|
| |||||||
 |  | |
 |  |  |
 |
| | أدوات الموضوع | طريقة عرض الموضوع |
02-09-2008, 12:49 AM
| ||||
| ||||
 رواية:الدنيا قاسية..للكاتبة:طيبة القلب..رواية روووعة.. *×*×*×* الـــــدنــــيــا قــــااااااااســــيـــــة *×*×*×* للكاتبة : طيبــــــــة القلــــــــــب دق الجرس .. ليعلن نهاية المطاف .. نهاية المسيرة.. ليعلن بدء لحظة من أصعب اللحظات في حياتي .. لحظة تدمع عيني .. وتجرح قلب .. ويهتز لها وجداني .. لحظة واحدة .. أتمنى أن تطول ولكن محال فيالها من لحظة تشعرني بالحزن والشجن فأردت أن اتخذ قلبي صندوقا لحفظ ذكرياتي.. فلا يستطيع الزمان أن يمحو ذكرياتي وأحزاني... ما بين البداية والنهاية رواية صعبة وحياة مؤلمة وأبطال جرحى وأماني لا تنتهي !! ********************************************* ***===== الجزء الأول =====*** اليوم : الجمعة الوقت : الساعة11.45 صباحاً المكان : في بيت أبو سلطان " غرفة موزة " في زمانك محد" يشيل همك " لا أخوك لا رفيقك لا صديقك ما تهم اللي يهمك! في زمانك لو بغيت تعيش صح ... صل فرضك .. واقبض أرضك .. وحب اللي يحبك .. خلك قنوع .. خلك صبور .. خلك حريص .. لا تسال اللى عن ما سأل عنك .. وهذي " نصيحه مني " ..... . الحين بتقولون شووو سالفتها هالبنت ؟؟!! أنا بخبركم عن نفسي أنا موزة وعمري 19 سنة وأدرس في الجامعة " هندسة معمارية " وخذيت التخصص بالقوة بعد طلعت الروح أبوية ماكان معترض بس أخوية سلطان معترض عن فكرة التخصص لأنه يفكر وين بشتغل بعدين لأن التخصص تخصص شباب على قولته ومنقود البنت تدخل هذي التخصصات بعد أقناعه وافق إني أدش التخصص .. بس الصراحه الهندسة يبالها .. أما على المقولة اللي قلتها قبل ما أبدأ حديثي معاكم .. هذي الكلمات أثرت فيني وايد كلمات معبرة ومقنعة في نفس الوقت .. مثل ماتشوفون عايشين في زمان ماأعرف كيف أوصفه لكم بس الأفضل أن يكون " كلن بحاله " أنا ماأعرف أشفيني أتفلسف عليكم من صباح الله خير .. شليت المدخن بإيدي وسرت حجرة أخوية سلطان ودشيت بدون ما أدق الباب الباب كان شوي مفتوح دشيت وحصلت سلطان يالس يعدل غترته لأنه بروح يصلي الجمعة موزة : السلام عليييييييييكم سلطان لف صوبي ورد يطالع شكله في المنظره : وعليييييكم السلام موزة : تبا دخون ولا لاه سلطان : خلي المدخن وسيري برايج إذا عندج شغله خليت المدخن على التسريحه " التواليت " وطلعت وسكرت الباب ورايه رديت حجرتيه ولبست شيلتيه وتعطرت وبندت الليت ونزلت تحت وإلا باب الصاله ينفتح وتدخل من خلود أختيه وأنا نازله من الدري موزة : هلااااااااااااا والله خلود : أهلين أشحالج تقربت منها وتخاشمت وياها : الحمدلله انت اشحالج خلود : الحمدلله تتصدد خلود يمين ويسار : وينهم أهل البيت موزة : اشدراني اضني امايه في المطبخ وحمد وخالد ماتشوفينهم منسدحين على التلفزيون تلف خلود الجهة الثانية وتشوف خالد وحمد منسدحين على التلفزيون ومندمجين وترد صوبي خلود : ليششش خوانج مايسلمون موزة : ههههههههه تراهم اخوانج بعد لاتنسين خلود : خالد حمد ليش ماتسلمون يرد عليها حمد ويأشر بإيده : بعدين بعدين بسلم خليه يخلص المسلسل خلود : أعوذ بالله كل ماادش البيت ماشيء غير هالمسلسل في التلفزيون 24 ساعه اطالعونه موزة : صار ادمان عليه مية مرة يشوفون الحلقة ولا بعد يندمجون مع الحلقه يقول اول مرة يشوفونها ههههههههه حتى ابويه صار يطالعهم اليوم : الجمعة الوقت : الساعة11.50 صباحاً المكان : في بيت أبو سلطان " غرفة سلطان " الحين يا الدور عليه أنا " الله يسلمكم " سلطان وعمري حالياً 24 سنة وأشتغل في بوظبي بس مشكلتي أني ما أحب أيسل في بوظبي بروحي لذلك فضلت أني أخذ لي درب من بوظبي للعين على الأقل أكون مرتاح هنيه بين أهلي .. صح أن الدرب طويل نوعاً ما بس شو أسوي حاولت أحول دوامي