اسمعي والكل منا لـه هـواه ولـه ميولـه =لا تمسين بكلامك شعـره بـروؤس القرايـب
ان حكيتي ماوفيتـي وأن تحديتـي عجولـه =تحسبين أن كل فعل(ن)تفعله يمنـاك صايـب
تحسبين أنك خذيتي بالحشا صولـه وجولـه =تحسبين اني ذكرتك مـع نسانيـس الهبايـب
والله انك لو ذبحتـي حافقـي لالقـاك حولـه =عاشقه تشقى بقلب(ن)من طريق العشق هايب
كم رضيت اسكت عليك من القهر وانتي زعوله =خايف اضحك واستفزك واهجرك واعيش ذايب
ادعيت أنك خجول..وادري أن منتي خجولـه =وادري انك تخجلين الشمس من فوق السحايب
مايحببنـي بقلبـك يالهنـوف الا فضـولـه =وماينسيني غرامـك غيـر تكـرار المصايـب
عاشقه جيتي ورحتـي يالحبيبـه يالعذولـه =مابنيتيلـي طمـوح ولا تركتيـهـا خـرايـب
تستبيحيـن القلـوب وتستحقيـن البطولـه =واستحق اعيش بعدك تايب(ن) وامـوت تايـب
ياكثر ماشال قلبي شـي أكبـر مـن حمولـه =ولا عفيتي عن غـلاه ولا بخلـك بالوهايـب
كنه ارحم من همال المزن للزهـر بذبولـه =وانتي اقسى من سموم القيض وكفوف الهلايب
وانتي ادرى في غلاك بداخلي شلـي يزولـه =ودخلي دخله على الله واحفظي ذيك السبايـب
ماخبرت اللحظه اللي حللـت قربـك تحولـه =ولا هقيـت انـي بشددللجفـا قلـب وركايـب
وما هقيت انك تحبين الزلل وانتـي جفولـه =وماهقيتـك تكرهينـي كثـر حبـك للطلايـب
كن قلبي في وصالك وابل(ن) لحظـه نزولـه =وفي فراقك مثل دمعه تنحدر من عين شايـب
كنت ابي وقفت حبيبه تنهض القلـب بخمولـه =طامح بالعشق وانتي عايبـه والحـظ عايـب
كنت غصن كل كف غيـر كفـك مايطولـه =كنت درب ودمعتين وقلب وجروح(ن) عطايـب
كنت ابيع العمر كله وارخصه عرضه وطوله =للعيون اللي هدبهـا ثامـن السبـع العجايـب
بس ابرضي لك غرورك واكسر القلب بذهوله =وقتها ماكنت افكـر صايـب او كنـت خايـب
والرجل لو ماتحلـى بالشهامـه والرجولـه =صدقيني صعب يقدر يملـك قلـوب الحبايـب
صدقيني مايوالف خافـق البنـت بسهولـه =بالهوى يابنت حـواء غيـر طـلاّب النشايـب
والسهر والعشق الاول والهوى واللي ينولـه =شي اقسى من همومك والعنا حاضر وغايـب
والهموم اللي دعدتني من بعد سن الطفولـه =كلها من تحت راس العشق ملعون الصلايـب