بسم الله الرحمن الرحيم
اللهم صل على محمد وعلى آله وصحبه أجمعين
السلام عليكم ورحمة الله وبركاته


عشقتك كلمه لو قلتها ما بلت عروقي


من تأليف: حفراوي مرووق

القسم الاول

الحلقه الأولى

[size=4]الساعة ثمان صباح يوم الخميس بتاريخ 15/1 (يوم عرس شيخه بنت عبيد على ولد عمها عيسى )
شيخه عمرها 21 سنه حلوه ما شاء الله عليها تدرس في الجامعه في كلية الهندسه متربيه احسن تربيه متوفي ابوها من سنتين ونص واخوها عبد الله تحمل المسؤوليه بعد وفاة ابوها )

كانت منسدحه فوق شبريتها ويردها شريط الذكريات لقبل سنتين ونص قبل وفاة ابوها في حادث سياره الأبو الطيب اللي الكل يشهد باخلاقه واحترامه لكل الناس وتربيته السنعه لولاده ما كان يقصر عليهم بشي من مال وحب و حنان ونصيحه وكان مدلعهم وايد وكانت دوم زوجته

(ام عبدالله (شمسه)) تقوله: لا ادلعهم وايد ترى الدلع الفارط مب زين و بيضيعهم

ويرد عليها بالابتسامه اللي ما تفارق ويهه: فديت روحهم يا شمسه هذيلا حياتي كلها وسعادتي في دنياي و اللي بيحملون اسمي بعد وفاتي تبيني ما ادلعهم بعد انا اعرف اولادي زين يا

ام عبد الله ومربنهم على الأخلاق الزينة

شمسه وترفع ايدها للسما : ربي يخليك ويحفظك لنا يا ابوعبد الله

شيخه كان عمرها 18 سنه في الثانويه العامه في ذلك الوقت ومر على ذاكرتها موقف في يوم كانت راده من المدرسه وحصلت ابوها يالس على الكنفه يطالع التلفزيون

شيخه والابتسامه على ويهه : السلام عليكم

عبيد : و عليكم السلام بحياتي و شيخة الحريم

راحت شيخه صوب ابوها وحبت راسه ويلست حذاله

عبيد : ها حبيبتي بشريني اشوفج مستانسه عسى الامتحان كان زين

شيخه : الحمد الله كان الامتحان سهل وان شاء الله بيب علامه زينه

عبيد : ها الغاليه تراها اخر سنه اباج تيبي لي ذيج النسبه اللي ترفع الراس وتفرح الخاطر

شيخه وهي تحط ايدها على جتف ابوها وتحضنه : ان شاء الله يا الغالي وبعدهم بيزقرونك يا ابو البش مهندسه

ابتسم لها وحبها على خدها

شمسه: ها الدلع انتي يتي

شيخه: الحين انا الدلع ولا شواقه البزايه وشميم وسكتوا عن حمودي اللي ماخذ الدلع كله يحليلي انا وعبود نحن اللي طالعين ولاد البطه السوداء

شمسه : الله و اكبر الحين انتي مب دلوعه قومي بدلي ثيابج ونادي اخوانج عسب نتغدى

شيخه: ان شاء يا غناة روح شيخه و بعدهم كلهم



نزلت الدمعه من عيون شيخه وقامت ويلست ولوت على المخده ويلست اتصيح بصمت وتقول في خاطرها اه يا ابوي يا غناتي وروحي وكلي الحين بنتك صارت عروس ياليتك معي يا عيوني وادخلني انت لين الكوشه اه كيف بتكون وناستي فرحتي كنت تقول دوم ان شاء الله تكون شيخه من نصيب عيسى تحققت امنيتك يا حياتي الله يرحمك ويغمد روحك الجنه يا لبوي

وحطت راسها على المخده وغمضت عيونها

وشوي وادق شوق الباب وتدخل

(شوق عمرها 19 سنه في الجامعه في كلية IT رغم انا مغروره شويه ودلوعه الا الكل ينبهر من جمالها الهادي واخلاقها العاليه وادبها وطيبتها وحنية قلبها )

شوق : يا كسوله بعدج ما قمتي

شيخه رفعت راسها وتبتسم : صباح الخير شواقه

شوق : بلاهن عيونج غناتي متنفخات كنتي تصيحين

شيخه: لا ما كنت اصيح

شوق: لا والله شواخي صدق شبلاج غناتي انتي تعبان يعورج شي زعلانه من شي والا حد ييصح في يوم عرسه

شيخه: لا ما فيني شي حياتي

شوق: صدق شواخي ما فيج شي

شيخه: هيه صدق ..............الا اشوفج واعيه بدري ما العاده

شوق: انتي ما دريتي عرس اختي وحبيبتي شواخي اليوم

شيخه تبتسم :صدق

شوق:هيه و الله انتي ما تدرين

شيخه:ههههههههههههه ....

