يا مدلّع نفسه بنفسه وهو توّه صغير ..

يا مدلّع نفسه بنفسه وهو توّه صغير ...=وش بقى لأهل الدلع يا الفاتن العذب الرقاق ...
قم سلام الله على قلبك عسى قلبك بخير ..=لا تقول الشعر مات وباقي الساحة نفاق ...
القصايد جبتها من بير قلبي وانت بير ...=كنّها بأعماق قلبي تزدحم والقلب ضاق ...
وكن فيها من غموض مهبّل الشعر الكثير ...=بس فيها من غموضي شي يا حلو المذاق ...
صغتها لك وقت ليل وبآخر الثلث الأخير ...=قمت أصلي وأطلب الله لا يوريني فراق ...
دامني لا شفت وجهك مع زراق الصبح غير ..=قلت يالله جعل يومي من زراق ٍ في زراق ...
لأجل أشوف عيونك اللي علمتني كيف أصير ...=شاعر ٍ مفتون فيك .. وعاشق ٍ ذاب إشتياق ...
يالجميل الباهي المتناهي الحرّ الحرير ..=يا المثير اللي عطيت القلب حمل ٍ لا يطاق ...
أشربك وأروي ظما روحي وأغني لك وأثير...=كل سكراتي وألمّك من عناق ٍ في عناق
وإن سكرت أصير ربّك يا الخورنق والسدير ..=وإن صحيت أصير ربّك يا الشياه ويا النياق ...
وان لمست إيديك طار القلب واعلومي تطير ...=كلما شفت الحيا له في محيّاك انطلاق ...
وكلما شفنك تثنّى قلت يالغصن النضير .. =وش تقول الريح في خصر ٍ تثنّى واستفاق ؟؟
وكلما شفتك تبسم قلت يا البدر المنير =مرحبا والليل توّه بأوله والشعر راق ...

للشاعر
فيحان الصواغ
رئيس مجلة تحرير الإلكترونيه