طبعا لابد من متابعة المسلسل من أوله حتى تفهم الحلقات الثانية....

<<< تكفى يا نوراتو وصلنا عند حلقه مدري كم بعد المية ولا خلص المسلسل>>>
" التكفى للي يشوفون أنمي فقط"

خلك بعيد عن التلفزيون مطري الشاشة وأنت تناظر المسلسل.
ومن اللعانة بخلي الخط صغير جدا عشان تنحولون.


قال لي بريالين وأنا ما معي إلا ريال ونص.
ولعنة وش لون بشتري حلويات العيد.

عنوان هذه الحلقة
التميمي وما تبعه من أحداث


عبسي: خلاص بتقاسم أنا وأنت ميزانيتي بس بشرط الكبدة ما تكون إلا لي أنا.

طيب وكم ميزانيتك؟!!!!!!!!


عبسي: على آخر ما حسبتها ريال.

الله وأكبر ريال وش يبي يسوي لنا؟؟؟

عبسي: الكبدة في بطني يعني في بطني، على الأقل أنت أقبض شيء أزين من لا شيء

ماشاء الله عبسي صار له تفكير إيجابي، ليه أنا ما فكرت مثله؟
بس التيس المستعار جت على راسه. دامه آكل الكبدة آكلها ليه يضحي بريال الفسحة؟؟؟؟؟ !!!!
لا يا الدبشة الخبيثة، الكمخة، الدجاجة الصقعاء... الخ>>> وعدنان يضحك بقلبة


عبسي: مشت عليه عدنان،،، نيهاهاهاااااااااااااااااااااي ما يدري إن يا ما تحت السواهي دواهي، بصير مشارك معه في الحلويات وكلها رح تروح، بس ما خوفي الا......



جلنط ( طبعا تعرفون ليه الجلنط)، رد نمرة، عقدة، والشنب في وسط مواقف التميمي معرض ماخذ مكان خمس سيارات، والبعير مدري الخروف إفتركت عيونه وعدنان في الغمارة ما دري إلا عيونه في عيون الخروف وكلهن ياخذن حلقات كأن مطبق عليهم تنويم مغناطيسي،،،،

إلا الخروف يقدم شفته،،، وعدنان يقدم بريطماته،،،
It's was love for first sight…
" كل هذا من آثار العقدة"

وبعدها ما قام عدنان إلا بعد طراق أليم جاي من الأطخم قرعوط أبو شعر فلافل
وبراطمه ناشبات في سنون البعير عفوا الخروف.

ويالله شيل وحط على بال ما فكوا البراطم الحساسة من سنينات الخروف
طبعا استخدموا كافة الأساليب بداية في أبو جلمبو نهاية إلى شباصة تعليق الملابس"الحديد طبعا".

بعدها جاب عبسي ال First Aid Kit واللي هي عبارة عن مروخ "أبو شنب" ولصقات جونصن andجونسون.

ويالله امرخ، ولصق، وأمرخ، ولصق، وأمرخ ولصق...

طبعا كل المدة ذي عدنان الفاهي هاجن إثمه وما يدري هو في علم ولا في حلم.

بعدين مشوا البقرات الثلاث إلى التميمي، وطبعا أشكالهم مهي مشبوهة أبدا.

عدنان والأطخم كل ثيابهم التي سبقت إن كان لونها أبيض كلها دمان
وعبسي المملوح ما عليه أي شيء " ثوبه أسود ما عليه وصخ لأن الوصخ متبري منه"

يوم جو عند الباب الخبيث عبسي استعجل ودخل بسرعة.
يوم جاء عدنان وقرعوط جاء السكيورتي قال معليش شباب عـــوائـــــل.

فاصل إعلاني


تعليق خارج عن الحلقة
ولعنتن تعلن والد والد واليدين اللي إخترع نظام إسمه عوائل في الرياض
ليه الشباب مضطهدين
كل ما جو يدخلون سوق قالوا لهم عوائل.
وإنقلبت الموازين صارو هم التماسيح يدورن محرم لهم عشان يدخلون الأسواق.
الخ
الخ
الخ
هذا الموضوع يحتاج عناية خاصه ولا يكفيه مجرد تنويه أو تعليق.
ما رح أكتب فيه
بس أتمنى أحد يدرس الموضوع بجدية ويشوف النواحي الإيجابية والسلبية
ونستفيد منه.