شيخه: بشتاقلج وايد غناتي وبشتاق لسوالفج

شوق ودمعتها نازله على خدها الوردي : وانا اكثر يا الغاليه صدق بفتقدج و بحس بفراغ كبير بعد ما تروحين يا غناتي ............ وراحت صوبها وحضنتها وتمت تصيح بصوت عالي

شيخه وصوتها حزين ما قادره تتكلم خانقتنها العبره : ايه يا الخبله جيه انا وين رايحه الا بيت عمي فرت حصاه من بعده يعني

شوق وهيه تصيح: ما تصور اقوم الصبح وما احصلج جدامي وما اصبح على هالويه الحلو وبيلس اسولف ويا منو وبعدين الأهم منو بيسوي لي ام علي اللي احبها

شيخه وتبعد شوق من حضنها : هههههههههههههه الحين همج كرشج يا الدبه لا تخافين كل يوم بتحصليني عندكم وبسويلج ام علي

شوق وهيه تمش ادموعها :صدق عيل برايج روحي جان بتين اتسويلي كل يوم اياها

شيخه:هههههههههههه الله يقطع سوالفج ........انزين متى بتيي اللي تعدل

شوق: قالت الساعه وحده الظهر بتكون موجوده

ودخلت عليهن شمه (عمرها 16 سنه في اول ثانوي حبوبه وحلوه ويه بيبي فيس وجمالها هادي اكثر وحدها تشبه امها في اول ثانوي شاطره في دراستها )

شمه: صباح الخير ......راحت ويسلست حذالهن على الشبريه

شيخه وشوق : صباح النور

شمه: شخبارج عروسنا اليوم وما احساسج وما شعورج بفراق البيت و التوجه الى بيت العريس ابن العم عيسى

شيخه: ههههههه تبين الصدق

شمه: اكيييييييييييييييد الصدق

شيخه: شعوري بالخوف والحزن الكبير على فراق امايه وعبادي وعلوه وشواقي الا انتي يا شميم

شوق: هههههههههههه حلوه هاي

شمه وهيه مبوزه: ههه لا بايخه نفس ويهج

شيخه وتصد صوب شمه : لو ما بشتاق لج يا غناتي شميم بشتاق لمن يعني

شمه راحت صوب شيخه ولوت عليها وحبتها على خدها : بشتاقلج يا حبيبتي حيييييييل

شيخه وتلوي عليها : وانا اكثر يا عمري

و يلسن البنات يسولفن عن العرس كيف بيسون تسريحاتهن ومكياجهن ومتى بيطلعون العروس

وشو الاغنيه اللي بتطلع عليها و الاغنيه اللي بيدخل عليها المعرس وعن العرض اللي بتسويه العروس في الكوشه وعن تسريحة العروس كيف يبهن وغيره من سوالف البنات

ومضى الوقت وهن يسولفن وتريقن ويت الساعه 11 وراحت شيخه تتسبح وتسترخي شوي علشان تكون مرتاحه وويها منور .....ونزلت شوق وشمه تحت في الصاله و حصلن عمتهن سلامه يالسه في الصاله سلمن عليها ويلست شوق وياها وراحت شمه فوق توعي محمد من الرقاد

سلامه: وينج شواقي ما تنشافين

شوق : و الله اهنيه عموه الا انتي من زمان ما يتينا وما تنشافين

سلامه: الحين منو اللي لازم يي انا العمه والا انتي

شوق تبتسم : فديت روحج الجامعه والدراسه شاغلتنا

سلامه: لا اعرفكن تستحن من ناصر ترى ناصر ولد عمتكن وببعدين دومه برا مايي الا في الليل و يوم تين بقوله ما يي البيت

شوق: افا عليج فالج طيب ما طلبتي بيي كل يوم لين ما تروغينا وتقولن لا تين يا بنات عبيد

سلامه: انا اروغكن انتن ريحة الغالي يا بنتي

شوق: فديت روحج عموه وحبتها على راسها

......................

