بسم الله نبدا
...............................................
يقولك وانا في عز النوم والسعابيل الا فجاه ....رن التليفون وطبعا تلفوننا ابوي شايل منه كل الارقام موووب مخلي الا رقمين التسعه والثمانيه يعني مالك امل الا تدق على الشرطه والا الدفاع المدني وغييييييره مافيه
المهم رفعت السماعه واقول نعم
الا وذاك الصووووت اللي يرد الروح صوووت بنت ....واخوكم اذا سمع صوت بنت اوجعه بطنه وقالت الووووو
انا ماعاد عرفت وش اقول انشلت براطمي ال ال ال ال لوووووووووو
قالت مين معاي؟قلت معاك انا
وهي اللي تضحك وانا قلبي احسه مووووب طبيعي قالبها سامري واستنزل عندي الكبد والبنكرياس انوااااااااااع الربكه وقالت لي سوسو موجووووده ؟؟؟
قلت لها ماينفع حوحو؟؟
قالت مين حوحو؟؟ قلت هذا اسم الدلع حق الحمار اللي هو انا
وضحكت للمره الثانيه على التوالي وقالت يؤيؤ شكلي غلطانه طيب اسفه قلت لها لاشكر على واجب
وقفلت السماعه
تصدقووون ماادري وش صار فيني حسيت بقشعريره بجسمي
وان افرازات الخشم عندي زاااادت وان ودي اروح انبطح في الحوش واكتب قصيده هجائيه
لايكون هذا هو الحب اللي يقولوووووون
عاد انا ماني متعود عالبنات لان ماشاء الله بيتنا فيه خمسطعشر رجال اللي هم انا واخواني وابوي وامي
المهم يعني انا واخواني ماشفنا بنت ابد وهذا اللي سبب لنا العقده الفيسلوجيه(من وين جت ذي ما ادري )
المهم قررت اني اتعرف على بنات قبل لااموت بس فيه مشكله وحده وهي اني ماعندي اسلوب ابد (يعني وقفت عالاسلوب ..نعن ابوك انت عندك الف مشكله مو وحده بس واهمها مشكلة وجهك اللي كنه لوحة انتبه امامك نفطة تفتيش )))
الوكاد اني مالقيت قدامي الا عبدوش (واحد من العيال) معروف انا البنات مايعوقون معه وانا اللي القط مفتاح سيارتي وارووح لعبدوش وعلمته بالسالفه وان امنيتي بالحياه اتعرف على بنت قبل لااموت (اخسسسسسسسسس يالشايب)
قال لي ..السالفه بسيطه اذا بغيت البنت تحبك حسسها انها احلى وحده بالعالم قلت له يعني اقولها انتي احسن من مارادونا ....؟؟؟؟

وهو اللي يرفسني برجله في بطني وقال لي انت ثووور وش دخل مارادونا يالغبي ؟؟؟
انا قصدي انك تحسسها بانوثتها وان مافيه بنت غيرها في العالم قلت له مافهمت يعني تبيني اذبح كل البنات واخليها لحالها وهو اللي يمووووه علي برررررجله ويمحطني بيده على جبهتي وقال لي شووووف انت حمار وماراح تفهم الا بالدروس العمليه ويطلع جواله ويدق وقال لي شوف انا بكلم وحده وتعلم قلت له طيب
وكلم وقال هلا عمري هلا حياتي هلا روووووووووحي
انا لؤي حبيبك ومجنوووووونك((((الحمد لله عالعقل ...نعن ابوك وين لؤي معه ...واللله لو اشوف وجهه في احسن الاحوا ل بعد مااعطيه غير اسم جعفر ))))

قال ايش قال لؤي
وقام يقول لها احبك اموووووووت فيك انا بدونك مثل البيت بدون حاره مثل التلفون بدون حراره مثل السواق بدون سياره انا البنزين وانتي الشراره انا الشارع وانتي الاناره انا الرومانسيه وانتي الاثاره انا مبنى التجاره العالمي وانتي الطياره (((((قسم بالله بغيت اضمه وابوسه يوم سمعت كلامه حسيت بشعور غريب نعن ابليسه لو يكلم جدار كان ذاب )))))

