من هواياتي !!!! فما هي هوايتك؟

الله يقطع بليسك يا شيخ

والله ذكرتنا بأيام منول إيييييييييييييييييه الله مستعان

معليش بروح أجيب مناديل وأرجع ................

يخوي قعدت أمس دموعي يوم جلست أتذكر ذيك الأيام أيام الهبال والشعر المخنفس على بالنا إنها هي الموضه

من ذيك الذكريات إننا مرة من المراريت رحنا نبي نسرق جح على قولك ( رقي ) المهم دخلنا ذاك المطق ( مزرعة ) بلغة الأولين ونتدير ندور لنا جح وحملنا لنا اللي نقدر عليه اللي نحتاجه واللي ما نحتاج له بس فساد
لا والضحكه وشي إن الهنود درو عنا وصكو باب المزرعة بس على مين يا بابا خوينا بايعها خلى صفقة الباب نثر في كل شنق ولا خافو ذالهنود قامو يلحقونا وردينا عليهم بالحرب النوويه قمنا نرجم عليهم من الجح اللي معنا يعني أنواع الطغى .

ومن المواقف الثانية :
الحن دايم نطلع نصيد جرابيع طبعاً كل واحد يعرف الجرابيع
ومن المواقف الطريفه اللي حصلت وقت التصييد

فيه واحد من الشباب طب من السيارة الحوض يبي يلحق على الجربوع المهم لحقه والحن ضيعناه لإنكم زي منتو عارفين إن الجرابيع ما تنفع تصيدها إلا في أول أيام الشهر أو آخره يعني علشان ما يصير فيه نور

نرجع للموضوع خوينا ضيعناه وجلسنا ندوره تدرون وش سوى

شب في شماغه وجلس يطوح به علشان نشوفه

حسيت إني طولت عليكم شوي ولا

أكرر شكري لك أخوي حميدان على طرحك الألبوم عفواً الموضوع هذا
تحياتي أبو خالد

الله يقطع شيطانك ياحميدان ذكرتني بالطفوله وايامها الحلوه بس مو كلها حلوه بس والله انا ماكنا نحس بالملل ولايعرف لنا طريق بس فيه بعض الهوايات الهامه قد تكون غابت عن بالك واحب او اورد منها هوايه التزحلق على الرمال (الطعوس) وكذلك صيد الضبان والجرابيع ..الخ......... اشكرك على هالطرح الجيد وارجو ان يكون للموضوع بقيه عن ذكريات الطفوله وايام الشقاوه والله يعطيك العافيه

اخوي ابو خالد ادام الله لك خالد واهله
والله انك صااادص قبل والله اني اذكر اول مانزل كميوتر صخر
يوووووووووه شي شي
تقول جاينا كمبيوترات ناسا كلها
بس والله ان هكلايام احسن من هالنت والكمبيوتر وعصر العولمه
الا اقووووووول الهندي اللي فضخت عينه يوم ترميه ببطل الماء وش سوى يوم شكى على ابوك؟؟؟؟؟؟؟
-==========
الحساااااااااااااااااااااام
والله اني فرحت يوم رحعت من رحلتلك الميمووونه وين الناس ياعم

بس تدري وش راااااااسخ في مخي؟؟
تذكر الرصاصه حقة البلديه يوم يسرقونها فريق عويسه يرصصون الملعب؟؟؟
ههههههههههههههههاي
اوالا الكهربااائي حق الفريق ابو تحسين
يمدد الكهرباء من الظغط العالي
والله ماضيع ميزاينه الدوله غير انتم)


== ولكم العديد من الهواياااات بس مو الحين اخليهن جزئ ثاااااني

آآآآآه يا أيام الطفوووله ...

ألا ليت الصبا يعود يوماً === فأخبره بما فعل الشبابُ

ههههههههههههههههههههههههههههههههه
يا زين هواياتك يا حميدان أنت والاخوان اللي هنا يوم انكم صغار ..