وفي غرفة محمد فوق (محمد عمره 13 سنه في اول اعدادي اخر العنقود مدلع وايد والكل يحبه نسخه من المرحوم ابوه مستواه زين في الدراسه ويحب اخته شوق وايد ومتعلق فيها لدرجه انه يسمع كلامها واوامرها على عكس خواته ويشتشيرها في أي شي يبى يسويه )

شمه: حمادي يلا قوم تراني تعبت من كثر ما اوعي فيك قوم

محمد: انزين خلاص بقوم شميم خليني

شمه : ما بخليك لين ما تنش جدامي و تغسل ويهك

محمد: اف انزين قلت انزين سمعت خلاص فكينا الله يخليج

شمه:ما ابى

محمد: غلسه ويا هالويه بقوم طلعي

شمه تقوم من الشبريه: بطلع لي ما قمت برد اطفربك

محمد: انزين اخبرج شو تبيني اسوي

شمه: ما شي الكل قايم في البيت الا انت

محمد : لا حول ولا قوه الا بالله

شمه تبتسم وتطلع من الغرفه:يلا يلا نش

محمد يتحرطم مكانه : الله ياخذ بليسها طيرت النوم من عيني وضيعت علي حلمي كنت اضارب علوه ولد يرانا ومطلع الدم من خشمه وغالبنه ........ الله ياخذج يا شميم

وقام من فراشه راح يغسل ويبدل ثيابه

........................

محمد نازل من فوق وحصل امه وخواته يالسات ........ يا وحب امه على الراس ويلس حذاله

محمد: صباح الخير امايه

شمسه: صباح النور و السرور غناة روح امايه ............. وتلف ايدها عليه وتحبه على خده

وراح صوب شوق وحبها على خدها : صباح الخير

شوق: صباح الخير حبيبي

شمه: بسم الله حتى ما بح عليه

محمد يطالعها ويلف ويها عنها ويطلع برا

شمه: ويا الويه

شوق: احلى عن ويهج يا الخامه

شمسه (الام ): خان عنكن السوالف الفاضيه وينها شواخي

شوق: تتسبح وتسترخي قبل ما تيي اللي تعدل

شمه: الساعه وحده بتيي يعني بعد نص ساعه ما باقي شي

شمسه: بروح اشوف عبادي وينه غناتي اكيييييد تعبان من تجهيزات العرس

شوق: نتعب في عرسه ان شاءالله

شمسه ترفع ايدها للسماء : ان شاء الله .اشوفكم كلكن عرايس واشوف عبادي وحمودي معاريس

وتدخل عليهن ليلى( عمره 25 سنه معرسه ساكنه في ابوظبي وعندها بنت عمرها سنه اسمها حمده وريلها فهد ولد عمها )

أ خت شمسه يعني خالة البنات : ان شاء الله يا اخويتي

شمسه: هلا و الله بليلى

شوق : توه ما نور البيت خالوه

ليلى تسلم على اختها وتقول لشوق :منور بوجودج شواقي

ويلسن يسولفن وشوي وصلت اللي تعدل وطلعن فوق علشان تبدا لانه ما باقي شي لين تخلصهن و تعدل العروس

في بيت سالم أبو عيسى الساعه 4 العصر

(يالسه ام عيس وعيسى و فهد اخوه (عمره22 سنه يشتغل ويا ابوه في الشركه شاب وسيم وايد طول وعرض متخرج من الثانويه وما دخل الجامعه وفضل يساعد ابوه في الشركه مغرور وسامته وايد)

ام عيس عايشه: عقبالك يا فهد يا وليدي

فهد: امايه الله يهديج ليش تفاوليلي

ام عيسى : شو افاولك عساك تعرس واشوف عيالك و عيال عيالك يا رب يا كريم

عيسى: لالا امايه لا تعورين راسج ويا فهد يقول بعده صغير يبى يمتع حياته

ام عيسى: شوه صغير ما شاء الله ريال عمره 22 سنه من وين صغير بعد هاي الا شايب

ويدخل عليهم ابو عيسى : صدقك يا ولدي شو تبى في العرس وويع الراس

ام عيس : الحين العرس ويع راس يا ابو عيسى

فهد يبتسم : هااااا ابويه رد اشوفك سكت

ابو عيسى : لا لا يا الغاليه انا ما قصدي هوه زين جان بيحصل وحده شراتج حلوه واخلاق واصل وفصل

ام عيسى: اتحرى عندك شي

عيسى: يا سلام يا الشيبه رومانسي ترى نحن هنيه

ابو عيسى: اعرفك انك هنيه جيه انا شو قلت يا مسود الويه

فهد يضحك : حوو المعرس فشلوه

عيسى: ما عندك سالفه

ابو عيسى: يلا نروح المسيد أذن العصر

فهد وعيسى : ان شاء الله



............................

