بسم الله الرحمن الرحيــــــــم

المقدمة

الخال هون مش اخو الام .. الخال هو الشئ الاسود المعفن اللي بيكون ملطوع في وجه او في صباح او على يد او في موقع آخر من جسم الانسان .. و هو ما يسمى ايضا بالشامة

و في ناس بيخربطوا بين الخال (الشامة) و الثالول .. او بينه و بين حب الشباب و الشابات او الكلف او النمش او العفش او الجدري او الحصبة او الجرب

لكن حتى تعرفوا انه في فرق بين الخال (الشامة) و البلاوي المذكورة اعلاه تذكروا انه الاغاني ما بتجيب سيرة اشياء مقرفة

فعندك مثلا اغنية "حلوة يا ام الخال يا احلى صبية"
و ما في اغنية "حلوة يا ام الثالول"

و هناك اغنية "ريتني خاتم بيّدك .. ريتني شامة على خدك كل صباح تشوفني"
و ما في اغنية "ريتني حصبة في وجهك كل صباح تشوفني"

و في امثال عربية كثيرة بتحكي عن الخال .. منها:

"ثلثين الولد لخاله" و يقال في الولد اللي ثلثين وجهه خال او شامة

و مثل ثاني : "الأصيل بينعرف من خاله و الدني من ثالوله" و يقال في الناس اللي بيصحوا الصبح و بيتفرجوا في المراية و مع هيك بيطلعوا برة البيت

و الآن بعد المقدمة يسرني ان ابدأ معكم سلسلة "إعرف شخصيتك من ...." و حلقة اليوم هي
إعرف شخصيتك من خالك (اللي بيعرف كم مرة صرت كاتب العنوان اله جائزة عبارة عن عملية تجميل لازالة الخال و اذا الخال مش موجود ممكن نشيل العم او التيتة)

الخال في نص الجبهة

انت انسان معقـّد .. بتحس انه كل الناس بيتفرجوا في صباحك .. بتمشي مطأطئ الرأس و دايما معك منديل و بتمسح على جبهتك عشان الناس يفكروا انك عرقان
اذا واحد اتفرج على ايدك بتبدا معاه مشكلة و بتقوله .. شو يابا؟ مش عاجبك خالي؟؟
البلد الوحيدة اللي بترتاح فيها هي الهند .. هناك بيفكروا الخال نقطة سودة من هظول اللي بيدلوا عن حالتك الاجتماعية او الدينية او الصحية
و انت صغير كانوا الاطفال في المدرسة يعايروك و يقولولك يا ابو ثلاث عيون وحدة منهم عورة .. و هذا الشئ اثر تأثير سلبي على شخصيتك و خلاك تكره المدارس يا فاشل


الخال على الخد (اليمين او اليسار مش مهم لانه بالمراية بينعكسوا)

انت انسان مرح .. بس ضحكتك ما بتكون من الذان للذان .. لانها بتصدم في الخال قبل ما توصل الذان .. بتحب المزح و لسانك طويل .. بس انت تخين و ما بتعرف تركض .. عشان هيك دايما بتاخد على نافوخك من ورا مزحك البايخ
بتحب حفلات التنكر و بتروح على هيئة سميرة توفيق



الخال على راس الأنف

عصبي و المكر و الخدعة صنعتك .. بتستعمل دايما كلمة خشم في شتايمك .. مثلا : روحي واصلة خشمي .. أو اقلب خشمك .. أو ينعن خشم اللي خلفك ..
و كمان بتستعملها في الحكي الحلو .. هات احب خشمك .. أو انت على خشمي يا رجل .. أو خشمي سدّاد

الخال على الشلطوفة العليا (الشفة)

أجرب .. و دايما بتحك في لحيتك .. و ما تقولي انه ما عندك لحية .. لانه كل واحد خاله تحت شلطوفته التحتانية مربي لحية .. لانه اذا حلقها بيجرح خاله و خاله بيصير يسيل دم بعدين
دمك ثقيل .. لانه ما بسيل كثير .. لانك ما بتحلق لحيتك .. اي احلقها و استحي على حالك




الخال على الرقبة

انسان لطيف و مؤدب في تعامله مع الناس .. لانه بيخاف اذا تزانخ مع حدا انه هاظ الحدا يلطشه خمساوي على رقبته .. لانه رح يلاقيها بسرعة لانها معلّمة
الناس اللي ما عندهم خال .. الواحد بيقعد ساعة عبين ما يعرف وين رقبتهم




بيكفي تحليل شخصيات اليوم .. اللي خاله في محل ثاني غير الوجه و الرقبة يراجع اقرب دكتور بيطري
و مصيبة اذا كان حد عنده مرض "الخال المتنقل" اللي كل يوم في محل

كل واحد يرد يعلمنا أي شخصية منهم

ترقبو المواضيع القادمة