وكمان راح انزل بارت ثاني لعيون اللى طلبوني انو البارت يكون طويل

الجزء الرابع



ابتسمت عزيزة برضا على اهتمام طلال بحلا , اللي حتى منال ماقدرت تعطيها اهتمام كثير ...

توقع طلال ان حلا قاعده بالصاله , راح هناك وشافها جالسه على الكنبه , وماسكه جوالها , تطالع تلفزيون وبالها مو معاه ..

جلس طلال على نفس الكنبه الكبيره , وقال بهدوء : الحلو ليش زعلان ؟

ابتسمت حلا ابتسامه مزيفة : لا مو زعلانه

طلال ابتسم : لا , زعلانه

حلا : لا مافيني شي , بعدين ليه يهمك تعرف ؟ خلاص قلت لك مافيني شي ( وقامت من على الكنبه )

قام طلال ووقف قبالها , تكتّف وقال : يهمني اعرف , عشان اورّيه شغله اللي يزعل بنت خالتي

حلا استحت , هي تعرف ان هذا اسلوب طلال في الكلام , هو مايقصد شي فيه , بس طريقته في الكلام حلوه , واساساً لسانه عسل مثل مايقولون

حلا باحراج : سبب بايخ اصلا مايستاهل

طلال : معليش , قولي


ترددت حلا قبل ماتتكلم , وجلست على الكنبة ..

حس انها منحرجه منه, قال وهو يتربع على الكنبه : طيب , تبين انادي لك منال تتكلمين معها ؟

حلا : لا عادي , ( وضحكت ببراءة ) بفضفض , بس الله يعينك علي تراني غثيثه ؟؟

طلال بالمصري : فضفضي ياختي فضفضي

( في الايام اللي عاشتها حلا معاهم , ارتاحت لطلال اكثر من منال , ماتدري ليه , مع انها حاسه ان طلال انتبه لهالشي بس ماحبت تبينه زياده , قالت وهي تتنهد : ماما ..

طلال : وشفيها ؟

...... : مادري , احس انها مخبيه علي أشياء ..

...... : زي ايش مثلا ؟

...... : ابوي , احيان احس ان اللي فيه اكبر من سالفة سكري وضغط , بس مافي فايده , شكلهم مغبيّين عني , مايبون يقولون لي , وجهه تعبان , غير عن اول , اول كان يرتفع وينخفض السكر عنده , اعرف شكله وحالته , مو نفس الوضع الحين , شكله فيه شي ثاني ..

بس يارب لأ , ويكون بصحة وعافية

حتى يوم راحت قالت لي بيتعالج برا , ماقالت لي بابا شاللي فيه , حسيت اني بزر , مو معطيني قيمه واهتمام , وشدعوه يعني ماأدري .. ؟

طلال : يابنت الحلال , يمكن ماحبت تقول لك , يعني شدّة وتزول , ان كان شي بسيط وسهل علاجه , يعالجونه بعدين يقولون لك ..

ويمكن بتقول لك , بس تنتظر الوقت المناسب

يعني انتي الحين لا تشيلين هم , متى آخر مره كلمتي امك ؟

حلا : اليوم , وكلمت بابا بس حسيت من صوته انه مو اوكي ! والله خايفه , حاسه ان فيه شي

طلال : حلا , اول شي امسكي دموعك ولا تصيحين , لاني ماتحمل اكلم احد كذا , وما أعرف , يتشتت تركيزي

حلا مسكت نفسها وابتسمت : وشسوي طيب ؟ يعني بالذمه طلال وش بيكون شعورك لو عرفت ان احد من اهلك مخبي عليك شي يهمّك وله علاقه فيك ؟

طلال : معاك حق , قهر صراحه , بس انتي لا تضيقين خلقك عشان هالشي , لما تتأكدين ساعتها يصير خير ..

( وابتسم ) وقال : ابتسم واضحك , ومالك وللألم ..

وازرع البسمه على صحرا الرمال ..



كانت الايام تمر بسرعة .. لين صار بكره موعد وصول منيرة وزوجها محمد , وياخذون حلا وشوق عشان يرجعون للبيت ..

حلا وهي فرحانه ومتضايقة بنفس الوقت : والله ماني عارفه وشبسوي بدونكم , تعودت عليكم ..

