بـوح الـصور بمـنـتدى الشـعر وبـوح الخـوافـي

قبل اسافر كنت جالس في زمان الانتظار =ارتشف هم المكان.. وكل همي حاجتين
كنت خايف من يباس وكنت خايف من خضار =كنت اخاف إنك تجين وكنت خايف ما تجين

لين شفتك من ورى بيبان صالات المطار =مقبله من كثر شوقك كنت أشوفك تركضين
مرة ركضك يمين ونظرة عيونك يسار =ومرة ركضك يسار ونظرة عيونك يمين
تايهه ما كنك الا ضحكة وسط انكسار =ساكته ما كنك الا دمعة فيها حنين
خايفه.. وجله.. حزينه.. يعني كنتي باختصار =تشرحين لكل جاهل معنى ( كلمة عاشقين )

بعدها جيتك.. ولدت عينك ودار الحوار =من كفوفي دمعتين ومن كفوفك دمعتين
كنت أصد.. وكنتي انتي ثايره مثل الشرار =ما على لتغة لسانك غير كلمة (وين؟ وين؟)
وأذكر إني رحت قبل أبدي لك أية اعتذار =رحت حتى قبل اطيب خاطرك في كلمتين
لكن أنتي عارفتني زين.. واللي صار صار =سامحيني واذكريني قد ما انتي تقدرين

اذكريني لا انتهت للشمس رحلة مع نهار =واذكريني لا صحى للصبح ورد الياسمين
واذكريني لا لمحتي في ليالي البرد نار =واذكريني لا سمعتي للمطر صوت حزين
اذكريني.. واذكريني.. واذكريني.. باختصار: =اذكري فهد المساعد قد منتي تقدرين