في بيت عليا ربيعة شوق (عليا كبر شوق عمرها 19 سنه ونفس الكليه يحبن بعض وايد من يوم كانن صغار ويا بعض كانوا قوم شوق يرانهم وبعدين تحولوا عنهم في الفله وهي وحيدة امها وابوها ومدلعه وايد وحلوه وطيبه وايد واخلاقها رفيعه وجمالها هادي ورقيقه وحساسه وايد )

عليا يالسه في غرفته وادق تيلفون لشوق

علياء : الو مرحبا

شوق : مرحبتين بهالصوت

علياء اشحالج غناتي

شوق: منيحه

عليا : ها خلتي متعدله والا بعدج

شوق : لا مخلصه الحين بدت شواخي .... و انتي لا تتاخرين الساعه السبع اباج تكوني عندنا

عليا: ان شاء الله انتي تامرين امر حياتي ............ها شخبار شواقي اكييد خيفانه ومتوتره

شوق : شوي

عليا: اوكي حياتي see you later

شوق: باي الغاليه

ومر الوقت والمعازيم وصلوا وخالاتها وعماتها وحريم عمومتها طلعن يسلمن عليها في غرفتها ويباركلها وبعدين راحن خيمة الحريم اللي كان تصميمها يطير العقل وديكور حلو والكوشه حمرا

ويا الاضواء تينن والساعه 7 راحن شوق وشمه وعليا ربيعة شمه الخيمه وكانن ما شاء الله حلوات ومسكتات لكن كانت شوق تفوقهن جمال والكل يلس يناظرها ويتبع حركاتها والحريم يلسن يرمسن عن حلاته

الحرمه الاولى: ما شاء الله اللي لابسه عنابي منو منهن بنات شمسه

الثانيه: هاي شوق متخرجه كبر لطوف بنتي .........ما شاء الله تبارك الرحمن مزيونه

الحرمه الاولى: يا حظه اللي بياخذه

الثانيه: وانتي صادقه يا اخويتي الله يخليها لاهلها

الاولى: آمين



........................

فوق في غرفة شيخه دخلت عليها امها واول ما شافتها شيخه قامت وحضنتها ويلست اتصيح

شمسه: والله وكبرتي يا غناة روحي وصرتي عروس ...........بس حياتي لا تصيحين بيتخرب المكياج وبعدين حياتي انتي ما رايحه بيت غرب بيت عمج حياتي وعيس ريال و النعم فيه ما بيقصر عليج بشي وحرمة عمج طيبه و بعد بتخليج شرات بنتها لطيفه ...........يلا حبيبي سكتي

شيخه تمش ادموعها : ان شاء الله

اللي تعدل : جيبي اعدلك اياه اكيد ضاع من كتر ما تصيحي

ونزلت شمسه (الام) تحت راحت الخيمه

والساعه 10 راح عبد الله غرفة اخته (عبدالله بن عبيد اخو شيخه عمره 25 سنه حنون طيب القلب من مات ابوه وهو دافن عمره في الشركه و الشغل وما فكر بالعرس كل تفكيره باخوانه وامه وكيف يعوضهم عن غياب ابوه ويوفر لهم كل اللي يريدونه ولا يقصر عليهم بشي

طبعه هادي وايد بس اخوانه يحترمونه وايد لقلبه الكبير وكان وايد متعلق بابوبه وموته اثر عليه بشكل كبير وخلاه يعيش في حالة حزن وحتى لو ابتسم في ابتسامته وتعابير ويهه حزن كبير)

عبدالله: الف مبروك شواخي .ويبتسم مبروك حبيبتي .......ويقترب منها ويحبها على الراس

شيخه: الله يبارك فيك يا اخوي

يا عبدالله ويلس حذالها وحط ايده على كتفها

عبدالله يبتسم الابتسامه اللي تحمل كل الحب والحنان : والله وكبرتي يا شواخي وصرتي حرمه ابقولج شي اعرفج حرمه ما عليج قصور وانج متربيه احسن تربيه واخلاقج ما عليهن رمسه اف يا غناتي لا تخلين حد ينقد عليج ويقولون ما عرفوا يربونها دابري ريلج وراعيه واهتمي فيه ولا تقصرين عليه بشي هذا اللي كنت ابى اقولج اياه وديري بالج على عمرج حياتي

وقام وحبها على يبهتها وابتسمت ابتسامه حلوه ومدت ايدها لاخوها ومسكها من ايدها علشان يوديها الخيمه