منال وهي تتمكيج عشان تستقبل خالتها في بيتهم : والله حتى احنا تعودنا عليك , انتي الى الآن ماكشختي ؟ امك بتجي يللا البسي

حلا : طيب , بروح الحين ..

راحت حلا لبست واستعدت ..

لبست بنطلون جنز وتي شيرت وردي عليه رسومات بالأسود , فكت شعرها , وحطت مكياج خفيف .. طلع شكلها خيال

طلال كان مارّ , وشاف انعكاس حلا بمرايتها , لانها ما كانت مسكره الباب بالكامل ..

علطول راح غرفته , وحمد ربه انها ماكانت منتبهه ..

بس هذي اول مره يشوفها بدون عبايه وحجاب من اول ماجات عندهم ..

مذهله !
ماهي بس قصة حسن
رغم ان الحسن فيها بحد ذاته مشكلة

مذهله
كل شي فيها طبيعي ومو طبيعي
اجمل من الأخيله ..

طلال كان يمشي وباله مع المرايه اللي انصدم منها قبل شوي ..

شكلها غير .. غير !

أحلى بكثير .. !


مع انها لمحه وحده ..!

بس قدرت حلا فيها انها تاخذ قلب طلال , وتخليه عندها ..

ويحبها كل يوم زياده عن اول .. !

اول ماعرفها وجات بيتهم , كان يعتبرها اخته , وكان كل همه انه يسعدها وترتاح معاهم ..

لاشعورياً ..... صارت حلا همّه الوحيد .. !!

وهي الكل بالكل في هذا البيت ..!

نزل طلال للدور الاول من البيت .. شافه فاضي , طلع للحديقة وكانت امه جالسه هناك ..

قال طلال وهو يحب راس امه : متى بتجي خالتي ؟

عزيزة : بعد العشاء ان شاء الله

طلال وكأنه يبي يعرف شي : اجل البنات وينهم ؟ اشوفك قاعده لحالك ؟

عزيزة : الحين ينزلون , بس يلبسون , تعرف البنات حوستهم حوسه , يستعدون لمنيرة ..

طلال : اوكي ..

شوي ويجون البنات تحت , قالت حلا وهي تكلم منال :احدي ربك انتي استغفر الله اليوم كان عندنا كيمياء عملي , بس انواع الضحك , خلص وقت المحاضره والتجربه ماسويناها , ماندري شالموضوع والله نحوس على كيفنا

منال : حمد الله ماعندنا لا كيمياء ولا خرابيط

عزيزة : ماتخافون انتم من ذا الكيمياء والمحاليل ؟

حلا وهي تجلس على الكرسي وتضحك : لا خالتي مايخوف عادي , بس المشكله روائح المركبات والأحماض تجيب الصداع

طلال : ايه في هذي صادقة

نادت عزيزة طلال , وهمست في اذانه شي وابتسمت

طلال : تعالي حلا في شي نبغاك تشوفينه

حلا : وشو ؟

عزيزة : انتي روحي وتشوفين

طلال : تجون ؟

منال : ايه بس دقيقه

عزيزة : روحوا وحنا نلحقكم ..


( كانت عزيزة ملاحظه اهتمام طلال بحلا , وارتياح حلا لطلال .. طبعاً اعتبرته شي عادي , لانها عارفه ان في حدود بينهم ..

بعدين جات في بالها فكره , انها تقوّي العاقه بين طلال وحلا , يمكن تعجبه ويرضى يتزوجها , ولا اول يوم كانوا خاطبينها له , ماكان راضي لا فيها ولا باي احد ثاني .. )


مشى طلال مع حلا , وكانت تمشي وراه , قال طلال وهو يلتفت : ماحب احد يمشي وراي , خليك قدامي ..

حلا : ماحب احد يمشي وراي , خلك قدامي ..

ضحك طلال على هبال البنت ...

قالت حلا باستغراب : انت وين بتوديني ؟ ( كانوا ماشين جهة الحديقة الخلفية اللي بالبيت , وهذا المكان ماقد راحت له حلا من اول ماجات عندهم )

طلال بخبث وهو يفتح باب غرفة خلفية : احب اربي فيران واسوي عليهم تجارب , تعالي شوفيهم

حلا بخوف وهي ترجع على ورا : لأ , منت صاحي تبيني ادخل ؟

........ : طبعا , ابيك تشوفين اشكالهم يجننون ..