العين بس ماشيء فايدة ميبسين روسهم فيني .. لا والمشكلة بأن ربعي كلهم في العين دواماتهم لو حد منهم ويايه في بوظبي جان أنحلت المشكلة بناخذنا شقة وبنبات هناك ؟؟!! .. فأنا عن نفسي ما أقدر أعيش في بيت بروحي بدون أهلي أو أي حد يونسني شليت المدخن في إيدي وقربته مني وبحركة سريعة تدخنت ورجعت المدخن لمكانه ورفعت إيدي أشوف الساعة .. خيبه تأخرت عن الصلاة شليت تلفوني وخليته في الجرج وخليت بوكي في مخبايه وطلعت من حجرتيه وأنا نازل شفت البشكارة شاله ملابس بتوديهن الحجرة فقلت لها طلعي المدخن من الحجرة شفت أختيه " خلود " تسلم على أمايه الظاهر أنها توها يايه وشفت موزة يالسه تعقم كندوة خالد " 4 سنوات " وحمد " 8 سنوات " يطالع التلفزيون سلطان : السلام عليكم خلود : وعليكم السلام هلا سلطان اشحالك تقربت من خلود " وايهتها " : بخير ربي يعافيج أنت أشحالج خلود : الحمد لله سلطان : قرب عبدالله خلود : لا لا نزلني وسار المسيد يصلي سلطان : اهااااا انزين بسير بيت يدوه يتغدنا ويانا خلود : لا بتغدا ويا أهله سلطان : خلاص عيل لفيت صوب خالد وأشرت له بيدي عشان إيي صوبي لأن تأخرنا عن خطبة الجمعة أم سلطان : يالله حمد قوم بسك من التلفزيون سلطان : أمايه أبويه وين أم سلطان : أبوك خطف عليه عمك أبو سعيد وساروا رباعه المسيد وبعدين بسيرون بيت يدتك وانت من تخلص الصلاة خطف علينا عشان نسير عندهم سلطان : مافيني أرد البيت أنا بصلي بالمسيد اللي عدال بيت قوم يدوه أنتن يالله قومن الحين بخطفكن على دربي أم سلطان لفت صوب موزة : موزة عيل قولي للبشكارة تخلي الغدا في السيارة وزقري أختج لطيفة " عمرها 14 سنة " من فوق موزة : إن شالله أماية سلطان : هاتي تلفوني بتلقينه في الجرج .. بخليه في جراجة السيارة اليوم : الجمعة الوقت : الساعة 12.3 صباحاً المكان : في بيت أبو سلطان " خلود " أنا أختهم بس مش الكبيرة سلطان أكبر عني بسنة وأنا متزوجه ولد عمي " عبدالله وعمره 26 سنة " عاد سالفتيه ويا عبدالله سالفة الله يسلمكم في ليلة عرسي " المشؤوم " أستوت ضرابة عشان سالفه التصوير بالتلفونات في العرس لأن خالات عبدالله كانت كل وحده ماسكه تلفونها وتصور ووصلت لأبويه وعمي وأخترب العرس ومن ذاك اليوم وأم عبدالله حالفة ما أطيح بيت أهليه ولا بيت يدوه اللي هيه " عمتها " أم ريلها .. وعمي اللي هو " أبو عبدالله " شوره بيد حرمته هيه تفصل وهو يلبس ماعنده أي مانع .. وبعد ماكملت مع ريلي سنة أنجلبت حياتي فوق تحت عمتيه تعاملني أسوأ معاملة وايد تظلمني وأنا حليلي على نياتي ما أرمس ولا أشتكي .. وعبدالله يعرف بكل اللي تسويه أمه فيني ومع هذا ساكت مايقدر يواجها .. ومع هذا كله أنا متحمله عذابي بس عشان خاطر ريلي اللي مقدرني ومامخلني أحتاج لأي شيء ؟؟ بس شو أقول غير إني : " تعلمت أزيف ضحكتي والقلوب أسرار على إني بخير بعين من يجهل أحزاني " يوم سألني سلطان عن عبدالله أنه بتغدا ويانا في بيت يدوه ولا لاه حزت في خاطريه ليش ريلي مايسلم على عمومته ولا أهلي أنزين أمه حالفة ما أطب البيت هو شو يخصة بحلفتها بس لأن عبدالله يخاف أمه تزعل عليه ولو زعلت ماأدري شو ممكن يستوي ؟؟!! اليوم : الجمعة الوقت : الساعة 12.5 صباحاً المكان : في بيت أبو سعيد " راشد " " الله يسلمكم " أنا راشد وعمري 22 سنة وأخواني سالم وخلفان " أبو سلطان " ومحمد " أبو سعيد " ومبارك " أبو عبدالله " وماعندي خوات ،، أدرس في كلية الشرطة كنت طالع من البيت وماسك تلفوني بيدي يالس أدق على سيف ولد أخويه مبارك ومايرد .. لا والمشكلة أخويه سالم في السيارة يترياني أنسير نصلي صلاة الجمعة وأنا متعود كل جمعة سيف يخطف علية ونسير نصلي رباعه ونرد نتغدا في بيتنا بس اليوم ما أدري شو سالفتة هالريال ما يرد على تلفونه .. ركبت السيارة ولا حتى عبرة أخويه