ودخلت العروس على موسيقى كلاسيكيه وكان عبدالله ماسكنها من ايدها وكانت وراها شوق

و ميثه بنت لطيفه تمشي جدامها تعق ورد وعدالها اختها عوشه شاله المدخن وكانن شمه وشوق ورا العروس يمشن يعدلن لها الطرحه وصلها عبدالله الكوشه وظهر ويلست اتسوي عرض في الكوشه بعدين يلست وبدا الرقص ورقصن البنات

واما برا كان عيسى وفهد( وناصر ومحمد وسلطان ربع عيسى ) واقفين برا خيمة الريال

عيسى: الله يهديك يا عبدالله متى بندخل ما صارت حاله

فهد:ههههههههههههههه

عيسى يطالع وهو معصب : قلت شي يضحك

عبدالله : بلاك مستعيل الحين بتدخل

عيسى: يلا عيل شو نتريا

عبدالله: اصبر شويه بسويلهم تيلفون ........ودق عبدالله على تيلفون شوق وقالها ان المعرس الحين بيدخل

شيخه: وين رايحه يلسي ويايه

شوق: احلفي بس انتي بروح البس عباتي تريدين عبدالله يجتلني

شيخه: و الله بديت اخاف

شوق: شعور عادي

ونزلت شوق من الكوشه وراحت تلبس عباتها ويلست هيه وشمه ولطيفه اخت عيسى وعليا ربيعتها في طاوله بعيده شوي عن الكوشه

واطلبوا من الفرقه انهم يغنون( طال ليلي ) لميحد ودخل المعرس وكان محمد اخوها يرزف جدامه وعبدالله حذاله وابوه

يوم وصل الكوشه شل الطرحه وباسها على يبهتها ويلس حذالها وسلم عليهم ابوه وعبدالله وطلعوا

وكانت شمسه يالسه بعيد ونزلت دمعتها اتذكرت المرحوم عبيد وتقول الله يرحمك يا ابو عبدالله ويغمد روحك الجنه يا ليتك كنت موجود وتشاركنا فرحتنا بعرس شواخي يا ريت شكثر بتكون فرحتي و فرحة العيال بس الله ماراد ومحد يعترض على حكمه والنعم بالله

و لاحول ولا قوه الا بالله الله يرحمك ويرزقك فسيح جناته



وشوي وغطوا العروس علشان اخوه فهد وولد عمتها نار وولاد خوالها وولاد خاله بيدخلون يسلمون ودخلوا وسلموا و طلعوا بس فهد في اخر الخيمه عند الباب حصل حرمة عمه شمسه

فهد: هلا خالوه اشحالج

شمسه: بخير ربي يسلمك .....عقبال ما اشوفك معرس يا فهد

فهد يبتسم : ان شاء الله ..........وطلع

وشوي وطلعوا المعاريس من الخيمه رايحين بيتهم وبيسافرون بعد يومين باريس يقضون شهر العسل

اما في بيت عبيد استوت مناحه الام اتصييح من صوب وشمه من صوب ثاني وشوق من صوب

ودخل عليهن عبدالله ومحمد

عبدالله: خير شو فيكن بلاج امايه

شوق: شواخي راحت

عبدالله: بسم الله زيغتني تقول مايت عليكن حد

محمد: و الله اشكالكن تضحك ......... ويطالع اخوه ويلسو يضحكون ويتطنزون عليهن

شمسه: جب يا مسودين الويهه الحين خبروني شو يضحكم

و يقترب عبدالله من امه ويحبها فوق الراس : يا حلاته اللي معصب انا

شمسه: وخر عني

محمد: تراني يوعان ابى آكل شي

شمه: يعلك اليوع دوم يا ربي

محمد: بسم الله يا النحسه شو سويتلج تسمعونا احد كلمها

عبدالله: خلاص شميم غناتي قولي لميري تحط لنا شي ناكله صدقه حمودي يوعانين

و قامت شمه وراحت المطبخ وشوق راحت تغسل ويها وتبطل شعرها وتبدل وبتنزل تتعشى و الام قالت ما تبى تعبانه بتروح ترقد وبعد ما تعشوا كلهم راحوا برقدون من التعب .[/size]





سوف اكمل لكم لاكن بعد ما ارى ردودكم












أخوكم ومحبكم الدائم
حفراوي مرووق << فيلسوف المنتديات >>

حفراووووي مروووق

يعطيك العافيه على القصه الرائعه

والى الامام دائماً

تحيااااتي لكـ ،،،،

جاري الانتظار................................