........ : وع مابي رح انت

طلال ضحك : امزح معاك , شوفي ( دخل وشغل اللمبة .. وكانت حلا واقفة عند الباب .. )

كان يضحك على وجه حلا وهي مستغربه من اللي شافته ..

كان معمل كيمياء صغييييير .. حق طلال .. لان تخصصه صيدله ..

قال طلال وهو يأشر بيده : مافي فيران , تعالي

حلا بعد تردد دخلت , قال طلال وهو يحوس بالدواليب : تبين تجربين .؟

حلا ببراءة هزت راسها وقالت : ممكن ؟

طلال بابتسامه تدوّخ : طبعا حنا جايبينك هنا عشان تجربين

حست حلا بفرحة مو طبيعية , مهما شكرت طلال واهله , ماتوفيهم حقهم ..

حطت يدينها على الطاوله وجلست تتأمل في الأشياء ..

قال طلال وهو يبتسم : كاشخين اليوم !

حلا ابتسمت بس مافهمت : نعم ؟

أشر طلال على جفنه وقال : الشدو , من جيتي ماشفناك تحطين .. حلو !

حلا طاح وجهها من الحيا وماردت عليه , اما هو اكتفى بابتسامة ..


صاروا يحوسون بالتجارب والمحاليل والزحمة ..

قال طلال بجدية : انكب على يدك ؟ اغسليه بسرعة ترا يدك يصير لونها اخضر بعدين

حلا صدقت وخافت وغسلت على طول : إه ياويلي ,,

طلال اللي كان يضحك لما التفتت عليه حلا , قال : ياحليلك تصدقين بسرعه ..

حلا : اوووووه لاتضحك علي

مر الوقت بدون ماتنتبه حلا انهم لحالهم مع بعض ..

دخلت عزيزة وقالت : ها وش عندكم ؟

طلال يمزح : يمه ابلشتنا ذي حاست الدنيا علينا ماهي عارفه تسوي شي

حلا : اسكت لا تكذب

ضحك طلال على برائتها وعفويتها , وقال وهو يطلع : بروح ابدل ملابسي واجي , لاتفجّرين المعمل علي

ضحكت حلا وقالت : بس تجي تلاقي المعمل في خبر كان

جلست عزيزة على الكرسي وصارت تسولف على حلا

راح طلال لغرفته , كان لابس برمودا جينز وبلوزة كحلي ماسكه على جسمه , بدل ملابسه ولبس ثوب عشان العزيمة , ضبط شعره وحط عطر وطلع




جلسوا كلهم مع بعض , ووصلوا محمد ومنيرة , وكان استقبال حار ..

قالت حلا وهي لازقة بأبوها : شخبارك بابا الحين ؟

محمد : والله الحمد لله

منيرة : ابلشتنا زي البزران كل شوي تسأل .. ها صدقتي ان ابوك بخير ؟

حلا وهي تحط راسها على كتف ابوها : أي صدقت

محمد : خلوها هذي دلوعتي ..

طلال يطالع في حلا ويبتسم على حركتها , حلا انحرجت ووخرت راسها

قام محمد وشال شوق من حضن امها وقال : تعالي حبيبتي انبسطتي عندهم ؟

شوق : ايه , هذا حلو .. ( وتأشر على طلال ) ..

( منال وعزيزة ماكانوا موجودين معاهم ..)

صار الوقت انهم يرجعون , ودخلت حلا الصالة تسلم على عزيزة ومنال ..

سلمت على عزيزة .. قالت عزيزة بحزن : والله تعودنا عليك يابنتي . كلها اسبوع بس والله ماحسينا فيه , ليتك تقعدين عندنا اكثر ..

منال اللي ضمت حلا بعد عزيزة : ايه ليتك والله

حلا بدموع : لا والله ماودي ازعجكم واضايقكم اكثر من كذا .. مع اني مدري شسوي الحين بدونكم اذا رجعت بيتنا

قال طلال وهو جاي ناحيتهم , وكانت منال معطته ظهرها .. ومبين حلا ودموعها تنزل .. : يا إلهي لا أستطيع أن أحتمل كل ذلك .. كم هي مؤلمة لحظات الفراق , هاهي دموعي تنسكب بكل حرقة ...

ضحكت حلا وسط دموعها وقالت : دبّ , والله من جد بشتاق لكم , ما أستهبل ..