أما أنا طفولتي ما كانت بعيده عن طفولتكم , رغم وجود بعض الاختلاف :
بالاضافه إلى ما ذكرتوا من هوايات , أول شي السياكل , والله يا مرت علي أيام مع السياكل ,,, ههههههههه أثارها موجوده علي إلى الآن , والله من طيحةٍ طحت فيها على خشتي , ومن زبرة جيت مسسرع أبطمرها مثل اللي في التلفزيووون هههههههه وجيت على وجهي وسيكلي على ظهري هههههههه , يوووووه يالربع والله يا موقفٍ صارلي مع السياكل ما أنساه طوول عمري :

طبعا قبل ما كان عندنا ( قار ) يعني زفلت ما شاء الله الأراضي اللي حولنا كلها برااان , ومتعودين على سياقة السياكل في البران , ومرّه في الاجازة الصيفيه سافرنا لديرة من الديار , وكانت متطووره ذيك الديره وعيال عمي كلهم عندهم سياكل , المهم والله وأنا آخذ سيكل واحد منهم ونطلع أنا ويا أقرد واحد فيهم , ويوم جربت السيكل على (القار ) لا والله يوم جازلي , يا ولد من يوم تعطيه يجاوب معك ما هو مثل ديرتنا كلها رمل وغراز وتعقيد , المهم : والله وانا أدزّ وأروح عنه وأخليه وهو وراي طبعا فيه سيارات .. وهو يولّع الماخوذ انقهر عشاني سبقته , وهو يقعد يحدّني وأنا خايف من السيارات , يالربع والله بغى ينفضخ قلبي هاك اليوم , قلت يا ولد افتك منه ومن شرره لا يحدك هلحين وتوطاك السيارات خله يرووح بس , والله وانا أمسك يمين الخط وأفتح له الطريق , أثر الماخوذ نيته شينه ناويني بالشرّ .. يوم إنه طافني وهو يلّف عليّ وتايره الخلفي يضرب تاير سيكلي الأمامي ... توقعوا وش صار ؟؟؟ هههههههه جيت مجااااااوب على خشتي , يووووه وأنواع الجروووح وأنواع الدمااان هههههههه واقولكم ولا تعلمون أحد ( أنواع الدموووع ) المخلوطه بالحقد والقهر والتهديد , والله ماخليك والله لاعلم عمي عليك ومن هالسوالف ( تخيلوا شكلي وأنا جالس في الشارع وماسكن ركبتي ودماني ماليةٍ وجهي ) وأهدده , المهم وقفت السيارات ونقلوني للمستشفى وأنواع اللفات على جسمي ههههههههه .. وبعدها قلت وا حلالاه يالبراان حقت ديرتنا بس , تجي مجاوب على خشتك وأكثر ما يجيك انك تقوم ووجهك مغبّر بسّ ;) هههههههههه .. وتبت ماعاد أركب سيكل على القار ..

إيه وعقب السياكل عقلنا شوي , وجت هواية الحمام وتربيته , يوووه أنواع الحمام والألوان كانت عندي يالربع سطح بيتنا تبرّوا منه أهلي ,, وأنواع التطير والتصفيق . ومن نظره وحده أعرف الذكر من الأنثى لا عاد وأصحاب الخبره يمسكوونه الحمامه مع منقارها ههههههههههههههههه الله يرجك حميدان ...

وعقب الحمام جت هواية متابعة المسلسلات الكرتونيه : وأصبحت أفضل مشاهدتها وحتى الآن ومنها : سالي , سنان , الغابة الخضراء , عدنان ولينا , الليث الأبيض , فتى الأدغال ماوكلي , غراندايزر , فلونه واخوها جاك , فارس الفتى الشجاع يصبح البطل , يوووه لا نسيت اهم شي جزيرة الكنز .... وغيرها كثيررر بس ناسيها هلحين ..ههههه
ومن الأفلام : أقدر شي اسمه : الرجل الأخضر , والسيارة السوداء ( العجيبه ) , وبوسي ( الكلب الوفي الله يعزكم ) , وذيك الأيام كنت أتابع : من سيربح المليوون اخخخخخخ امزح ..

