي وانت مرقاب الشجون وهاجس المرقى=ترى كلٍ يموت الا الوفي بعيون خلانه
حبيبي والجروح اللي سببها ليلة الفرقا =ضما يدها الوصال اليا ظما المحروم حرمانه
حبيبي لو يسامحك البحر وتبيحك الغرقى=أنا ماأسامحك لو لامني ملّحـه ومرجانه

جفت اقلام الغرام وطول المحبوب باله=والله اني ماهقيت ان الغضي يقسي عليه
وش خطاي الا المحبه وش رجاي الا وصاله =وش يبي غير الموده والغلا والمقدريه
دللوه اللي ربوه صغير واسرف بي دلاله=ليت لي قلب يطيق الصبر وعيون خليه
والغضي لو لاعه التحنان وبقلبه عداله =ماغذت من دونه القيعان جردٍ جرهديه
وان تشره قايد الغزلان ماله بي جماله=لعنبو من خان خلانه وجنب عن خويه
عن جنوبه والوله والشرق يغنيني شماله=صد ياقلب الجفا لاصد وضاح الثنيه
ماانت ياالخفاق عبد له ولا انت اصغر عياله=انت خفاق الضلوع العوج والخيره خفيه

حبيبي لا تعذر ما على صدق الحبيب جدال = رضت عنك العيون وهاك قلب فز بأعشابه
على وعدك تجيني يا حبيبي صاخب الميصال = عليك من اليدين وناسها هرجه وسبابه
هلابك وين ما يشرق نظرك الناعم القتال = هلابك وانثنى غصن الزمان وطار باسرابه
عذاريبك قليلة يا حبيبي كايد العذال = ولكنك بقلب من سكنته حارسك بابه
عيونٍ شافتك عن قرب قرب يهمها تختال = على بعض العيون وكل طير يحب مرقابه
انا اللي سلمك قلبه دلو عشق وغلاك الجال = وتليته بحبل من جفاك وضاق بأسبابه
فداك اللي تبي هاك الجمل والحمل والجمال = جلب تلك السنين وكل سوق وطيب مجلابه
يا الطف من طيوفك في عيونٍ للسهر مدهال = لجني خايفات وكل طيف احلى من ثيابه
احبك كثر ما ينسى زمانه مستريح البال = واحبك كثر ما قلب المسافر حنّ لترابه
شبيه الشمس لو مالك مثل شمس السنين ظلال = ترى كلن يموت الا قصيدٍ يبكي احبابه
وانا ليلي قصايد او قصيدي ليل لا تحتال = هذا بعض الغلا باقصى خفوقي جاك باعشابه

كل الشوارع تمرّك يالحرير الحر = يا تل قلبي على لاماك من تالي
صحّيت جمرة .. و ذاب الشمع و السكّر = وشلون ما اتذكّرَك و تمر في بالي
في بسمتك يضحك الرّمان للمرمر = و بعد يغار الشهد من ريقها الحالي
و يحق لك يا صغير السّن تتكبّر = إلاّ على اللي يحبّك يا بعد حالي
يا كثر حبك بقلبي و الغرام أكثر = و تخيّل وش كثر أحبك و انت غربالي
يا خلطة المسك و الرّيحان و العنبر = الريح تستاذنك يالطّيب الغالي
رح وين ما تشتهي رح قد ما تقدر = أنا أول الناس في قلبك و انا التالي
والعاشق يعلم الصبّار يتصبّر = على الظما لا تغطرس و أشهب اللالي

طبعا هالقيدة للامانه لم أجد لها أسم فحبيّت اطلق عليها اسم
قتيّل البرّد

العشب الأزرق سامر الشيح و القمح = عقب سْقتَه عذب السحايب بَرَدْها
و الجادل اللي طولها كنّه الرمح = كل الرّغَد و الخيزران لجسدها
هي بَسمةٍ يشقى بها الجمر و الصّبح = و تغار قطعان النّحل من شهدها
عن ملحها ياما البحر حدّث الملح = و ياما الحرير اشتاق لعناق يدها
شيهانةٍ لا بيّنَت وجهها السمح = تذبح يا أهل شقر الحرار و هددها
قلب الوله و قلادة التيه و المدح = يستاهله عنق الجفول و نهدها
ليت الجفا زلّة و أدوّر لها دمح = و ليت الغرام جروح و انسى عددها
و أنا قتيل البرد يا وادي الطلح = كان المزون أضناك صاخب رعدها

الموت حظ القلم والمجد للدفتر = حبر القلم غلطتي وايامي اوراقي
الخوف يجتاحني وجه الطريق أسمر = راح اكثر العمر ياخوفي على الباقي
ياجرح رافقتني للناس لاتظهر = وان عشت في نظرتي مامت باعماقي
ياصوت لاتلتحف صمتي ولاتصبر = قل ماتبي واترك الهقوه على الهاقي
والخطوه اللي عن آخر سكتي تقصر = ماهيب من طبع رجليني ولاساقي
مانيب من عاش لايربح ولا يخسر = ولاهو ضرري تكون أفعالي أخلاقي
ثراي ماينشد الغيمه متى تمطر = مادامها في سماي تحن لاغراقي
رح وين ماتشتهي رح قد ماتقدر = أنا اول الناس في قلبك وانا الباقي
يكفيني انك تعذبني وانا اتفجر = قصايدٍ تنتظرها كل عشاقي
وانا قصيدي يجي مختارني مهجر = وأنبت عشانه نخل وسنيني الساقي

نار الحطب صفرا وزفراتها زرق = يذكر بها الأخضر ليالي جفافه
لشموسها شبيت في سدرة الشرق = واطعمتها طلح الشجن والحسافه
لعلي اكتب من لحون الدفا طرق = والا اجمع التمر لمواسم خرافه
والشاعر اللي يجهل النوح والورق = يغيب عن بال التباريح قافه
الشعر انا حادي مجاهيمه الزرق = اللي ترزم لي حنين ولطافه
بيني وبين اللي يغنون به فرق = لاني اشقي به واحبه واخافه
والمزنه اللي شافي قطنها البرق = سالت ونسيتها الرعود ارتجافه

أدعكم معها بصوته فهي أجمل

ركزوا بالصور الشعريه الموجودة باللابيات

فكرّة أخراج أخوكم


خالد

المشاركة الأصلية كتبت بواسطة الشاعر مساير شكرا على هذا المجهود الرائع اخ خالد وشكرا على هذه الابيات التي عطرت بجمالها قسم البوح دمت ودام هذا العطاء لك الود

العشب الأزرق سامر الشيح والقمح. يوم اسقته عذب السحايـب بردهـا

نار الحطب صفرا وزفراتهـا زرق يذكر بها الأخضر ليالـي جفافـه

ثراي ماينشد الغيمـه متـى تمطـر مادامها في سماي تحـن لاغراقـي رح وين ماتشتهي رح قـد ماتقـدر أنا اول الناس في قلبك وانا الباقـي يكفيني انك تعذبنـي وانـااتفجـر قصايـدٍ تنتظرهـا كـل عشـاقـي وانا قصيدي يجي مختارني مهجـر وأنبت عشانه نخل وسنيني الساقـي