ارخت يدينها منال بس حلا رجعت ضمتها مره ثانيه وقالت : والله اذا ماجيتوا زرتونا ترى انا اللي بجي ..

منال تضحك : طيب

طلال حط يدينه على خصره ويبتسم , قال وبعدين طلع لسانه : وأنا مالي ضمّه مثلهم ؟

عزيزة ضربته على ذراعه : استح على وجهك

طلال مات من الضحك على وجه حلا لأنها صدقت كلامه : امزح يمه من جدك انتي ؟ وانتي يالهبله بعد صدقتي ( يطالع حلا )

ابتسمت له حلا وقالت : مع السلامة طلال , مشكور , ومشكورين على كل شي

قرب منها طلال شوي وقال : لا شكر على واجب , نخدمك بعيوننا ..

( وشال شوق من يمها وحبها ) وقال وهو يطالع شوي في شوق وشوي في اختها : تعالي العبي عندنا كل يوم , طيب ؟

شوق قالت : ايه , اذا جات حلا انا اجي

عزيزة : حلا اوعديني اذا احتجتي شي وأهلك مو عندك ولا تحت أي ظرف , علطول اتصلي فينا او حتى تعالي . وارقامنا عندك , واي شي تبينه قولي لا تستحين ..

حلا : ان شاء الله خالتي ماتقصرون والله ..

وخطفت حلا نظرة اخيرة لطلال اللي كان واقف مبتسم وفي نفسها كان ودها تضمّه فعلاً .. لكن مستحيل طبعاً .. ,, وفتحت الباب ,طلعت بدون ماتلتفت مره ثانية , مسكت شوق بيدها وركبت السيارة ..

وتركت حلا دموعها تاخذ راحتها في السيارة ...

( حلا ) ..

كل الأوقات الحلوة ,, راحت !!

ابكي على فرقاهم ..

شي مضحك .. مع اني معاهم بنفس المدينة .. لكني بصراحة خايفة ..

خايفه ما أشوفهم كثير .. وما أقعد معاهم ..

أخاف يحطون حواجز بيننا ..

ما أضحك معاهم كثير وأسولف ..

في أسبوع واحد بس .. تغيرت أشياء كثيرة في حياتي ..

اولها .. أني لما اروح السوق , بشتري برقع أو نقاب .. !!


ناوية افرّح طلال .. بهالتغيير ..!

صحيح اني يمكن ماتغطى عنه هو لانه ولد خالتي واحسه قريب لي ,,

بس على الأقل .. ما أحس أنه متضايق مني اذا طلعت معاهم مكان ..

أحس ان اهلي مارح يخلونا نتقرب من بعض زياده ..

مجرد فترة قضيتها عندهم وانتهينا ..

لا ... ما أبي

ابي اصحى الصباح على وجه خالتي عزيزة وهي تبتسم ..

وأشرب الشاهي على نفس الطاولة اللي يجلس عليها طلال , وجمبه منال .. !

أبي اضحك واسولف مع طلال وهو يوصلني الجامعة , ويجيبني منها ..

طماعه ؟ طيب .. على الأقل يوصلني بس .. !!

بفتقد هذي الأيام كثير ..

أيام ماكان طلال يجي ياخذ شوق مني ويلعب معاها عشان أرسم ( تجربة ) أو أحل ( مسأله ) .. أو أحفظ ( قاعده) ..

وأحيان كان يقعد جمبي ويحلّ معاي ..

ويعلّمني ..

مازلت اتذكر معمل الكيمياء الصغير .. !!

والفوضى اللي سبتتها هناك ..

وحديقتهم الصغيرة ..

اللي كنا نتناوب على سقايتها انا ومنال ,, وطبعا طلال ..

ومرات .. كنا نرش المويه على بعض ..



فجأه ... لقيت طلال يتربع على ذكرياتي كلها ,, وتدور حوله أغلبها ..

لأنني ببساطه .. ماكان لي أي احتكاك بهذا النوع من الناس ..

اقصد ( الجنس الآخر ) ..

!!

أو يمكن لأن شخصيته مميزة وحلوه .. ؟

أو يمكن لأنه عاملني بطريقة ماقد عاملني أحد فيها ؟؟

أو لأن عيونه بس .. فيها حنان ودفى العالم كله ..

وقلبه أكبر قلب عرفته ..