المهم خلص المكالمه والتفت علي وقال لي يالله دورك بعطيك رقم بنت وكلمها وقول نفس الكلام وهو اللي يدق على بنت ويعطيني الجوال وانا اللي اقول الوووووووووووووو ويوم سمعت صوتها ضاعت علومي ونسيت كل الكلام وقلت لها بابا فين؟؟؟وما حسيت الا بذيك الجزمه اللي لازقه في مقفاي وقال لي شوف انت غبي قل لها نفس الكلام اللي انا قلته يالثووووووووووووور وانا اللي لقول لها هلا حياتي هلا روحي هلا تعالي وقالت طيب وبعدين قلت لها انا بدونك مثل الكيبورد بدون فاره مثل التقاطع بدون اشاره مثل الحمار بدووووووون حماره مثل السلطه بدون خياره انا محترف وانتي نظام الاعاره انا الولاعه وانتي السيجاره انا الددسن وانتي الغماره انا الصرصور وانتي البياره اناا طوووط طووووط طووووط طوط (قفلت في وجهي )قال عبدوش وش فيك قلت له لا ابد الخط مشغول ((((مايعرف يصرف ابد ))))
ومادريت الا وعبدوش مطلع لوح فيه مسامير وذبحني فيه اللين قلت للعنز ياخاله .......... المهم رجعت للبيت ودماني تصب وماليه وجهي من كثر الطق اللي جاني
وانا اللي ادخل بشويييييييييش عشان مايشوفني احد واطلع غرفتي واسكر الباب واناااااااااااااااااام
وفي عز النوم دق التلفون وارفع السماعه الا هي البنت اللي كلمتني اول مره قلت نعم قالت سوسو موجوده ..؟؟
قلت لها شوفي بيتنا كله شباب ومافيه احد يبدا اسمه بحرف السين انا واخواني كلنا اسمنا خالد ومافيه الا تخوي الصغير فهد هو اللي اسمه نايف ونناديه عبدالرحمن ((وش عنده عادل امام...؟؟؟؟.))والبنت كرتها ضحكه وقالت دمك خفيف ((هي تحسبني استهبل مادرت اني دلخ من جد)) وقلت لها شكرررررا((مسوي مؤدب)) وسالتني وش تسوي اللحين قلت لها كنت نايم قالت يؤيؤ تنام في الليل انت قلت اجل متى انام ؟؟؟؟؟؟؟؟؟؟؟؟؟؟
قالت لا انا انام النهار واسهر الليل قلت لها الاخت بومه قالت لا بس الليل وقت الرومانسيه انت تعرف الرومانسيه ؟؟؟قلت لها لا والله مااعرف بنات انا ((مسوي فيها فاهم))وسالتني انت وش اسمك ؟؟قلت لها مصيول قالت وش معناه قلت هذا اسم كلب كان عند جدي وسماني ابوي عليه لاني اشبهه وسالتها انتي وش اسمك قالت داليدا قلت لها انا ابي اعرف اسمك مو معيارتك قالت هذا اسمي
سويت فيها اسلوب وقلت لها اني حبيت وحده بس انتهى هالحب لانها خانتني قالت من حبيت ؟؟؟؟؟؟
قلت لها حبيت عنز جيراننا بس خانتني مع تيس سورررري عشان له قذله ....
المهم ان البنت قالتلي اوكي اكلمك بكره لان امي جت






قلت مو مشكله وتطورت العلاقه وصرنا نكلم بعض كل يوم وانا انقلب حالي ولاحظوا اهلي اني تغيرت بس سرحان
وصرت اقرا واجد عشان اتعلم كلام جديد في الحب تلقاني اقرا كتب الشعر والحب والطبخ(((لاتستغربون لان كتب الطبخ اتعلم منها كلام حلو مثل ياعسل ياحليب ياقشطه ياكريم كراميل ))))
وادخل كتب ممنوعه للبيت بس المشكله انها ضاعت مني وصرت اروح عند بيارة جيراننا اللي دايم الدوم طافحه ((كرم الله القاريين)) واقعد افكرواتامل وارمي حصى وسط البياره ((مسوي رومانسي مثل اللي يجلسون على البحر ويرمون حصى))المهم في ليله من الملاليل قالت لي البنت مصيول اوصفلي شكلك

:smils115:



ياوالله البلشه وش اقول لها هذي هاللحين اقول اني قرد اعترف لها بالحقيقه المره واقول لها اني جدار مالي ملامح اعترف لهااني شبيه عبدالله سليمان ((الف حمدلله والشكر))
الوكاد اني قلت ياولد خلني انصب عليها المهم قلت انا عيوني مثل عيون جواد وطولي مثل طول طلال الرشيد وخشمي مثل خشم خالد عبدالرحمن وملحي مثل ملح راشد الماجد ومهطوووووووووم كتيييير مثل رامي عياش ((((والله ماناقص الا الملحن ويكمل الاوبريت)))

شكل البنت خقت معي وقامت تشاهق من الفرحه وسالتها انتي اوصفيلي شكلك قالت مقدر لما اشوفك بتعرف لا ن مالي مثيل

اكملكم بعدييييييييييييين

منتديات مدرسة المشاغبين - القصص و الروايات و الحكايات قصص قصيرة و تعلم القصة story novelette