تكلمة الحلقة

يوم جاء عدنان وقرعوط جاء السكيورتي قال معليش شباب عـــوائـــــل.
ولعنة تعلن بليس وش اللي عوائل.
شف عبسي الخجم قدامنا توه داخل مع نفس ذا الباب.
السكيورتي: معليش شباب يمكن معه عائلة. أو دخله واحد يعرفه، أنا ما مر من قدامي هذا الشخص

أقول أول شيء خله يلبس سروال سنه بعدين خله يجي يدخل عندكم.

قرعوط: وش قصة سروال السنة....؟؟؟؟!!!!!

لا تسأل أزين لك

المهم شوي إلا حصيصة أم الخلاقين، بنت الجيران، ،،، (وعبسي ترى إلى الحين ما يعرف حصة ولا يعرف إي بنت بالحارة غير لينــــا).

نرجع لسالفة التعاريف
حصيصة أم الخلاقين: أيضا مخلوقة كثيرة التشره والبلاغة والجحادة، تتغذى على الشاهي والكراث. تتكاثر في الأماكن النسائية " مشاغل، مسايير، كوفيرات، نوادي، مركز الأمير سلمان الإجتماعي، إي مكان له وجود نسائي بشكل كبير.. الخ الخ الخ"، شعارها في الحياة قالت أم فلان!!!

سلام عليكم عدنان>>> مستحية
شلونك عدنان أخبارك>>> بعد مستحية
إلى الحين ما تهاوشت أنت ولــيــنــا>>> لازالت مستحية
على العموم إذا تهاوشت خلني أول من يعرف>>> الخدوم قمة في الحمار

طبعا السكيورتي يعرف حصيصة أم الخلاقين عن طريق بنت خالت جدت أم عمت جيران خواله


السكيورتي: عشان حصيصة سلمت عليكم بسمح لكم المرة ذي


دخلوا التميمي، عبسي قدامهم معه العربية، قرعوط منبطح على الأرض يقول يا نظفها، وماشاء الله باردة.

ملحوظة مهمة
من الحين هذي قصة واقعية صارت لواحد في وسط التميمي بس لحاله. لين ما أقول لكم إنتهت.
طبعا لا بد فيها شوي من البهارات " النصب" بس بشكل عام هذا اللي صار له يقول

وأنا أمشي، تميمي صحاري، على يميني الحلويات، قدامي الناتشوز، على يساري المخبز، مالي ومال العالم
بروح آخذ عصير، بعدها إلى باقي مقاضي البيت، إلا وما دريت إلى على ظهري ذاك اللي يخبز.

كعب جاي من مسافة خمس أمتار. ويتليه الكعب الثاني مع الجبهه.
وما دريت إلا ذاك الوحش، مهو بنت ، يهاجم في الشنطه اللي مدري وش محمل فيها كأنه رصاص

تحليلي ما في وسط الشنطه من خلال العلامات ما بعد التسطير

عطر، إحتمال شانيل، أو ديور، أو بالأحرى كلينك. طبعا 200 ملل
جوال إما العنيد، أو الكاتيل.
شوي مكياج. وأكيد فيهم محدد شفايف لونه أحمر لأنه بصم على جبهتي
قلادة ذهب مكتوب عليها أغنيه أصيل
إيه أحبك
(هذي البصمة على السكسوكة)
بقايا مخلفات مباني. بلوك. بلاط. سراميك.الخ الخ الخ

المهم شوي إلا السكيورتي جاي ويفكنا
شوي إلا هي تقول أنا لازم أربي عديم الأصل، جيبوا الهيئة
وأنا اقول وش القصة
المهم رحنا لمكتب المدير وكانت عنده كميرات وكل شيء مصور أثر واحد جاء يركض وحط الرقم في يدها ودخل في السيب الثاني وما كان في السيب إلا أنا وهي وفعلت بي ما لم يفعل بي من قبل

واااااااااااااااااااااااااااااااااء وااااااااااااااااااااااااااااااااااااء

تخيلوا موقفكم لو إنكم تصيرون مسطرين
ولا بعد من قبل سحلية
والمشكلة ما تقدر تدافع عن نفسك
وبالأخير صفت على معليش يا أبو الشباب والله آسفه
إنتهت الواقعية
رجعنا على سالفة البقرات الثلاث...