ووجوده حولي .. يحسسني بأمان .. مع أني احس دائما بارتباك وحراره ..

أو عشان ابتسامته تحسسني ان الدنيا بخير ..

ما أدري .. !


أف .. كل هذا استنتجته بأسبوع ..؟

صدق اني هبله ..!!

افا ولا رد معقوله القصه ماعجبتكم بس راح انزل بارت كمان لاني متاكده انو القصه راح تعجبكم لانها بصراحه رووووووووووووعه

الجزء الخامس ..



وصلت حلا البيت وخلقها ضايق .. رمت نفسها ع السرير ودها تنام ,, بس ضلت الأفكار والذكريات تتزاحم في بالها ..

دخلت شوق وقالت : حلا , ليش مانلوح عند مشاوي .؟

سمعت حلا الأسم , وابتسمت ,, تذكرت مشاري الموظف اللي في المستشفى ,,

مع انها ماقدرت تتذكر ملامحه زين .. لكنه ظل في بالها دقيقتين ..

قالت حلا في نفسها : وش اللي جابه في بالها الحين ..

شوق : بس طلال احسن منه

ضحكت حلا .. طبعاً طلال احسن ,, طبعاً ..

مافي مجال للمقارنه بينهم أساساً ..

مافي مجال للمقارنة بين طلال واي احد ثاني ..

لانه في كل مره , بترجح كفة طلال ..

وبيكون هو الأحسن والأفضل والأجمل ..

في عيني أنا على الأقل ...!!

يؤ يؤ يؤ ..!

حلا اسمعي نفسك

وش قاعده تقولين .. ؟

صدق انك انهبلتي ..

ضحكت حلا اكثر على نفسها بعدين خذت جوالها واتصلت على غدير ..

حلا : هلا بالعروس .. شخبارك ؟

غدير تضحك : انا تمام , وانتي شدي حيلك عشان تصيرين عروس مثلي

....... : تقولين شدي حيلك كنّه دراسة أو اختبار , لا ..! تكفين , فكيني من هالسالفة ..

........ : والله من جدي , ترا فيصل عنده اخو اصغر منه بسنه , واذا بغيتي اضبط لك الموضوع

......... : هاي انتي ! وش شايفتني عانس ولاداقه اطلب منك رقم خطابة ؟

......... تضحك : لا يعني بس قلت لو ناخذ اخوان عشان نظل قريبين من بعض ..

......... بمزح : لا ! انا ابي فيصل !

.......... بعصبية : نعم ! لا ياماما فيصل حقي . انتي دوري لك واحد ثاني

......... : يالخاينه , وين ايام الثانوي تقولين انا وانتي مانتزوج الا واحد ويسكننا حتى بشقة وحده , هذي الصداقة اللي تعرفينها , طلعتي أي كلام ..!

......... : اوه هذي من جدها صدقت , شوفي لك كل شي تبينه ... الا فيصل . .. ( وتغيظها بنبرة صوتها ) لأ يعني لأ ..

....... : احسن خلي فيصلك لك وععععععععععع من زينه , طلا.. ( بتقول طلال احلى بس ماكملت )

....... وكأنها استنتجت شي : ايه وشفيه طلال ؟

........... : انا ما قلت طلال اصلا

........... : حلااااااااااااااااااا لا تنرفزيني , قلتي طلال

.......... : دبّه , ماقلت ..

......... : طيب خلاص ماقلتي , غيري الموضوع

حلا تعاندها : طلال احلى من فيصل بمليون وعشر طعشر مره !

غدير : الشرهه علي انا اللي اوريك صورته ..

حلا : احسن تستاهلين

غدير : طيب قولي يللا وشصار معاك ..

ضحكت حلا بعفوية على غدير اللي مهتمه تعرف السالفة ومانستها ..

طيب .. اسمعي ..

وقلت السالفه لغدير اللي بدورها قالت قصتها مع فيصل وحددت موعد للملكة ..

قالت بعدها ,, وحسيتها صادقه في كلامها : احس انك مارح تنقطعين عنهم , بالعكس تقوى علاقتك فيهم اكثر , بأي طريقة كانت ..

استغربت من جملتها الأخيره وقلت : كيف بأي طريقة يعني ؟

قالت بتهرب من الإجابه : لا , قصدت يعني .. باي طريقة يعني .. مدري خلاص مدري

قلت انا : دببببببببّه والله انك بايخه , فهمت قصدك اصلا , لا تفرحين ماقد فكرت في هالشي

ماصار لي معاهم اسبوع اصلا ..


