قطعة كونكت موبايلي mobily والجوال ALJAWAL ( النصب في عروقهم يمشي )

السلام عليكم ورحمه الله وبركاته

بسم الله الرحمن الرحيم

يوم عن يوم تثبت لنا شركات الأتصالات الجوال في المرتبة الأولى

في النصب والحيلة والكذب على العملاء

وماخذها شهادة الشرف ثم موبايلي

قطعة الكونكت مثل ماانتو عارفين كان لهم اعلان سابق وهو

سرعة 7.2 وسبق نزلت موضوع والتحذير من قطعهم الخرطي

مشكلتنا شعب ينضحك علينا بأعلان تافهه ودق سلف على اقرب

محل وصفط وطلع المحفظة وادفع ولاتدري وش السالفة

في الأخير اخر الشهر مطفر واقرب مبوبة وتبيع القطعة

ماعلينا من الهذره الي راحت بس تلطيف جو

نجي نبدى بكونكت الجوال الي اسمها ( مودوم الجوال )

صورة القطعة



سعر القطعة

999 ريال تخفيض 1 ريال بارك الله فيهم مايبون يخسروونا

الباقات

1 جيجا 100 ريال

2 جيجا 200 ريال

الباقة المفتوحة 450

طبعاً الي منحد بقوووة يشتري الكونكت اما الي وضعه ممتاز

وعنده دي اس أل في البيت ومتربع عليه 24 ساعة لاياخذها


سرعة قطعة الجوال كونكت ( جوال مودوم ) من شركة الأختلاسات

السعودية

يتطلب ان يكون عندك التغطية ممتازة وقوية فاالسرعة تختلف

من منقطة لأخرى والجيل الثالث لازم منه عشانه افضل لسرعة

القطعة وقوة الأتصال

اذا توفرت عندك التغطية وابراج الجيل الثالث تكون السرعة

من 400 الى 1500 وان طقت فيوزات الأتصال وقطعتهم وصلت 2000

وافلقني ان زادت

واذا الأبراج عليها زحمة وضغط ماتتعدى سرعتك الـ 400 وحب يدك

وجه وقفى

هناك شريحتين للقطعة السوا والفاتورة

الفاتورة ميزتها انها قليله تفصل يعني ثابته سرعتها سواء

السرعة مشي حالك ولا قوية تكون ثابته

اما السوا هذي امه داعيه عليه يروح يحذفها على اقرب رصيف

سرعتها تطلع فوق وتدحدر في ثانية للحضيض وبتقول الله يعز

الدايل اب ويخليه لك


هاالحين نروح عند شركة اتحاد الأتصالات ( موبايلي ) عالم من اختياري

قطعة كونكت موبايلي

صورة القطعة



الباقات

1 جيجا 100 ريال

5 جيجا 200 ريال

الباقة المفتوحة 350

وللعلم كانت اول الباقة المفتوحة كل يوم لك حد اقصى 1 جيجا

>>مدري ليه مسمينها اجل الباقة المفتوحة

سرعة القطعة تبدى من 50 كليوبايت الى 3000

السرعة موبايلي افضل من الأتصالات لو تلاحظون بكثير وهذا

لأن اغلب ابراجها الجيل الثالث وثانياً الضغط عليها اخف

من الأتصالات

في كل الحالتين والشركتين لازم يكون طبعاً الجوال يدعم الجيل الثالث

يعني لاتروح تاخذلي العنيد وتقول ياولد بطيئة وامير نصاب


موبايلي كويسة لكن بعض المناطق تكون فيها الخدمة سيئة

والجوال يتفوق من هاالناحية

باالنسبة في حفر الباطن يوم سافرت >>ماخلى احد ماقالة

موبايلي افضل في التغطية بكل جدارة ولو اني اعرف مديرها

اعطيته خروف نعيمي >>قالك متأثر بأهل الحفر


كل قطع الكونكت سواء موبايلي او الجوال او غيرها من الشركات

الي بذكرها تكون من شركة وحدة وهي صينية وناسين والله اسمها

لاتذكرت رجعت سدحت اسمها


القطعة الجديدة الي نازلة في السوق وافضل من كونكت الجوال

وكونكت موبايلي سواء في السعر او الأداء والسرعة

هي قطعة BANDLUXE باندلوكس وميزتها تدعم كل الشرايح

صورة القطعة



الجوال ولا موبايلي ولا اي شركة ثانية >>وهو فيه غيرها اصلن


عيب كونكت موبايلي والجوال ماتقدر تشبكة الا عن طريق USB

اما باندلوكس لا تقدر تشبة من الاب توب مباشرة وتقدر تشبكة

USB

حجمها حلو وشكلها انسيابي الا شي بسيط >>شرايكم في الوصف

سعر BANDLUXE الباندلوكس كان اول مانزلت 1200 ريال سعودي

والحين سعرة في المحلات 650 وبعض المحلات تبيعه 750 وفي جرير سعر

اعلى لكن ميزت جرير يعطونك ضمان 6 شهور وانت وشورك


ونصيحة لاتاخذ شريحة من الجوال لأن التفعيل عندهم خذ وخل

تبطي كوع ألين تفعل باقة الأنترنت

لا وازيدكم من الشعر بيت ياخذون قيمة الباقة ولاتتفعل

موبايلي تتفعل اول ماتوصل البيت

وباالنسبة للأتصال وقوته في المودوم تعرفها من المودوم

النور الازرق : جيل ثالث مطور ومعناتها ان السرعه عالية افرح ياعم

النور الاخضر: جيل ثالث والسرعه خرطي بكل قوة

النور البنفسجي : جيل ثاني والسرعه اخرط من الخرطي بكل جدارة

النور الاحمر : يعني ما فيه تغطيه او ان الشريحه بلاك لست

الي يشبكون عن طريق الشريحة الجوال والكمبيوتر بكيبل او عن

طريق البلوتوث السرعة مشي حالك تكون حول 100 كيلوبايت

يعني تقريباً دبل الدايل اب مرة


وننهي الموضوع الشيق الانيق المزركش بنصيحة اخوية

لاتشتري القطعة الا اذا انت منحد او خدمة الدي اس ال dsl

ماوصلت لك ولابتوصلك لأن لو ماعندك كيبل في الحارة رح حفر ان

وصلتك الخدمة يمكن عام 2015 توصلك ان كاني ماني ظالمهم بعد

ادري ان الموضوع يامكثر فيه هاالفيس

بس وش اسوي احبة في الله واحس اني مبسوط اليوم


ايه بغيت انسى شي

محل العمرو في حفر الباطن نسيت عندهم بطاقة الاحوال بتاعتي

تهاوشت مع السوداني يوم فكرت اشتري القطعة ومن زود الحماس

نسيت بطاقتي كلمت راعي المحل وتزهلي يرسلها فيدكس لكن ماحصلت

تجاوب جحدوني الي حولهم المحل لايبخل بخدمتي يتواصل معي

ويرسلها ع الفيدكس والتكاليف مدفوعه مقدماً واكون له من

الشاكرين

>>>>كن الموضوع قلب صرقعة


وان شاء الله تكونون استفدتوا من الموضوع

\
،،
/