الفرق بين الواد النجدي وابو الشباب الحجازي

اعزائي اسف على غيابي المتواصل ولكنكم تعرفون احوال المغتربين عن اوطانهم واهاليهم اربع وعشرين ساعة دراسة وكرف علشان يخلصون ويرجعون لهلهم ولمدينتهم عنيزة يا بعدي انا والله

المهم هذا موضوع مر على وحبيت اشارككم معاي

هذاه بعض الفروق بين الحجازي والنجدي وكلهم اخوان وما اقصد منها شي الا التسلية واللي حس انو فيها زعل ياليت يخبرني علشان اضفها واعتذر مقدما لكن بيني وبينكم تحتوي على بعض الحقائق اذا مو كلها

وهذه الفروق من النواحي التالية :

1.الرومانسيه.
2. لغه العيون.
3.العلاقه بالاطفال.
4.السريه والتعتيم.
5.التواضع.
6.الالفاظ.
*********************************************
اولا : الرومانسيه
مايختلف اثنين ان الحجازي اكثر رومانسيه من النجدي.
هذي مافيها طقه عصى.
<====وين تجيب ذي امثالها منه
دائما النجدي مايعبر عن الي في قلبه ويعتبر هذا ضعف.
بس الحجازي اكثر وضوح واقل تعقيد من هالناحيه
يعني ممكن تشوف دموع الحجازي.
بس النجدي يموت بس مايبكي.
مع ان البكا ابدا مو ضعف هو تعبير عن شعور زيه زي الضحك.
<====جاها جفاف من كثر بكاها
..............................
ثانيا : لغه العيون
الكل يستخدمها بس الاختلاف في الغرض من استخدامها
الشاب النجدي يستخدمها للتهديد والوعيد والبنت الي تبي تفهم قصدي تجرب
تقول لابوها في حضره اخوها:ابوي خله يوديني للسوق.
بعدين تشوف النظرات الرهيبه الي رح يرسلها لها الاخوالعزيزالي
لويسلطهاعلى جبل هدته
<---حشى ليزر ذي مو عيون.
بس الحجازي لا غييير حد عيونه التسبيل بس يعني يستخدمهااستخدام سلمي.
والي يحد من استخدامهاانها غالبا تكون حمرى من التدخين(مايخفى عليكم
ان التدخين منتشر في الحجاز اكثر من نجد)
...................................
ثالثا. من ناحيه الاطفال
الحجازي يتحملهم يعني ممكن يسلم على عيال خواته كلهم.
بس النجدي بيحب اثنين منهم والثالث بيصافحه والباقين بيطقهم.
وعلشان تفهم الوضع قارن بين حالتين اذا نط الطفل وجر شماغك.
الحجازي بيلحقه علشان يقرصه في خده ويضحك ويقول ايش الشقاوه هدي
والنجدي بيلحقه بعد بس علشان يرفسه في بطنه ويصك به الجدار
.................................
رابعا: من ناحيه السريه
يوووه والله الغموض الي فيه النجدي يوووه
ماتدري وينه رايح وينه جاي.
بيروح مشوار وجاي من شغلا لي.
الف علامه استفهام على تنقلاته ليش ما ادري مع انه ممكن مايسوي شي غلط
بس شعاره التعتيم الاعلامي قد مايقدر.
(تقول كنه اكبر همنا ياتشارلز على غفله لاتخاف ترى محد جابلك خبر)
والدراسه يوووه ماتدري وينه واصل الوعد يوم التخرج
بس وش مستواه هذي ولا الموساداليهودي يجيبها.
................................
خامسا:التواضع
لا عاد هذي حكايتها حكايه.
النجدي ذا فيه عنطزه ماادري وينه جايبها منه
لاحظتها في خواني بس عجزت اقنعهم انهم مافيهم زود عن غيرهم.
يعني شعب الله المختار.
هو غير العالم ذا كله.
طيب قله : ليش
يقولك وهو يضخم صوته: لاني من نجد
طيب والنعم بنجد ماقلنا شي بس تراها ماتتعدى صحرا كلها ضبان وجرابيع(
ياهاواي على غفله)
بس الحجازي لا بالرغم من انه عنده ميزه رهيبه وهي كونه هو والرسول صلى
الله عليه وسلم من نفس المكان ومع ذلك تشوفه متواضع.
................................
سادسا:الالفاظ
يوووووه حدث ولا حرج.
النجدي يعني..غالبا..غالبا..اقول غالبا..
حطو تحت غالبا خمسه خطوط واحد منها احمرعلشان تنتبهون
غالبا مايكون جلف اييه جلف بكل ماتعني الكلمه
يعني ناديته يقولك هاه
بغى يناديك يقول هيه
مع ان الكلام ببلاش والملافظ سعد بس هذا الواقع.

اذا تبي تلاحظ الي انا اقول احضر جلسه شباب يمونون على بعض ولاحظ
كلمات عندهم وتريقه يقولونها عادي زي السلام عليكم بالرغم من انها
تزعل الحجازي لو وجهت له وتخليه يقدم على نقل ويترك الديره كلها.
وتلاحظ انهم يتصيدون اخطاء بعض يعني ياويلك زل لسانك بكلمه خلاص
مسكوها الشباب عاد اذا لاحظو انك انحرجت ماعاد نسوها ابد لا ويمكن
ينادونك بها
لا وفيه شي ملاحظ ما ادري انتم لاحظتوه ولا لا في مجالس شباب نجد
يتكلمون كلهم بصوت عالي وفي نفس الوقت من الي يسمع ما ادري
بس الحجازيين السلام بالدور والكلام بالدور لحظات الصمت موجوده.
انا خبرتي في هالناحيه محدوده ماتتعدى جلسات اخواني وبعض اعمامي
واخوالي بس الي عنده راي ثاني ولا فرق بين المجلسين ولا ملاحظه ياليت
يضيفها
هذا مما لاحظت وقرات وسمعت
----ياسر العظمه على غفله.
طيب سبب الاختلاف انا في رايي سببين :
الاول البيئه البيئه الصحراويه والجمل تاثيرها غير بيئه الاوديه والغنم
يعني
احتكاك النجدي بالصحراء والجمل اثر فيه زي ما اثر احتكاك الحجازي
بالاوديه والغنم.
الصحراء وجفافها وقسوتها غير سهوله الوادي وخضاره.
وترى الغنم غيير الجمل كثير الغنم يبيله سياسه في التعامل معه بس
الجمل تنفع معه الجلافه.
وكل هذا له تاثيره على الانسان

الشي الثاني. الاحتكاك :
النجدي مجتمعه مغلق يعني مافيه احتكاك الا من نفس النوعيه علشان كذا
زادت صفاته تاصل بس الحجازي مجتمعه مفتوح وكل سنه يرد عليه الكثير من البيئات والثقافات في الحج.
وهذا اثر فيه وخلاه ياخذ منهم الزين والشين بس بما ان البقاء للاصلح
فانا في رايي ان الزين اكثر.
واخيرا اقول ان النجدي والحجازي قطبين من اقطاب بلدناالحبيب الغالي علينا كثير .وكلهم والنعم فيهم هم ابوانا واخوانا الي اذااحتجنا لهم مايقصرون.
بس ابي الي عنده راي ولا فكره يطرحها(بس شوي شوي عليها لايوجعها)
سواء كانت مؤيده ولا معارضه.
ولاتنسون اختلاف الراي لايفسد للود قضيه
موضوع جدي وطرح هزلي .....ينفع.



------------------
دولجـبي الهوجاس مع هبت النود......والحال من نس الهواجيس ذايب