قالت غدير وهي تصر على كلامها : تحبينه , والله انك تحبينه ..

قلت وبكل ثقه : أي احبه , بس مافكرت بفكرتك هذي .

قالت غدير وحسيت بالتأكيد في كلامها : يعني طول المده اللي قعدتي فيها عندهم , ماتخيلتي ولو مره , انك تتزوجينه او على الاقل تنخطبين له ؟

انا بكل تأكيد واصرار نبع من قلبي : منتيب صاحية , لا طبعاً , صحيح اني افكر في طلال كثير .. واحبه ,, بس ما أعرف نوع الحب اللي بيني وبينه .. ولا فكرت اصلا او تخيلت ..

قالت بكل هدوء : طيب وش فيك عصبتي ؟ ترا مو عيب ولا حرام انك تفكرين او تتخيلين في شي زي كذا ..

قلت انا وبين في صوتي ضيقة الخلق : يعتبرني اخته , او يمكن حتى بنته .. احس عطف في تعامله , مو اكثر من كذا ..

قالت غدير وحسيتها تتحدى : طيب , الأيام تثبت لك ولي هالشي , وبتقولين غدير قالت ..

توّني بكمل كلامي .. قالت لي غدير باستعجال : حلا اكلمك بعدين .. معاي خط

قلت بمكر : مييييييين ؟

قالت بعصبيه وسكرت بعدها : انقلعي اكيد فيصل ولا ماكا ن صرفتك , باي

ياحليلها غدير ,, ودي اشوف وجهها وهي تكلّمه .. احسّ انها متخبّيه تحت السرير أو ورا الباب ..

ماودي اضحك ,, اكيد انا بلوتي أكبر لو أني بمكانها .. !!


بعد ايام ..

صحيت بدري ,, بديت اروح الجامعة بالباص ..

كنت اروح معاه احيانا بداية السنة .. بعدين بطّلت ..

ليه غيرت رايي الحين ؟

مادري .. منال بنت خالتي تروح بالباص .. بس الفترة اللي قضيتها عندهم كان يودينا اخوها عشان ما أصير بلحالي معاه ..

احم , مبيّنة التصريفة ؟

طيب خلاص ..

رحت مع الباص عشان طلال !



كان يقول ان الباص أحسن ,, ويصير معاك جماعه ومو بلحالك .. ويعوّد الناس على الإلتزام بالوقت والمواعيد ..

مع اني ادري مايهمّه اقتنعت بكلامه ولا لا ..

بس ..


سمعاً وطاعه طلال ..!


ركبت الباص وطبعاً تلفت على كرسي فاضي .. ماحب اقعد جمب احد الا اذا كنت اعرفه ..

مافي سبب كبير .. بس في بنات ملاقيف ,, عينهم عليك طول ماهم قاعدين .. مايمديك تكتبين مسج ولا تقرين شي , حطوا عيونهم عليك ..

كالعادة ,, سندت راسي على الشباك ..

سرحت وأنا أتأمل ( الرايح والجاي ) .. السيارات والناس , وأحاول أحفظ الطريق اللي صار لي شهرين أشوفه وكني أول مره أشوف شوارعه ومبانيه ..

اعتقد انها ميزه تخص الرجال ... !

ماشاء الله عليهم

من اول مره يروحون مكان .. يحفظون الطريق علطول ..

او ان انا مخي مايهتم بهذي الأشياء .. !

الحمد لله ان الحريم مايسوقون سيارات ..

وخاصة أنا ..

اللي مداومه في صحارى مول , ومادري الى الأن في أي شارع هو .. !



المهم .. وقف الباص .. !

كنت اظن انه تعطّل , بس يوم صحيت من غفوتي البسيطه ,, شفت بوابة الجامعة .. !

وصلنا بهالسرعه ..؟

فعلاً ما أحس بالوقت لما أدخل (عالم افكاري ) ..

دخلت وشلت عبايتي ..

كنت امشي في طريقي للكافتيريا , اللي التقي فيه بالبنات دايما ..

رن جوالي , وذكرني اني ماحطيته عالسايلنت ..

كانت منال ..