اللي من ساعة يترياني في ظربة الشمس سالم : أنت أبد مافيك مذهب ياخي قول أخويه الكبير فضيحه من ساعة يترياني في الشمس راشد خليت تلفوني على طرف ولفيت صوب سالم : السموحه بس تدري سيارتي في الكراج وسيف مايرد على تلفونه سالم : وأنا شو ذنبي اترياك ساعة للين ماتلبس حشا لو بعدك حرمة مايلست هالكثر راشد : أنت تدري أني ثجيل في رقادي شو أسوي سالم سكت ومارد على كلامي وشغل سيارته وتوه بريوس السيارة إلا بسيارة سلطان توقف ورا سيارته ونزنا كلنا نسلم على سلطان وحرمة أخويه تقرب سالم قبلي وسلم على سلطان وسار صوب حرمة أخوية وبناتها وتقربت من سلطان وبعد السلامات والكلام الفاضي ركب سلطان ويانا في السيارة وأخوه حمد وخالد وبنات أخويه وأمهن دخلن البيت اليوم : الجمعة الوقت : الساعة 12.55 الظهر المكان : في بيت أبو سعيد " شمة " أنا شمة وعمري " 18 سنة " أولى جامعة .. وعندي أخو أكبر مني واللي هو سعيد وعمره 21 سنة ونورة وعمرها 13 سنه .. بعد ماصلينا أنا وموزة بنت عمي سرنا المطبخ ننقل الغدا لغرفة الطعام الرئيسية اللي صوب الميلس .. موزة : أقول سيف بتغدا عندكم شمة : لييييش تسألين؟؟!! موزة : وياراسج لاتفهميني غلط ؟؟!! شمة : ماأدري مايانا اليوم موزة : أووووووووووف شمة : أشفيج ؟؟!! موزة : مافيني شيء بس هذا الولد ماأحبه شمة : حرااااام عليج والله أنه فنان وغير عن كل أخوانه حتى إنه أحسن عن عبدالله ريل خلود بواااااايد موزة : مايهمني بس تعرفين عاداتنا وتقاليدنا عيب الوحده تطلع جدام عيال عمها شمة : عااادي حبيبتي أنا أطلع عيل جدامه وأنت اطلعين جدام سعيد موزة : أنت متعوده على سيف لأنه أربع وعشرين ساعة عندكم في البيت ومرات يبات عندكم ،،أما سعيد فتعرفين أنه متربين ويا بعض من كنا صغار وسعيد مثل أخويه والكل يدري أنه مستحيل يكون بينا غير الأخوه شمة : هههههههه عادي حبيبتي يستوي ريلج في المستقبل موزة : لا مايجوز كيف يستوي ريلي ونحن مثل الأخوان شمة : كيف أخوان بالله عليج لا راضعين ويا بعض ولاشيء موزة : لاتحاولين تجذبين على عمرج وأنا مافكر أخذ حد من أهلي وخاصة عيال العم على قولتهم " روح بعيد وتعال سالم " " احم احم احم " كلنا لفينا ورانا ياترى منو صاحب الصوت ؟؟!! موزة : الله ياخذك طيحت قلبي فقت ويهك راشد : فقت ويهج أنت !! شو يالسات تقولن جني سمعت كلمة بالغلط ؟؟!! شمة أطالع موزة ؟؟!!! شمة : شو قلنا ماقلنا شيء أنسوالف عن الجامعة رادش : امممم الجامعة ؟؟ شو ياب طاري " روح بعيد وتعال سالم " موزة : مشكلة عندنا في الجامعة عشان الإمتحان راشد : اهاااا عشان الإمتحان أنزين يالله يالله طلعن برع سيف واقف برع بدش داخل شمة من سمعت إسم سيف لفت صوب موزة ؟؟!! موزة تغشت بشيلتها ومشت بكل هدوء وطلعت ولحقتها شمة موزة خطفت جدام سيف : السلام عليكم سيف : وعليكم السلام شمة : قرب قرب سيف البيت بيتك اليوم : الجمعة الوقت : الساعة 12.55 صباحاً المكان : في بيت أبو سعيد " خلود " رفعت إيدي بعد ماخلصت من صلاتي ودعيت ربي : (اللهم أنت السلام ومنك السلام تباركت يا ذا الجلال والإكرام .. ) ( يالله يا مستجيب لدعوة الداعي .. يا الواحد الذي جميع الخلق يرجونه.. . أرجيك وأدعيك وأنا ساجدة وقائمة .. تحفظ لي زوج وتجعله راضي علي وحببني في قلبه كما حببته لي في قلبي يارب العالمين .. ) لفيت السجادة وخليتها على الكرسي وعقيت شيلة الصلاة ولبست شيلتي .. وطلعت من حجرة يدوه وسرت عندهم في الصالة أم سعيد : خلود تعال تغدي خلود لفيت على يالسين اللي هم " أم سعيد وأماية ويدوه ولطيفة يالسه تقرأ الجريدة وعدالها نورة تسولف مع خالد .. وشمة وموزة يالسات يتغدن " أم سلطان : خلود فديتج أشفيج خلود : لا لا أمايه مافيني شيء تقربت منهم ويلست عدال يدوه . يدوه خلت إيدها على راسي ومستحته وقالت : الله يوفقج يابنتي ويرزقج العيال أم سلطان : انشالله من يابت يدوه طاري العيال تجمع كل الدم في ويهي وحسيت جسمي حار تذكرت كل اللي صار فيني بسبة العيال ؟؟؟ حاولت أبين أني طبيعية مافيني أي شيء ؟؟!! حاوت أتصنع الضحكه مع أنها طالعه مب من الخاطر ؟؟ حسيت قلبي يعورني وجسمي يرتجف وقلبي يدق بقو وبصوت عالي حتى شكيت أن يدوه تسمع دقات قلبي من كثر ماهو يدق ؟؟ حاولت أبلع شيء من الأكل بس مب قادره أبلعه أحسه يوقف ولايطيع ينزل .. صبيت لي كوب عصير وقمت أم سعيد : خلود ماتغديتي خلود : شبعانه إلا الساعه 11 متريقه والحين ماأشتهي شيء شليت عمري وسرت يلست على طرف في الصالة لأني إذا سرت داخل خفت يشكون فيني ويقولون البنت شيء فيها ؟؟!! اليوم : الجمعة الوقت : الساعة 1.25 الظهر المكان : في بيت أبو سعيد " موزة " من دخلت خلود الصالة وأنا حاسة أنها فيها شيء ؟؟!! ومن يابت أمايه طاري العيال ويها أعتفس ؟؟ ياربي أشفيها هالبنت وايد أحسها مضايجه وشاله هموم الدنيا كلها على راسها .. أوهووووو أنا بروحي مصيبتي أكبر مني ؟؟ الحين عمي راشد شو بقول عني ؟؟!! بقول البنت مب مأدبة وتطري الرياييل ومافيها سنع وأبوها ماعرف يربيها ؟؟ لااااا أبويه مربيني ومربي أخواني أحسن تربية وماقصر في تربيتنا بس هاي شمة اللي فتحت السالفة وخبصت من عندها هي شو عليها عمي راشد عاذرنها أما أنا شووو بقول عني ؟؟!! لازم أتأكد إذا سمع السالفة ولا لاه ؟؟!! بس كيف أسأله قوية الصراحه ؟؟ اشحلاتني وأنا أسأله بقول هالبنت مرة عينها قوية وماتستحي على ويها ؟؟ أوووف أنا ماأحب حد يرمس عني وفي تربيتي أو حد يفهم قصدي غلط ؟؟ كنت سرحانه في عالم مشكلتي ماحسيت إلا بشمة تقرصني عشان نقوم داخل لأن عمي راشد وسيف بدخلون الصالة .. لأن سيف بسلم على يدوه ماشافها اليوم ؟؟ قمت من مكاني وسرنا صوب المطبخ التحضيري عشان نغسل إيدينا .. شمة : موزة أشفيج موزة : شمة الله يخليج سكتي عني الحين مافيني حد يسمعني إذا رمست بعدين بتفاهم وياج باللي صار شمة سكتت عني غسلت إيدينها وسارت صوب الثلاجه تشرب ماي أما أنا شفت خلود داشه لمطبخ شاله الكوبات بتغسلهن فأستغليت الفرصة عشان أسألها أشفيها ؟؟!! وشو اللي غيرها فجأة !! ـــــــــــــ واتمنى تكون عجبتكم..ابغا تفاعل وردوود..
_________________   يأإصإحبي .. !لا تلعب مع اللبوه تأإذيك .العب مع النملهِ وتضمنّ حٍَُّيَِّأإِتًٍَكٌُِ  |
|
02-09-2008, 01:24 AM
| ||||
| ||||
| رد: رواية:الدنيا قاسية..للكاتبة:طيبة القلب..رواية روووعة.. يسلموووووو القصة بدايتها روعة تقبلي مروووري القلب الكبير |
|
02-09-2008, 03:16 PM
| ||||
| ||||
| رد: رواية:الدنيا قاسية..للكاتبة:طيبة القلب..رواية روووعة.. ***===== الجزء الثاني =====*** ما فائدة القلم .. إذا لم يفتح فكرا .. أو يضمد جرحا .. أو يمسح دمعا .. او يطهر قلبا .. أو يكشف زيفا .. أو يبني صرحا يسعد الإنسان في ضلاله...! اليوم : الجمعة الوقت : الساعة 1.30 الظهر المكان : في بيت أبو سعيد " خلود " كنت شاله الغسول في ايدي .. الصراحه كنت أريد أي شيء بس عشان أتهرب منهم فقلت بغير الغسول عشان ارتاح من نظرتهم ماادري ليييش كنت أحس إن الكل يطالعني مع اني أشوف محد يشوفني الكل كان مشغول عني بشي .. في هذي اللحظه شفت موزة تتقرب مني ما أدري شوو ياني حسيت حرارتي ارتفعت ؟؟!! موزة : خلود خلود : نعم موزة : امممممم اقوول اشفيج خلود : مافيني شيء عااادي موزة : ماادري ليييش حسيت انج مضيجه من شوي خلود : هاا لااا عاديه مافيني شيء بس شوي مصدعه موزة : مصدعه ؟؟ زين زين خلااص تبين بندول عشان الصداع خلود : لالا مااريد لفيت صوب شمه ورديت صوب خلود " موزة " : خلود اشفيج رمسي خلود لفت ويها صوب المغسله : مافيني شيء انت اشفيج موزة : انا اشفيني ..؟؟ خلود : موزة فكيني من صدعتج قلت لج راسي يعورني موزة : خلاص على راحتج شليت الغسول ورديت الصاله عندهم .. ويلست عدال عمي راشد .. اللي صدعنا بسوالفه وغشمرته ..!! اليوم : الجمعة الوقت : الساعة 1.40 الظهر المكان : في بيت أبو سعيد " موزة " الصراحه انا شاكه بأن خلود فيها شيء احس انها مضيجه وهموم الدنيا كلها على راسها بس كيف اعرف هاي عنيده وراسها يابس مابتقول اللي بخاطرها بكل سهوله بس ماعليه لازم اتوصل لأي شيء أكشف سرها هالبنت كانت يالسه سرحانه أفكر بمشكلة أختي وأدور شوو السبب اللي محطمنها بهذي الطريقة ماحسيت بعمي سالم وهو يدش المطبخ ويلس على الكرسي اللي عدالي .. سالم : حووووووووو موزة : عمي من متى وانت هنيه سالم: يمكن من دقيقة دقيقتين ما اعرف بالضبط موزة : اهاااا غريبة لييش مارقدت أحيدك لازم بعد الغدا ترقد للين صلاة العصر سالم : عاد اليوم قمت الساعه 10 فما فيني رقاد الحين موزة : زين والله احسن لك واخبااارك بعد سالم : اخباري من اخبارج موزة : ياحيك يا العم سالم : اقووول موزة موزة : خير سالم : اباااج بمهمة موزة : افاااا عليك آمرني بس أنت سالم : تسلمين يابنت اخويه ،، الله يسلمج عندي خرايط عشان تصميم بيت واحد فقلت اباج تساعديني بتصميم شو رايج موزة : مستعده افااا عليك سالم : خلاص عيل تعالي معايه براويج الخرايط موزة : خلاص سير وانا بلحقك بعد 5 دقايق سالم : خلاص لاتبطين راح عمي وأنا بعدني مب مصدقة إن عمي يريد مساعدتي لا بعد بشو بالتصميم يعني هندسه هاي بتكون أول معركه أخوضها في الهندسه لازم ماخيب ظن عمي فيني سرت بسرعة وأنا ريولي خاطرها اطيرني فوق من الفرحة والوناسه اليوم : الجمعة الوقت : الساعة 2.5 الظهر المكان : في بيت أبو سعيد " سعيد " كنت يالس على الكمبيوتر من ساعة تقريبا .. أدش موقع واطلع من موقع هالنت فضيع مافيه شيء يونسني كله ممل أخبار وخرابيط وأعلانات .. فدشيت موقع من المواقع فشفت فيه محطة للصور فدشيت أشوف الصور مع إنها كانت صور عاديه ما تهمني بشيء قلت خلني أتسلى فيهن وجلست انزل صور من جميع أنواع السيايير على جهاز كمبيوتريه .. بعد ما نزلت الصور دشيت موضوع في إحدى المنتديات يتكلم عن حياة الزوجين في مشوار حياتهم .. فكل ما أقرأ كلمة من هذا الموضوع كنت أحس بشعور غريب شيء يجذبني لداخلي .. جلست اقرأ الموضوع أكثر من مرة حتى من كثر ما قريته حفظت كل كلمة فيه .. الصراحة الموضوع يتكلم عن كيف المرأة تعامل زوجها وكيف هو يعاملها .. يمكن الموضوع غريب بس أنا فسرت كل كلمة فيه بطريقتي الخاصة وبعقلي .. نحن البشر صرنا على الأرض أغراب ما عاد يربطنا عليها انتسابي يوم نسينا أصلنا طين وتراب لا ما حسبنا للطبيعة حسابي نبني خراب ونهدم أخلاق و آداب نركض ورا الأوهام وهي سراب .. حياتي فعلاً كانت جذيه ما يهمني شيء غير وناستي وسعادتي ما كنت اهتم بحد غير حريتي واستقلالي .. حياتي كلها كمبيوتر وخراب وبنات وطلعات وسناتر .. كنت أربع ورا الموضة وكل شيء جديد .. كنت أسوي المستحيل عشان الناس أطالعني شووو أسوى .. ما كنت أخاف فعلا ما أخاف من أي حد حتى أهلي ما اعمل لهم أي حساب .. بعد دقايق صاح تلفوني شليته وشفت الرقم مسجل باسم " الخبله " ضحكت من الخاطر وسكرت الخط في ويها وأغلقت تلفوني لأني تعبان وأريد ارقد .. طفيت جهاز الكمبيوتر وانسدحت على الشبريه .. وأفكر بحل حق هالخبله ؟؟!! هالبنت شفتها في دبي من سنتين ما ادري ليييش في البداية جذبتني يمكن بطريقه مشيتها ولبسها اللي يكشف عن جسمها وتخطيطه من كثر ما هو راص عليها ولا ريحه عطرها وطريقه مكياجها وقوتها وشجاعتها .. في ذلك اليوم شفتها تمشي بمشيتها الكل يصد صوبها هيه كانت فرحانه بأن الكل يشوفها ماتعرف إنها كانت تجذبهم بصوت نعالها اللي شالة السوق بصوته .. فحبيت أكسر خشمها وكبريائها بطريقتي الخاصة .. فجلست ألحقها