-{ آلضــرس آلوآحــد والــعــشـــريــن ~

.: المـوضـوع :.


بعد صلاة العشاء من مساء اليوم كنت وش زيني وش حليلي جالس أهرول على مقبرة النسيم وكافي خيري شري
رجعت للبيت وحصلت الشله متجمعه ( أبوي وأخواني )
قال أبوي: واحد منكم يروح للمطعم ويجيب عشاء الليل سرا يا رياجيل
وأنا أنقز مثل الذيب ,,,, قلت: أبشر بعزك , الحين أحلى مفطح أجيبه لك >> مهايطي
قال أبوي : من يبي يروح يجيب لنا عشاء غير هالسفيه , لأنه لو راح ماعاد رجع لنا وبيسحب علينا ولا تعشينا
جلسو أخواني يتعذرون من أبوي قآل آبوي : رح وآنآ آبوك مآفي غيرك بس تكفى تعآل لآ تسحب

نقزت وركبت سيارتي وتوجهت للمطعم وأنا في الطريق شفت مستوصف الجزيزه لطب الأسنان
قلت في نفسي : ليش ما أوقف عندهم عشان يصلحون ضرسي المحفور << جنت على نفسها برآقش
وقفت ودخلت المستشفى وكان على الإستقبال بنت سعوديه ,,, قلت: عندكم دكتور أسنان
قالت: وين داخل أنت , حنا في مركز طب أسنان مختص
قلت: قصدي عندكم دكتور فاضي لأني مستعجل أبي أجيب للبيت عشاء
أخذت مني 30 ريال عشان فتح الملف ,,,,, قالت: وش أسمك لو سمحت
قلت: فدغوش ,,, قالت: إيش إيش ,,,, قلت : ف د غ و ش
قالت: إسم أبوك ,,, وعلمتها بالإسم وقالت : إيش إيش وجلست أقوله حرف حرف
بعدين قلت إسم جدي ,,, قالت: إنت تتكلم جد والا تمزح ,,, إش الأسماء هذي
قلت: وأنا وش دخلني تفاهمي مع أبوي لا تجلسين تسئليني أنا



تـذكيـير




المهم

عطت السستر الملف وطلعت مع السستر دخلنا على الدكتور وكان مصري
مسكني وسدحني على السرير وشاف ضرسي ,,,, قال: ده لازموه خلع ياسي فدغوش
قلت: وش خلعه يا رجال , حط لك حشوه بسيطه وخلني أمشي والحق أجيب عشاء للبيت
قال: ده ضرس العئل , مالهوش فايده خلينا نخلعوه أحسن لك
قلت: وش خلعه يالحبيب شف لنا حل ثاني بس غير الخلع
قال: يا بني واللهي لازموه خلع غير الخلع مالهوش حل واللهي
( وجلس يحلف بالنبي والسيده زينب ومدري وش )
قلت: ماضريناها بالهيبات أخلعه لا أبوه لا أبو ستين تسلب
عطاني إبرة بنج بعدين رجع وعطاني الثانيه ,,,, قلت: عطني ثنتين زياده البنج ماسوا فيني شي
قال: ما أئدرش أزيد لك البنج شويه ويقي مفعوله
قلت: يا ولد علي الحرام لو تضربني بصاروخ نووي مايجيني شي , مير إعجل علي وعطني إبرتين زياده