رديت بمرح : يالله صباح خير , نعم وش هالازعاج ؟

قالت منال : شفتي شلون ! ماقدر اصبر عنك

انا : هههههههههههههههههه تكفين عاد

منال : انتي بالجامعه ؟

انا : لا نايمه بالبيت

ضحكت على منال اللي شكلها مافهمت المزحه : تستهبلين ؟

قلت : طبعا , وشلون نايمة واكلمك ؟

ضحكت منال على غبائها : طيب , وش اخبارك ؟

...... : تمام الحمد لله , انتي كيفك ؟

...... :تمام

.......: منال , لا تقولين مو جايين بيتنا الاربعاء هذا , ترا كل يوم تأجلون .!

....... : لا ان شاء الله بنجي ..

قلت بفرحه ,, واعتقد اني صرخت لان البنات اللي كانوا يمشون حولي ,, كلهم التفتوا علي ..

: قولي والله !

انحرجت وابتسمت , وبعدت عنهم شوي قلت باهتمام : وطلال .. بيجي معكم ؟

قالت منال بعد تفكير قصير : مادري , ماتوقع ..

...... : مو على كيفه , لازم يجي !

قلتها بحماس , واعتقد ان منال استغربت من جملتي وقالت : طيب ..! بقول له , وان شاء الله يوافق ..

قلت باحراج : طيب .. ردّي علي ..

....... : اوكي .. يمكن ادق عليك المغرب لان عندي تأخير اليوم ..

.حاولت ارقّع واصرّف .. قلت وانا فيني الضحكة : ايه ترا شوق أبلشتنا في البيت , كل يوم تسأل متى يجي طلال

حسيت ان السالفه ما مشت على منال , بس وشسوي , قالت : ياحليلها , أي والله طلال يحبها ,,



وأنا طيب ؟ تراي حبوبه وحليوه .. وخفيفة دم .. والناس يحبوني ,, ليه شوق بس .. ؟

قلت بمزحه : الله يهني سعيد بسعيده ,, يالله انا وصلت عند البنات , انتظر اتصالك المغرب

قالت منال وهي تضحك , حسيتها تتخيل شوق وطلال : يللا مع السلامه ..

سكرت منها ,, ومسكت الجوال بيدي .. وضحكت ضحكه وانا منزله راسي , عشان ماينتبهون البنات ..

الحين يقولون خبله ..! تضحك بلحالها ..

تخيلوا وحده كذا تمشي تتذكر اشياء وتضحك .. !


اوه وين راحوا البنات .. ؟

رفعت لي وحده منهم يدها , ورحت لعندهم ..

قالت وحده منهم : مضيعة انتي اليوم .. !

قالت الثانيه : ماتدرون شالسالفه , حلا لابسه نظارات , يمكن عشان ماتشوف !

قلت وانا ارفع نظارت الشمسية , واجلس على الكرسي : بااااايخه مايضحك ..

الكل ضحك ,, عداي انا ..

قالت نوره : الله يعين , شكلها حقدت علينا ..

.... : لا ماحقدت , تذكرت ان عندي كيمياء , ودكتورتنا تجيب المغص , مغروره وماتفهّم شي

( ويوم قلت كيميا , تذكرت طلال ,, وابتسمت )

قالت وحده منهم : الحمد لله , قبل شوي مكشّره والحين تبتسم !

ضحكت على نفسي وانا اطلع محفظتي بروح الكافتيريا : اقوم اجيب لي فطور اصرف ..


بعدها ...

طلعت من المحاضره الغثيثه , ورحت ادور على غدير , ابي اقول لها عن مكالمة منال , ماني قادرة اصبر .. !

: الو , غدير يادبّيه وينك فيه ابغاك

غدير بصوت تعبان وكأن مالها خلق : انا في مبنى 21 , تعالي لي

..... : اف حرام عليك بعيد . مالي خلق امشي

.... : اجل اقعدي مكانك !

..... : نعم ! لأ بجي , عندي سالفه لك ..

..... : اجل بلا كسل , انا ماني قايمه , عندي محاضره بعد ربع ساعه بنفس المبنى , تعالي بسرعه

..... : طيب انا جايه , وتلفّتي حولك على مكنسه ولا عصا , عشان اذا جيت تصفعيني فيها !

عليك أخلاق تجاريه غدير ..


قالت غدير : اوه ! نعسانه ,, انتي تعالي بس !

وسكرت منها وانا امشي لعندها ..

دخلت المبنى , وشفتها جالسه تحوس بجوالها , وقفت قبالها وقلت : خير ؟

رفعت راسها باستغراب : وشو ؟

..... : وش عندك قاعده عند المصعد ؟ تشحذين ؟

..... : المبنى هذا دايم مليان , ومافي مكان ..!

تربعت قبالها وقلت السالفه , وتوني مخلصه , ضحكت غدير ,, وضحكه حسستني ان تصريفاتي لمنال من جد بايخه ومضحكه ....

قلت بترجي : قولي يارب يجي معهم

قالت وهي تفرك عيونها : احسب عندك سالفه , قومي على محاضرتك لا تشوتك الدكتوره !

..... : اوووه طيب انتي وش تتوقعين انتبهت منال ولا لا ؟

..... : البزران ماتمشي عليهم ياحلوه .. كيف منال .. ( وقالت حسيتها تبي تخوفني ) : الحين بتقول لطلال وبتطلعين مطفوقه قدامه

شفت الساعه .. وكان باقي 5 دقايق على المحاضره , قمت واقفه ,, وخذت الملزمه اللي بحضن غدير , وطقيتها بخفيف على راسها وقلت بعصبية : والله مقابل وجه الدكتورة سعيدة اصرف من مقابل وجهك وانتي تستهبلين ..


وصلت البيت .. ومادري ليه كنت كل شوي اطالع بالجوال .. انتظر منال تتصل , مع انها قالت لي مارح تتصل قبل المغرب ..

طبعا مافي وقت انام .. المطبخ وأمي ينتظروني عشان عزيمة اليوم .. اقوم ابدل ملابسي وانزل تحت احسن لي ..




الوقت يمر .. والمغرب اذن .. راحت حلا صلت وبدلت ملابسها .. مسكت جوالها وجلست على السرير .. محتاره تدق هي على منال ولا لأ .. !

اخر شي قررت انها ماتدق ...

بعد فترة .. وصلوا الضيوف .. عزيزة ومنال .. و ................طلال ..!


جلس طلال 5 دقايق بعدها استأذن ..

ماحبّ انه يطول عندهم عشان تاخذ حلا راحتها ..

طلع وراح يتمشى ,, وقضوا الاربعة احلى اوقات مع بعض .. وحلا مبسوطة بس كان ودها ان طلال يكون معاهم ..

صحيح انه مايجلس معاهم كثير لانه يبيها تاخذ راحتها , بس كانت الاوقات اللي يكون فيها موجود .. من احلى الاوقات .. وامتعها ..

قالت منيرة وهي تكلم حلا : قومي البسي عبايتك , الحين بيجي طلال بياخذ اهله , وروحي المطبخ جهزي كاسة عصير عشان اذا جا ..

حلا وهي بتنط من الفرحة لان طلال بيرجع : ان شاء الله

راحت حلا وجهزت الصينية وطلال دخل المجلس وارتاح على الكنبة في الوقت اللي كانوا عزيزة ومنال يلبسون عباياتهم ..

دخلت حلا ووقفت من بعيد .. وحطت الصينية من بعيد برضو .. وقالت : تفضل طلال ..

طلال : يزيد فضلك مشكوره .. ( وابتسم ابتسامه خلت حلا تلتفت على منال ) وتصرّف وتغير الموضوع : عاد لاتقطعون عنا تعالوا دايم

منيرة : أي والله ماودنا ننقطع مره عليكم ومره علينا .. الله يعينكم عاد ( وتضحك )

عزيزة تضحك : والله حياكم الله باي وقت , انا مدري ليه حنا من زمان قاطعين , خلاص ا شاء الله المره الجاية علينا احنا

منيرة : ان شاء الله

سكتت عزيزة شوي بعدين ابتسمت وطالعت في حلا وقالت : ليه مانلم الشمل , وناخذ حلا لطلال , ويصير مانقطع ابد .. وشرايك .. ؟

الكل سكت وعيونهم على اثنين .. حلا .. وطلال .. في انتظار ردّة فعلهم ..!!



















ها ,, رايكم وتوقعاتكم وتعليقاتكم .. بليز ..!!

الله يخليك بســــــــــــــــرعه كملها لاني متحمسه مره

واتمنى انك تنزلها كامله عشان ما نجلس اشهور واحنا نقراها

و شـــــــــــــكرآ