من مكان لمكان في السوق حتى أني عرفت بيتهم فجلست على هالحالة لمدة يومين أحاول اجذبها صوبي أخليها تعرف أني كنت أراقبها من يومين فعطيتها رقمي ورمستها بالتلفون كانت يوميا تتصل فيني أكثر من مرة وغير المسجات اللي اطرشهن في البداية كنت فرحان فيها يمكن لأني كنت بأول مراهقتي كان عمري في وقتها " 19 سنه " وكنت مجذب عليها وقلت لها عمري 22 سنه لأن عمرها كان 21 سنه فما حبيت أكون أصغر منها .. استمرت علاقتي فيها للين هذا اليوم شفتها يمكن 5 مرات في دبي بعد سابق موعد معاها .. أما الحين أريد أبعدها عني بطريقه أخليها ذليلة وتعرف منو أكون ومنو تكون هيه وإني مستحيل أخذ وحده من هالأشكال .. من كثر ما أفكر بهذا الموضوع ماحسيت بعمري إلا وأنا سابع نومه .. اليوم : الجمعة الوقت : الساعة 2.30 الظهر المكان : في إحدى شوارع العين " عبدالله " أنا عايش مع همي وهمي صعب تفسيــــــــره حياتي بالألم تبدأ وهذا أول المشــــــــــــــوار أنا صوره من الماضي وأنا حاضر بلا ديــره وأنا طيف مضى وقته وأصبح للزمن تذكـار وأنا جرح صعب يبرى وكسر صعب تجبيره وجودي والألم واحد بدنيا كلها أســـــــــرار وأنا ورده بدت تذبل وضعها كيف تصويره تخيلها سحابة صيف بخيله حتى بالأمطــار من ساعه كنت يالس على الغدا مع أهلي وأمايه الله يهديها كل شوي تفرني بكلامها اللي يجرح القلب كله تقول لي حرمتك حرمتك ؟؟ فقمت منالغدا مطلعت من البيت عساني ارتاح شوي من التفكير .. الله يهديها أمايه هيه اللي كانت مصره أخذ خلود والحين شوو اللي غيرها عليها .. خلود ظالمنها ويايه وايد الصراحة وايد عليها متحمله كل اللي يصير صح اني مقصر فيها بس مع هذا احبها هاي زوجتي .. يمكن أكون قاسي معاها في بعض الأحيان بس هذا مايجبر أنى ما احبها .. كنت اقسا عليها بسبب تصرفات أمايه اللي تخلي الواحد يشك حتى بنفسه .. ياربي شوو اسوي كيف أحل هالمشكله اللي يوم عن يوم أشوفها أصعب عن اليوم اللي قبله وكل يوم أكتشف إني صغير جدام الكل .. حتى والله أنى مستحي أشوف أهلي أشوف حرمتي وإخوانها .. ماحسيت بعمري إلا أنا موقف على طرف الشارع وأشل تلفوني واطرش مسج حق خلود اللي أحس إنها زعلانه عليه من تصرفاتي وتصرفات أهلي معاها وكتبت بالمسج : (بنيت لك بالقلب قصر من الماس ما ينهدم لو حاولوا يهدمونه ) صح انه مسج صغير بس على عسى انه أطيب خاطرها مني .. وقفت في مكاني اتريا جواب منها ؟؟!! كنت أحسب الدقايق والثواني عشان ترد عليه بس للأسف ماردت عليه ؟؟ فشكيت إنها زعلانه عليه ؟؟!! فدقيت لها تلفون بس للأسف بعد ماترد على التلفون ؟؟ اليوم : الجمعة الوقت : الساعة 3.15 الظهر المكان : في ميلس بيت بو سعيد " سلطان " كنت يالس أشوف راشد وسيف يلعبون ورقه ويسولفون سوالف عادية عن السيايير والدراجات والمحلات اللي تعرض هالأشياء .. أما أنا منسدح ومشغل التلفزيون .. راشد : سلطان أنت باجر ما عليك دوام سلطان : عليه ليييييش تسأل ؟؟ راشد : لا بس كنت بسألك متى بتسير بوظبي سلطان : نفس كل يوم الساعه 5.30 الفير راشد : اممممم خلاص عيل بسير وياك سلطان : ليييييش شوو تسوي في بوظبي راشد : عليه تدريب باجر هناك وقلت بدال ما أسير بروحي أسير وياك لفيت صوب سيف : وانت بعد وراك تدريب سيف : لا أنا الاسبوع الياي لفيت صوب راشد : خلاص قوم وقت إذا ماخلصت أنا بسير عنك مابجلس اترياك راشد : انشالله بقوم بسرعة في هالدقيقة صاح تلفوني وكانت امايه داقه سلطان : الوووووووو أم سلطان : سلطان تعالي بسرعة داخل انشل خلود المستشفى بدون إحساس مني نقزت في مكاني " سلطان " : اشفيها ام سلطان : ما ادري يالله بسرعة تعال سكرت بسرعة التلفون .. ربعت بسرعة بدون ما أرد على راشد وسيف يسألوني شوو صاير بسرعة بسرعة بأقل من عشر دقايق أشل أمايه وخلود المستشفى ؟؟!! اليوم : الجمعة الوقت : الساعة 3.30 الظهر المكان : في غرفة سالم " موزة " كانت يالسه على الأرض أنا وعمي فارشين الأوراق على كبر الحجرة وماسكه القلم الرصاص بأيدي واخطط مع عمي بالتصميم .. كنت فرحانة كل شوي أتعلم شيء جديد وشيء بفيدني بعدين .. صح إن عمي اشطر عن بهالمجال بس أنا متخصصة بنفس المجال بس بعدني توني بأول المشوار .. مرات كنت أنبه عمي على أشياء ينساها .. عمي كان مستانس بعد لأنه حد يساعده .. نقزت في مكاني من الخوف شمه داشه الحجرة بدون سابق إنذار وفجت الباب بقوة من قوة الباب الأوراق حسيت انهن طارن شمة : موزة لحقي موزة : اشفييييييج زيغتينا شمة : خلود موزة " من الخوف وقفت بسرعه " : اشفيهااااا شمة : ماأعرف فجأة يلست تصيح وتزاعج بصوت عالي بطنها يعورها موزة : وينها الحين شمة : سلطان أمج ودوها المستشفى من الخوف طحت على ريولي على الأرض نزلت راسي : لاالااااالااااالاااا ليييش ماقلتيلي قبل مايودونها سالم يمسكني من أيدي : موزة اشفيج هدي إن شا ء الله ما فيها إلا العافية موزة : والله اني كنت حاسة إنها فيها شيء اليوم كانت أبداً مش طبيعية في هالدقايق يصيح تلفوني وشفت رقم عبدالله استغربت قلت يمكن درا بالسالفة سالم يأشر على موزة عشان تسكت سالم : ألووووووو عبدالله : هلااا عمي اشحالك سالم : بخير الحمدلله اشحالك أنت عبدالله : الحمدلله على كل حال اقوووول سالم : خييير عبدالله عبدالله : أنا الحين ياي صوبكم سالم : ليييييش غريبة شوو صاير عبدالله : بشل خلود فقلت أعطيكم خبر لأن خلود ماترد على تلفونها سالم : انزين خلاص انت تعال وانا اترياك عند الباب عبدالله : خلاص يالله فمان الله سالم : فمان كريم رديت لفيت صوب موزة وحضنتها : موزة خلود بخير انا بسير اطمأن عليها وبدق أطمنج بس خلي بالج على خوانج حمد وخالد الوقت : الساعة 3.35 الظهر المكان : في غرفة سالم " سيف " طلعت من بيت يدوه ومعايه راشد في السيارة كنا سايرن صوب المسيد نصلي صلاة العصر وبعدين نسير النادي ... كنت أفكر اشفيها خلود مااحيد إنها مريضة أو أي شيء وليش ما اتصلوا بعبدالله لازم يكون عنده علم بأن حرمته نقلوها المستشفى ،، أنا اليوم شفتها عند يدوه كانت ساكتة وماترمس وايد كله تسمعنا وبس وإذا كانت السالفة تضحك تبتسم ابتسامه بسيطة بس ومرات تسرح بعيد بخيالها اممممم هالبنت أكيد فيها شيء ؟؟!! أنا أحس إنها مب طبيعية يمكن سلطان يعرف السالفة وماطاع يخبرنا ؟؟ سيف : راشد راشد : شووووو سيف : بعد الصلاة نسير النادي ولا نسير الكراج نيب سيارتك راشد : صح ذكرتني بسير اييب سيارتي طبعاً سيف : خلااص بعد الصلاة بنسير انزين اقول اليوم ماشفت سعيد وينه كانت سيارته موقفه عند الباب راشد : مااعرف هالولد بروحه حاله خاصة يبا حد ايوزه عشان ايوز من حركاته سيف : ههههههه يوم عمي سالم عمره 28 سنه مب معرس كيف تبا واحد عمره 21يتزوج راشد : ههههههه صدقكك والله بعدين بنتفاهم بسالفته وندور لها حل نزلنا المسيد .. نصلي صلاة العصر .. وبعد الصلاة بنسير الصناعية نيب سيارة راشد من يومين عندهم يعدلونها ؟؟!! وقبل مانوصل الصناعية .. سيف : راشد اشفيها خلود راشد : ماادري يدوه قالت مريضة وانا دقيت على سالم وقالي بعدين بدق ودقيت على سطان بس مايرد عليه سيف : الله يستر الوقت : الساعة 4.5 الظهر المكان : عند باب بيت بو سعيد " سالم " كنت على أعصابي وكل شوي ادق بسلطان اطمأن على خلود بس سلطان مايرد على التلفون وهذا اللي زادني خوف .. انا من ربع ساعه يالس اتريا عبدالله يوصل .. احس الدقايق والثواني صعبه والوقت بطيء بدرجه اني كنت اعد ثانية بثانية بعد دقايق وصل عبدالله ونزل وتوايهة وياه .. وقلت له ركب السيارة نتفاهم بموضوع عبدالله : ليييييش شو صاير سالم : ركب في السيارة انا بخبرك عبدالله : انزين يالله اركب سالم : انا بسوق السيارة