يا صاحبي لا تكلمني *** فهد عائض الحري

يا صاحبي لا تكلمني وأنا ضايق
خابرك تدري وش تسوي بي الضيقه
اصير سرحان لا نايم ولا فايق
واخذ مع الهم تغريبه وتشريقه
ماني على همي وكثر الغثا طايق
إن زاد همي عن المعقول ما أطيقه
يا صاحبي لو تجي في قلبي اتوايق
تلقى هموم الدهر قامت بتطويقه
يم الشقا والتعاسه ساقني سايق
والعشق بحر الشقا يغرق عشاشيقه
أشوف جو العرب يا صاحبي رايق
وأنا علي الشقا طبق مطابيقه
مشكاي ما هو لكم يا صاحبي لايق
مشكاي للي جعلني من مخاليقه
يالله أنا عبدك ومن نعمتك ذايق
مير الدهر يشرق الرجال في ريقه
مؤمن بربي ولا خاين ولا بايق
والقلب صدق بربي كل تصديقه
يالله أنا عن مرادي عاقني عايق
وعندك يارب الحرم يا هون تحقيقه
للشاعر فهد عائض الحري