سلخير جميعا
آسف لإنقطاعي
واتمنى ان تحوز مشاركتي على رضاكم
<======= يلمح بالتثبيت

مرتن من المراريت كنت منسدح قدام هالتلفزيون ما غير افرفر بقنوات هالموسيقى -الله لا يبلاكم- من روتانا الى مزيكا ولا تهون نجوووم (( آآآه يالبرتقاله )) واذا زعلت مني ستار اكادمي ماني مسئوول
وطبعا قصدي اكحل عيوني بهالمزين والا الأغنية بسلامتها ولا كأني اسمعها
واثناء (تسمري) قدام التلفزيون ولا ودي ارمش اخاف تفوتني لقطة الا وجوالي يرن
<===== يعلمكم ان عنده جوال
وانا بعادتي اذذا اتصل علي واحد رقمه مو موجود عندي (اشحط) اخشن صوتي وما دريت الا وذاك الصوت الناعم اللي فقع اذني برقته وهو يقول آسف اخطيت بالرقم وقفلت الخط
وحينها رحت للمرايه وكان امشط شعري واتميلح واضبط نبرة صوتي واتصل عليها واقول ما اعتقد ان هالصوت الحنون يخطيء
<======== ابوك يا التشبيك
فردت علي كأنك واثق من ان الرقم اللي ابيه هو رقمك
قلت لها اصلا رقمي معشوق الملايين
قالت : لا يكون جوال كاظم الساهر وانا ما ادري
قلت لها : وانتي الصاجة رقمي احلى
قالت : هههههههه دمك خفيف والا انت كذا
قلت : ولو اني ما وزنته الا ان البنات اللي اعرفهن بيقولن تسذا
فزعلت البنت وقالت يالله ضف خشتك وروح يمّهن ولا عاد اسمع صوتك
قلت : افا زعلتي
قالت : صحيح ان ما عندك اتيكيت
قلت : الا عندي البارح مشتريه من البقاله
قالت : اتيكيت يعني ذوق يا دلخ
وهنا برد وجهي ونكست خشتي للأسفل <===== يعني انحرجت
فقلت : اسف ما سمعتك زين احسبك تقولين ما عندك كيك <====== ابوك يا الترقيع
قالت : ايه هين الا ا عمرك سمعت عنها يا القروي
قلت : طيب آسف سامحيني
المهم وبعد ساعتين ونصف من المحاولات والمداولات و(التقردن) حتى اقنعتها بان تقابلني في مركز الراشد اللي في الخبر
قالت : طيب كيف اعرفك
قلت : اذا وصلتي المركز اتصلي فيني وانا اقول لك وين انا فيه
قالت : ما اقدر لأن اخواني ما يخلوني اروح للمراكز لوحدي لازم يروح واحدن منهم معي
قلت : طيب ( وش الدبره ) ايش الحل ؟
قالت : انت البس لبس مميز ووقف عند النافور اللي بالوسط وحينها راح اعرفك
قلت : لبس مميز !! زي ايش ؟؟
قالت : البس ثوب شتوي
قلت : لبس شتوي !!! لكن حنا في فصل الصيف !!!
قالت : اجل الغي اللقاء
قلت : امري لله ولو ان شكلي راح يكون مضحك لكن لأجل عين تكرم الف عين
فلبست اللباس الشتوي ورح للمركز وقعدت عن النافورة <======== وا فشيلتاه
وكل ما مر واحد من جنبي يضحك ويتحمد الله على العقل ويسألني ليش لابس هاللبس
وانا اقول ايه اللي يدري يدري واللي ما يدري يقول عدس !!!
وما مر وقت طويل الا وانا المح اصدقائي من بعيد يناظرون لي وهم يضحكون
بصراحة لعب الشيطان براسي فشكيت بأمرهم فرحت يمهم
وانا اقول وش ذا البرد
فرد على احد الشباب وهو يقلد صوت البنت اللي واعدتها صحيح ان ما عندك اتكيت
فعرفت ان الشباب مسوين لي مقلب وانا شربته
وحينها طلعت من المركز وانا متفشل
وبعدها حلفت اني ما اكلم بنت