انت يلس عدالي عبدالله ماقال شيء او علق على الموضوع ركب عدالي وهو ساكت يترياني اتكلم .. الصراحه انا خفت اقوله عن خلود وهو يسوق السيارة ففضلت انا اسوق احسن عن يصير شيء لاسمح الله مشيت بالسيارة وكنت متجه صوب المستشفى عبدالله : سالم تلفت اعصابي ارمس شو صاير سالم : عبدالله تعوذ من الشيطان عبدالله : اعوذ بالله من الشيطان سالم : خلود في المستشفى عبدالله : خلوووووووووود اشفيهااااااااا سالم : والله ماادري قبل ماادق تلفون قالولي انها تعبت ودوها المستشفى ونحن الحين سايرين صوبهم عبدالله : سالم انت صدق ترمس ولا شووو سالم : والله يا عبدالله مااجذب عليك انا بروحي خايف اكثر منك ؟؟!! عبدالله : شووو فيها بالضبط سالم : ماادري اللي سمعته بطنها يعورها عبدالله : لاتقوووول لايكون صار شيء بالجنين سالم :" لفيت صوب عبدالله بسرعه " : جنين ؟؟!! خلود حامل عبدالله نزل راسه : هيه حامل من شهر تقريبا وماخبرنا حد بالموضوع سالم : الله يستر بس الله يستر الوقت : الساعة 4.30 الظهر المكان : في المستشفى " عبدالله " كنت امشي بممرات المستشفى .. ماكنت امشي كنت اربع احس ريولي بروحها تمشيني بسرررررعه ؟؟!! وصلت الغرفة اللي فيها خلود كانت امها واقفه عدالها والدكتورة بعد وياها كانت موصله بوايرات مغذي تقرب عبدالله منها ومسك ايدها عبدالله : خلود اشفيج خلود كانت تفتح عيونها ببطء كانت تعبااانه والتعب يبين على ويها : عبدالله بموووت عبدالله : لا شوو تقولين انت تعوذي من الشيطان لحظات ويدخل الدكتور ومعاه دكتور ثاني عبدالله : دكتور بشرني الدكتور : انت منووو عبدالله : انا زوجها الدكتور : والله شو اقول لك الجنين صار له ميت من عدة أيام مما سبب لها نزيف حاد والحين لازم انزل الجنين بعملية لأنها اذا مانزلنا يمكن تموت من النزيف عبدالله : شوووو دخيلك دكتور انت شوو تقول الدكتور : والله هذا اللي كاتبه ربك عبدالله : انزين لازم هالعملية الدكتور : قلت لك النزيف يمكن يسبب لها ضرر عبدالله يلف صوب خلود : خلود شوو اسوي دخيلج ردي علي خلود : اسوي العملية ماشي غير هالحل عبدالله يلف صوب الدكتور : خلاص تسوي العملية بس المطلوب مني شو الدكتور : توقع على هالوراق لأنك المسؤول عن زوجتك يمسك عبدالله القلم بالقوووووو ويغمض عيونه وفي هاللحظة تنزل دموووعه اللي حابسنها في عيونه .. يفتح عيونه ويوقع بسرعه وايده ترتجف .. بهتوقيع يمكن ينقذ حياتها ويمكن .... ويمكن تموووت ؟؟!! بعد ماشل الدكتور الأوراق قال للسستر تنقلها غرفة العمليات بسرعه .. عبدالله ساند عمره على طرف الشبريه : سامحييني سامحييني ياخلود خلود ترفع ايدها لعبدالله وتمسك طرف كندورته : عبدالله .. عبدالله .. انت انت .. انت سامحني .. خلود تغمض عيونها .. خلاااص ماقدرت تكمل شيء من اللي كانت تبا تقوله عبدالله كان يريد يقووول لها كل شيء كان يريد يقووول كل اللي في خاطره يقووول اللي يدور في راسه ؟؟ يمكن هذي أخر لحظات تجمع خلود بعبدالله .. يمكن تكووون أخر حوار دار بينهم .. في هالدقايق كانت تمر على عبدالله صعبه .. يحس ان الوقت وقف هنيه ماطاع يتحرك لاجدام ولا وراء .. عبدالله يحس بضعف وان حياته وقفت للين هنيه خلود ضحت بهلها وحياتها . الحين توقف جدامه وتصارع الموووت .. لا ويمكن عبدالله هو السبب باللي خلود فيه الحين .. خاف يفقدها يفقد انسانه تحمل الكثير عشانها تحمل كلام الناس واهله ؟؟!! جلس على الأرض على ركبه ونزل راسه تحت وخلى ايدينه فوق راسه يلس يصييييح مثل اليهال يصيح .. بصوووت يقطع القلب ريال اشطوله وعرضة يصيح بهالطريقة ..
_________________ يأإصإحبي .. !لا تلعب مع اللبوه تأإذيك .العب مع النملهِ وتضمنّ حٍَُّيَِّأإِتًٍَكٌُِ |
|
| مواقع النشر (المفضلة) |
| أدوات الموضوع | |
| طريقة عرض الموضوع | |
| |
-
-
العرض العادي