وبعدها تطورنا شوي وصرنا نطالع للسيارات , كل واحد منا معه ددسن 82 ولا 85 وبس لا تدور غيرهن , وتعالوا شووفوا أنواع التحديات والراليات والسباقات ,, وكلن يضبط موتره , والله العظيم كنا نصرف عليهن مصاريف والله توصل لقيمة سيارة جديده وحنا ما ندري , أهم شي : الكفرات خطّ , والبوري طط , والمسجل تررررري , لا وجت موضة التنزيل ( سحب السست ) وعشنا أيامنا معها والكبووس حقت الدوريات , والتوانك والشنطه , وعقبها وصلتنا جنوط الكرووم ههههههههههههههه أنوواع العربجه , لا وتعالوا شوفوا كيف نسووق عاد , حنا قصار وقتها لانا صغيرين , والواحد منا تحته خمسطعشر مخدّه عشان يلحق الدكسوون , ونمسك الدركسون باليمين ونجلس بزاوية الكشن واليد الثانيه على الشنب نمسّحه كن في شنبات عاد , والطاقيه مكبوسسه على العيون , هههههههه ويا ويلك يالله تطالع فينا عند الاشاره ,, شوفوا له أول نظره بس وإذا عادها يا ويله بالويل أنواع النذاله واللقافه , ههههههههه وإذا كان رجال وفيه خير وقدّها , يلحقنا يمّ الحااره .. هههههههههههههههههههه
وعقبٍ تطورنا واستلمنا الهنوود والأفغانيه حقين السياكل , ليش لانهم يسوقون سياكل والسشياكل عندنا ماهم قدها ما يركبها الا الأشناااب , المهم الله لا يوريكم , يا ويل الهندي اللي نشوفه على سيكل ههههههههه تدرون وش نسوي ؟ :
كنا نجمّع الفلوس حقّت الفسحه , لين يصير مع كل واحد ريالين صافي ونروح نشتري لنا كرتون بيض , وتعالوا شوفوا الهنود المساكين , لا من زود اللقافه والنذاله إذا نويناهم ولا معنا فلوس رحنا نجمع الأكياس ونعبيها مويه , ونبردها في الثلاجه وفي عزّ المربعانيه ندورهم دوره ههههههههههه
ونجي مسسرعين وأقرب واحد عند الدريشه ينتف الهندي .. يا عزي عنهم , والله بدوا يختفوون بالليل ما عاد يطلعون .. ههههههههههه ومن المواقف المحررجه واللي من جد خلتنا نبلع العافيه ونتوب الموقف هذا :
مرره كنا مشترين أربع بيضات بريالين , ونفرفر في الشوارع ندوّر بس ريحة واحد على سيكل ,, لين ملينا مالقينا أحد , وصدفه الا جايك هاك الأفغاني اللي ما فيه أكبر من علابيه , يذكرني بحلاق حميدان ( عاظم ) ههههههههه المهم حنا شفناه ؟؟؟ والله تقوول شايفين ابليس ,, حدّه حده يمين يسار وين راح ايه هذا هو , اطرح الرجاااال , هههههه وسواقنا الله يسلمه يقربنا منه شووي لين بغى يصدمه , وحنا نطلع يدينا عشره مع الدريشه , وكلن يبي يصفقه بالبيضه قبل الثاني , والله ونحذفهن عليه بكل ما أوتينا من قوّة , وصابه اللي صابه وأخطاه اللي أخطاه المهم إن الرجال إنقلب لونه إلى الصفااار , وننبسط ع الآخر وحنا ماشين كان فيه قدامنا اشاره ما انتبهنا لها , ومن سوء الحظ ولعت حمراء , هههههه وتعال شف اللي قبل شوي شجعااان كيف صاروا لما وقفنا ,,, هههههههههه وأشجع واحد فينا سواقنا , قلنا له يا ولد الأفغاني جانا , ويطبخ من القهررر والله ليقطّعنا تقطيع ,,, قال لا ما عليكم نمسكه ونتوطا في بطنه , ويوم شفنا خوينا كذا قلنا ما علينا منه نتوطا في بطنه ولا همنا , يوم قرب الأفغاني , وشاف علابيه رفيقنا ضاعت علومه , وهو يتلها باثنين ويقطع الاشااره , ويفكنا الله من شر هاك اللأفغاني ....
الله يتووب علينا ولا يواخذنا بأفعالنا

شكلي تحمّست للموضوع أكثر من اللآزم

يوووووووه والله السوالف واااجد يالربع , بس والله اني تعبت .. إن شالله أكملها لكم مع الجزء الثاني حق حميدان ... ههههههههههههههههه

المهم إستروا ما واجهتوا ...

تحياتي لك حميدان
ولجميع اخوتي هنا
أخوكم / ناصر