ان باعوا الشيمه

ان صار زود المال بيدين الانذال = حنا من المعروف تندا يدينا
وان كانهم شرهو على طيب الافعال = حنا وردنا جمامها وارتوينا
وان فكر و للجود يمشون رحال = حنا قبل يمشون يمه خطينا
ياما لبسنا للشرف كل سربال = وعلى البسيطه للفضيله مشينا
في دوحة العرب لنا مجد وظلال = وحنا على در المكارم غذينا
لو نجمع اللي فات منا من المال = ان كان شيدنا القصور وبنينا
نعطي ولا نتبع عطانا بالاقوال = ونبذل ونسكت كننا ما عطينا
وان باعوا الشيمه بدينار وريال = حنا دخلنا سوقها واشترينا
نطلع لها لو هي على راس الاقذال = لو هو عسيرن دربها مانثنينا
بافعالنا نرسم دروب للاجيال = الى نساها غيرنا ما نسينا
اسود سادات تسجل الاشبال = فضايل شمنا لها واهتدينا
بيضن نسجلهن جديدا وسمال = حفايظن لاحفادنا اللاحقينا
نصبر على الشديدات لو شيلنا مال = لو سال دم ادفوفنا ما شكينا
نخاف يلقى سدنا كل ختال = ويبني هزيلات المعاني علينا
الليل يا خالد على والدك طال = وهنيت ناس بالكرا نايمينا
ياعز راسي شفت ما خبث البال = شين يهول شيب الجاهلينا
شي من اسبابه يشيب الاطفال = فطر خشوم مهجرعات الحنينا
ادير قالات عريضات واطوال = قالات خلن المخفى يبينا
منهن رزين العقل بالوقت يهتال = بوقتن عبوس فطن الغافلينا
وقت من اسبابه شكل كل ريبال = نصبر ونسكت كننا غايبينا
الناس بالايام راحل ونزال = وتفجعهم الدنيا وهم دالهينا
وحيات رب نزل آيات الانفال = عالم خفايا نية الحاقدينا
ما اترك طريق العدل في كل الاحوال = لو يرحل المريخ للفرقدينا