المهم وقرعوط منبطح على الأرض مطلع سيقانه كأنها أسياخ كباب
وفجأة عبسي وقف العربية دون أي حراك
دقيقة، دقيقتين، ثلاث، أربع،عشر، عدنان جنبة يعطيه بقوس،يخقله، يمعط شعر شوشة أباطه، ولا حراك

يوم إلتفت عدنان للمكان اللي يناضر فيه،

أثر حصيصة أم الخلاقين المكيف الصحراوي شايل عباتها ، ومخليها على مروحة شفط مكان اللحوم وجالسة نتاظر في إتجاه عبسي، تناظر عدنان لا يشوفها على هالحال. جنزها الأصفر باين وفنيلتها" اللي كمها طويل ولا هي مفتوحة من قدام ولا مع البطن ولا مع الظهر" مكشوفه، والجزمة الجديدة اللي من عند باتا، عفوا أقصد حراج إبن قاسم ولا هي جزمه زنوبا شاريتها بالجملة واضحة، والشراب اللي لونهن جميع ألوان الطيف لأن منكب عليها كلوركس. واللي زاد الطين بله إن النقاب لازال على راسها ما طار مع العباة،
يعني الزين ما كمل.
" ياما تحت السواهي دواهي، حمد لله إن فيه عبايات ساترات عيوب ولا كان عاد فيها علوم، ما والله تطلع الصبح وتوصل مشوارك إلا ومسدوده نفسك من الجمال الفائق في بناتنا يا ملحهن، لله دركن ما أملحكن"

وبما إن عبسي وعدنان جنب بعض، عبسي يحسب إنها تناظره،لأنها في آخر الممر.
ولا أنوه على إن النظر عند عبسي شجر،
عينه اليمين كاشته يسار وبرضوا عينه اليسار كاشته يسار، مهو كأنه بيمزع كوره لكن كأنه يلخس اللي على يمينه... " بسبب كذا عبسي ما عمره طلع من إختبار إلا ممسوك إنه يغش..."


المهم ما درينا إلا ذالك البعرصي الملثم " مهو فارس ملثم" عند مروحة اللحم مسوي روميو ويجيب العباية ويعطيها حصيصة ومعها ثلاثة كيلو كوارع وراس بقرة... وبسطرمة... "على باله مسوي رومنسي ما لقى ورد رقعها ما في وسط الملحمة".
وعلى طول البعرصي الملثم إختفى في قدرة قادر.
عدنان يناظر ورا ولا ما فيه أحد منبطح على الأرض، يلتفت يمين يسار مافيه أحد منبطح.
إلا عبسي وين قرعوط؟؟؟؟

عبسي: شفت القنبلة اللي جالسة تناظرني من شوي!!! ولا بعد الحين تأشر لي تقول لي تعال!!!!!

حصيصة خجلانه من الموقف اللي صاير عشان كذا جلست تأشر لعدنان على إنه يرجعها معه في الأودي، عفوا قصدي في صندوق الشاص مع البعير" الخروف".

عبسي: واللي يرحم والديك خل الجو لي رح صرف عمرك، واللي يرحم والديك بتصرف معها.

عدنان جلس يتفرج من بعد، لملم عبسي نفسه، جمع كامل أنفاسه، وهو يمشي حط يده في الثلاجه وأخذ أقرب قزازه مشروب" ما يدري وشو"

عطاها قال أنا عازمك على قهوة، بس بردي ريقك في هذا لين نوصل قهوة.
" اللي عطاها خل تفاح من فوق ثلاجة الخضار المجمدة"

قالت له عبسي

نعم،،، عبســــــــــــــي،،، تعرفني،،،، من ذي الجنيـــــــــــــــــــه،،،،!!!!

قالت له عبسي أبو طبيع ما يجوز عن طبايعه، خل عنك العيارة، أنت شخص غير جاد في حياتك، عشان كذا أنا انادي عدنان يوصلني وهو راجع.

صــــد مـــــــــــــة

بعدها عدنان يحاول إنه يكلم عبسي وعبسي ما يتحرك.

يضربه، يطبق عليه أفلام أكشن، لا حراك

أخذ الحلويات، وطلع من التميمي برفقه حصيصة أم الخلاقين

والسواق عند الباب يحتريهم في الشاص والخروف عطشان وعبسي بوسط السوبرماركت.


ترقبوا الحلقة القادمة من مغامرات العيد في عدنان خوي لينا.

في الحلقة القادمة


عبسي: عدنان، ليه، إيش فيه متميز عني، أنا أحسن منه، إيش هي شايفة فيه مو فيني، تقول إني مو جاد.....

عبسي: هل خوفي بتضحيتي ريال الفسحة في محلة أو لا......

عبسي: فوق طعس في العاذرية يناظر القمر.....

عبسي: راح للسوق وإشترى درزن سراويل،، بس هل السراويل له ولا لغيره.....

هذا ما ستعرفونه في الحلقة القادمة...

منتديات مدرسة المشاغبين - ترفيه طرائف مرح فكاهه ضحك فرفشه نكت صرقعه هسترة عياره مزوح تعليق دعابه