جلست أتناقش مع الدكتور كم دقيقه ماحسيت إلا سعابيلي تتقاطر وأحط يدي على براطمي ما أحس فيها صارت مبنجه
قال الدكتور : يا أخي دنتو شعب بياعين كلام واللهي إحنا مدري إيه وإحنا مدري إيه وكل حاقه تتكبرو عليها
هاه يآفدغوش عمل لك البنق حاقه والا عاوز اضربك بصاروخ نووي ( أنا قمطت العافيه , حسيت إني زلابه وقتها )
ويجلس الدكتور يشتغل في فمي مره يجيب سكروب , مره زراديه مره مشرط
وكل شوي يقول : سكشن سكشن ’’’ والسستر تحط شفاط في فمي ويجلسون يشفطون منه
وأنا حاط رجل على رجل ولا أحس شي بسبب البنج ,جلسو نص ساعه وهم يشتغلون في فمي
شوي ويطالع فيني الدكتور ,,, قال: إنتا بشر والا ديناصور
قلت: هشر فشر خشر ( مقدر أتكلم من البلاوي اللي في فمي )
قال: بوص بئه يبني ده الضرس بتاعك ماعمري شوفت ضرس زيوه من أئبل تئولشي مسبتيونه بحديد وإسمنت
وأنا جالس أحرك يدي عشان يشيل الضرس ويفكني منه , وهو يطالع في السستر
قال: gif me root ( يعني عطيني الزراديه ) وهو يجي يسحب الضرس والضرس ناشب الله لا يوفقه
قال: big root ( يعني جيبي الزراديه الكبيره عشان نشيل ضرس هالبدوي )
ويسحبون في ضرسي وعجوز يخلعونه ,,, قال: بوص بئه وأنتا صوغير أهلك بيأكلوك إيه
أنت من أي كوكب قي يابني ده مش ضرس بني أدم ده ضرس ديناصور
قلت: درد دردته ( يعني جاي من الديرهـ )
قال: بوص بئه ها أخلع ضرسك على مرحلتين راح أئسموه نصين نص للمرحله الأولى , ونص للمرحله الثانيه
لأنو كدا مش هايطلع معانا ده مش ضرس ده
وأنا جالس أحرك يدي وأعطيه الإشاره عشان يسوي اللي يعجبه
شوي ويجيب شي زي السكروب ويجلس يضرب في الضرس ويرجع ويجيب الزراديه ويصقعون بضرسي
ويجي دكتور زياده ويجلس يمط فمي ويوسعه (حسبي الله عليهم ساعه كامله وهم يسحبون في هالضرس المسكين )
أخر شي ويطلع نص الضرس ,, قال: دي المرحله الأولى وها نخوش على المرحله الثانيه ونشيل الباقي من ضرسك
ويرجعون يسحبون في الضرس والبنج مفعوله بدا يخلص
وأنا معلق على : اااااااه , ااااااااح , اووووووووووه ( راح المهايط اللي قبل شوي )
أخر شي وهم يشيلون الباقي من ضرس العقل
ويحطون في فمي 70 الف شاشه عشان الدم ,,, ويعطوني علاجات بـ 250 ريال
وأنزل للإستقبال تحت عند البنت السعوديه ,,, قالت: 100 يا فدغوش ,, وأنا أعطيها 500 ريال
قالت: إن شاءلله الحين أحسن وأنا جالس أطالع فيها بنص عين ودي أصفقها بالجوال في خشتها
( فمي كله شاش مقدر أتكلم وذي جالسه تسئل ) وترجع لي 400
قالت: لك كشف مجاناً خلال أسبوع عند الدكتور بس ياليت تجي بعد ما تلتم اللثه , أريح لك

طلعت من المركز حق الأسنان وفمي كله شاش ودم بسبب ضرس العقل
يوم جيت للبيت كانت الساعه 11 بالظبط إلا أبوي جالس هو وأخواني في الملحق
قال أبوي : وين العشاء ,,, وأنا أطلع الشاش من فمي
قلت: مآحولك عشاء , أنا شفت الموت بعيني وأنتم تبون العشاء

قال: وش فيك , فمك علامه دم ,, قلت: شلت ضرس العقل
قال: وأنت أصلاً في راسك عقل عشان ينبت لك ضرس العقل
من يوم طلعت عالدنيا وأنت سفيه وبتموت وأنت سفيه كنت بضرس عقل والا بدونه


بعد كلام آبوي وأنا اللي أجلس في غرفتي وأفكر بضرس العقل
هل يا ترى الشخص اللي يشيل ضرس العقل يكون إنسان عاقل أو مجنون ؟
هل من الممكن إني نقصت خلايا مخي بسبب خلع ضرس العقل ..!!

~ { مخرج ~
كل وآحد آو وحده بـ يتعب نفسه وبيرد ويكتب
(( يعطيك آلعآفيه آو شكراً او حلو الموضوع او ههههههه ))
بقوله مقدماً : الله يعآفيك و العفوو و الحلوه عيونك ودوم هالضحكه
يآنآس آبي شغل اقتباسات الموضوع مايحلو آلآ بردود الحلوه
مآعندك رد حلو لا ترد ولا ماتعرف ترد تعلم من الي بيردون يافاشل

قال: